Sirib nga Mangigiya ta Pattoletam

1. Ngatta kawagattam i sirib nga maggafu ta Dios? (Proverbio 4:7)

NU NAGANGNGUA ka ngana tu importante nga desision, siguradu nga nakimallo ka tapenu mapeggakka tu sirib nga kawagammu. (Sant. 1:5) Nitura ni Patul Solomon: “I ka-uto [onu sirib] i pinaka-importante nga gannug.” (Bibbigan i Proverbio 4:7.) Ari nga tukuyan ni Solomon i sirib nga maggafu ta tolay, nu ari, i sirib nga maggafu kani Jehova nga Dios. (Prov. 2:6) Ngem talaga kari nga makaduffun i sirib nga maggafu ta Dios ta problema tam ira sangawe? Wan, makaduffun, gitta na magigiammu tam taw nga artikulo.

2. Kunnasi ittam mabbalin tu kurug nga masirib?

² Mabbalin ittam tu kurug nga masirib nu gigiammuattam anna iyaplika tam i tuttuddu na dua nga lalaki nga kuruga masirib. Ikonsidera tam labbi si Solomon. Kagian na Biblia nga “niddan na Dios si Solomon tu nerumu-ruma nga sirib anna pakalippawa.” (1 Pat. 4:29) Mekadua, ikonsidera tam si Jesus, i pinakamasirib nga nattolay tawe ta davvun. (Mat. 12:42) Kunnaw i neprofesiya meyannung kani Jesus: “Mattalupaddian noka nisa i espiritu ni Jehova, i espiritu na sirib anna na pakalippawa.”​—Isa. 11:2.

3. Anni i gigiammuattam taw nga artikulo?

³ Niddan na Dios tu sirib si Solomon anna si Jesus yari tu nakeyawa ira tu makoffun nga tabarang meyannung ta gannug ira nga importante nittam ngamin. Taw nga artikulo, ikonsidera tam i tallu tatun: I kapeggan tu balanse nga pagimamma ta kuartu, sekular nga trabahu, anna baggi tam.

I BALANSE NGA PAGIMAMMA TA KUARTU

4. Anni i nakkaduman ni Solomon anna ni Jesus?

⁴ Kitarriku si Solomon anna maddian yayya ta makakkasta anna komfortable nga balay. (1 Pat. 10:7, 14, 15) Baddi gapa i pakkukua ni Jesus anna awan tu sarili na nga balay. (Mat. 8:20) Ngem parehas nga balanse i pagimamma da ta material nga gannug megafu ta tattadday i Naggafuanan na sirib da—si Jehova nga Dios.

5. Anni i balanse nga pagimamma ni Solomon ta kuartu?

⁵ Kinagi ni Solomon nga “proteksion” i kuartu. (Ecl. 7:12) Nu egga gare i kuartu tam, magatang tam i pakawagattam ira, kunne na gapa i karuan ta kayà tam. Ngem maski nu kitarriku si Solomon, nalippawa na nga egga ira i mas importante anne ta kuartu. Nitura na: “I makasta nga ngagan [onu, “i makasta nga reputasion,” ftn.] ay mas nakuan nga pilian anne ta sobra nga kinariku.” (Prov. 22:1) Nasingan gapa ni Solomon nga ari tu kontentu ta pakkukua da danuri iddukadda i kuartu. (Ecl. 5:10, 12) Kinagi na paga nga ariattam nakuan nonopan nga kuartu i pinaka-importante megafu ta maski anni karu na kuartu tam, awayya na tu insigida nga mofu yatun.​—Prov. 23:4, 5.

