“Ari Makkurang ta Anni Laman nga Mapia Danuri Magala-aleg Kani Jehova”

1. Anni i mariga nga nesimmu kani David?

NATTAMMANG si David megafu ta mappeligro i inango na. Nigato gare yayya nga patayan ni Saul nga makapangngua nga patul ta Israel. Turi ta kawagan ni David i makan, minay yayya ta siudad na Nob nu sitaw nakkiddaw yayya tu lima laman nga pan. (1 Sam. 21:1, 3) Turi kua, nattagu yayya anna i suddalu na ira ta tadday nga kueba. (1 Sam. 22:1) Ngatta tamma kunnatun i nesimmu kani David?

2. Ngatta nabbalin tu marake i sinaddag ni Saul? (1 Samuel 23:16, 17)

² Sobra i passil ni Saul kani David megafu ta sikat yayya anna namippiga ngana yayya nga nangaffu ta gerra. Ammu ni Saul nga nawawan na i fabor ni Jehova megafu ta arian na yayya nga sinuttul anna ammu na gapa nga pinili ni Jehova si David tapenu mabbalin saw tu patul. (Bibbigan i 1 Samuel 23:16, 17.) Tatun nga tiempo, si Saul lagapa i patul na Israel yatutta aru lagapa i suddalu anna taga-suporta na. Mawag gafu nga mattammang si David. Nanono kari ni Saul nga mafugaddan na i gakkag na Dios nga pabbalinan tu patul si David? (Isa. 55:11) Awan tu kinagi na Biblia. Ngem yaw i siguradu: Delikadu i sinaddag ni Saul. Magga maffu i kumontra ta Dios!

3. Anni i natageno ni David maski nu mariga i situasion na?

³ Mapakalinno si David. Ari na nga pinili nga mabbalin tu patul na Israel. Si Jehova i nappili ta nisa. (1 Sam. 16:1, 12, 13) Ikala-kalussaw ni Saul si David. Ngem ari nga pinaliwa ni David si Jehova maski nu nappeligro i inango na. Ari gapa yayya nga narreklamo maski nu balabaddi i suplay na kanan na anna mawag tu mattagu yayya ta kueba. I kurug, posible nga durante ta pattagu ni David tatun nga kueba, nitura na i makakkasta nga kansion na paddayaw, nelagum tatun i tema nga teksto tam: “Ari makkurang ta anni laman nga mapia danuri magala-aleg kani Jehova.”​—Sal. 34:10, NW.

4. Anni i pakkiavu ira nga tabbagattam, anna ngatta importante danatun?

⁴ Aru sangawe ta massesserbi kani Jehova i makkurang ta kanadda anna karuan paga nga inaggaw nga pakawagadda.b Kuru-kurug yatun mas ngana sangawe ta pandemic. Ekspektattam nga mas mazziga paga i situasiottam durante nga umara-aranni i dakal nga ziga. (Mat. 24:21) Makasta gafu nu tabbagattam yaw nga appa nga pakkiavu: Anni i kayà kagian na “ari makkurang ta anni laman nga mapia” si David? Ngatta mawag tu makontentu ittam? Ngatta makapattalo ittam nga tangngallan ittam ni Jehova? Kunnasi ittam makapapprepara sangawe para ta mappange?

“AWAN NGANA TU AWAGAK-KU”

5-6. Kunnasi ittam moffunan na Salmo 23:1-6 tapenu malippawa tam i kinagi ni David nga “ari makkurang ta anni laman nga mapia” i masserbi ira ta Dios?

⁵ Anni i kayà kagian ni David nga “ari makkurang ta anni laman nga mapia” i masserbi ira kani Jehova? Turi ta nitura ni David i Salmo 23, kunnatun gabbalaman ira nga uvovug i niyusa na. Moffunan gafu ittam natun nga salmo tapenu malippawa tam i kinagi ni David. (Bibbigan i Salmo 23:1-6.) Nigafu ni David yatun nga salmo gukaban na pakkagi na: “I YAFU [nga Jehova] i pastor ku; awan ngana tu awagak-ku.” Ta tumunug ira nga versikulo natun nga salmo, kinagi paga ni David i nabala-balor ira nga gannug gitta na espiritual ira nga bendision nga nalawa na megafu ta si Jehova i pastor na. Igigiya ni Jehova si David “ta dalan na katunungan” anna ari na yayya vuluvuga nga pagurayan ta makasta anna marake nga tiempo. Ammu gapa ni David nga makkaproblema lagapa yayya maski nu pagibannaggan yayya ni Jehova ta “malavva nga kakaddattan.” Mittan, makkafi i nono na nga gitta na lumakag yayya ta “karibbattan” anna magga egga ira kumokkontra ta nisa. Ngem megafu ta si Jehova i pastor ni David, ‘awan vuluvuga tu paganassingan na.’

