Labanan i Passil Tapenu Merattal i Imammo

1. Kunnasi nga nafektan na passil i familia ni Jose?

IDDUKAN ni Jacob i ngamin nga ánana, ngem espesial i pangidduna ta 17 anios nga si Jose. Anni i reaksion na wawwaragi ni Jose? Nappassil ira nisa anna nikalussoda yayya. Awan tu kingngua ni Jose tapenu ikalussaw yayya na wawwaragina. Maski paga kunnatun, nilakuda si Jose ta pakka-aripan anna nalladdug ira ta yamada ta pakkagi nga pinatay na simaron nga ayam i paboritona nga ana. Zinaral na passil i imammo na familia anna fermi nga pinarraddam natun i yamada.​—Gen. 37:3, 4, 27-34.

2. Segun ta Galacia 5:19-21, ngatta kuruga delikadu i passil?

² Ta Katurakan, nelista i passilb bilang tadday nga annangngua na “neravvunan nga kata-katolay” nga marresulta ta patay anna makefugag ta tolay nga marensia i Pappatulan na Dios. (Bibbigan i Galacia 5:19-21.) Passil i pinakagamu na kappatay ira nga vunga kagitta na pakkorontra, paddarama, anna pappata-patu.

3. Anni i gigiammuattam taw nga artikulo?

³ Ipasingan na ehemplo na wawwaragi ni Jose nu kunnasi nga daralan na passil i relasion ira anna i imammo ta unag na familia. Maski nu ariattam vuluvuga kuan i kingngua na wawwaragi ni Jose, imperfekto anna minangngilogo i futu tam ngamin. (Jer. 17:9) Ari ngana gafu kakkadda-kaddag nga nu mittan, passilattam i tanakuan. Ikonsidera tam i karuan nga pamappalan ta Biblia nga makoffun nittam nga ammuan nu ngatta maggamu i passil ta futu tam. Ikonsidera tam gapa i praktikal ira nga makua tam tapenu labanan i passil anna irattal i imammo.

ANNI I POSIBLE NGA KEGAFUAN NA PASSIL?

4. Ngatta pinassil na Filisteo ira si Isaac?

⁴ Material nga kinariku. Mariku si Isaac yayya nga pinassil na Filisteo ira i kinarikuna. (Gen. 26:12-14) Tinavvunadda paga i posu ira nga iyusa ni Isaac tapenu penuman i aya-ayamna. (Gen. 26:15, 16, 27) Gitta na Filisteo ira, passilan na karuan nga totolay ta maddaggun danuri mas aru i material nga pakkukuada anne ta nira. Ariadda laman karagatan i gannug nga egga ta tanakuan, nu ari, manakida paga lagu nga mapeggan yatun nga tolay tu kunnatun ira nga gannug.

5. Ngatta nappassil i relihioso ira nga lider kani Jesus?

⁵ Nu kakayà na tanakuan i tadday nga tolay. Pinassil na Judio ira nga relihioso nga lider si Jesus megafu ta kuruga kakayà yayya na aru nga totolay. (Mat. 7:28, 29) Si Jesus i representante na Dios anna ituttudduna i kinakurug. Maski paga nu kunnatun, nangiwara danaw nga relihioso nga lider tu kinaladdug anna pamara-parake tapenu daralan i makasta nga reputasion ni Jesus. (Mar. 15:10; Juan 11:47, 48; 12:12, 13, 19) Anni i magigiammu tam tatun nga rekord? Mawag tu labanattam i tendensia nga passilan danuri wawwaragi nga iddukan na kongregasion megafu ta makasta ira nga kualidadda. Mappursigi ittam lallagu nga parigan i mapia ira nga kualidadda.​—1 Cor. 11:1; 3 Juan 11.

