Magana ira​—Uffunan i Ána Nu nga Ayatan si Jehova

1-2. Ipakanawag nu ngatta mas maappresia tam i karuan nga prinsipio ta Biblia nu manguli i situasiottam.

TA AGGAW na kasal, ginnan tu mapia na guapo nga nobio anna guapa nga nobia i nebase-Biblia nga palappa meyannung ta pagatawa. Familiar ira ta teksto ira tatun nga palappa. Ngem namegafu ta aggaw na kasal da, nabbalin ngana tu mas importante yatun ira nga teksto para ta nira. Ngatta? Megafu ta iyaplika da ngana yatun bilang magatawa.

² Kunnatun gapa i mesimmu nu mabbalin ngana tu magana i Cristiano nga magatawa. Ta pappasa na tiempo, posible nga aru ngana nga palappa i naginna da meyannung ta pamadakal tu ana. Ngem sangawe, mas importante ngana ta nira i tabarang tatun ira nga palappa. Egga ngana gare i sarili da nga ana nga padakalladda. Talaga dakal yatun nga responsibilidad! Nu nanguli i situasiottam, normal laman nga mas maappresia tam i karuan nga prinsipio ira ta Biblia. Yatun i tadday tu rason nu ngatta bibbigan na maddayaw ira kani Jehova i Katurakan. Pannonopadda yatun tu mapia “kada aggaw” ta interu pattoleda, gitta na nepakua ta patul ira na Israel.​—Deut. 17:19.

3. Anni i gigiammuattam taw nga artikulo?

³ Sikamu nga magana, i panuddu ta ána nu meyannung kani Jehova i tadday ta kadakallan nga pribilehio na tadday nga Cristiano. Ngem ari nga makalanno nga basta tudduan nu laman ira meyannung ta Dios tam. Mawag tu uffunan nu gapa ira nga ayatan si Jehova. Kunnasi nu nga makua yatun? Taw nga artikulo, gigiammuattam i appa nga prinsipio ta Biblia nga makoffun ta nikamu. (2 Tim. 3:16) Ikonsidera tam gapa nu kunnasi nga nabbenefisio i karuan megafu ta niyaplika da i tabarang na Biblia.

APPA NGA PRINSIPIO NGA MAKOFFUN TA MAGANA IRA

4. Anni i tadday nga prinsipio nga makoffun ta magana ira tapenu matudduadda i ána da nga ayatan si Jehova? (Santiago 1:5)

⁴ Ollu nga prinsipio: Mappegiya kani Jehova. Kiddawan nu kani Jehova i sirib onu ka-uto nga kawagan nu tapenu moffunan nu i ána nu nga ayatan si Jehova. (Bibbigan i Santiago 1:5.) Yayya i kapianan nga Persona nga mangiyawa tu tabarang. Ngatta? Ollu, si Jehova i pinaka-ekspiriensadu nga magana. (Sal. 36:9) Mekadua, kanayun nga makabenefisio i masirib ira nga tabarang na.​—Isa. 48:17.

5. (a) Anni ira nga uffun i iyayawa na organisasion ni Jehova ta magana ira? (b) Base ta video, anni i nagigiammum ta pamadakal ni Brother anna Sister Amorim ta ána da?

⁵ Gukaban na Uvovug na anna na organisasion na, napakaru i iyawa ni Jehova nga espiritual ira nga makan nga nebase ta Biblia tapenu moffunan nu i ána nu nga ayatan si Jehova. (Mat. 24:45) Angngarigan na, aru i mabibbig nu nga praktikal nga tabarang ta serye na artikulo nga “Uffun Para ta Familia” nga available ngana sangawe ta website tam. Piga dagun bi nga nepublisa yatun ta magazina nga Malukag! Aru gapa nga video ta jw.org i makoffun ta magana ira ta pangiyaplika da ta tabarang ni Jehova ta pamadakal ta ána da.b—Prov. 2:4-6.

6. Anni i nakagi na tadday nga yama meyannung ta tabarang ira nga malawa da na atawa na maggafu ta organisasion ni Jehova?

