‘Makitappaddiakka Niakan ta Paraiso’

1. Nige nga natay si Jesus, anni i kinagi na ta tadday nga kriminal ta biko na? (Lucas 23:39-43)

MAGATTATTAM ta taki si Jesus anna i dua nga kriminal ta biko na durante nga magimmamatay ngana ira. (Luc. 23:32, 33) Parehu nga ininsulto natun nga dua nga kriminal si Jesus yayya nga magga ari ira tu disipulo na. (Mat. 27:44; Mar. 15:32) Ngem nanguli i tadday tatun nga kriminal. Kinagi na: “Jesus, daddammam-mà noka nu mammaguray ka ngana!” Simibbag si Jesus: ‘Ta kakurugan na kagiakku nikaw toye nga aggaw, makitappaddiakka niakan ta Paraiso.’ (Bibbigan i Lucas 23:39-43.) Awan tu mabibbig tam ta Biblia nga kinurug natun nga kriminal i mensahe meyannung ta “Pammaguray na Dios” ta langi nga nilayyagayya ni Jesus. Awan gapa vuluvuga tu kinagi ni Jesus nga makatallung noka yatun nga lalaki ta Pappatulan ta langi. (Mat. 4:17) I kakkagian ni Jesus ay meyannung ta Paraiso ta mappange taw ta davvun. Ngatta makagi tam yatun?

2. Ngatta tadday nga Judio yari i kriminal nga nabbabawi?

² Dakal i posibilidad na nga tadday nga Judio i kriminal nga nabbabawi. Kinagi gare natun nga kriminal tari ta kavulu na: “Ari ka nga maganassing ta Dios? Para-parehu ittam nga makastigo.” (Luc. 23:40) Tadday laman nga Dios i dayawan na Judio ira ngem aru nga dios i dayawan na Hentil ira. (Ex. 20:2, 3; 1 Cor. 8:5, 6) Nu ari nakuan tu Judio danatun nga dua nga kriminal, i neyavu nakuan ay “Ari ka nga maganassing ta dios ira?” Fuera tatun, nedog si Jesus ta “totolay na Israel nga neyarig ta karneru nga nakkawawan,” ari tu ta Hentil ira. (Mat. 15:24) Ta Israelita nga kinagi na Dios nga paginnolayan na noka danuri natay. Posible nga ammu yatun na kriminal nga nabbabawi megafu ta masingan ta kinagi na nga nononopan na nga paginnolayan noka ni Jehova si Jesus tapenu mammaguray ta Pappatulan na Dios. Awayya na nga iniddanaman natun nga lalaki nga paginnolayan gapa yayya na Dios.

3. Anni i awayya na nga nanono nari na mabbabawi nga kriminal ta kinagi ni Jesus nga Paraiso? Ipakanawag. (Genesis 2:15)

³ Megafu ta Judio yari i kriminal nga nabbabawi, posible nga ammu na i meyannung kadi Adan anni Eva anna i Paraiso nga nagipayyan ni Jehova ta nira. Yayya nga magga nanono natun nga kriminal nga i Paraiso nga kinagi ni Jesus ay tadday noka nga makakkasta nga hardin taw ta davvun.—Bibbigan i Genesis 2:15.

4. Gafu ta kinagi ni Jesus ta kriminal, anni nakuan i pannonopattam?

⁴ Gafu tari ta kinagi ni Jesus ta kriminal, pannonopattam nakuan nu kunnasi tamma i mattolay noka ta Paraiso. I kurug, makka-ideya ittam meyannung ta Paraiso nu gigiammuattam i memammo nga pammaguray ni Patul Solomon. Kakkagian na Biblia nga mas makawayya si Jesus anne kani Solomon. Ekspektattam gafu nga makipattrabahu noka si Jesus tari ira ta kakavulu na nga mammaguray tapenu pabbalinan tu makakkasta nga paraiso i davvun. (Mat. 12:42) Mawag gafu nga ammuan na “tanakuan nga karneru” nu anni i kuadda tapenu kualipikadu noka ira nga mattolay tu mannanayun ta Paraiso.—Juan 10:16, NW.

