“I Minappakalinno ay Irensiad-da i Davvun”
Aru nittam i nakasingan tu kawan na hustisia anna tazza-tazzian na marake ira i masippo anna inosente nga totolay. Duttal paga kari i tiempo nga awan ngana tu kawan na hustisia anna kinarake?
Tabbagan yatun na Salmo 37 ta Biblia, anna igiyana ittam sangawe. Innan i kagianna ta tumunug ira nga importante nga pakkiavu.
Anni nakuan i reaksiottam turi ira ta manattazzi nittam?—Bersikulo 1, 2.
Anni i mesimmu ta marake nga totolay?—Bersikulo 10.
Anni i mappange danuri magaggangngua tu fustu?—Bersikulo 11, 29.
Anni i mawag nga kuattam sangawe?—Bersikulo 34.
Manawag nga kinagi na nainspiran nga uvovug ta Salmo 37 nga makasta i mappange danuri ‘magiddanama kani Jehova anna mamarulo ta dorobna.’ Magayayya i Saksi ira ni Jehova nga uffunakka nga gigiammuan i Biblia anna ammuan nu anni kuammu tapenu malawà mu anna na iddeddukammu ira yatun nga mappange.