Parigan i Profeta Ira—Habakuk
1. Ngatta matageno tam gapa i kagitta na natageno ni profeta Habakuk?
1 Durante nga umara-aru i kinamarakay ta pallevu tam, matageno tam gapa i kagitta na natageno ni Habakuk, nga nangiyavu kani Jehova: “Ngatta ta ipasingammu niakan i marake nga anangngua? Ngatta ipamavulummu i panattazzi?” (Hab. 1:3; 2 Tim. 3:1, 13) Makoffun i pannono tu mapia ta mensahe anna matalo nga ehemplo ni Habakuk tapenu makapagattam tam ta paginnag ta aggaw na pamanunnu ni Jehova.—2 Ped. 3:7.
2. Kunnasi tam mepasingan nga mattoletam nga sigga-matalo ta maddaggun?
2 Mattolay nga Sigga-matalo: Imbes tu mappa-afekto ta marake ira nga situasionna, sigga-alerto anna aktibo ta nespirituan si Habakuk. (Hab. 2:1) Siniguradu ni Jehova ta profeta nga matuppal i uvovugna ta eksakto nga tiempo anna “i matunung ay mattolay noka gukaban na kinamatalona.” (Hab. 2:2-4) Anni i kebalinanna yaw para ta Cristiano ira nga mattotolay ta urian nga tiempo na panuppalan? Mas importante nga kumbinsido tam nga duttal i panuppalan anne ta pangammu nu sonu anni duttal yatun. I pangurug i mamaguyu nittam nga sigga-alerto nakuan anna ipoppollu i ministerio.—Heb. 10:38, 39.
3. Ngatta mawag tu kanayuttam nga magayaya ta passerbi kani Jehova?
3 Magayaya Kani Jehova: Sonu umatake i Gog na Magog ta ili ni Jehova, mapurueban noka i pangurug tam. (Eze. 38:2, 10-12) Mamazziga yaw maski turi ta mepaliag ta ultimona. Awayyana nga makkurang i makan, mawawwan i pakkukua ira, anna mazziga i pattolay. Anni i kuattam nu luttuag yatun ira nga ziga-riga? Ammu ni Habakuk nga duttal i ziga-riga, yari tu determinado yaya nga kanayun nga magayaya ta passerbina kani Jehova. (Hab. 3:16-19) Makoffun gapa “i pagayaya kani Jehova” tapenu maattammattam i ziga-riga ta mappange.—Neh. 8:10; Heb. 12:2.
4. Ngatta egga rasottam nga magayaya ta maddaggun anna ta mappange?
4 Metulu-tuloy noka nga matudduan ta dala-dalan na Dios danuri ipaliag ni Jehova ta mappange nga aggaw na pamanunnuna. (Hab. 2:14) Matudduan gapa meyannung kani Jehova i mapaginnolay ira. Maski ta maddaggun, usattam i ngamin nga oportunidad nga ituddu i meyannung kani Jehova anna i makapabbaw ira nga kingnguana!—Sal. 34:1; 71:17.