Solbannu Kari i Ari Pakkarantindian Anna Ipagaram i Imammo?

PAGARAMMAN ni Jehova i Cristiano ira nga tagibaloran i imammo, tapenu mabbalin yatun tu importante nga aspeto na pattoletam. Marresulta tu mannanayun nga imammo ta kurug ira nga maddayarayaw i pabbalin tu minammakoma. Makoffun yaw tapenu mabbalin i Cristiano nga kongregasion tu makakkasta nga lugar ta tanakuan nga magala-aleg tu imammo.

Angngariganna, naobserba na popular nga albulariu ta Madagascar i pattaradday na Saksi ira ni Jehova. Kunna ta baggina, ‘Nu egga i relihion nga tuttulakku, yaw ngana i pilliakku.’ Turi kua, nagimmang ngana yaya ta espiritistiko ira nga annangnguana, piga vulan nga tinununna i ari nebase-Biblia nga situasionna ta pagatawa, anna nabbalin tu maddayarayaw kani Jehova, i Dios na imammo.

Kagitta natun nga lalaki, rinivu nga totolay kada dagun i nakaleg tu talaga karagatadda nga imammo ta Cristiano nga kongregasion. Ngem, manawag nga kinagi na Biblia nga i kegga na “passil anna pakkaraga ta gannug nga masserbi ta baggi” ta kongregasion ay makadaral ta pakkorofun anna mangigafu tu problema. (Sant. 3:14-16) Kappagayaya megafu ta nangiyawa i Biblia nittam tu positibo ira nga tabarang nu kunnasi tam mebita i kunnatun ira nga problema anna mapaladda i imammo. Tapenu makua yatun, innattam i kurug ira nga situasion.

PROBLEMA IRA ANNA SOLUSION

“Narigatannà nga makikavulu ta tadday nga brother nga mattrabahu niakan. Durante nga makkakulle kami ta kataggi-tadday, minay i dua nga lalaki anna nasingadda i paddamami.”​—CHRIS.

“Gavva laman nga nagimmang makikavulu niakan i sister nga kanayukku kavulu ta ministerio. Tapus, ariannà ngana kiyuvovugan. Ariakku ammu nu ngatta.”​—JANET.

“Tallu kami nga ma-conference call. Tadday nikami i nappakannammu ngana, anna abbo ku nga awan ngana yaya. Tapus nakkagi ngà tu marake ira nga gannug meyannung sa ta tadday paga nga egga ta telefono, ngem arianna paga balo nikazza i telefono.”​—MICHAEL.

“Ta kongregasiommi, namegafu nga makkaproblema i dua nga payunir. Napporay i tadday nira. Kaddismaya ta tanakuan i paddamada.”​—GARY.

Baka manonomu nga simple laman nga gannug yatun ira. Ngem, awayyana yatun marresulta tu nabayag nga emosional nga paddaddam anna makadaral ta espiritualidad danuri nesipo. Ngem magayaya ka mammuan nga netoli danatun nga wawwaragi i imammo megafu ta nappegiya ira ngamin ta Biblia. Anni ira nga annuttulan i neyaplikada nga efektibo?

“Ariannu maggazzi ta kataggi-tadday durante nga egga kamu ta dalan.” (Gen. 45:24) Nitabarang yatun ni Jose ta wawwaragina nga manoli ta yamada. Talaga masirib yatun nga uvovug! Nu ari kontrolan na tolay i emosionna anna alistu nga maggazzi, mas maggrabe i situasion. Nasingan ni Chris nga pakkafianna i pappakatannang anna pammanaki nga alawatan i giya. Megafu ta kayàna i manguli, nakikoma yaya ta brother nga kinipporfiana tapus nappursigi yaya nga kontrolan i paggazzina. Ta pappursigina nga manguli, nanguli gapa i brother. Magayaya ngana ira dua nga masserbi kani Jehova.

“Ari matuppal i plano nu awan tu paggararubang.” (Prov. 15:22) Nalippawa ni Janet nga kawaganna nga mas ipafutu paga yatun nga kinakurug. Naddesision yaya nga ‘makiyarubang,’ onu makiyuvovug ta sister. Ta paguvovugda, mataktika nga inimbita ni Janet i sister tapenu kagian i taki na nonona. Ta gafu, tensionadu i paguvovugda, ngem nakkasta gabbalaman i ganna-gannug durante nga kalmadu ira nga maguvovug. Nammuan na sister nga mali i pakalippawana ta tadday nga gannug nga ari gamma kavulu si Janet. Nakipakoma yaya anna makkavulu mangana ira nga masserbi kani Jehova.