⁶ Aru nga magana i mappappabalo ta uffun nga iyayawa ni Jehova gukaban na organisasion na. Kunnaw i kagian na yama nga si Joe: “Tallu i ana mi. Makagì nga mariga nga padakallan ira ta kinakurug. Kanayukkami nga makimallo na atawà nga uffunan nakami ni Jehova. Kada kua, sassakto gapa nga egga i mallawan nga artikulo onu video nga makoffun ta situasiommi. Talaga kanayun nga dakal nga uffun i tabarang ni Jehova.” Napakurug ni Joe anna na atawa na nga makoffun yatun ira nga probision tapenu maddukko i ána da kani Jehova.

7. Ngatta mawag tu kuan na magana i ngamin nga mawayya da tapenu mabbalin tu makasta nga ehemplo? (Roma 2:21)

⁷ Mekadua nga prinsipio: Mabbalikka tu makasta nga ehemplo. Masingi-singan na ána i kukukuan na magana da anna maruddu nga parigadda yatun. Siempre, awan tu perfekto nga magana. (Roma 3:23) Ngem mawag nga kuan na magana ira i adde na mawayya da tapenu mabbalin tu makasta nga ehemplo ta ána da. (Bibbigan i Roma 2:21.) Kunnaw i komento na tadday nga yama: “Kagitta na espongha i abbarabbing. Masussu da i ngamin.” Kinagi na paga: “Ikagi da ta nittam nu makkaduma i kukukuattam ta ituttuddu tam ta nira.” Nu kayà tam gafu nga ayatan na ána tam si Jehova, mawag tu masingi-singadda nga dakal i pangaya tam kani Jehova.

8-9. Anni i magigiammum ta niyistoria da Andrew anna Emma?

⁸ Aru i makua na magana ira tapenu matudduan i ána da nga ayatan si Jehova. Kunnaw i istorian na 17-anios nga si Andrew: “Kanayun nga ituddu niakan na magana ku nga importante i pakimallo. Kada gabi maski nu nakimallo ngà ngana, makimallo lagapa uli si Papa kavulu ku. Kanayun nga iperaddam nikami na magana mi: ‘Maski mamippiga kamu makibbida kani Jehova, okay laman.’ Megafu tatun, nabbalin ngana gapa tu importante ta niakan i pappakimallo. Ari ngà ngana nga marigatan nga umaranni kani Jehova anna para ta nio, minaggiddu nga yama si Jehova.” Sikamu nga magana, kanayun nu nakuan daddamman nga makoffun ta ána nu i mismu nga pangaya nu kani Jehova tapenu ayatadda gapa yayya.

⁹ Kunnaw gapa i istoria ni Emma. Pinanawan ira na yama na nga napakaru i gatu na yari tu mawag nga pagan yatun na yena na. Kinagi ni Emma: “Mamippiga nga nakkukurang si Mama tu kuartu, ngem kanayun na nga istorian niakan nga tattangngallan ni Jehova i aripan na ira anna iyawa na i pakawagadda. Talaga masingi-singakku ta pattolay ni Mama nga kumbinsidu yayya tatun. Kukukuan na i ituttuddu na niakan.” Anni i magigiammu na mappagana ira tatun? Awayya nu i mabbalin tu makasta nga ehemplo maski ta mariga ira nga situasion.​—Gal. 6:9.

10. Anni ira i chansa na Israelita ira nga magana tapenu kibbidan i ána da? (Deuteronomio 6:6, 7)

¹⁰ Mekatallu nga prinsipio: Kanayun nu nga kibbidan i ána nu. Nibilin ni Jehova ta Israelita ira nga magana gari nga mawag tu kanayudda nga tudduan i ána da meyannung ta nisa. (Bibbigan i Deuteronomio 6:6, 7.) Kada aggaw, aru i chansa da nga kibbidan i ána da anna tudduan ira nga ayatan si Jehova. Angngarigan na, aru nga oras nga makkavulu i abbing nga lalaki nga Israelita anna i yama na ta pammula onu pagapit. Puede gapa nga aru nga oras nga kavulu na wagi na nga babay i yena da ta paddage, pallaga, anna ta karuan paga nga trabahu ta baleda. Durante nga makka-uffun i mappagana anna i ána ira, mapabbiridadda i aru nga importante nga topiko. Angngarigan na, awayya na nga mapabbidadda i pia ni Jehova anna nu kunnasi na nga uuffunan i familia da.

