I Unnug na Pakka-ulu ta Kongregasion

1. Anni i tadday nga rason nu ngatta egga i pattaradday ta familia ni Jehova?

MAGAYAYYA ittam ta parte ittam na familia ni Jehova. Ngatta memammo anna mattaradday i familia tam? Tadday nga rason ay megafu ta kukukuattam ngamin i mawayya tam tapenu irespeto danuri niddan ni Jehova tu autoridad. Nu mas malippawa tam i unnug na pakka-ulu, mas mattaradday ittam.

2. Anni ira nga pakkiavu i tabbagattam taw nga artikulo?

² Taw nga artikulo, gigiammuattam i pakka-ulu ta kongregasion. Tabbagattam gapa i tumunug ira nga pakkiavu: Anni i papel na sister ira? Kurug kari nga ngamin nga brother ay ulu na kada sister? Parehu kari i autoridad na elder ira ta wawwaragi ta unag na kongregasion ta autoridad na ulu na familia ta atawa anna ánana? Ikonsidera tam labbi nu anni nakuan i pagimamma tam ta sister ira.

ANNI NAKUAN I PAGIMAMMA TAM TA SISTER IRA?

3. Kunnasi tam mas maappresia i kukukuan na sister ira?

³ Appresiattam i sister ira nga malallappo ta panangngal ta familiada, pallayyagayya, anna passuporta ta kongregasion. Mas maappresia tam paga ira nu nonopattam nu anni i pagimamma ni Jehova anna ni Jesus ta nira. Makagigiammu tam gapa ta pinattratu ni apostol Pablo ta babbay.

4. Kunnasi nga ipasingan na Biblia nga appresian ni Jehova i babbay kunne na gapa i lallaki?

⁴ Ipasingan na Biblia nga parehu nga appresian ni Jehova i babbay anna lallaki. Mabibbig tatun nga ta kaggawan na apostoles, parehu nga niddan ni Jehova tu masanto nga espiritu i babbay anna i lallaki tapenu makangngua ira tu kappabbaw nga ganna-gannug gitta na paguvovug tu nadduruma nga lengguahe. (King. 2:1-4, 15-18) Parehu gapa nga zinelugan na masanto nga espiritu i babbay anna i lallaki anna makipammaguray ira noka kani Cristo. (Gal. 3:26-29) Parehu nga mabala-balakkan tu mannanayun nga inango ta davvun i babbay anna i lallaki. (Nep. 7:9, 10, 13-15) Parehu gapa nga mallayyagayya anna manuddu i lallaki anna babbay. (Mat. 28:19, 20) Angngariganna, mabibbig tam ta libru na Kingngua i tadday nga sister nga mangngagan tu Priscila. Kavuluna i atawana nga si Akila turi ta nipakanawagda tu mapia i kinakurug kani Apolos nga kuruga edukadu nga lalaki.​—King. 18:24-26.

5. Segun ta Lucas 10:38, 39, 42, kunnasi nga nirespeto ni Jesus i babbay?

⁵ Nikakua ni Jesus i babbay. Tagibadditan na Fariseo ira i babbay. Ariadda nga makibbida nira nu egga i makasingan anna ariadda paga lagu ipakiyuvovug ta nira i Katurakan. Ngem ari nga kunnatun si Jesus. Arianna nga nifuera i babbay nu ipakiyuvovugna i monag ira nga espiritual nga gannug ta disipulosna.b (Bibbigan i Lucas 10:38, 39, 42.) Nivulu gapa ni Jesus i babbay ta pallayyagayyana. (Luc. 8:1-3) Niyawana paga lagu ta babbay i pribilehio nga ipakoli ta apostolesna nga naginnolay ngana yayya.​—Juan 20:16-18.

6. Kunnasi nga nikakua ni apostol Pablo i babbay?

⁶ Kinagi ni apostol Pablo kani Timoteo nga mawag tu ikakuana i babbay. Kinagi ni Pablo nga ‘ikwentana tu yenana i babbaka-bako ira, anna ikwentana gapa tu wawwagina i babbay nga mas abbing anne nisa.’ (1 Tim. 5:1, 2) Dakal i neyuffun ni Pablo kani Timoteo tapenu mabbalin yayya tu manakam ta espiritual, ngem ammuna nga i yena anna i kako ni Timoteo i ollu nga nanuddu nisa meyannung ta ‘masanto ira nga tura.’ (2 Tim. 1:5; 3:14, 15) Kinumusta gapa ni Pablo i sister ira anna kinagina i ngaga-ngagadda ta turana ta Roma. Nasinganna gapa i netuppal danatun nga sister anna mappappabalo yayya ta uffudda ta trabahu nga pallayyagayya.​—Roma 16:1-4, 6, 12; Fil. 4:3.

