MATTOLAY NGA CRISTIANO
Nu Kunnasi Mabbalin tu Malappo nga Estudiante na Katurakan
Kayà mu kari nga mabbalin tu matalo nu mapurueban gitta ni Daniel? Malappo nga ginigiammu ni Daniel i Uvovug na Dios, maski i monag ira nga profesiya. (Da 9:2) Makoffun nikaw i malappo nga paggigiammu tu Biblia tapenu mattalupaddian nga matalo. Kunnasi? Mapasikan naw i pangurug mu nga matuppal i promesa ira ni Jehova. (Jos 23:14) Mapadakal paga naw i aya mu ta Dios, nga mamaguyu nikaw nga kuan i fustu. (Sal 97:10) Ngem kunnasim pegafuanan? Ikonsidera i tumunug ira nga suhestion.
Anni gigiammuakku? Nelagum ta makasta nga rutina na paggigiammu i papprepara ta study ira na kongregasion. Mas makapabenefisio i linigguan nga pabbibbig tu Biblia nu iddammu tu tiempo i par-research ta punto ira nga ariammu malippawa. Pinili gapa na karuan nga gigiammuan i profesiya ta Biblia, i aspeto na vunga na masanto nga espiritu na Dios, i pammisionero ni apostol Pablo, onu maski i pinaratu ira ni Jehova. Nu egga manono mu nga pakkiavu ta Biblia, itura mu anna i-research mu ta tumunug nga proyektom ta paggigiammu.
Pakalegakku tu informasion? Para ta pappilian ira, girawan i video nga Rimienta ira ta Pagaleg tu Espiritual nga Minas. Tapenu makapappraktis ka, i-research i makapangngua ira nga nasion nga neyilustra gukaban na ayam ira ta Daniel kapitulo 7.
Piga oras ngà maggigiammu? Mapprogreso ka ta espiritual nu regular i paggigiammum. Awayyana nga manganannuan laman i paggigiammum ta gafu tapus, puedem ammungan i oras ta kada paggigiammum. Kagitta na pakkokkog tu nakatagu nga minas i paggigiammu ta Uvovug na Dios; nu mas aru nga minas i malegammu, mas kakayà mu paga nga makkokkog! (Pr 2:3-6) Mas maginteres ka ta Uvovug na Dios, anna tulu-tuloy nga mabbalin tu rutinam i regular nga paggigiammu tu Biblia.—1Pe 2:2.
ANNI I IREPRESENTA NA AYAM IRA TA DANIEL KAPITULO 7?
Da 7:4
Da 7:5
Da 7:6
Da 7:7
TANAKUAN PAGA NGA PAKKIAVU:
Kunnasi natuppal i Daniel 7:8, 24?
TUMUNUG NGA PROYEKTO:
Anni i irepresenta na ayam ira ta Nepakannammu kapitulo 13?