11. Anni i makasta nga tiempo nga makibbida na Cristiano ira nga magana i ána da?

¹¹ Nanguli ngana i tiempo tam. Ta aru nga nasion, ari nga makkavulu i magana anna i ána da ta interu nga aggaw. Awayya na gare nga mattrabahu i magana tapus magiskuela gapa i ána. Megafu tatun, mawag nga magaleg i mappagana ira tu chansa tapenu kibbidan i ána da. (Efe. 5:15, 16; Fil. 1:10) Makasta nga tiempo i family worship tapenu kuan i kunnatun. Kagian na kabataan nga si Alexander: “Kanayun nga iyunnug ni Papa i paf-family worship mi. Manaki na nga egga i mangistorbo ta tiempo nga makkaravulu kami. Kada kabalin na paggigiammu mi, maggiristoria kami.”

12. Anni nakuan i daddamman na ulu na familia nu maf-family worship ira?

¹² Nu ulu ka na familia, anni ira i puede nga kuammu tapenu ma-enjoy na ána mu i family worship? Puede nga gigiammuan nu i makakkasta anna bagu nga publikasion nga Magayayya nga Mattolay tu Mannanayun! Makoffun yatun nga libru tapenu ma-enjoy nu i paggiristoria nu. Gakkag nu nga ikagi nikamu na ána nu i kurug nga mataga-tageno da, yatutta ari nu nakuan ira nga poryan onu ivuya ta tiempo na family worship nu. Ari kamu nakuan gapa nga mapporay nu egga i kagian na ána nu nga mekontra ta Biblia. Mappabalo kamu lallagu ta ikagi da ta nikamu i kurug nga mataga-tageno da. Pagaramman nu gapa ira nga kanayudda nga kuan yatun. Mas moffunan nu ira nu ammu nu i kurug nga mataga-tageno da.

13. Anni paga i karuan nga chansa nga moffunan na magana i ána da tapenu maddukko kani Jehova?

¹³ Sikamu nga mappagana, kada aggaw kamu nakuan nga magaleg tu chansa tapenu uffunan i ána nu nga maddukko kani Jehova. Ari laman nakuan nga ta tiempo na pangi-Bible study nu ta nira nga ituddu nu i meyannung ta minaggiddu nga Dios tam. Kunnaw i kagian na yena nga si Lisa: “Usu-usammi i pinaratu tapenu metuddu ta ána mi i meyannung kani Jehova. Angngarigan na, nu egga i kuan na kitu mi nga mamagalo ta ána mi, ituddu mi ta nira nga minaggayayya nga Dios si Jehova anna kayà na gapa nga magayayya ittam.”

14. Ngatta mawag nga uffunan na magana i ána da nga mappili tu mapia nga kokkofun? (Proverbio 13:20)

¹⁴ Meka-appa nga prinsipio: Uffunan nu i ána nu nga mappili tu mapia nga kokkofun. Manawag i kagian na Uvovug na Dios nga egga i mapia onu marake nga efekto ta nittam na kokkofuttam. (Bibbigan i Proverbio 13:20.) Sikamu nga mappagana, ammu nu kari nu sinni i kokkofun na ána nu? Nammammu nu kari ngana ira anna nakavulu? Anni i makua nu tapenu moffunan nu i ána nu nga makikkofun turi ira ta mangaya kani Jehova? (1 Cor. 15:33) Moffunan nu ira nga mappili tu mapia nga kokkofun nu imbitan nu ta aktibidad ira na familia nu danuri makasta i espiritualidad da.​—Sal. 119:63.