⁶ Anni gafu i kayà kagian na “ari makkurang ta anni laman nga mapia” si David? Kayà kagian natun nga egga ngana kani David i ngamin nga pakawagan na ta espiritual. Ari nga nakadepende i pagayayya na ta material ira nga gannug. Kontentu si David ta iyayawa ni Jehova. I bendision anna i proteksion gare ni Jehova i pinaka-importante ta nisa.

7. Segun ta Lucas 21:20-24, anni i mariga nga situasion nga neparubang ta Cristiano ira ta Judea?

⁷ Masingattam ta kinagi ni David nga mawag tu mepangngo i pagimamma tam ta material ira nga gannug. Awayya tam gapa magenjoy ta material ira nga pakkukua tam, ngem ari nakuan tu yatun i prayoridad tam. Yatun i importante nga kinakurug nga nalippawa na ollu-siglo ira nga Cristiano nga maddian ta Judea. (Bibbigan i Lucas 21:20-24.) Inabisowan ira ni Jesus nga duttal saw i tiempo nga ‘nalevutan ngana na suddalu ira’ i siudad na Jerusalem. Sonu mesimmu ngana yatun, mawag tu ‘makkarela ira ta kavukiran.’ Mapaliag ira nu kuadda yatun ngem mawag tu aru i isakrifisio da. Ta nappasa nga piga ragun, kunnaw i kinagi na Ang Bantayan: “Pinanawadda i komadda ira anna i babaleda. Ariadda gapa inaku i material nga pakkukua da ta babaleda. Mattalo ira ta proteksion anna suporta ni Jehova anna pinagollu da i paddayaw da ta nisa anne ta maski anni nga ari kuruga importante.”

8. Anni i importante nga magigiammu tam ta nesimmu ta ollu-siglo ira nga Cristiano ta Judea?

⁸ Anni i importante nga magigiammu tam ta ollu-siglo ira nga Cristiano ta Judea? Kunnaw paga i kinagi na Ang Bantayan: “Ta mappange, awayya na nga mapurueban i pagimamma tam ta material ira nga gannug. Danatun kari i pinaka-importante ta nittam onu mas importante ta nittam i mepaliag megafu ta matalo ittam ta Dios? Sonu duttal i panuppalan, posible nga meparubang ittam ta pazziga-riga anna pakkukurang ta material nga pakawagattam. Mawag gafu nga sigga-paran ittam nga kuan i maski anni kagitta na ollu-siglo ira nga Cristiano nga nattammang naggafu ta Judea.”c

9. Kunnasi naka mapagaram na tabarang ni apostol Pablo ta Hebreo ira?

⁹ Maimajimmu kari nu kunnasi kaziga para ta Cristiano ira tagga nga panawan i ngamin anna maddian ta bagu nga lugar? Mawag tu mattalo ira nga iyawa ni Jehova i pakawagadda. Anni tamma i makoffun ta nira tapenu makua da yatun? Lima ragun nige nga palevutan na Romano ira nga suddalu i Jerusalem, nangiyawa si apostol Pablo tu makoffun ira nga tabarang ta Hebreo ira. Kinagi na: “Iyarayyu nu i attolay nu ta pangaya ta kuartu, anna makkontento kamu ta anni laman nga egga nikamu. Ta kinagi na Dios, ‘Ariat-taka vuluvuga nga panawan, ni et-taka nga pagurayan.’ Yatun tu awayya tam nga kagian nga sigga-ammakatalo, ‘I Yafu i manguffun niakan, awan tu ek-ku paganassingan. Anni i makua na tolay niakan?’” (Heb. 13:5, 6) Siguradu nga mas mabi para turi ira ta nangiyaplika ta tabarang ni Pablo nga mabbalin tu kontentu ta mas simple nga pattolay ta bagu nga paddianadda. Siguradu ira nga iyawa ni Jehova i pakawagadda. Ipasiguradu gapa ni Pablo ta nittam nga makapattalo ittam nga iyawa gapa ni Jehova i pakawagattam.