KUNNASI NOKA I PATTOLAY TA PARAISO?

5. Anni ira i maimajimmu nga pattolay ta Paraiso?

⁵ Anni i maimajimmu nga pattolay ta Paraiso? Baka maimajimmu nga egga ka ta makakkasta nga hardin kagitta na hardin ta Eden. (Gen. 2:7-9) Baka manono mu gapa i profesiya ni Mikias nga i kada totolay noka na Dios ay ‘magitubang ta lirum na fun na ubas na anna ta lirum na fun na igos na.’ (Mik. 4:3, 4) Baka manono mu gapa i teksto ira na Biblia nga makkagi tu abundansia noka i maka-makan. (Sal. 72:16; Isa. 65:21, 22) Yari tu baka maimajimmu nga egga ka ta makakkasta nga hardin, aggitubang ka ta lamesa nga napappannu tu masingngo ira nga makan. Kitabbangug gapa i magug mu ira nga mulu-mula anna lappaw ira. Magga maginnam gapa i paggaralo na kafamiliam anna na kokkofummu ira, kunne na gapa danari napaginnolay megafu ta magayayya kamu ngamin nga makkaravulu. Ari laman tu imahinasion ngamin danatun. Siguradu nga mesimmu danatun taw ta davvun. Ngem egga gapa saw i kappagayayya nga trabahuattam ta Paraiso.

6. Anni noka ira i trabahuattam ta Paraiso? (Innan i letratu.)

⁶ Pinaratu ittam ni Jehova nga magayayya ta pattrabahu tam. (Ecl. 2:24) Angngarigan na, sonu Tanga-rivu Dagun nga Pammaguray ni Cristo, napakaru noka i mawag nga trabahuattam. Magawag gare noka tu passinnun, makan, anna paddianan danuri mepaliag ta dakal nga ziga kunne na gapa i minillion nga mapaginnolay. Magga enjoy tam saw i napakaru nga trabahu nga mawag tu kuattam tapenu meyawa danatun. Nu kunnasi nga nebilin kadi Adan anni Eva nga pakastadda i hardin nga paddianadda, makapagayayya gapa noka i trabahu tam nga pabbalinan tu paraiso i davvun. Ituddu tam gapa saw i meyannung kani Jehova anna ta gakkag na tari ira ta minillion nga napaginnolay kunne na gapa danuri matalo nga nattolay gari nige na tiempo ni Jesus. Fugurammu yatun!

7. Ta anni ittam nga makapakkomfiansa, anna ngatta?

⁷ Sonu Paraiso, memammo saw i pattoletam, egga ngamin i pakawagattam, anna organisadu saw. Ngatta makapakkomfiansa ittam tatun? Egga ngana gare i niyawa ni Jehova tu angngarigan nu kunnasi i pattolay sonu mammaguray i Ana na. Masingattam yatun ta pammaguray ni Patul Solomon.

PAMMAGURAY NI PATUL SOLOMON—ANGNGARIGAN NA PATTOLAY TA PARAISO

8. Anni ira i ketuppalan na kinagi ni Patul David ta Salmo 37:10, 11, 29? (Innan i “Pakkiavu na Mabbibbig Ira” taw nga isyu.)