6. Kunnasi nga nappassil si Diotrefes?

⁶ Teokratiko ira nga pribilehio. Ta ollu nga siglo, pinassil ni Diotrefes danuri mangirollu ta Cristiano nga kongregasion. Ikayana nga “mabbalin tu dakal” na miembro ira na kongregasion yatutta nangiwara yayya tu marake ira nga gannug nga manaral ta respeto na wawwaragi kani apostol Juan anna ta tanakuan paga nga manakam. (3 Juan 9, 10) Maski nu ariattam vuluvuga kuan i gitta na kingngua ni Diotrefes, posible nga mamegafu nga passilattam i kapangngurug tam nga nakalawa tu tadday nga asayment nga iddanamattam gapa nga malawa. Netallugaring yatun nu matageno tam nga maski sittam ay kualipikadu onu mas malalaki tam paga nga kuan yatun nga responsibilidad.

7. Anni i posible nga efekto na passil ta nittam?

⁷ Neyarig i passil ta tadday nga makadaral nga kaddo. Oras tu maggamu yatun ta futu tam, mariga ngana nga battulan yatun. Mattalovu i passil megafu ta negatibo ira nga panageno gitta na pappakatannang, pabbalin tu makasarili anna pakikkompetensia. Fugaddan na passil i pattalovu na makasta ira nga kualidad gitta na aya, pangikallo, anna kinasippo. Nu masingattam nga mamegafu ngana nga mattalovu i passil ta futu tam, mawag nga battulattam insigida yatun. Kunnasi tam labanan i passil?

KULTIBAN I KINAPAKALINNO ANNA PAKKAKONTENTU

8. Anni ira nga kualidad i makoffun nittam nga labanan i passil?

⁸ Malabanattam i passil gukaban na pakkultiba ta kinapakalinno anna pakkakontentu. Nu napannu i futu tam tu kunnaw ira nga makasta nga kualidad, ari nga mattalovu i passil. Duffunan ittam na kinapakalinno tapenu ari nga atannang i anningattam ta baggi tam. Ari nga matageno na minappakalinno nga tolay nga mas mepangngo yayya anne ta maski sinni. (Gal. 6:3, 4) I tolay nga kontentu ay magayayya ta egga nisa anna arianna ikumpara i baggina ta tanakuan. (1 Tim. 6:7, 8) Nu masingan na minappakalinno anna kontentu nga tolay i tanakuan nga makalawa tu mapia nga gannug, makitappagayayya yayya nisa.

9. Segun ta Galacia 5:16 anna Filipos 2:3, 4, anni i makua tam megafu ta uffun na masanto nga espiritu?

⁹ Mawag tam i uffun na masanto nga espiritu na Dios tapenu malillitattam i nepattaggan nga ugali nga passil anna makultiba i kinapakalinno anna pakkakontentu. (Bibbigan i Galacia 5:16; Filipos 2:3, 4.) Duffunan ittam na masanto nga espiritu ni Jehova tapenu mosito i kononaggan nga nononopan anna motibo tam. Ta uffun na Dios, matalianattam tu makapagaram nga ganna-gannug i makadaral ira nga appana-panono anna panageno. (Sal. 26:2; 51:10) Ikonsidera i ehemplo da Moises anni Pablo, lallaki nga nawayyada labanan i tendensia nga mamassil.

10. Anni nga situasion i namurueba kani Moises? (Innan i letratu ta vungun.)

¹⁰ Daka-dakal i autoridad ni Moises ta totolay na Dios ngem arianna finugaddan i tanakuan nga mapeggan tu kunnatun nga autoridad. Angngariganna, inalsan ni Jehova i karuan ta masanto nga espirituna kani Moises anna niyawana yatun ta grupo na manakam ira nga Israelita nga agga-taddag aranni ta tolda na paggarammammungan. Kabalinna, naginna ni Moises nga i dua nga manakam nga ari nga minay ta tolda na paggarammammungan ay nakalawa gapa tu masanto nga espiritu anna namegafu nga nagakto bilang profeta. Anni i reaksion ni Moises turi ta nikiddaw ni Josue nga fugaddanna i dua nga manakam? Ari nga pinassil ni Moises i atension nga nalawa na dua nga lalaki kani Jehova. Lallagu, sigga-pakalinno yayya nga nakitappagayayya ta pribilehioda. (Num. 11:24-29) Anni i magigiammu tam kani Moises?

