1921—Magatu Nga Dagun Ngana I Nappasa

“ANNI gafu nga trabahu i ekspektattam sangawe nga dagun?” Yatun i pakkiavu na Enero 1, 1921 nga Watch Tower ta Estudiante ira na Biblia. I tabbag tatun nga pakkiavu nga malegan ta Isaias 61:1, 2 i nangiperaddam ta nira ta annungadda nga mallayyagayya. Kunnaw i mabibbig tatun: “Sakan i pinili ni Jehova nga mangilayyagayya tu mapia nga dumug ta mapakalinno . . . , tapenu ilammuyag i dagun na kinapia ni Jehova anna i aggaw na pangibalo na Dios tam.”

MAGUTU NGA PALLAYYAGAYYA

Mawag tu maggutu i Estudiante ira na Biblia tapenu metuppal da i annungadda. Ari laman gare tu “mapia nga dumug” i ilammuyag da ta mapakalinno, nu ari, maski gapa i “aggaw na pangibalo” turi ira ta marake.

Magutu nga nallayyagayya ta Canada si Brother J. H. Hoskin maski nu kokkontradda yayya. Ta gafu na 1921, egga i nasimmuan na ta pamala-balena tu tadday nga ministro na Methodist. Kinagi ni Brother Hoskin ta nisa: “Makasta nu pabbidatta i meyannung ta Katurakan. Maski nu egga i ari ta nga pakka-anugutan, ari ta nakuan nga maddama anna makkofun itta lagapa.” Ngem ari tu kunnatun i nesimmu. Niyistoria ni Brother Hoskin: “Piga minuto kami pagalaman nga makka-istoria, gavva nga sinuntu [na ministro] i puerta. Abbo ku nu mabakka paga lagu i bidru natun.”

“Umay ka tari ta ari nga Cristiano tapus ira i kibbidammu!” nikulle na ministro. Ari nga nattattannug si Brother Hoskin ngem ta panaw na, kunna ta baggi na, ‘Gitta na ari lagu tu Cristiano i kinibbidà e!’

Ta kommanan na, turi ta nassermon yatun nga ministro ta simbahadda, marake i kinakkagi na meyannung kani Brother Hoskin. Kinagi ni Brother Hoskin: “Kinagi na ta totolena nga ta ngamin nga minay tatun nga ili, sakan kanu i pinakaladdug yayya nga mepappangngo laman nga matay ngà.” Ngem ari vuluvuga naganassing si Brother Hoskin tatun. Ari yayya nga nagimmang anna aru nga totolay i nalayyagayyan na. Niyammung na paga: “Kakayà ku i mallayyagayya tari. Kakkagian paga lagu na karuan nga totolay niakan, ‘Ammù tu tolay naka na Dios!’ tapus kayà dà paga nga uffunan ta pakawagakku ira.”

PERSONAL STUDY ANNA FAMILY STUDY

Nipublisa na Estudiante ira na Biblia i Bible study program ira ta The Golden Age tapenu mapprogreso i interesadu ira.a Tadday tatun i Juvenile Bible Study program. Egga ira i pakkiavu tatun nga awayya na nga pabbidan na magana kavulu i ána da. Iyavu na mappagana ta ána da danatun nga pakkiavu tapus uffunadda ira nga alegan i tabbag ta Biblia. Nammuan na abbarabbing i simple ira nga gannug meyannung ta Biblia megafu ta pakkiavu ira gitta na, “Piga nga libru i egga ta Biblia?” Neprepara gapa ira nga mabbalin tu magutu ta pallayyagayya megafu ta pakkiavu ira gitta na, “Ekspektan kari na kada Cristiano nga mapeppersigi ira?”

Egga gapa ira i mamappanono nga pakkiavu para ta adulto ira nga Estudiante na Biblia ta programa nga Advanced Studies in the Divine Plan of the Ages. Malegan i tabbag tatun ira nga pakkiavu ta ollu nga libru na Studies in the Scriptures. Rinivu i nabbenefisio taw ira nga programa, ngem turi ta Disiembre 21, 1921 niyanunsio na The Golden Age nga meyemmang ngana danatun nga programa. Ngatta?

