Nu Natayakka

“Awan tu nakuà turi ta gaggavva nga natay si manung ku. Ta pappasa na piga vulan, manono ku yayya anna maraddam ngà, nga gittana maduddug i futù. Nu karuan, makaporay ngà nu ngatta natay si manung ku. Nakokkonsensia ngà gapa ta ariammi kuruga nakkavulu.”—Vanessa, Australia.

NU NATAYAKKA, awayyana nga nadduruma gapa i natageno mu: naddaddam ka anna awan tu awa-awayyam. Posible gapa nga nakaporay, nakonsensia, anna naganassing ka. Awayyana nga nanono mu gapa nu egga paga i serbi na pattolem.

Ari tu marake i maddaddam, maski mabayag yatun. Ipasinganna laman i pangiddu mu ta minatay mu. Ngem posible kari nga mabanna-bannayakka lagapa ta nepallo nga daddammu?

NU KUNNASI NAKAPAGATTAM I KARUAN

Maski gittana ari mawawan i taki nga mataga-tageno mu, makapabannay i tumunug ira nga suhestion:

MADDADDAM KA NU KAWAGAN

Nadduruma i paddaddam na kada tolay anna nadduruma gapa i kabayagna. Maski nu kunna, mabanna-bannayakka ta pattangi. Kunni Vanessa nga nakagi ta gafu: “Itangi ku laman; mawag nga ilawakku i mataga-tageno ku.” Kunna gapa ni Sofía nga natayan tu wagi: “Mataka-taki nga nonopan i nesimmu. Kagitta natun i pappakarenu ta nainfeksion nga bigag. Gittana kakku makaya i takina, ngem pammapian natun i bigag.”

IPAKIBBIDAM I NONONOPAN ANNA I MATAGA-TAGENO MU

Natural laman nga kayà mu i magitetadday nu mittan. Ngem madaddammo i paddaddam nu siko laman i mangattu. Manono na 17 anios nga si Jared nga natayan tu yama: “Kinagì i mataga-tageno ku ta tanakuan. Kakku ammu nu natindiaddà, ngem kakkasta lapa ta nekagì i mataga-tageno ku.” Kagian paga ni Janice nga nakagi ta gafu nga artikulo: “Talaga makapabannay i pangistorià ta tanakuan. Matindiaddà anna ari ngà magitetadday.”

ALAWATAMMU I UFFUN

Kagian na tadday nga doktor: “Nu mappoffun i natayan ira ta kokkofun anna parientesda, mas mabi nira nga attamman anna arubangan i paddaddamda.” Ikagim ta kokkofummu nu anni i meyuffudda; siguradu nga ikayà daka uffunan ngem baka ariadda ammu nu kunnasi.—Proverbio 17:17.

UMARANNI KA TA DIOS

Kunni Tina: “Turi ta natay i atawà ta cancer, kakku ngana mekagi nisa i pakavurungakku, yari tu ikagì ngamin ta Dios! Ta gafu na kada aggaw, mappoffun ngà nisa tapenu makayanakku yatun. Daka-dakal i niyuffun nio na Dios.” Kunni Tarsha nga 22 anios tagga ta natay i yenana: “I pabbibbig tu Biblia i namanna-bannay niakan ta inaggaw. Mangiyawa yatun tu pamagaram nga nononopakku.”

NONOPAMMU I PAGINNOLAY

Kunna paga ni Tina: “Ta gafu, ari ngà nabannayan ta iddanama nga paginnolay ta kawagakku i atawà anna kawagan gapa na ánami i yamada tatun nga tiempo. Ngem kabalin na appa nga dagun, magiddanama ngà ngana taw. Yaw i namasikan niakan. Maimajin ku nga masingakku yayya uli. Mamakkalma anna mamagayayya niakan yatun!”

Awayyana nga ari ka insigida mabanna-bannayan ta paddaddammu. Maski nu kunna, mapasikakka ta naekspiriensa ni Vanessa. Kinagina, “Abbo mu nga kammu makayanan yatun, ngem sisinu lapa nga mapakarianan i daddammu.”

Nonopammu nga maski nu kanappammu lagapa i minatay mu, egga lapa i serbi na pattolem. Ta meddu nga uffun na Dios, magayayya ka lagapa ta madukko nga pakikkofun anna ta pattolay nga egga i gakkagna. Aranni ngana nga paginnolayan na Dios i natay. Ikayana nga magakkopammu uli i minatay mu. Mawawan ngana noka i taki nga mataga-tageno mu!

Makoffun ira nga Teksto ta Biblia

Masingi-singan na Dios i paddaddam anna pattangi mu.

Tadday nga nattura ta Biblia i nakkagi ta Dios: “I lista na luluà ira ay pinappannam-mu. Ari kari tu ta librum danaw ay nitura mu?”—Salmo 56:8.

Mevuvvu mu ta Dios i ngamin nga mayan na futum.

“Kagiak-ku [ta Dios] ngamin i kavurungak-ku . . . Sikaw, AFU, i ek-ku paddagingan.”—Salmo 142:2, 5.

Egga i iddanama.

“Egga noka i paginnolay.”—Kingngua 24:15, NW.

Nipromesa na Dios nga paginnolayanna i aru nga natay, anna kakayàna nga kuan yatun.a—Job 14:14, 15, footnote.

a Para ta mas aru nga informasion meyannung ta paginnolay, innan i leksion 30 na libru nga Magayayya nga Mattolay tu Mannanayun! nga nipublisa na Saksi ira ni Jehova anna libre nga me-download ta www.pr418.com/ibg.