⁸ Nipetura na Dios kani Patul David nu kunnasi i pattolay nu mammaguray i tadday nga ma-uto anna matalo nga patul. (Bibbigan i Salmo 37:10, 11, 29.) Kanayuttam nga ibibbig i Salmo 37:11 nu ipakiyuvovug tam i mappange nga Paraiso. Fustu gapa yatun megafu ta inusa ni Jesus danatun nga uvovug ta Sermon na ta Vukig nga mangipasingan tu egga paga i ketuppalan natun ta mappange. (Mat. 5:5) Nipasingan gapa na kinagi ira ni David nu kunnasi i pattolay ta tiempo na pammaguray ni Patul Solomon. Turi ta si Solomon i nammaguray ta Israel, kuruga memammo i totolay na Dios anna maddian ira ta davvun nga “bastante ta gatto anna issi” yari tu egga ngana ngamin ta nira i kawagadda. Kinagi na Dios: “Nu tulu-tuloy nga tuppalan nu i dorob ku . . . , mangirattal ngà tu imammo ta davvun, anna magidda kamu anna awan tu mamaganassing nikamu.” (Lev. 20:24; 26:3, 6) Nesimmu danatun nga promesa turi ta si Solomon i nappatul ta Israel. (1 Cro. 22:9; 29:26-28) Nipromesa gapa ni Jehova nga “mapawan” i marake nga totolay. (Sal. 37:10) I nakagi gafu ta Salmo 37:10, 11, 29 ay natuppal gari anna egga paga i ketuppalan na ta mappange.

9. Anni i nakagi na reyna na Sheba meyannung ta pammaguray ni Patul Solomon?

⁹ Nadumug na reyna na Sheba i meyannung ta imammo anna kinariku na Israelita ira turi ta si Solomon i patul da. Yayya nga nabbiahe tu ararayyu yatun nga reyna mappange ta Jerusalem tapenu masingan na mismu yatun. (1 Pat. 10:1) Kabalin nga nilelevu na reyna i pappatulan ni Solomon, nakagi na: “Awan paga balo ta gaddua i nepakannammu ta niakan! . . . Magayayya i totolem ira, anna magayayya gapa i dorobammu ira nga kanayun nga tumaddag ta arubammu anna magginna ta ka-uto mu!” (1 Pat. 10:6-8) Ngem danatun nga paddia-paddian ta pammaguray ni Patul Solomon ay tadday laman nga angngarigan na kuan noka ni Jehova para ta totolay sonu mammaguray i Ana na nga si Jesus.

10. Ngatta makagi tam nga ararayyu nga mas makawayya si Jesus anne kani Solomon?

¹⁰ Ararayyu nga mas makawayya si Jesus anne kani Solomon. Imperfekto gare si Solomon anna egga ira i nakua na nga madammo nga liwa nga namarriga ta totolay na Dios. Ngem si Jesus ay perfekto nga Mammaguray nga ari vuluvuga makaliwa. (Luc. 1:32; Heb. 4:14, 15) Nattalupaddian si Jesus nga matalo ta Dios maski nu kitazziga ira i kapurueba nga inattamman na megafu kani Satanas. Napakurug ni Jesus nga ari yayya vuluvuga makangngua tu liwa, ni tu magangngua yayya tu maski anni nga gannug nga mamarriga ta matalo ira nga sakup na. Si Jesus gafu i kakastan nga Patul nga mammaguray ta nittam.

11. Sinni noka ira i manguffun kani Jesus?

¹¹ Makipattrabahu noka kani Jesus i 144,000 nga kakavulu na nga mammaguray tapenu uffunadda yayya nga iyawa i pakawagan na totolay anna tuppalan i gakkag ni Jehova para ta davvun. (Nep. 14:1-3) Aru nga kapurueba anna ziga-riga i nappasa-pasadda turi ta mattolay paga ira ta davvun, yatutta mantindiadda noka i pappasa-pasan danuri na sakup da. Anni ira i espesipiko nga annungan danatun nga kakavulu ni Jesus?

ANNI IRA I ANNUNGAN NOKA NA NAZELUGAN IRA?

12. Anni nga trabahu i ipakua noka ni Jehova ta 144,000?

¹² Mas aru noka i trabahu nga mepakua kani Jesus anna ta kakavulu na nga mammaguray anne ta trabahu nga nepakua kani Solomon. Sinangngallan ni Patul Solomon i pakawagan na minillion nga totolay ta tattadday laman nga nasion. Ngem danuri noka mammaguray ta Pappatulan na Dios ay manguffun tapenu iyawa i pakawagan na binillion nga totolay ta interu nga mundo. Talaga daka-dakal nga pribilehio i niyawa ni Jehova ta 144,000!