6. Anni i pagimamma ni Jesus ta material ira nga gannug? (Mateo 6:31-33)

⁶ Balanse i pagimamma ni Jesus ta material ira nga gannug. Nagayayya yayya ta makan anna ta inuman. (Luc. 19:2, 6, 7) Ta tadday nga okasion, nagangngua yayya tu kapianan nga binarayang, i ollu ta ngamin nga milagro na. (Juan 2:10, 11) Ta aggaw na patay na, mangina i sinnun nga agga-yosa na. (Juan 19:23, 24) Ngem ari tu material nga gannug i pinaka-importante kani Jesus. Kinagi na ta disipulos na: “Awan tu tolay nga mapparehu i passerbi na ta dua nga pakiyafuan. . . . Arian na nga awayya tu maggiddan i pangaya ta Dios anna pangaya ta kuartu.” (Mat. 6:24) Nituddu ni Jesus nga nu ipoppollu tam i Pappatulan, siguradu nga iyawa ni Jehova i kawagattam ira.​—Bibbigan i Mateo 6:31-33.

7. Kunnasi nabenefisiowan i tadday nga wagi ta balanse nga pagimamma na ta kuartu?

⁷ Aru nga wawwaragi tam i nabbenefisio ta pangiyaplika da ta masirib nga tabarang ni Jehova meyannung ta kuartu. Tadday tatun i bagitolay nga si Daniel. Kinagi na: “Turi ta katinedyer ku, nadisidì nga i pinaka-importante ta pattolè ay i passerbi kani Jehova.” Megafu ta pinasimple ni Daniel i pattolena, nakapav-volunteer yayya ta disaster relief anna ta Bethel. Kinagi na paga: “Ariakku vuluvuga pabbabawyan i pinilì. Napakaru nakuan i kuartù nu yatun i nipoppollù ta pattolè. Ngem magga ariakku nakuan nakilala i kokkofukku ira sangawe. Megafu gapa ta nipoppollù i Pappatulan, kurug nga magayayya ngà. Ari nga magatang na kuartu i bendision ira ni Jehova nio.” Siguradu gafu nga mas mabenefisiowan ittam nu ipoppollu tam i espiritual ira nga gannug anne ta kuartu.

I BALANSE NGA PAGIMAMMA TA SEKULAR NGA TRABAHU

8. Ngatta makagi tam nga balanse i pagimamma ni Solomon ta trabahu? (Eclesiastes 5:18, 19)

⁸ Kinagi ni Solomon nga “regalu na Dios” i pagayayya ta malappo nga pattrabahu. (Bibbigan i Eclesiastes 5:18, 19.) Nitura na: “Egga i bentaha ta kada klase na malappo nga pattrabahu.” (Prov. 14:23) Napakurug ni Solomon nga fustu danatun nga uvovug. Malappo yayya nga trabahador! Nangipataddag yayya tu babalay, nammula tu ubas ta koman, anna nagangngua tu laguerta ira anna pagunnugan tu danum. Nangipataddag gapa yayya tu siudad ira. (1 Pat. 9:19; Ecl. 2:4-6) Siguradu nga nagayayya yayya ta malappo nga pattrabahu na! Ngem ammu ni Solomon nga tapenu mabbalin yayya tu kurug nga magayayya, mawag nga egga paga i kuan na. Aru i kingngua na para kani Jehova. Angngarigan na, nirolluan na i kepataddag na makakkasta nga templo ni Jehova. Pitu dagun yatun nga proyekto! (1 Pat. 6:38; 9:1) Napakaru i netuppal ni Solomon, ngem nalippawa na nga i passerbi kani Jehova i pinaka-importante. Nitura na: “I pattuppalan na gannug, kabalin nga naginna i ngamin, ay: Maganassing ka ta kurug nga Dios anna tuppalammu i bili-bilin na.”​—Ecl. 12:13.

