Megafu Laman ta Pangngizzi!

DUA nga babbay i lumaka-lakag ta business area ta Baguio City ta Pilipinas. Nasingadda i tadday nga public witnessing cart, ngem ariadda nga inarannian yatun. Nginizzitan ira ni Sister Helen nga agga-taddag ta biko na cart. Tulu-tuloy lagapa nga liminakag i babbay ngem nagustuadda i kakkasta nga pinangngizzi ni Helen.

Turi kua, nab-bus danatun nga babbay ta pallabbeda, tapus egga nasingadda nga kakkadakal nga jw.org nga nakadispley ta tadday nga Kingdom Hall. Neraddammadda nga parehu yatun ta nasingadda ta cart. Nakkazza ira parehu ta bus tapus iningadda i iskediul na study ira na nadduruma nga kongregasion nga nakalista ta trangka na Kingdom Hall.

Nagatende yatun nga dua nga babbay ta tumunug nga study. Ammum kari nu sinni i nasingadda ta pattalludda ta Kingdom Hall? Si Helen! Insigida nga nakilalada nga yayya yuri babay nga kakkasta i pangngizzina. “Turi ta inaranniaddà,” kunni Helen, “mediu mannerbios ngà. Abbo ku nu egga i nakaliwatakku nira.” Ngem niyistoriada kani Helen nga nasingadda bi yayya ta cart.

Na-enjoy da i maki-study anna komfortable ira nga nakistoria ta wawwaragi. Turi ta nasingadda nga mappakarenu i karuan nga wawwaragi kabalin na study, niyavuda nu puede ira nga manguffun. Ari ngana nga maddian ta Pilipinas i tadday tatun nga babbay. Ngem makikkistudy anna mab-Bible study ngana i tadday nira. Megafu laman ngamin yatun ta pangngizzi!