“Yatun tu nu umay ka ta altar nga mangitavvung ta regalum ta Dios, anna keraddammam-mu tu egga i taki na nono na wagim nikaw, panawam-mu labbi i regalum ta altar anna umay ka sa nga makippakoma.” (Mat. 5:23, 24) Baka meraddammammu yatun nga tabarang nga niyawa ni Jesus ta Sermon ta Bakulug. Narraddam si Michael turi ta nalippawana nga ari yaya nangipasingan tu konsiderasion anna kinasippo. Determinadu yaya nga metoli i imammo. Sigga-pakalinno yaya nga nakippakoma ta arubang na brother nga natakitanna. Anni i resultana? Kunni Michael, “Interu futu nga pinakomanà na wagì.” Netoli i pakkofudda.

“Makkapasa-pasensia anna makkapaka-pakoma kamu nu egga i taki na nono nu ta kataggi-tadday nikamu.” (Col. 3:12-14) Ta situasion na dua nga nabayag ngana nga payunir, inuffunan ira na masippo nga elder nga pannonopan yaw ira nga pakkiavu: ‘Mepangngo kari nga marraddam i tanakuan megafu ta ariammi pakkarantindian? Egga kari i fustu nga rasommi nga ari pappasa-pasensian i kataggi-tadday anna memammo nga masserbi kani Jehova?’ Inalawada i tabarang na elder anna niyaplikada yatun. Masaya ngana ira nga makkavulu durante nga ilayyagayyada i mapia nga dumug.

Awayyana tu makasta nga pamegafu nu egga i nakataki nikaw i pangiyaplika ta instruksion na Biblia nga nekagi ta Colosas 3:12-14. Aru i nakalippawa nga megafu ta kinapakalinno, awayyada mamakoma anna makattamman i tagaruli. Maski nu nappursigi ka ngana ngem gittana awan paga tu nesimmu, meyaplikam kari i prinsipio ta Mateo 18:15? Tukuyan ni Jesus i dakkua nga makua nu egga i nakangngua tu serioso nga liwa ta tanakuan. Ngem baka i prinsipiona yatun i kawagammu nga tuttulan. Arannian i brother onu sister tapus masippo anna sigga-pakalinno nga paguvovugan anna solban i ari pakkarantindian.

Siempre, egga paga i tanakuan nga praktikal nga suhestion na Biblia. Tapenu makasta i pattuppalanna yaw ira nga suhestion, kawagammu ipasingan “i vunga na Espiritu . . . pangaya, pagayaya, imammo, pappasensia, pia na affutu-futu, pia na pangnga-pangngua ta ikattolay, kapasikkal, pappakasippo, anna pangifugag ta baggi.” (Gal. 5:22, 23) Kagitta na grasa nga mappakasta ta paffunsina na makina, ipamavulun gapa natun ira nga makadios nga kualidad i makakkasta nga proseso na imammo.

MAKABENEFISIO TA KONGREGASION I NADDURUMA NGA PERSONALIDAD

I personalidad​—i neruma nga klase na ugali nga egga nittam anna nadduruma ta kataggi-tadday—​ay mappakasta ta pakkorofun. Marresulta gapa tu ari pakkarantindian i nadduruma nga personalidad. Kunnaw i angngarigan na tadday nga manakam nga elder: “I tadday nga minappasirang ay marigatan nga makikavulu ta tadday nga minakkistoria anna mahilig mattattappe. Kagitta na baddi laman yatun; ngem, awayyana nga mabbalin tu serioso nga problema.” Ngem makagim kari nga marresulta tu problema danuri talaga madduma i personalidadda? Ikonsidera tam i dua nga apostol. Kunnasi si Pedro? Baka manonomu nga prangka anna alistu yaya nga maddesision. Kunnasi gapa si Juan? Manono tam gapa yaya nga meddu anna kanayunna nga pannonopan i kakkagian anna kukukuanna. Egga ira i pamakurug tam nga kunnatun yatun nga dua nga apostol. Makagi tam nga madduma i personalidadda. Ngem, makasta lagapa i pavvuludda ta trabahu. (King. 8:14; Gal. 2:9) Yatutta, posible gapa para ta Cristiano ira ta maddaggun nga nadduruma i personalidadda nga makkavulu nga mattrabahu.

