MAGIGIAMMU NGA ARTIKULO 20
Pakastattam i Pakimallo Tam Ira
“Ngamin i vuru-vurung nu en-nu sa nga kagian.”—SAL. 62:8.
KANSION 45 I Appana-panono Ku
SUMARIOa
Awayya tam i makimallo kani Jehova kanayun anna mappegiya ta nisa ta anni laman nga situasion nga arubangattam (Innan i parapo 1)
1. Anni i kakayà ni Jehova nga kuattam? (Innan gapa i letratu.)
SINNI i awayya tam nga pakiyoffunan nu mawag tam i banna-bannay anna giya? Ammu tam i tabbag tatun. Awayya tam i makimallo ta Dios nga Jehova. Kakayà ni Jehova nga kuattam yatun. Ikaya na nga ‘maddasal ittam ta ngamin nga tiempo.’ (1 Tes. 5:17) Awayya tam i kanayun nga makimallo ta nisa anna mappegiya ta maski anni laman nga situasion nga arubangattam. (Prov. 3:5, 6) Megafu ta vuka-palag nga Dios si Jehova, arian na nga igamma maski paga mamippiga ittam nga makimallo ta nisa.
2. Anni i gigiammuattam taw nga artikulo?
2 Tagibalorattam i regalu nga pakimallo. Ngem megafu ta napakaru i kuattam, awayya na tu marigatan ittam nga makaleg tu tiempo tapenu makimallo. Baka manono tam gapa nga mawag tu pakastattam paga i kalidad na pakimallo tam ira. Mapia ngana laman ta aru i mabibbig tam ta Biblia nga mamagaram anna mangigiya ta nittam. Taw nga artikulo, gigiammuattam i ehemplo ni Jesus tapenu mammuattam nu kunnasi ittam nga makaleg tu tiempo nga makimallo. Pabbiridattam gapa i lima nga importante nga gannug nga awayya tam nga ilavu ta pakimallo tam tapenu mapakasta tam paga yatun.
EGGA I TIEMPO NI JESUS NGA MAKIMALLO
3. Anni i ammu ni Jesus meyannung ta pakimallo ira?
3 Ammu ni Jesus nga importante kani Jehova i pakimallo tam ira. Nige na nga minay ta davvun, nasingan na nga sinabbag na Yama na i pakimallo ira na matalo nga lallaki anna babbay. Angngarigan na, kavulu ni Jesus i Yama na turi ta sinabbag na i napafutuan ira nga pakimallo da Hana, David, Elias, anna karuan paga. (1 Sam. 1:10, 11, 20; 1 Pat. 19:4-6; Sal. 32:5) Yatutta sinudduan ni Jesus i disipulos na nga kanayun nakuan ira nga makimallo nga sigga-komfiansa!—Mat. 7:7-11.
4. Anni i magigiammu tam ta pakimallo ira ni Jesus?
4 Nangipasingan tu ehemplo si Jesus ta disipulos na ira gukaban na personal nga pakimallo na kani Jehova. Ta pamministerio ni Jesus, kanayun yayya nga nakimallo. Mawag tu magaleg yayya tu tiempo nga makimallo megafu ta maruddu nga napakaru i kuan na anna aru nga totolay i minay ta nisa. (Mar. 6:31, 45, 46) Naggaggammia yayya nga nalukag tapenu egga i tiempo na nga makimallo nga magitadday. (Mar. 1:35) Egga ira i tiempo nga tanga-gabi yayya nga nakimallo. Angngarigan na, kingngua na yatun turi ta nangngua yayya tu importante nga desision. (Luc. 6:12, 13) Mamippiga gapa nga nakimallo si Jesus ta gabi nige na nga natay tapenu metuppal na i pinakamariga nga parte na annungan na taw ta davvun.—Mat. 26:39, 42, 44.
5. Kunnasi tam nga maparigan si Jesus nu makimallo ittam?
5 Magigiammu tam ta ehemplo ni Jesus nga maski nu busy ittam, mawag lagapa tu magaleg ittam tu tiempo nga makimallo. Awayya na tu maggammia ittam nga malukag onu mediu ibayag tam tu baddi i pakkatrug tam ta gabi. Nu kunnatun i kuattam, ipasingattam kani Jehova nga appresiattam yatun nga espesial nga regalu. Meraddamman ni Sister Lynne nga talaga mappappabalo yayya turi ta ollu nga nakannammuan na i pribilehio na nga makimallo. Istorian na, “Turi ta nammuakku nga awayyà nga kibbidan si Jehova ta maski anni nga oras, imammatakku ngana yayya bilang madukko nga Kofukku, anna ikaya ku ngana nga pakastan paga i pakimallo ku ira.” Siguradu nga kunnatun i matageno na aru ta nittam. Ammuattam ngana gafu i lima nga importante nga gannug nga ipakimallo tam.