“KONTENTO ITTAM NGANA TATUN”

10. Anni i sekreto ni Pablo nga kinagi na ta nittam?

¹⁰ Parehu gabbalaman i nitabarang ni Pablo kani Timoteo anna magaplika gapa yatun ta nittam. Nitura na: “Yatun i gafu na tu basta egga i kanan anna passinnut-tam, kontento ittam ngana tatun.” (1 Tim. 6:8) Kayà kari kagian natun nga ariattam ngana awayya kuman tu masingngo nga makan, mapeggan tu makasta nga paddianan, onu gumatang sinaggi-mittan tu bagu nga sinnun? Ari tu yatun i punto ni Pablo. Kayà kagian ni Pablo nga mawag tu makontentu ittam ta maski anni laman nga egga ta nittam. (Fil. 4:12) Yatun i sekreto ni Pablo nu ngatta magayayya yayya. I relasiottam gafu ta Dios i pinaka-importante nga pakkukua tam, ari tu i material ira nga gannug nga egga ta nittam.​—Hab. 3:17, 18.

11. Anni i magigiammu tam ta kinagi ni Moises ta Israelita ira meyannung ta pabbalin tu kontentu?

¹¹ Awayya na nga madduma i pagimamma tam ta pagimamma ni Jehova ta pakawagattam. Ikonsidera tam i kinagi ni Moises ta Israelita ira kabalidda nga maddian ta katanapan ta 40 nga dagun. Kinagi na: “Binendisionan nakamu ni Jehova nga Dios nu ta ngamin nga kingngua nu. Ammu na i ngamin nga nesimmu ta pallakag nu taw nga alalawa nga katanapan. Egga nikamu i Dios nu nga si Jehova taw nga 40 dagun, anna ari kamu nakkurang ta anni laman.” (Deut. 2:7) Tatun nga 40 nga dagun, niyawa ni Jehova i manna ta Israelita ira tapenu kanadda. Ari gapa vuluvuga nga naddana i sinnun nga niyusa da ta pappanaw da ta Ehipto. (Deut. 8:3, 4) Awayya na tu minammatan na karuan nga ari makalanno danatun nga probision. Ngem niperaddam ni Moises nga egga ngana ta Israelita ira i ngamin nga pakawagadda. Magayayya si Jehova nu makontentu ittam anna appresiattam maski i simple ira nga probision na. Imammatattam nakuan danatun bilang bendision anna mappappabalo ittam tatun ira.

MATTALO NGA TANGNGALLAN NAKAMU NI JEHOVA

12. Anni i mangipasingan nga nattalo si David kani Jehova ari tu ta baggi na?

¹² Ammu ni David nga matalo si Jehova anna tangngallan na tu mapia danuri i mangaya ta nisa. Maski nu mappeligro i inango na turi ta nitura na i meka-34 nga Salmo, masiki-sikan i pangurug ni David kani Jehova yatutta makasiguradu yayya nga “tangngallan na anghel danuri i mangikakua ta YAFU.” (Sal. 34:7) Nigitta ni David i anghel ni Jehova ta tadday nga suddalu nga makkampu ta katanapan nga kanayun na nga sifutan nu egga i kalaban. Maski nu malalaki nga suddalu si David anna nipromesa ni Jehova ta nisa nga mabbalin yayya tu patul, ari yayya nga nattalo ta abilidad na nga mamalsi onu mangiyusa tu espada tapenu affutan i kalaban. (1 Sam. 16:13; 24:12) Mattalo si David nga i anghel ni Jehova ay ‘paliaran na danuri i mangikakua ta YAFU.’ Ari tam ekspektan nga mammilagro si Jehova sangawe tapenu maprotektan ittam. Ngem ammu tam nga nu mattalo ittam kani Jehova, malawa tam noka i mannanayun nga inango maski matay ittam sangawe.

13. Sonu atakeyan ittam na Gog na Magog, ngatta imammatadda ittam tu awan tu kalaban-laban na, ngem ngatta ari ittam nakuan maganassing? (Innan i letratu ta vungun.)

