Panuddu nga Usan i Brosiur nga Makakkasta nga Balita
1. Kunnasi nga nadisenio i brosiur nga Makakkasta nga Balita?
1 Kagitta na nagigiammu ta Hulio nga isyu na Ministerio Tam ta Pappatulan, tadday nga importante nga meyusa ta pangituddu i brosiur nga Makakkasta nga Balita! Ari nga nepay taw i naddian na nakagi nga teksto ira tapenu mabibbig yatun mismu na householder ta Biblia. Ari tu kagitta na aru nga publikasiottam nga awayya gigiammuan maski nu awan tu mangituddu, nadisenio yaw nga publikasion nga kawagan i manuddu. Yari tu nu ipalima yaw, idemonstra nu kunnasi nga gigiammuan tapenu masingan na householder nu kunnasi makapagayaya i paggigiammu ta makasta nga dumug nga naggafu ta Biblia.—Mat. 13:44.
2. Kunnasi tam meyusa i brosiur nga Makakkasta nga Balita ta ollu nga pabbisita?
2 Ta Ollu nga Pabbisita: Awayyam kagian: “Nakapasiar ngà megafu ta mavurung i totolay meyannung ta mesimmu ta mappange. Para nikaw, egga paga kari pangulian na pattoletam? [Innaggan nga tumabbag.] Egga i makasta nga dumug ta Biblia nga makeyawa tu iddanama. Yaw i karuan nga pakkiavu nga tabbagan na Biblia.” Iddan tu brosiur i householder, anna pappilian yaya tu tadday nga pakkiavu ta likug na brosiur. Kabalinna, idemonstra nu kunnasi nga gigiammuan i ollu nga parapo na napilina nga leksion. Awayyam gapa nga makkiavu ta householder tu makapa-interes nga pakkiavu base ta leksion nga napilim anna ipasingan nu kunnasi nga makoffun sa i brosiur tapenu mammuan i tabbag na Biblia. Nu egga video ta jw.org/ibg nga meyannung tatun nga leksion, i-play yatun na karuan nga publisher ira ta presentasiodda.
3. Iyesplika nu kunnasi gigiammuan i brosiur nga Makakkasta nga Balita.
3 Nu Kunnasi nga Gigiammuan: (1) Bibbigan i nanumerruan anna makannag neketurana nga pakkiavu tapenu maka-fokus i householder ta pinakapunto. (2) Bibbigan i parapo. (3) Bibbigan i naka-italiko nga teksto anna mangiyusa tu makapa-interes nga pakkiavu tapenu masingan na householder nu kunnasi nga tabbagan na Biblia i pakkiavu. (4) Nu ari laman tu tadday i parapo ta gukag na pakkiavu, ulian i nakagi ta meka-2 anna meka-3. Nu egga video nga mepangngo ta pakkiavu anna ari paga nagiraw na householder, ipagiraw yatun sa. (5) Pangultimuanna, iyavùmu ta householder nu anni tabbagna ta nanumerruan nga pakkiavu tapenu masiguradu nga nalippawàna.
4. Anni i makoffun tapenu masanay tam ta pangiyusa taw nga nabalor nga brosiur?
4 Gigiammuan tu mapia yaw nga nabalor nga brosiur. Usan ta kada mepangngo nga situasion. Nige na kada paggigiammu, nonopan nu kunnasi i pinakamakasta nga pangiyesplika ta teksto ira na leksion ta estudiante. (Prov. 15:28; King. 17:2, 3) Durante nga umara-aru i ekspiriensa anna abilidadmu, matagenòmu noka nga kakayàmu ngana nga usan yaw nga brosiur ta panuddu tu kinakurug ta totolay!