9. Kunnasi nga nipasingan ni Jesus nga ari tu i sekular nga trabahu na i ipoppollu na?

⁹ Malappo nga trabahador si Jesus. Nakkarpinteru yayya ta katinedyer na. (Mar. 6:3) Siguradu nga nagayayya i magana ni Jesus megafu ta panguffun na nga mattrabahu tapenu meyawa i kawagan na dakal nga familia da. Perfekto si Jesus, yari tu perfekto gapa i trabahu na. Yayya nga magustuan na aru nga tolay i kalidad na trabahu na! Nagayayya si Jesus ta trabahu na. Ngem maski malappo yayya nga trabahador, siniguradu na nga kanayun nga egga i oras na nga masserbi kani Jehova. (Juan 7:15) Turi kua, kunnaw i nitabarang na ta nilayyagayyan na ira: “Ari kamu nga mabbanna-bannag nga magaleg ta kanan nga madaral, nu ari ta kanan nga mangiyawa ta inango nga adde ta ngangangay.” (Juan 6:27) Ta Sermon ni Jesus ta Vukig, kinagi na: “Magunnug kamu lagu ta kukua ira nga masserbi nikamu ta langi.”​—Mat. 6:20.

10. Anni i awayya na nga luttuag nga problema nu malappo ittam nga mattrabahu?

¹⁰ Nu iyaplika tam i masirib nga tabarang ni Jehova, mapeggattam tu balanse nga pagimamma ta sekular nga trabahu. Bilang Cristiano, natudduattam nga mallallappo anna ‘mattrabahu ta matunung.’ (Efe. 4:28) Masingan na boss tam nga mapammakatalakkan anna malappo ittam yari tu appresiadda yatun. Megafu tatun, awayya na tu magovertime ittam megafu ta aya tam nga makasta nakuan i paningan na boss tam ta Saksi ira ni Jehova. Ngem nu kuattam yatun, awayya na tu mofu ngana i oras tam nga para nakuan ta familia tam anna ta espiritual ira nga aktibidad. Mawag tu magangngua ittam tu panguloli tapenu mabbalin ittam tu balanse.

11. Anni i nagigiammu na tadday nga brother meyannung ta balanse nga pagimamma ta trabahu?

¹¹ Naobserba mismu na kabataan nga si Brother William i importansia na pabbalin tu balanse ta sekular nga trabahu. Kunnaw i kagian ni William meyannung ta dati nga boss na nga elder: “[Yaw nga brother] ay makakkasta i ehemplo na ta balanse nga pagimamma ta trabahu. Malappo yayya anna kakayà yayya na kostumer na ira megafu ta de-kalidad i trabahu na. Ngem nu larga ngana, ibattang na i trabahu na tapus usan na ngana i oras anna sikan na para ta familia na anna kani Jehova. Ammum kari nga yayya i tadday ta pinakamagayayya nga tolay nga kilalà?”b

I BALANSE NGA PAGIMAMMA TA BAGGI TAM

12. Kunnasi nga nipasingan ni Solomon nga balanse i pagimamma na ta baggi na, ngem kunnasi na nga nawawan yatun?

¹² Turi ta matalo paga si Solomon kani Jehova, balanse i pagimamma na ta baggi na. Turi ta mabbing yayya anna mamegafu pagalaman nga mappatul, ammu na i limitasion na ira anna nakkiddaw yayya tu giya kani Jehova. (1 Pat. 3:7-9) Ammu na gapa i peligro na pabbalin tu palagopog. Nitura na: “I pappakatannang ay marresulta ta kadaral, anna i pappalagopog ay marresulta ta kesiddukal.” (Prov. 16:18) Turi kua, kaddaraddam ta ari na balaman neyaplika i tabarang na. Nappakatannang yayya anna ari na sinuttul i bili-bilin na Dios. Angngarigan na, nedog ta Hebreo nga patul nga ‘arian na manga tu aru nga atawa para ta baggi na, tapenu ari meyawawan i futu na.’ (Deut. 17:17) Ari nga ginigginna ni Solomon yatun nga dob. Nanga yayya tu 700 nga atawa anna 300 i babay na. Aru ta nira ay pagano! (1 Pat. 11:1-3) Baka nanono yaw ni Solomon: “Awan tu problema. Sakan bahala.” Ngem turi kua, naekspiriensa gabbalaman ni Solomon i marake ira nga efekto na ari pattuppal kani Jehova.​—1 Pat. 11:9-13.