¹³ Araranni ngana nga mapurueban i pattalo tam ta pakawayya ni Jehova nga protektan ittam. Sonu atakeyan ngana na Gog na Magog onu alyansa na nasa-nasion i totolay na Dios, baka manono tam nga mapateda ittam. Mawag nga kumbinsidu ittam nga mawayya ittam nga ipaliag ni Jehova anna talaga kuan na yatun. Imammatan ittam noka na nasa-nasion nga awan tu kalaban-laban tam anna awan tu mapprotekta ta nittam. (Eze. 38:10-12) Awan gare tu armas tam anna ari ittam nasanay tapenu makiggera. Abbo noka na nasion-nasion nga mabi da laman ittam nga maffu. Ariadda masingan nga tattangngallan ittam na napakaru nga anghel ni Jehova. Ngem ammu tam yatun megafu ta egga i pangurug tam. Kunnasi gapa gare ira masingan na nasa-nasion? Awan mabba tu pangurug da ta Dios. Talaga makaddagan saw ira sonu masingadda nga makillaban para ta nittam i armada na anghel ta langi!—Nep. 19:11, 14, 15.

MAPPREPARA SANGAWE PARA TA MAPPANGE

14. Anni i makua tam sangawe tapenu makapapprepara para ta mappange?

¹⁴ Anni i makua tam sangawe tapenu makapapprepara para ta mappange? Ollu, ari tam nakuan nga prayoridad i material ira nga gannug megafu ta duttal saw i aggaw nga ibattattam danatun. Mawag gapa tu makontentu ittam anna i relasiottam nakuan kani Jehova i pinakamamagayayya ta nittam. Nu mas nga kannammuattam i Dios tam, mas makumbinsi ittam ta pakawayya na nga protektan ittam sonu umatake i Gog na Magog.

15. Ngatta makasiguradu si David nga kanayun yayya nga uffunan ni Jehova?

¹⁵ Innattam nu anni paga i nakoffun kani David anna nu kunnasi yatun makoffun ta nittam tapenu makapapprepara ittam para ta problema ira. Kinagi ni David: “I pia na YAFU ay en-nu mismu nga kakkapan, ta mapalag i tolay nga yaya i en-na pakiyegutan!” (Sal. 34:8) Ipasingan natun ira nga uvovug nu ngatta makasiguradu si David nga uffunan yayya ni Jehova. Kanayun nga mattalo si David kani Jehova anna ari na yayya vuluvuga nga pinagurayan. Ta kabbing gapa ni David, kinalaban na i higante nga Filisteo nga si Goliat anna kinagi na tatun nga kananassing nga suddalu: “Taw mismu nga aggaw iyawa naka ni Jehova ta limà.” (1 Sam. 17:46) Turi ta masserbi si David kani Patul Saul, namippiga yayya nga nigato nga patayan ni Saul. Ngem “suportadu yayya ni Jehova.” (1 Sam. 18:12) Dati ngana nga inuffunan ni Jehova si David yatutta makasiguradu yayya nga uffunan yayya ni Jehova maski anni paga i problema na.

16. Anni ira i makua tam tapenu ‘makakkapattam’ i kinapia ni Jehova?

¹⁶ Nu kanayun ittam nga mappegiya kani Jehova sangawe, mas makumbinsi ittam ta pakawayya na nga uffunan ittam ta mappange. Mawag tam i pangurug anna pattalo kani Jehova nu mappakannammu ittam ta boss tam nga magatende ittam ta asembli onu kombension. Mawag tam gapa yatun nu ikiddaw tam nga manguli i iskediul tam ta trabahu tapenu maka-atende ittam ta ngamin nga study anna mas aru i tiempo tam ta ministerio. Kunnasi nu manaki yatun na boss tam tapus malsa ittam ta trabahu tam? Mangurug kari ittam nga ari na ittam vuluvuga nga panawan onu pagurayan ni Jehova anna kanayun na nga iyawa i pakawagattam? (Heb. 13:5) Aru nga wawwaragi nga egga ta ngamin-tiempo i mamakurug nga inuffunan ira ni Jehova ta tiempo nga kuruga kawagadda yayya megafu ta matalo si Jehova.

17. Anni i teksto tam ta dagun 2022, anna ngatta mepangngo yatun?

¹⁷ Megafu ta kanayun ittam nga uffunan ni Jehova, ariattam maganassing ta mesimmu ira ta mappange. Ari na ittam vuluvuga nga pagurayan na Dios tam basta pagolluattam i Pappatulan. Kayà na Manangngal nga Baggi nga nakaprepara ittam sangawe para ta mesimmu ira ta mappange anna mattalo ittam kani Jehova nga arian na ittam vuluvuga nga pagurayan. Yayya nga napili da i Salmo 34:10 bilang teksto tam ta dagun 2022: “Ari makkurang ta anni laman nga mapia danuri magala-aleg kani Jehova.”