Nu Inilloku Naka na Atawam

MATAKA-TAKI nu inilloku naka na atawam. Egga ira atawa nga mapakomada i mabbabawi nga atawada anna ayusadda uli i relasiodda.a Ngem maski nu mabuu uli onu ari i pagatawada, kana-kanayun lagapa nga matakitan i atawa ira nga inilloku na atawada. Kunnasida marubang i nepallo nga taki nga mataga-tagenoda?

MAKOFFUN IRA NGA TEKSTO TA BIBLIA

Maski mariga-riga, nabanna-bannayan na Biblia i inosente ira nga atawa. Nammuadda nga masingi-singan na Dios i patta-tangida anna ikabbina ira.​—Malakias 2:13-16.

“Nu aru i kavuru-vurungan na nono ku, i pamanna-bannem i mangiyawa ta pagayaya ku.”​—Salmo 94:19.

Kagian ni Bill: “Ta pabbibbig ku tatun nga teksto, maimajin ku i pamanna-bannay nio ni Jehova, kagitta na kukukuan na minangngikabbi nga yama.”

“I totolay nga ariad-daka likuran, AFU, ay ariam-mu likuran ira.”​—Salmo 18:25.

“Inillokunà na atawà,” kunni Carmen nga piga vulan nga inilloku na atawana. “Ngem ammù nga matalo niakan si Jehova. Ariannà vuluvuga likuran.”

“Arian nu nga kavurungan i anni laman nga gannug. Ngem ta ngamin nga pakimallo nu . . . kiddawan nu ta Dios i mawag nu. Ay iyawa na Dios nikamu i imammo na nga ari malippawa na tolay. Yaw i manangngal ta nono anna giffutuan nu.”​—Filipos 4:6, 7.

“Pakatotolì nga binibbig yaw nga teksto,” kunni Sasha. “Ta kana-kanayun nga pappakimallo ku, iniddannà na Dios tu memammo nga nono.”

Egga ira tiempo nga maggi ari ngana makaya na nakagi ira ta utun i situasiodda. Ngem nattalo ira kani Jehovab nga Dios anna napasikan ira na Biblia. Kagian ni Bill: “I pangurug ku i nangiyawa tu direksion ta pattolè tagga ta gittana nadaral ngana i ngamin. Maski ta tiempo nga egga ngà ta ‘karibbattan,’ kavulu ku i Dios.”​—Salmo 23:4.