11. Kunnasi maparigan na elder ira si Moises?

¹¹ Nu tadday ka nga elder, nekiddaw kari ngana nikaw nga sanayammu i tanakuan nga tangngawan i pribilehio ta kongregasion nga kuruga tagibalorammu? Angngariganna, baka tagibalorammu i pribilehio nga mangikondukta tu Paggigiammu tu Passifusifutan ta kada ligguan. Ngem nu minappakalinno ka gitta ni Moises, ariammu matageno nga ari ka ngana nabalor nu mekiddaw nikaw nga sanayammu i tanakuan nga brother tapenu ta pappasa na tiempo, makuana ngana gapa tu mapia yatun nga pribilehio. Magayayya ka lallagu nga uffunan yatun nga wagim.

12. Kunnasi nga ipasa-pasingan na aru nga Cristiano ta maddaggun i pakkakontentu anna kinapakalinno?

¹² Ikonsidera i tanakuan nga situasion nga ara-arubangan na lakay ira ngana nga brother. Ta piga nga dagun, nasserbi ira bilang koordineytor na baggi na elder ira. Ngem turi ta nagedad ira tu 80, sigga-paran ira nga ipeyabaga i asaymentda ta tanakuan. I manangngal ta sirkito ira nga magedad tu 70 ay sigga-pakalinno nga ipeyabagada yatun nga pribilehio ta tanakuan anna akseptan i tanakuan nga asayment. Ta nappasa nga daga-ragun, aru nga miembro na familia na Bethel ta interu mundo i napeggan tu bagu nga asayment ta lawan na Bethel. Danaw nga matalo nga wawwaragi ay ari mattaki i nonoda ta nanali nira ta asaymentda.

13. Ngatta posible nakuan nga matenta si Pablo nga passilan i 12 nga apostoles?

¹³ Makasta gapa nga ehemplo si apostol Pablo bilang tadday nga nangultiba ta pakkakontentu anna kinapakalinno. Ari nipamavulun ni Pablo nga makatageno yayya tu passil. Nappursigi yayya ta ministerio ngem sigga-pakalinno nga kinagina: “Sakan i kalinnakkan ta paddia-paddian ta ngamin nga apostol. Ari ngà paga lagu nga mepangngo nga magalan tu apostol.” (1 Cor. 15:9, 10) Vinulu na 12 nga apostol si Jesus durante ta ministeriona ta davvun ngem nabbalin laman tu Cristiano si Pablo kabalin na patay anna kapaginnolay ni Jesus. Maski nu natunno gabbalaman si Pablo bilang ‘apostol nga nadog ta Hentil ira,’ ari yayya vuluvuga nabbalin tu tadday ta 12 nga apostoles. (Roma 11:13; King. 1:21-26) Imbes nga passilanna danatun nga 12 nga lallaki anna i meggo nga pakikkofudda kani Jesus, nattalupaddian nga kontentu si Pablo ta egga nisa.

14. Anni i kuattam nu kontentu anna minappakalinno ittam?

¹⁴ Nu kontentu anna minappakalinno ittam, mabbalin ittam tu gitta ni Pablo nga mangirespeto ta autoridad nga niyawa ni Jehova ta tanakuan. (King. 21:20-26) Niyunnugna nga irollu na natunno ira nga lallaki i Cristiano nga kongregasion. Maski nu imperfekto ira, ikonsidera ira ni Jehova bilang ‘regalu ta totolay ira.’ (Efe. 4:8, 11) Nu irespeto tam danatun nga natunno nga lallaki anna sigga-pakalinno nga tuttulan i direksiodda, mattalupaddian ittam nga madukko kani Jehova anna magayayya ittam ta egga i imammo ta nallatanan na wawwaragi tam.