13. Anni i nelagum ta trabahu na kakavulu ira ni Jesus nga mammaguray?

¹³ Kagitta ni Jesus, masserbi gapa noka i 144,000 bilang patul anna papari. (Nep. 5:10) Turi ta sakup paga na Mosaiko nga Dob i Israelita ira, i papari ira i manguffun ta totolay tapenu kanayun nga mapia i gawa-gawayyadda ta pisikal anna ta espiritual. Megafu ta i Dob ay ‘aninu laman na mapia ira nga ganna-gannug nga mappange nga duttal,’ rasonable gafu nga nonopan nga manguffun noka danuri kakavulu ni Jesus nga mammaguray tapenu kanayun nga mapia i gawa-gawayyan na totolay na Dios ta pisikal anna ta espiritual. (Heb. 10:1) Kunnasi noka makikomunika danatun nga patul anna papari ta sakup ira na Pappatulan nga egga taw ta davvun? Ari tam paga ammu yatun sangawe. Ngem maski anni paga i iyunnug noka ni Jehova, komfiansa ittam nga ta Paraiso, malawa noka danuri na egga ta davvun i giya nga kawagadda.​—Nep. 21:3, 4.

ANNI I MAWAG TU KUAN NA “TANAKUAN NGA KARNERU” TAPENU KUALIPIKADU IRA NGA MATTOLAY TA PARAISO?

14. Anni i relasion na “tanakuan nga karneru” anna na “baddi nga ipastoran”?

¹⁴ Inagalan ni Jesus danuri grupo na makipammaguray ta nisa bilang “baddi nga ipastoran.” (Luc. 12:32, NW ) Tapus egga gapa i tanakuan nga grupo nga inagalan na bilang “tanakuan nga karneru.” Yatun nga dua nga grupo ay parte na tattadday nga kural. (Juan 10:16, NW ) Sangawe, makkavulu ngana ira nga mattrabahu anna tulu-tuloy yatun adde sonu mabbalin tu paraiso i davvun. Siempre, tatun nga tiempo, egga ngana saw ta langi danuri “baddi nga ipastoran,” tapus iddanaman gapa na “tanakuan nga karneru” nga mattolay tu mannanayun taw ta davvun. Ngem egga ira i mawag tu kuan sangawe na “tanakuan nga karneru” tapenu kualipikadu ira noka nga mattolay ta Paraiso.

15. (a) Kunnasi nga suportan na “tanakuan nga karneru” i wawwaragi ni Cristo? (b) Kunnasim nga maparigan i ehemplo na brother ta pharmacy? (Innan i letratu.)

¹⁵ Natay i nabbabawi nga kriminal nige yayya nga mapeggan tu chansa nga ipasingan i appresasion na ta kingngua ni Cristo para ta nisa. Ngem ari tu kunnatun ta nittam nga “tanakuan nga karneru.” Aru i chansa tam sangawe nga ipasingan i pappabalo tam kani Jesus. Angngarigan na, mepasingattam i pangiddu tam ta nisa ta pattratu tam ta nazelugan nga wawwaragi na. Kinagi ni Jesus nga yatun noka i basehan na ta panentensia nu sinni i mebilang nga karneru. (Mat. 25:31-40) Masuportattam i wawwaragi ni Cristo nu matalikarag nga uffunattam ira ta trabahu nga pallayyagayya anna pangngua tu disipulos. (Mat. 28:18-20) Makua tam yatun nu usattam tu mapia i rimienta ira ta pab-Bible study nga niyawa da ta nittam, kagitta na libru nga Magayayya nga Mattolay tu Mannanayun! Nu awan paga tu Bible studym, puede kari nga kuammu tu goal nga mangiyofer tu Bible study ta mas aru nga totolay?

