Meraddammammu Kari?

Nabibbig mu kari tu mapia i isyu ira na Passifusifutan taw nga dagun? Innammu nu matabbag mu yaw ira nga pakkiavu:

Kunnasi ittam mammakapia nu iddattam tu tiempo i pakibbida, pagginna, anna pannono meyannung kani Jehova?

Mas makapaddesision ittam tu mapia, mabbalin tu mas malalaki ta panuddu tam, malladda i pangurug tam, anna dumakal i pangaya tam kani Jehova.—w22.01, p. 30-31.

Anni i meyuffun na ta nittam nu sanayattam i baggi tam nga mattalo kani Jehova anna ta mangirollu ira?

Sangawe ngana i tiempo nga mattalo ittam ta desision ira na Dios. Ariattam nakuan paddudan i instruksion anna i desision na elder ira. Tapenu sonu dakal nga ziga, mattuppal ittam lagapa maski nu mariga nga malippawa onu mariga nga tuttulan i malawa tam ira nga instruksion.—w22.02, p. 4-6.

Anni i kayà kagian na anghel turi ta kinagi na kani Zacarias i meyannung ta “besing ta lima ni [Gobernador] Zerubabel?” (Zac. 4:8-10)

Nipasiguradu natun nga sirmata ta totolay na Dios nga magga mabalin i templo maski nu simple laman i itchura na anna mepataddag yatun segun ta uray na Dios.—w22.03, p. 16-17.

Kunnasi ittam mabbalin tu “papparigan ta paguvovug”? (1 Tim. 4:12)

Masippo anna marespeto ittam nu mallayyagayya ittam, napafutuan nga makkansion, kanayun nga makkomento ta study, makkagi tu kurug, maguvovug tu makapagaram, anna ibita i abusadu nga paguvovug.—w22.04, p. 6-9.

Ngatta napakkirivu ta tadday laman nga ayam ta Nepakannammu 13:1, 2 i kasissinnan na appa nga ayam (pappatulan ira) ta Daniel kapitulo 7?

I ayam ta Nepakannammu 13 ay ari laman nga mangisimbolo tu tadday nga espesipiko nga pappatulan, kagitta na Roma. Isimbolo natun nga ayam i ngamin nga gobiernu onu mammaguray nga nammaguray ta totolay.—w22.05, p. 9.

Kunnasi tam mepasingan nga mattalo ittam ta hustisia na Dios?

Nu egga i nanginsulto, nakataki, onu nakaliwa ta nittam, alsattam i poray anna taki na nono tam. Italo tam i ganna-gannug kani Jehova. Pakappian na noka i ngamin nga marake nga efekto na liwa.—w22.06, p. 10-11.

Anni nakuan i daddamman na brother nga mangirollu ta pakimallo ta study?

Ari nakuan nga meyusa i pakimallo tapenu manabarang ta kongregasion onu mangiyanunsio. Mas ngana ta gafu na study, ari nga kawagan nga mangusa tu “kuruga aru nga uvovug.” (Mat. 6:7)—w22.07, p. 24-25.

Anni i kayà kagian na ‘maginnolay tapenu makastigo’ “danuri i marakay i kikkingngua da”? (Juan 5:29)

Ari ira nga makastigo base ta nakaliwatadda nige da nga natay. I kayà kagian na makastigo tatun ay masifutan labbi tu mapia i appana-panono anna annangngua da kabalidda nga mapaginnolay nige ira nga masentensian.—w22.09, p. 18.

Anni i kappagayayya nga nipagaram ni J. F. Rutherford ta tadday nga kombension turi ta Setiembre 1922?

Ta tadday nga kombension ta Cedar Point, Ohio, U.S.A., niyanunsio na: “Mammaguray ngana i Patul! Responsibilidad nu nga ipakannammu yatun ta ngamin. Yatutta, ilayyagayya, ilayyagayya, ilayyagayya i Patul anna i Pappatulan na!”—w22.10, p. 3-5.

Segun ta Isaias kapitulo 30, anni i tallu nga panguffun na Dios tapenu makapagattam ittam?

Ipasingan natun nga kapitulo nga (1) ginnan anna tabbagan na i pakimallo tam ira, (2) igiya na ittam, anna (3) bendisionan na ittam sangawe anna ta mappange.—w22.11, p. 9.

Ngatta makagi tam nga i Salmo 37:10, 11, 29 ay natuppal gari anna egga paga i ketuppalan na ta mappange?

Dineskriba na kinagi ira ni David i makasta nga paddia-paddian ta Israel gari, kagitta na turi ta nammaguray si Solomon. Kinagi ni Jesus i meyannung ta paraiso ta mappange anna inusa na i uvovug ira ta versikulo 11. (Mat. 5:5; Luc. 23:43)—w22.12, pp. 8-10, 14.