BAGU NGA LIBRU!

I libru nga *The Harp of God*

Card na pahina ira nga mawag tu mabibbig

Card nga egga ira i pakkiavu na

Nanono na brother ira nga mangirollu nga mas makasta nu egga i topiko-por-topiko nga paggigiammu ta Biblia. Yatutta nipublisa da i libru nga The Harp of God turi ta Nobiembre 1921. Nagenrol ta The Harp Bible Study Course danuri interesadu nga nanga ta kunnatun nga libru. Makoffun yatun nga paggigiammu tapenu mammuadda i “gakkag na Dios nga iddan tu mannanayun nga inango i totolay.” Kunnasi kari yatun?

Nu makala tu kopia i tadday nga tolay tatun nga libru, egga gapa i malawa na tu baddi nga card. Nepay tatun i pahina ira na libru nga mawag tu bibbigan na. Tapus ta tumunug nga ligguan, egga mangana i malawa na estudiante tu card nga egga ira i pakkiavu na meyannung tari ta binibbig na anna nepay ngana gapa tatun i pahina ira nga mawag tu itunug na nga bibbigan tari ta libru.

Ta unag na 12 nga ligguan, linigguan nga makalawa i tadday nga estudiante tu bagu nga card nga ipatulug na kongregasion ira nga aranni ta nira. Maruddu tu mannakam onu danuri ari ngana makangay ta babalay i mangipatulug tu card ira. Kunnaw i niyistoria ni Anna K. Gardner nga taga-Millvale, Pennsylvania, U.S.A.: “Marigatan ngana nga lumakag i manang ku nga si Thayle. Pia ngana laman ta nepublisa i The Harp of God. Mas aru ngana i makua na ta ministerio gukaban na panguffun na ta pangipatulug ta card ira nga egga ira i pakkiavu na.” Sonu mabalin ngana yatun nga paggigiammu na estudiante, egga i mabbisita ta nisa tu wagi nga manguffun ta nisa tapenu umaru paga i pakannammu na ta Biblia.

TRABAHU TA MAPPANGE

Ta ultimu na 1921, nattura si Brother J. F. Rutherford ta ngamin nga kongregasion. Kinagi na nga “mas aru i nalayyagayyan anna mas efektibo i pallayyagayya para ta Pappatulan sangawe nga dagun kumpara ta nappasa nga daga-ragun.” Tapus niyammung na paga: “Aru paga i mawag nga makua. Pagaramman nu gafu i tanakuan tapenu manguffun taw nga makakkasta nga trabahu.” Kunnatun mismu i kingngua na Estudiante ira na Biblia. Mas magutu nga nilayyagayya da i meyannung ta Pappatulan ta 1922.

Magutu nga Kokkofun

Nipasingan na Estudiante ira na Biblia i pangaya ta wawwaragi gukaban na pakka-uffu-uffudda. Magutu ira nga kokkofun nga “meyana ta tiempo na ziga” gitta na masingattam ta tumunug nga istoria.—Prov. 17:17.

Turi ta Martes, Mayo 31, 1921, egga i lalaki nga ngisi i lahi na nga maddian ta Tulsa, Oklahoma, U.S.A. Naakusan yayya nga biniktima na kanu i tadday nga babay nga furaw i lahi na tapus nefuku yayya. Megafu tatun, inatake na 1,000 nga furaw nga lallaki i mas baddi nga grupo na ngisi nga lallaki. Nagadde i parralaban ta paddianan na ngisi ira nga magalan tu Greenwood. Nakokotan anna natuggi i maturu tu 1,400 nga babalay anna pallakuan tatun. Kinagi na balita nga 36 nga tolay laman i natay, ngem posible nga nagadde yatun ta 300. Nagalan yatun nga riot nga Tulsa Race Massacre.