7. Anni ira nga pakkiavu i tabbagattam?

⁷ Kagitta na nagigiammu tam ta nappasa ira nga parapo, awan tu kagian na Biblia nga mas alinno i sister ta brother ira. Daka-dakal i uffun na minaggiddu anna minangngiyawa ira nga sister ta kongregasion. Mattalo gapa i elder nira ta panguffudda tapenu memammo anna mattaradday i kongregasion. Ngem mawag lagapa nga matabbag danaw nga pakkiavu: Ngatta nu mittan, ikiddaw ni Jehova ta sister ira nga mangiyusa tu panakkag ta ulu? Megafu ta brother laman i mapeggan tu pribilehio nga mabbalin tu elder onu ministerial nga aripan, kebalinan kari natun nga ngamin nga brother ay ulu na kada sister ta kongregasion?

NGAMIN KARI NGA BROTHER AY ULU NA KADA SISTER?

8. Segun ta Efeso 5:23, ngamin kari nga brother ta kongregasion ay ulu na kada sister? Ipakanawag.

⁸ Ari tu ngamin nga brother ta kongregasion ay ulu na kada sister. Si Cristo i ulu na sister ira. (Bibbigan i Efeso 5:23, NW.) I lalaki i ulu na atawana ta unag na familia. Ngem ari tu ulu na yena i bawtisadu nga anana nga lalaki. (Efe. 6:1, 2) Limitadu gapa i autoridad na elder ira ta sister anna brother ira ta kongregasion. (1 Tes. 5:12; Heb. 13:17) Egga gapa ira i single nga sister nga ari ngana makikabbalay ta yama anna yenada. Ngem irespetoda lagapa i mappagana anna i elder ira. Maski kunnatun, si Jesus laman i ulu danatun nga sister, nu kunnasi nga si Jesus laman gapa i ulu na brother ira ta kongregasion.

9. Ngatta nu mittan, mawag nga mangusa i sister ira tu panakkag ta ulu?

⁹ Kurug tu sinunno ni Jehova i lallaki nga mangirollu ta panuddu anna paddayaw ta kongregasion. Arianna niyawa i kunnatun nga autoridad ta babbay. (1 Tim. 2:12) Ngatta? Megafu ta kayàna nga organisadu i kongregasion. Yatun gapa i rason nu ngatta si Jesus laman i sinunnona nga mabbalin tu ulu na lallaki. Ngem nu egga ira i sirkumstansia nga i sister i magangngua ta annungan nga gagangay nga kuan na tadday nga brother, ikiddaw ni Jehova nga mangusa yayya tu panakkag ta ulu.c (1 Cor. 11:4-7) Ipakua yatun ni Jehova ari nga tapenu iyalinno i sister ira, nu ari, tapenu mepasingadda nga irespetoda i unnug ni Jehova ta pakka-ulu. Anni gapa i sakup na autoridad na ulu na familia anna na elder?

I PAPEL NA ULU IRA NA FAMILIA ANNA NA ELDER IRA

10. Ngatta baka manono na tadday nga elder nga mamadday tu bili-bilin para ta kongregasion?

¹⁰ Iddukan na elder ira si Cristo anna iddukadda gapa i ‘karneru’ nga nipatangngal ni Jehova anna ni Jesus ta nira. (Juan 21:15-17) Megafu ta tattangngallan na tadday nga elder i kongregasion, baka nonopanna nga gittana yayya i yama na kongregasion. Baka manonona nga megafu ta egga i kepangngattan na ulu na familia nga mangngua tu bili-bilin tapenu protektan i familiana, kunnatun gapa ta tadday nga elder. Baka manonona i mamadday tu bili-bilin tapenu protektan i karneru na Dios. Ikiddaw gapa na karuan nga wawwaragi ta elder ira nga mabbalin ira tu espiritual nga yamada anna ira i maddesision para ta nira. Ngem parehu kari i autoridad na elder ira ta kongregasion anna na ulu na familia?

11. Anni i napparehuan na papel na ulu na familia ta papel na elder ira?

¹¹ Kinagi ni apostol Pablo nga egga i napparehuan na papel na ulu na familia ta papel na tadday nga elder. (1 Tim. 3:4, 5) Angngariganna, ikaya ni Jehova nga tuttulan na miembro na familia i uluda. (Col. 3:20) Ikayana gapa nga tuttulan na wawwaragi i elder ira. Ekspektan ni Jehova nga iyawa na ulu na familia anna na elder ira i espiritual anna emosional nga pakawagan danuri na tattangngalladda. Kagitta gapa na mapia nga ulu na familia, siguraduan na elder ira nga uffunadda i wawwaragi nga egga i problemada. (Sant. 2:15-17) Tuttuttulan gapa na elder ira anna na ulu na familia i ‘kagian na dob’ nga egga ta Biblia. Ekspektan gapa ni Jehova nga uffunadda i tanakuan nga kuan yatun.​—1 Cor. 4:6.