LIMA NGA IMPORTANTE NGA GANNUG NGA IPAKIMALLO TAM
6. Segun ta Nepakannammu 4:10, 11, mepangngo si Jehova ta anni?
6 Dayawan si Jehova. Ta tadday nga kappabbaw nga sirmata, nasingan ni apostol Juan i 24 nga mannakam ta langi nga maddayaw kani Jehova. Zinayoda i Dios anna kinagi da nga mepangngo yayya nga mangalawa tu “kekakua, dayaw anna pakapangngua.” (Bibbigan i Nepakannammu 4:10, 11.) Napakaru gapa i rason na matalo ira nga anghel tapenu dayawan si Jehova. Kavulu da si Jehova ta langi anna ammammu da yayya tu mapia. Masingadda i kualidad na ira ta kukukuan na. Habang inninnadda i kukukuan na ira, mapaguyu ira nga dayawan yayya.—Job 38:4-7.
7. Anni ira i rason nu ngatta dayawattam si Jehova?
7 Mawag gapa nga idayaw tam si Jehova ta pakimallo tam ira. Makua tam yatun nu ikagi tam ta nisa i magustuattam ira nga kualidad na anna nu ngatta ikakua tam yayya. Habang bibbigan anna gigiammuammu i Biblia, pannonopammu i kualidad ira nga nipasingan ni Jehova nga ikakaya mu. (Job 37:23; Roma 11:33) Tapus ikagim kani Jehova nu anni i matageno mu tatun ira nga kualidad na. Dayawattam gapa si Jehova megafu ta uuffunan na ittam anna i ngamin nga wawwaragi tam. Kanayun na ittam nga tangngallan anna protektan.—1 Sam. 1:27; 2:1, 2.
8. Anni i karuan nga rason nu ngatta mappabalo ittam kani Jehova? (1 Tesalonica 5:18)
8 Mappabalo kani Jehova. Aru i rasottam nga mappabalo kani Jehova ta pakimallo. (Bibbigan i 1 Tesalonica 5:18.) Awayya tam nga ipappabalo ta nisa i maski anni laman nga mapia nga gannug nga egga ta nittam, megafu ta yayya mabba i naggafuan na ngamin nga mapia nga regalu. (Sant. 1:17) Angngarigan na, puede tam nga ipappabalo ta nisa i makakkasta nga davvun anna i makapabbaw ira nga pinaratu na. Puede gapa nga ipappabalo tam i inango tam, familia, kokkofun, anna i iddanama tam. Ikaya tam gapa nga ipappabalo kani Jehova i chansa nga mabbalin tu madukko nga kofun na.
9. Ngatta mawag tu minappabalo ittam kani Jehova?
9 Baka mawag tu ikagumattam nga pannonopan i rason ira nu ngatta sittam mismu ay mappabalo kani Jehova. Ari nga minappabalo i aru ta totolay sangawe. Maruddu nga agga-nono da laman i ikaya da anna awan tu pappabalo da ta gannug ira nga egga ta nira. Nu parigattam i kunnatun nga ugali, baka puru kiddaw ngana laman i pakimallo tam. Tapenu ari nga mesimmu yatun, mawag tu minappabalo ittam ta ngamin nga kukukuan ni Jehova para ta nittam anna ikagi tam yatun ta nisa.—Luc. 6:45.
Makoffun i pangikagi tam tu pappabalo kani Jehova tapenu makapagattam ittam (Innan i parapo 10)
10. Kunnasi nakoffun ta tadday nga sister i pappabalo tapenu makapagattam yayya? (Innan gapa i letratu.)
10 Makoffun i pabbalittam tu minappabalo tapenu maattammattam i problema ira. Ikonsidera i ekspiriensa ni Sister Kyung-sook ta Enero 15, 2015 nga Ang Bantayan. Na-diagnose nga egga i lung cancer na nga ari ngana vuluvuga mammapia. “Fermi nga nakkafi i nono ku gafu tatun nga taki,” inamin na. “Natageno ku nga gitta na nawawakku ngana i ngamin anna fermi i anassikku.” Anni i nakoffun ta nisa tapenu makapagattam? Kinagi na nga kada gabi nige na nga makkatrug, umay yayya ta rooftop na anna ipakimallo na tu masikan i lima nga gannug nga ipappabalo na tatun nga aggaw. Megafu tatun, napakarianan i pavvuru-vurung na anna napaguyu yayya nga ikagi i pangaya na kani Jehova. Naekspiriensa na nu kunnasi nga uuffunan ni Jehova i matalo ira nga aripan na nu meparubang ira ta maziga ira nga situasion. Nalippawa na gapa nga mas aru i bendision nga malawa tam anne ta problema tam ira. Kagitta ni Kyung-sook, aru i rasottam tapenu mappabalo kani Jehova maski nu maddaggun i problema tam. Makoffun i pangikagi tam ta nisa tu pappabalo ta pakimallo tam tapenu makapagattam ittam anna kalmadu ittam lagapa.
11. Ngatta mawag na disipulos i gutu turi ta nanoli ngana si Jesus ta langi?
11 Makkiddaw tu gutu kani Jehova tapenu makapallayyagayya. Nige nga nanoli si Jesus ta langi, niperaddam na ta disipulos na i annungadda nga ilayyagayya i meyannung ta nisa “ta Jerusalem, ta interu nga Judea tuange ta Samaria adde ta ngamin nga tuppu-tuppag na davvun.” (King. 1:8; Luc. 24:46-48) Ari nabbayag, inaresto na Judio ira nga lider da apostol Pedro anna Juan tapus niyangeda ira ta Sanhedrin. Nimandu da tatun nga matalo nga lallaki nga magimmang ira nga mallayyagayya anna inananassidda paga ira. (King. 4:18, 21) Anni i kingngua da Pedro anni Juan?
