Sonu Anni i Panuppalan? I Kinagi ni Jesus
Nagigiammu tam ta nappasa nga artikulo nga nu kagian na Biblia i meyannung ta panuppalan na mundo, ari na kayà kagian nga i davvun onu i ngamin nga totolay i manuppal. Nu ari, i maddaggun nga marake nga sistema na ganna-gannug anna i ngamin nga massuporta taw i manuppal. Ngem nakagi kari ta Biblia nu sonu anni i panuppalan naw nga marake nga sistema na ganna-gannug?
AMMUATTAM I DUA NGA KINAGI NI JESUS MEYANNUNG TA PANUPPALAN:
“Yatun tu mappara-parak-kamu, ta arian nu nga ammu i aggaw onu oras.”—MATEO 25:13.
“Magimmugug kamu gafu anna mawag tu sigga-parak-kamu ta arian nu nga ammu i dattal natun nga tiempo.”—MARCOS 13:33.
Awan gafu tu tolay nga makannammu nu sonu anni i panuppalan. Ngem pinili ngana na Dios i “dattal natun nga tiempo”—i eksakto nga “aggaw onu oras”—na panuppalan. (Mateo 24:36) Kayà na kari kagian nga ari tam vuluvuga makannammuan nu aranni ngana i panuppalan? Ari gapa. Kinagi ni Jesus ta disipulos na nga egga ira i mesimmu nga mangipasingan nga araranni ngana i panuppalan.
I SENIALES
Danatun ira nga mesimmu i seniales na “panuppalan.” Kinagi ni Jesus: “Maggegerra noka i nasa-nasion, kunne na gapa ta pappatulan ira. Ay mabbisin i totolay, anna mallunig ta madduma-ruma nga lugar.” (Mateo 24:3, 7) Kinagi na gapa nga egga noka i “palakag nga tulu-tulagan”—epidemia ira. (Lucas 21:11) Masingi-singammu ngana kari nga mesissimmu i kinagi ira ni Jesus?
Sangawe, mazziga-riga i totolay megafu ta gerra, bisin, lunig, anna napakaru ira nga taki. Kagitta na ta 2004, nat-tsunami megafu ta masiki-sikan nga lunig ta Indian Ocean. Ma-225,000 i natay. Ta unag na tallu nga ragun laman, ma-6.9 million i natay ta interu mundo megafu ta COVID-19 pandemic. Kinagi ni Jesus nga aranni ngana i panuppalan nu mesissimmu ngana i kuddanatun.
“PANGURIANAN IRA NGA AGGAW”
Ta Biblia, nagalan nga “pangurianan ira nga aggaw” i tiempo nige na panuppalan. (2 Pedro 3:3, 4) Nakagi ta 2 Timoteo 3:1-5 nga kiteddake i moralidad na totolay ta pangurianan ira nga aggaw. (Innan i kahon nga “I Mesimmu ira Nige na Panuppalan.”) Egga kari i totolay nga kilalam nga makasarili, kakkam, kappaganassing, anna awan tu pangiddu da ta kasittoleda? Seniales gapa yaw nga araranni ngana i panuppalan na mundo.
Kunnasi kabayag i pangurianan ira nga aggaw? Kagian na Biblia nga “pigo” laman yatun nga tiempo. Kabalin natun, daralan na Dios i “totolay nga namarattal toye ta utun na davvun ta panara-daral!”—Nepakannammu 11:15-18; 12:12.
ARANNI NGANA I PARAISO NGA DAVVUN!
Pinili ngana na Dios i aggaw anna oras nga panuppalan na i maddaggun nga marake nga sistema na ganna-gannug. (Mateo 24:36) Yaw paga i makasta nga balita—“arian na nga ikaya tu egga i madaral.” (2 Pedro 3:9) Niddan na ittam tu chansa nga mammuan i uray na anna mattuppal ittam nisa. Ta ngatta? Megafu ta ikaya na nga mapaliag ittam ta panuppalan naw nga mundo tapenu mattolay ittam ta bagu nga mundo sonu paraiso ngana i davvun.
Siniguradu na Dios nga mammuan na ngamin nga totolay nu kunnasi malagum ta bagu nga mundo nga sakup na Pappatulan na. Kinagi ni Jesus nga melayyagayya i mapia nga dumug na Pappatulan na Dios “ta tanga-ravvunan.” (Mateo 24:14) Binillion nga oras nga ilayyagayya anna ituddu na Saksi ira ni Jehova ta interu mundo i mensahe na Biblia nga mangiyawa tu iddanama. Kinagi ni Jesus nga mesimmu yaw nga pallayyagayya ta interu mundo nige na panuppalan.
Aranni ngana mabalin i pammaguray na totolay. Ngem i makasta nga balita, awayyam i mapaliag ta panuppalan na mundo anna makapattolay ta Paraiso nga davvun nga nipromesa na Dios. Mepakanawag ta tumunug nga artikulo nu kunnasi ka makapattolay ta bagu nga mundo.
Mangiyawa tu iddanama i kinagi ira ni Jesus meyannung ta “pangurianan ira nga aggaw”