Inistoria ni Brother Richard J. Hill i nesimmu. Tadday yayya nga ngisi nga Estudiante na Biblia anna maddian ta Greenwood. “Nesimmu yatun nga riot ta gabi na study mi. Egga i naginna mi nga napparalattug ta sentro na siudad kabalin na study mi. Tulu-tuloy yatun adde ta dis-oras ngana na gabi.” Ta kommanan na, Mierkules, Hunio 1, mas paga narrake i situasion. “Kinagi na karuan nga minay ta balay mi nga nu kayà mi nga safe kami, umay kami ngana insigida ta Convention Hall.” Minay si Brother Hill kavulu i atawa na anna i lima tu ána na ta Convention Hall ta Tulsa. Ma-3,000 tu ngisi nga lallaki anna babbay i minay tatun tapenu maprotektan na National Guard. Zinog ira na gobiernu tapenu pagimmangan i riot.

Megafu tatun nga mesissimmu, egga i magutu nga kingngua na furaw i lahi na nga si Brother Arthur Claus. Kinagi na: “Turi ta nabalitaakku nga egga ngana ta Greenwood i totolay ira nga makkoko anna manuggi tu balay, nanono ku nga umay tari tapenu kumustan i kofukku nga si Brother Hill.”

Si Arthur Claus kavulu i 14 nga abbarabbing nga sinudduan na ta libru nga The Harp of God

Paddattal na tari, nadanganan na i konsu palattug nga karruba anna kofun ni Brother Hill nga furaw gapa i lahi na. Ngem abbo natun nga lalaki nga tadday si Brother Claus ta mar-riot. Nikulle na: “Ngatta egga ka taw?”

Istorian ni Brother Claus: “Nu ari na nagustuan i nitabbag ku, baka pinalattugan nà. Siniguradù ta nisa nga kofun nà ni Brother Hill anna namippiga ngà ngana minay ta baleda.” Nabantayan tu mapia natun nga lalaki anna ni Brother Claus i balay ni Brother Hill kontra ta makkoko ira.

Nakannammuan gabbalaman ni Brother Claus nga egga ta Convention Hall si Brother Hill kavulu i familia na. Ngem egga nakkagi kani Brother Claus nga tapenu mepanaw na da Brother Hill, kawagan na labbi i permit nga firmadu ni General Barrett nga officer in charge tatun. Kinagi ni Brother Claus: “Mariga i maki-appointment ta general. Ngem turi ta kinagì ta nisa nu anni i kayà ku nga mesimmu, niyavu na: ‘Mabantayammu kari yaw nga familia anna meyawa mu i pakawagadda?’ Wan kukku ngay.”

Kabalin nga nala ni Brother Claus i permit, nadderechu yayya ta Convention Hall tapus nipasingan na yatun ta guardia. Ngem nakaddag i guardia. Kinagi na: “Kunnasi ka nakapappafirma ta general? Ammum kari tu sikaw pagalaman i ollollu nga mangilawan tu maski sinni tawe?” Nalegan gabbalaman ni Brother Claus anna na guardia si Brother Hill pati i familia na. Nattakay ira ngamin ta kotche ni Brother Claus tapus limibbe ngana ira.

Siniguradu ni Brother Claus nga safe i familia da Brother Hill. Makasta i efekto na ta tanakuan turi ta nasingadda i gutu anna pangaya ni Brother Claus ta wawwaragi. Inistoria na: “Yari karruba ni Brother Hill nga nakavulu ku ta pabbantay ta baleda, mas nirespeto na i Saksi ira. Mas aru gapa nga totolay i naginteres ta Pappatulan megafu ta awan tu pangireruma tam ta lahi anna pantay-pantay ittam laman ngamin nga totolay na Dios.”

a Nabbalin tu Consolation i ngagan na The Golden Age turi ta 1937 anna Awake! gapa turi ta 1946.