Awayyana nga egga i wagi ta kongregasionnu nga kalussom i paguvovug anna agguyu-guyuna. Ngem, malippawamu nga natay gapa si Cristo para sa anna kawagammu nga mangipasingan tu aya. (Juan 13:34, 35; Roma 5:6-8) Yatutta, imbes nga pammanakitammu i makikofun ta brother onu sister onu arayyuan yaya, iyavumu ta baggim: ‘Egga kari i kukukuan naw nga wagi tu manawag nga tagaruli ta Biblia? Talaga kari mangngua yaya tu gannug nga kepasiranakku? Onu madduma laman i personalidadmi?’ Importante gapa i pakkiavu nga: ‘Kunnasi ngà mabenefisiowan ta makasta ira nga kualidadna?’

Importante yatun nga ultimo nga pakkiavu. Nu minaggistoria i tadday anna ariammu mattattannug, nonopan nu kunnasi kalistu para sa nga mangigafu tu paguvovug ta ministerio. Awayyam ikiddaw nga mevulu sa ta ministerio anna innan nu kunnasi ka matudduan. Nu minangngiyawa yaya ta tanakuan, ngem egga i tendensiam nga mangiyetu, ngatta ariammu nonopan i pagayaya ta pangiyawa ta bako anna lakay, mataki, onu ta egga pakawaganna? I punto, maski nu nadduma i personalidadnu, sikaw anna i wagi ay maddukko nu maffokus ta positibo. Ari kebalinan na pangngua tatun nga mabbalikkamu tu kuruga madukko, ngem makoffun ta pakkasta na relasion anna mas egga i imammo​—nikaw anna ta kongregasion.

Madduma gapa i metodo anna personalidad da Euodia anni Sintike. Ngem, pinagaram ira ni apostol Pablo nga ‘pakappiadda i avvuluda kunna mawwagi ta Yafu.’ (Fil. 4:2) Kunnatun gapa kari i kuammu kunne na gapa ta tanakuan nga egga koneksionna ta imammo?

ARIANNU IPAMAVULUN NGA MATTULU-TULOY I ARI PAKKARANTINDIAN

Kagitta na kaddo nga komforme i paddakallanna ta laguerta, mas marrake laman i ari makasta nga mataga-tageno ta tadday nu ariattam battulan. Nu inaffu na lussaw i futu na tadday nga tolay, maka-influwensia yatun ta espiritu na kongregasion. Nu ayatattam si Jehova anna i wawwaragi tam, kuattam ngamin i adde na mawayya tam nga ari makafekto i personal ira nga ari pakkarantindian nga mamappeligro onu makari tu imammo ta totolay na Dios.

Nu paguvovugattam i paddarama onu ari pakkarantindian tapenu mapeggan tu imammo, baka masorpresa ka ta makakkasta ira nga resultana. Ikonsidera i ekspiriensa na tadday nga Saksi: “Natageno ku nga tratuannà na tadday nga sister nga gittà i abbing. Ari ngà komportable tatun. Durante nga mas ma-irita ngà, mamegafu ngà ngana maggazzi sa. Para niakan, ‘Arianna ipasingan i respeto nga mepangngo niakan, yatutta ariakku gapa ipasingan i respetò sa.’”

Pinanono ngana naw nga Saksi i meyannung ta kikkingnguana. “Nasingakku i pakkurangakku, anna talaga dismayadu ngà ta baggì. Nalippawa ku nga uliakku i appana-panono ku. Kabalikku nipakimallo yatun kani Jehova, giminatang ngà tu simple nga regalu para ta sister anna nitura ku ta card nga makipakoma ngà ta marake nga ugalì. Nakkagakko anna umanugu kami nga kattamman ngana yatun nga gannug. Awan ngana tu maski anni nga problemami.”

Talaga kawagan na totolay i imammo. Ngem, nu egga i makkuestion ta posision anna kina-importansiada, aru i magguyu nga ari memammo. Mesimmu yatun ta aru ira nga ari maddayaw kani Jehova, ngem egga i imammo anna pattaradday ta nallatanan na maddayarayaw sa. Ininspiranna si Pablo nga itura: “Ikikkiddò nikamu tu mattolay kamu ta kunna mepangngo ta nagagalan na Dios nikamu. Kana-kanayun kamu nakuan nga mappakalinno, mappakasippo, anna mappasensia. Ipasingan nu i pakka-aya-aya nu ta pakkapasa-pasensia nu ta kataggi-tadday nikamu. Kuan nu ngamin i adde na awayya nu nga mamannanayun ta pia na pattaradday nu nga iyawa na Espiritu Santo gafu ta imammo nga mamakatadday nikamu.” (Efe. 4:1-3) Nabalor i “imammo nga mamakatadday.” Patuyaggattam yatun anna determinadu tam nakuan nga solban i ari pakkarantindian nga meparubang nittam.