“Umaranni kamu ta Dios, ay umaranni yaya nikamu.”—Santiago 4:8
Gigginnan Kari na Dios i Pakimallo Tam?
Nanono mu ngana kari nu gigginnan naka na Dios nu makimallo ka? Nanono gapa yatun na aru. Aru i mappaduffun ta Dios ta problemada ira ngem ari lagapa mawawwan i problemada. Kayà na kari kagian nga ari gigginnan na Dios i pakimallo tam? Ari! Ipasiguradu na Biblia nga ginnan ittam na Dios nu mepangngo i akkimallo tam. Ammuattam i kagian na Biblia.
MAGGIGGINNA I DIOS.
“Ta tabbagam-mu i dasa-dasal mi ira. Ngamin i totolay ay aranniad-daka.”—Salmo 65:2.
Makimallo i karuan tapenu laman makkasta i panagenoda, maski nu ariadda mabba mangurug nga egga i maggigginna. Ngem i pakimallo ay ari laman tu basta mamakkasta ta panageno tam tapenu makayanattam i problema tam ira. Ipasiguradu na Biblia nga “aranni yaya [si Jehovaa] ta ngamin nga magagal sa—ta ngamin nga napafutu i pagagal da. . . . Ginnan na i pakimallo da.”—Salmo 145:18, 19.
Makasiguradu ittam gafu nga ginnan ni Jehova nga Dios i pakimallo na massesserbi ira nisa. Masippo nga kinagina: “Agaladdà anna umay kamu anna makimallo kamu niakan, ay ginnattakamu.”—Jeremias 29:12.
IKAYA NA DIOS NGA MAKIMALLO KA NISA.
“Maddasal kamu ta maski anni nga tiempo.”—Roma 12:12.
Ipagaram na Biblia nga ‘kanayun ittam nga makimallo’ anna ‘makimallo ta maski anni nga tiempo.’ Manawag nga ikaya ni Jehova nga Dios nga makimallo ittam nisa.—Mateo 26:41, NW; Efeso 6:18.
Ngatta ikaya na Dios nga makimallo ittam nisa? Nonoppammu: Magayayya i tadday nga yama nu mappaduffun nisa i abbinna. Siempre, ammu ngana na yama i mawag onu i matageno na anana, ngem nu maginnana i pappaduffunna nisa, matagenona nga mattalo nisa i anana anna madukko nisa. Nu makimallo ittam gapa kani Jehova nga Dios, mattattalo ittam nisa anna ikaya tam nga maddukko nisa.—Proverbio 15:8; Santiago 4:8.
KURUG TU IDDEDDUKAN NAKA NA DIOS.
“Ipammakatalo nu sa ngamin i kavurungan nu ta yaya i manangngal nikamu.”—1 Pedro 5:7.
Ikaya na Dios nga makimallo ittam nisa gafu ta iddeddukanna ittam anna ikavurunganna ittam. Ammuna i ngamin nga problema anna pakavurungattam, anna ikayana ittam nga uffunan.
Ta interu pattolay ni Patul David, nakimallo yayya kani Jehova nga Dios para ta uffun anna kinagina nisa i manonono anna mataga-tagenona. (Salmo 23:1-6) Anni i matageno na Dios kani David? Iddeddukan na Dios si David anna sinabbagna i aru nga pakimallona. (Kingngua 13:22) Ginnan gapa na Dios i pakimallo tam ira gafu ta iddeddukanna ittam.
“AYATAK-KU I YAFU GAFU TA TANGNGAGAN NÀ”
Kinagi yatun na nattura ta tadday nga salmo ta Biblia. Siguradu yayya nga naginna na Dios i pakimallona ira, anna yatun i nakaduffun ta nisa. Mas ngana nga naddukko yayya ta Dios anna egga ngana i sikanna tapenu arubangan i problema anna daddam.—Salmo 116:1-9.
Nu siguradu ittam nga ginnan na Dios i pakimallo tam ira, mas nga kana-kanayuttam nga makimallo nisa. Kunnaw i ekspiriensa ni Pedro nga taga-northern Spain. Natay ta aksidente i 19-anios nga anana. Ta tiempo nga fermi i paddaddam ni Pedro, kinagina ta Dios i ngamin anna mamikkaruna nga nipakimallo i banna-bannay anna uffun. Anni i resultana? “Sinabbag ni Jehova i pakimallo ku ira gukaban na pamanna-bannay anna uffun na kapangngurug mi ira ta nikami ni bako ku,” kunni Pedro.
I pamanna-bannay anna uffun na minaggiddu ira nga kokkofuttam i tadday ta tabbag ta pakimallo tam
Ari nga naginnolay i ana ni Pedro ngem naduffunan tu mapia na pakimallo si Pedro anna i familiana. Kinagi ni María Carmen nga atawana: “Naattammakku i paddaddam ku gafu ta pakimallo. Ammù nga malippawanà ni Jehova nga Dios gafu ta nu makimallo ngà, memammo nukua i panageno ku anna kalmadu ngà.”
Manawag ta Biblia anna ta aru ira nga ekspiriensa nga gigginnan na Dios i pakimallo ira. Ngem manawag gapa nga ari nga tabbagan na Dios i ngamin nga pakimallo. Ngatta tabbagan na Dios i karuan nga pakimallo ngem arianna tabbagan i karuan?
a Jehova i ngagan na Dios.—Salmo 83:18, NW.