Nu Kunnasi nga i Paggigiammum tu Biblia ay Mas Efektibo Anna Makapagayayya

Bibbibbigan ni Josue i Dob; nadabba i pader na Jerico anna nattalupaddian i balay ni Rahab; niyatannang ni Josue i limana ta langi nga makimallo

MARIGA nga problema i neparubang kani Josue. Irolluanna i nasion na Israel tapenu makatallung ta Nepromesa nga Davvun ta arubang na kappaganassing ira nga makefugag. Ngem nipasiguradu ni Jehova nga makuana yatun, gukaban na kunnaw nga pamagaram: ‘Maggutu ka anna kuruga massikan. Tuttulammu i Dob ku. Bibbigammu aggaw anna gabi, tapenu matuttul mu tu mapia i ngamin nga nakatura taw. Nu kunnatun makasta i pattuppalammu anna makapagguyu ka tu masirib.’—Jos. 1:7, 8.

Taw nga tiempo na “ziga-riga,” mariga gapa nga arubangan i problema tam ira. (2 Tim. 3:1) Gitta ni Josue, mavviktoria ittam nu tuttulattam i tabarang ni Jehova nittam. Awayya tam regular nga bibbigan i Biblia anna memmugug nga iyaplika i prinsipio ira natun ta kapurueba ira nga keparubangattam.

Maski kunna, baka aminattam nga ariattam nga malalaki nga estudiante anna i paggigiammu ay ari malogon para nittam. Ngem gafu ta kuruga importante i paggigiammu tu Biblia, repasuan i kahon nga “Purueban Danaw nga Suhestion” para ta karuan nga makasta nga direksion nu kunnasi nga mas mabbalin tu efektibo anna makapagayayya i paggigiammum tu Biblia.

Nikansion na salmista: “Ta pamarulo ku ta dorob mu ay tudduam-mà, ta danaw i pakalerak-ku ta pagayaya.” (Sal. 119:35) Dakal nga ayayya i mala mu ta paggigiammu tu Uvovug na Dios. Madiskubrem i meyawana nga minas durante na pakkokkog mu ta espiritual ira nga kayamanan.

Maski nu ariammu kawagan nga irolluan i tadday nga nasion gitta ni Josue, egga lagapa ira i problema nga keparubangammu. Yatutta gitta ni Josue, gigiammuan anna tuttulan i netura ira para ta pammakapiammu. Nu kunnatun i kuammu, makasta gapa noka i pattuppalammu anna makapagguyu ka nga masirib.

PURUEBAN DANAW NGA SUHESTION

Makimallo nige maggigiammu. Mabibbig ta Biblia i appana-panono na makapangngua nga Dios nga nipeturana para ta pammakapiammu. Yatun nga nu bibbigammu i Biblia, mappoffun sa tapenu malippawa yatun, mepatalatto nikaw, anna meyaplika yatun ta pattolem.—Ezra 7:10.
Iyavu ta baggim i pakkiavu ira durante nga bibbigan i Biblia onu nebase-Biblia nga literatura: ‘Anni i ituttuddu naw nga material niakan meyannung kani Jehova? Anni i meyuffun naw ta interu nga mensahe na Uvovugna? Kunnasì mosa danaw tapenu uffunan i tanakuan?’
Monag nga pannonopan i giggigiammuan. Magimmang mabbibbig tapus mannono: ‘Kunnasi afektan naw nga material i annagenappakku? Ngatta kunna i matageno ku? Anni i koneksion natun ta nappasakku, maddaggun nga situasiokku, onu ta mesimmu ira ta mappange? Kunnasì iyaplika danaw nga prinsipio na Biblia anna yaw nga tabarang ta pattolè?’ (Job 23:5; Sal. 49:3) Purueban nu mawayyam nga iyesplika nu ngatta ikikkiddaw ni Jehova ta aripanna ira nga ibita i karuan nga annangngua. Onu nonopan nu anni ira i resultana nu tanakuan i kingngua na tolay nga nabibbig mu ta Biblia.—Deut. 32:28, 29.
Usan i imahinasiommu kada mabbibbig tu istoria ira. Angngariganna, manono mu kari i eksena turi ta ilaku na wawwaragi ni Jose yayya ta Ismaelita ira? (Gen. 37:18-28) Anni i masingammu, maginnam, anna magug mu? Nonopammu tu sikaw i egga ta eksena. Anni i nononopadda anna i mataga-tagenoda? Nu usammu i imahinasiommu, mas manawag anna mas aru i magigiammum.
Usan i rimienta ira ta paggigiammu nga neyawa nikaw tapenu mas mabbalin tu interesante i parresearch mu. Kabisaduan i rimienta ira nga mala ta lengguahem, ta online anna ta neyimprenta. Ariammu mappasiran nga mappoffun ta tanakuan tapenu mosa tu efektibo danatun. Angngariganna, makoffun nikaw i Watch Tower Publications Index onu i Research Guide for Jehovah’s Witnesses tapenu malegan i informasion ira meyannung ta aru nga topiko anna tapenu malegan i pakanawag na aru nga teksto na Biblia. Usan i apendise ira na New World Translation of the Holy Scriptures ta lengguahe nga matindiammu. Mangiyawa danaw tu makoffun ira nga informasion meyannung ta heograpia, kronolohia, dammo anna gukug, anna karuan paga.
Isumario i importante ira nga punto ta material tapenu moffunakka nga meraddamman i nagigiammum ira. Mas makasta paga nu ibillem ta tanakuan danatun. Egga kari i puedem mosa ta ministerio? Nu kuammu danaw, ari laman nga mepitto ta nono mu i importante ira nga punto, nu ari, mosam gapa i nagigiammum ira tapenu mammakapia i tanakuan.