13. Anni i magigiammu tam ta kinapakalinno ni Jesus?

¹³ Balanse i pagimamma ni Jesus ta baggi na anna minappakalinno yayya. Nige na minay taw ta davvun, napakaru i kappabbaw nga netuppal na ta passerbi kani Jehova. Gukaban ni Jesus, “naparo ngamin i ganna-gannug nga egga ta langi tuange ta utun na davvun.” (Col. 1:16) Turi ta nabawtisowan yayya, posible nga neraddamman na i ngamin nga netuppal na turi ta kavulu na paga i Yama na. (Mat. 3:16; Juan 17:5) Ngem ari nga nappakatannang si Jesus megafu laman tatun. Ari na gapa vuluvuga ninono nga mas malalaki yayya anne ta tanakuan. Kinagi na lallagu ta disipulos na nga minay yayya ta davvun, ‘ari nga tapenu maserbian, nu ari, masserbi anna iyawa na i inango na tapenu matavvu i aru nga totolay.’ (Mat. 20:28) Kinagi na gapa nga awan tu awayya na nga makua nga maguroray. (Juan 5:19) Kuruga mapakalinno si Jesus! Makasta yayya nga parigan.

14. Anni i magigiammu tam kani Jesus meyannung ta balanse nga pagimamma ta baggi tam?

¹⁴ Sinudduan ni Jesus i disipulos na nga balanse nakuan i pagimamma da ta baggi da. Mittan, kunnaw i nipasiguradu na ta nira: “I vu nu ay nabilang ngamin.” (Mat. 10:30) Kuruga makapabannay yatun mas ngana nu negatibo i pagimamma tam ta baggi tam. Ipasingan gare natun nga kuruga interesadu ta nittam i Yama tam ta langi anna nabalor ittam ta nisa. Nipamavulun ni Jehova nga maddayaw ittam ta nisa anna imammatan na nga mepangngo ittam nga mattolay tu mannanayun ta napabagu nga mundo. Ariattam nakuan vuluvuga kuestionan yatun.

15. (a) Anni i nitabarang na Ang Bantayan meyannung ta balanse nga pagimamma ta baggi tam? (b) Base ta picture ira ta pahina 24, anni ira nga bendision i ari tam nga malawa nu nakafokus ittam ta baggi tam?

¹⁵ Maturu tu 15 dagun ngana i nappasa, nitabarang na Ang Bantayan nga balanse nakuan i pagimamma tam ta baggi tam: “Siempre, manaki tam nga atatannang i paningattam ta baggi tam, adde ta mabbalittam ngana tu opog. Ngem manaki tam gapa nga alalinno ngana mabba i paningattam ta baggi tam, adde ta madismaya ngana ittam. Ikagumattam nakuan gafu nga balanse i pagimamma tam ta baggi tam. Ammu tam nakuan i abilidad tam ira anna i limitasiottam ira. Kunnaw i kagian na tadday nga sister: ‘Ari gapa tu sobra i dake ku, ngem ari tu sakan i pinakamasippo. Egga ira i kalalakiakku anna egga gapa ira i pakkafiakku. Kunnatun ittam ngamin.’”c Makasta gafu nu ikagumattam nga balanse i pagimamma tam ta baggi tam.

16. Ngatta iddan ittam ni Jehova tu masirib nga tabarang?

¹⁶ Iddan ittam ni Jehova tu masirib nga tabarang gukaban na Uvovug na. Ayatan na ittam anna kayà na nga magayayya ittam. (Isa. 48:17, 18) I pinakamasirib gafu nga desision nga kurug nga mamagayayya ta nittam ay i pangipoppollu tam ta uray ni Jehova. Nu kunnatun i kuattam, melilli ittam ta aru nga problema nga pappasan danuri na ipoppollu da i kuartu, sekular nga trabahu, onu i baggi da. Determinadu nakuan gafu i kada tadday nittam nga mabbalin tu masirib tapenu mapagayayya tam i futu ni Jehova!—Prov. 23:15.