12-13. Base ta Roma 7:2, anni i nadduman na papel na ulu ira na familia ta papel na elder ira?

¹² Ngem dakal i nadduman na papel na elder ta papel na ulu na familia. Angngariganna, ta elder nga niyawa ni Jehova i annungan nga manangngaw ta hudisial ira nga kaso ta kongregasion, ari tu ta ulu na familia. Niddanna i elder ira tu responsibilidad nga alsan ta kongregasion danuri nakaliwa nga ari mabbabbabawi.​—1 Cor. 5:11-13.

¹³ Ngem egga i niyawa ni Jehova nga autoridad ta ulu ira na familia nga awan ta elder ira. Angngariganna, egga i kepangngattan na ulu na familia nga mangngua tu bili-bilin para ta familiana anna siguraduanna nga matuttul danatun. (Bibbigan i Roma 7:2.) Puede yayya nga mamadday tu bilin nu anni nga oras nga mawag tu nakalubbe ngana i ánana ta baleda nu gabi. Disiplinanna gapa i ánana nu ariadda nga matuttul yatun nga bilin. (Efe. 6:1) Ngem nige nga mamadday tu bili-bilin i minaggiddu nga ulu na familia, mawag labbi nga ikonsultana danatun ta atawana. Ngatta? Megafu ta “tadday ngana laman” ira dua.d—Mat. 19:6.

IRESPETO SI CRISTO BILANG ULU NA KONGREGASION

14. (a) Segun ta Marcos 10:45, ngatta mepangngo laman nga sinunno ni Jehova si Jesus bilang ulu na kongregasion? (b) Anni i papel na Manangngal nga Baggi? (Innan i kahon nga “I Papel na Manangngal nga Baggi.”)

¹⁴ Gukaban na tavvu, ginatang ni Jehova i inango na kada tadday ta kongregasion anna na sinni laman nga egga i pangurugna kani Jesus. (Bibbigan i Marcos 10:45; King. 20:28; 1 Cor. 15:21, 22) Megafu ta niyawa ni Jesus i inangona bilang tavvu, mepangngo laman nga sinunno yayya ni Jehova bilang ulu na kongregasion. Yatutta egga i autoridad ni Jesus nga mangngua tu bili-bilin para ta totolay, familia ira, anna ta interu kongregasion. Siguraduanna gapa nga tuttulattam danatun nga bili-bilin. (Gal. 6:2) Ngem ari laman nga mangngua tu bili-bilin i kuan ni Jesus. Tattangngallan anna ayatanna gapa i kada tadday ta nittam.​—Efe. 5:29.

15-16. Anni i magigiammum ta kinagi ni Sister Marley anna ni Brother Benjamin?

¹⁵ Ipasingan na sister i respetoda kani Cristo nu tuttuladda i direksion ira na lallaki nga natunno nga manangngal ta nira. Aru nga sister i umanugu kani Sister Marley nga taga-United States. Kunna: “Tagibalorakku i annungakku bilang atawa nga babay anna tadday nga sister ta kongregasion. Kanayukku kukukuan i adde na mawayyà tapenu irespeto i niyunnug ni Jehova nga pakka-ulu. Mas mapaleg para niakan nga kuan yatun megafu ta irespetonà na atawà anna na brother ira ta kongregasion anna appresiadda i ngamin nga kukukuakku.”

¹⁶ Mepasingan na brother ira nga malippawada i unnug na pakka-ulu nu ikakuada i sister ira. Kunnaw i kagian ni Brother Benjamin nga taga-England: “Aru i nagigiammù ta komento na sister ira ta study anna ta suhestiodda ira nu kunnasi nga mabbalin tu mas malalaki ta pallayyagayya anna pab-Bible study. Para nio, daka-dakal i meyuffun na kukukuadda.”

17. Ngatta mawag nga irespeto tam i unnug na pakka-ulu?

¹⁷ Nu malippawa anna irespeto na ngamin ta kongregasion—lallaki, babbay, ulu ira na familia, anna elder ira—i unnug na pakka-ulu, memammo i kongregasion. Pinaka-importante, medayaw tam i minaggiddu nga Yama tam ta langi nga si Jehova.​—Sal. 150:6.