“IGAKKAG TAM NGA KUAN I GANNA-GANNUG IRA NGA MAKEYAWA TA IMAMMO”

15. Anni i mawag nga kuattam?

¹⁵ Ari nga mattalupaddian i imammo nu ipamavuluttam nga dumakal i passil. Mawag nga battulattam i passil ta futu tam anna lillitattam nga sittam i makegafu nu ngatta mappassil i tanakuan. Mawag nga kuattam danaw nga importante nga dakkua tapenu matuttul tam i bilin ni Jehova nga “igakkag tam nga kuan i ganna-gannug ira nga makeyawa ta imammo anna mamasikan ta angngurug na kataggi-tadday.” (Roma 14:19) Anni ira i espesipiko nga makua tam tapenu uffunan i tanakuan nga labanan i passil, anna kunnasi ittam mangirattal tu imammo?

16. Kunnasi tam moffunan i tanakuan nga labanan i passil?

¹⁶ Dakal i influwensia ta tanakuan na ugali anna annangngua tam. Ikaya na mundo nga ‘ipara-parayag’ tam i pakkukua tam. (1 Juan 2:16) Ngem marresulta ta passil i kunnatun nga ugali. Mebita tam nga sittam i makegafu nu ngatta mappassil i tanakuan nu lillitattam i kanayun nga pangistoria ta pakkukua tam onu ta plano tam ira nga gatangan. Tadday paga nga makua tam ay gukaban na mapakalinno nga pagimamma ta pribilehio tam ta kongregasion. Nu kanayuttam nga idirekta i atension ta pribilehio ira nga egga nittam, mangukkultiba ittam tu pattalovuan na passil. Ngem nu ipasingattam i napafutuan nga personal nga interes ta tanakuan anna rekunnisian i makasta ira nga makuada, moffunattam ira nga mabbalin tu kontentu anna mangirattal ittam tu pattaradday anna imammo ta kongregasion.

17. Anni i nawayya nga kuan na wawwaragi ni Jose, anna ngatta?

¹⁷ Mawayya tam nga affutan i passil! Ikonsidera uli i wawwaragi ni Jose. Piga dagun kabalin na marake nga pinattratuda kani Jose, nasimmuadda yayya ta Ehipto. Nige nga ikagi ni Jose ta wawwaragina nu sinni talaga yayya, pinuruebanna ira tapenu ammuanna nu nanguli ngana ira. Niyunnugna nga kuman ira anna tatun ay nangiyawa yayya tu kuruga mas aru nga makan ta pinaka-uriadda nga si Benjamin. (Gen. 43:33, 34) Ngem awan tu indikasion nga mappassil i wawwaragina kani Benjamin. Nangipasingan paga lagu ira tu napafutuan nga pangikavurung ta wagida anna ta yamada nga si Jacob. (Gen. 44:30-34) Megafu ta ari ngana nga minappassil i manung ira ni Jose, nakoffun ira tapenu metoli i imammo ta familiada. (Gen. 45:4, 15) Kunnatun gapa, nu battulattam i passil, moffunattam i familia anna kongregasiottam tapenu mattalupaddian nga memammo.

18. Segun ta Santiago 3:17, 18, anni i mesimmu nu manguffun ittam ta pangirattal tu imammo?

¹⁸ Ikaya ni Jehova nga labanattam i passil anna mangirattal ittam tu imammo. Mawag tu mappursigi ittam nga parehu nga kuan danatun. Gitta na nagigiammu tam taw nga artikulo, egga i tendensia tam nga mappassil. (Sant. 4:5, NW ) Napalevutan ittam gapa tu totolay nga mangipagaram ta passil. Ngem nu kultibattam i kinapakalinno, pakkakontentu, anna appresasion, ari ittam mabbalin tu minappassil. Makoffuttam lallagu nga mangirattal tu imammo tapenu makultiba tam i makasta ira nga kualidad.​—Bibbigan i Santiago 3:17, 18.