15. Anni i makua na mappagana tapenu moffunadda i ána da nga mappili tu mapia nga kokkofun?

¹⁵ Niyistoria na yama nga si Tony i kingngua da na atawa na tapenu uffunan i ána da nga mappili tu mapia nga kokkofun. Kinagi na: “Ta nappasa nga daga-ragun, inimbita mi na atawà ta balemi i brother anna sister ira nga madduruma i edad da. Makkaravulu kami nga kuman tapus mevulu ira ta family worship mi. Yatun i kingngua mi tapenu makilala mi danuri mangaya kani Jehova anna massesserbi nisa nga sigga-pagayayya. Dakal nga pribilehio nga naddian ta balemi i manangngal ira ta sirkito, misionero, anna karuan paga. Daka-dakal i neyuffun na ta ána mi na ekspiriensa da, talikarag da, anna na pabbalidda nga minassakrifisio. Megafu tatun, naparanni i ána mi kani Jehova.” Sikamu nga mappagana, ikaguman nu nakuan nga uffunan i ána nu nga mappili tu mapia nga kokkofun.

ARIAN NU MAWAWANAN TU IDDANAMA!

16. Kunnasi nu kinagi na ana nu nga ari na kayà i masserbi kani Jehova?

¹⁶ Kunnasi nu maski kingngua nu ngana i ngamin, tadday ta ána nu i nakkagi nga ari na kayà i masserbi kani Jehova? Ari nu nonopan nga nakkurang kamu bilang magana. Niddan ittam ngamin ni Jehova tu lallaguray nga mappili nu passerbiattam yayya onu ari. Maski i ana mu, egga gapa i lallagurena. Nu pinanawan na ana mu si Jehova, ariammu mawawanan tu iddanama nga manoli yayya. Daddamman i ilustrasion meyannung ta ana nga neyawawan. (Luc. 15:11-19, 22-24) Napakaru i kingngua natun nga ana tu marake. Ngem nanoli gabbalaman yayya. Awayya na tu kagian na karuan: “Istoria laman yatun. Talaga mesimmu kari gapa i kunnatun?” Wan, mesimmu! Kakurugan na, yatun i nesimmu ta kabataan nga si Elie.

17. Kunnasi naka mapatuyag na ekspiriensa ni Elie?

¹⁷ Kinagi ni Elie meyannung ta magana na: “Kiningngua da i ngamin tapenu matudduan ngà nga iddukan si Jehova anna i Uvovug na, i Biblia. Ngem ta katinedyer ku, narrebelde ngà.” Nabbalin tu doble-kara i pattolay ni Elie. Pinurueban na magana na nga uffunan yayya ngem ari na ira ginigginna. Turi ta nanaw yayya ta baleda, marake ngana i kinikkingngua na. Ngem maski kunnari, iistorian na lapa i meyannung ta Biblia ta tadday ta barkada na. Kinagi ni Elie: “Kada istoriakku i meyannung kani Jehova ta kofukku, mas nga manono ku si Jehova. Ari insigida nattugu i vukal na kinakurug nga pinappursigian na magana ku nga imula ta futù. Ngem sisinu gabbalaman nga nattalovu yatun.” Ta pappasa na tiempo, nanoli gabbalaman si Elie ta kinakurug.c Siguradu nga nagayayya i magana na ta nituddu da ta nisa nga iddukan si Jehova ta kabbinna pagalaman!—2 Tim. 3:14, 15.

18. Anni i makagim ta magana ira nga mappursigi nga tudduan i ána da nga ayatan si Jehova?

¹⁸ Sikamu nga magana, neddakkamu tu makakkasta nga pribilehio nga mamadakal tu bagu nga henerasion na maddayaw kani Jehova. (Sal. 78:4-6) Ari tu mapaleg yatun nga trabahu, yari tu makomendakkamu ta pappursigi nu nga uffunan i ána nu! Nu itulu-tuloy nu nga kuan i ngamin tapenu uffunan i ána nu nga iddukan si Jehova anna padakallan nu ira ta tuddu anna tabarang na, masiguradu nu nga magayayya nikamu i minaggiddu nga Yama tam ta langi.​—Efe. 6:4.