16. Anni ira i makua tam sangawe tapenu preparadu ittam nga mabbalin tu sakup na Pappatulan na Dios?

¹⁶ Ari tam mawag nga innaggan i Paraiso nige ittam nga mabbalin tu klase na tolay nga kayà ni Jehova nga maddian tari. Sangawe pagalaman, ikagumattam ngana nga mabbalin tu mapammakatalakkan ta kakkagiattam anna ta kukukuattam anna balanse ta pattoletam. Mabbalin ittam gapa nakuan tu matalo kani Jehova, ta atawa tam, anna ta kapangngurug tam ira. Nu sangawe pagalaman tuttuttulattam ngana i estandarte ira na Dios taw nga marake nga mundo, mas mabi noka para ta nittam nga tuttulan danatun sonu Paraiso. Awayya tam gapa nga gigiammuan sangawe i skill ira anna ipasingan i ugali ira nga mangiprepara nittam ta pattolay tam tari. Innan i artikulo nga “Preparadu Ka Ngana Kari nga ‘Irensian i Davvun’?” taw nga isyu.

17. Ipamavuluttam kari nga makkafi i nono tam megafu ta nakaliwatattam ira ta nappasa? Ipakanawag.

¹⁷ Ikagumattam nakuan gapa nga ari ngana tu grabe nga makonsensia megafu ta madammo ira nga nakaliwatattam ta nappasa. Siempre, ari tam nakuan gapa nga pakakuan onu ‘talakkurugan i mattagaruli’ tapus irasottam nga egga mabba i sakrifisio nga tavvu. (Heb. 10:26-31) Ngem makapakkomfiansa ittam nga nu talaga nabbabawyattam ngana i madammo nga nakaliwatattam, nakiyoffun ittam ngana gapa kani Jehova anna ta elder ira, anna inuli tam ngana i kondukta tam, magga pinakoma ittam ngana ni Jehova. (Isa. 55:7; King. 3:19) Daddamman i kinagi ni Jesus ta Fariseo ira: “I inangayak-ku ay ari tu magagal ta matunung ira nga totolay, nu ari ta minattagaruli ira.” (Mat. 9:13) Makalanno ngana i pakawayya na sakrifisio nga tavvu tapenu kallabban i ngamin nga liwi-liwa tam.

POSIBLE NGA MATTOLAY KA TU MANNANAYUN TA PARAISO

18. Anni saw i kayà mu nga pabbidan nu na kriminal nga natay ta biko ni Jesus?

¹⁸ Maimajimmu kari i baggim nga mattolay ta Paraiso tapus kibbidammu i kriminal nga nakibbida kani Jesus? Magga parehu saw nga ikagi nu dua i appabalo nu ta sakrifisio ni Jesus. Puede saw nga ipa-istoriam ta nisa nu anni paga ira yari i nesimmu ta ultimu ira nga oras na pinattolay ni Jesus taw ta davvun anna nu anni i natageno na turi ta sinabbag ni Jesus i kiddona. Awayya na gapa nga ipa-istoria na saw ta niko nu kunnasi i pattolay durante na pangurianan nga aggaw taw nga sistema ni Satanas. Dakal noka nga pribilehio nga i-Bible study i totolay nga kagitta natun nga lalaki!—Efe. 4:22-24.

19. Ngatta ari tu makolang i pattolay noka ta Paraiso? (Innan i letratu ta vungun.)

¹⁹ Ari vuluvuga tu makatupa onu makolang i pattolay noka ta Paraiso. Kanayun noka nga egga i totolay nga bagu tam laman nga makilala anna makapagayayya nga trabahu nga kuattam. I kakastan paga tatun, kadaggaw noka nga mas makilala tam tu mapia i Yama tam ta langi anna ma-enjoy tam yari ira i niyawa na. Ari tam vuluvuga mofutan tu ganna-gannug nga gigiammuattam meyannung ta nisa anna kekkaru noka i magigiammu tam meyannung ta pinaratu na ira. Habang mas mabbayag saw i pattoletam, mas iddukattam gapa i Dios tam. Kuruga mappappabalo ittam kani Jehova anna kani Jesus ta pangipromesa da ta nittam nga posible ittam nga mattolay tu mannanayun ta Paraiso!