12. Segun ta Kingngua 4:29, 31, anni i kingngua na disipulos?
12 Kunnaw i nitabbag da Pedro anna Juan ta pangananassing na Judio ira nga lider na relihion: “Sikamu laggapa i maddisidi nu matunung ta arubang na Dios tu matuttul kamu anne ta Dios. Ta arian na awayya tu ariam-mi nga ilammuyag i nasingan anna nagigginna mi ira.” (King. 4:19, 20) Turi ta nakalawan da Pedro anna Juan, kunnaw i nattaradday nga nipakimallo na disipulos meyannung ta uray ni Jehova: “Kiddawam-mi nikaw tu iddan nakami tu gutu nga mangilayya-gayya ta uvovug mu.” Sinabbag ni Jehova yatun nga napafutuan nga pakimallo.—Bibbigan i Kingngua 4:29, 31.
13. Anni i magigiammu tam kani Jin-hyuk?
13 Maparigattam i disipulos nu ari ittam magimmang nga mallayyagayya maski nu ipeyemmang yatun na gobiernu. Kunnatun i nesimmu kani Brother Jin-hyuk nga nefuku megafu ta manaki na i massuddalu. Ta affukutan, nepatrabahu ta nisa i pangiyawa ta pakawagan na presu ira nga magitetadday nga nefuku. Ngem ari na awayya nga ipakiyuvovug ta nira i ari nga konektadu ta trabahu na, nelavu ngana i Biblia. Yatutta nakimallo yayya tapenu mabbalin yayya tu magutu anna mataktika nga ipakibbida i kinakurug kada egga i chansa na. (King. 5:29) Kinagi na: “Sinabbag ni Jehova i pakimallo ku ira. Niddan nà tu gutu anna ka-uto tapenu makapegafu ngà tu aru nga Bible study nga sinaggi-lima minuto laman ta lawan mismu na selda ira. Tapus nu gabi, mamadday ngà tu tura nga iyawa ku ta presu ira ta kommanan na.” Makasiguradu ittam gapa nga duffunan ittam ni Jehova tapenu metuppal tam i ministerio tam. Kagitta ni Jin-hyuk, awayya tam nga ipakimallo i gutu anna i ka-uto.
14. Anni i makoffun ta nittam nu egga i attattammattam nga problema? (Salmo 37:3, 5)
14 Mappoffun kani Jehova tapenu maattamman i problema ira. Attattamman na karuan ta nittam i taki, problema ta emosion, patay na iddeddukan, problema ta familia, pameppersigi, onu karuan paga nga problema. Ngem mas maziga nga attamman yatun ira nga problema megafu ta mesissimmu ira nga pandemic anna gerra. Ivuvvu mu nakuan i mayan na futum kani Jehova. Ikagim ta nisa i pappasa-pasammu, kagitta na pakkagi ta tadday nga madukko nga kofummu. Makasiguradu ka nga “uffunan naka” ni Jehova.—Bibbigan i Salmo 37:3, 5.
15. Kunnasi nga makoffun nittam i pakimallo tapenu ‘mapasensiattam i ziga tam’? Mangistoria tu ekspiriensa.
15 Makoffun ta nittam i kanayun nga pappakimallo tapenu ‘mapasensiattam i ziga tam.’ (Roma 12:12) Ammu ni Jehova i pappasa-pasan danuri na maddayaw ta nisa, yari tu “ginnan na i pakimallo da.” (Sal. 145:18, 19) Napakurug mismu yatun na 29-anios nga payunir nga si Kristie. Kalanna nga nattaki yayya tu grabe. Megafu tatun, sobra yayya nga nadepres. Turi kua, nammuan na gapa nga na-diagnose i yena na tu taki nga awayya na nga ipatay. Kinagi ni Kristie: “Nakimemallo ngà kani Jehova nga iddan nà tu sikan nga kawagakku ta kada aggaw. Ari ku nga pinagurayan i espiritual nga rutinà. Nagatende ngà lagapa ta study anna nap-personal study.” Istorian na paga: “Nakoffun nio i pakimallo tapenu maattammakku i mariga ira nga situasion. Ammù nga kanayukku nga kavulu si Jehova. Megafu tatun, kalmadu ngà. Maski nu ari ngà insigida nga nammapia, sinabbag ni Jehova i pakimallo ku ira. Niddan nà tu memammo nga nono anna kalmadu nga futu.” Kanayuttam nakuan gafu nga daddamman nga “ammu laggapa na Yafu [Jehova] nga paliaran i totolay nga minagganassing sa ta ziga-riga nga kapuru-puruebad-da.”—2 Ped. 2:9.
Tapenu malabanan i tentasion, (1) mappoffun kani Jehova ta pakimallo, (2) magguyu segun ta pakimallo mu ira, anna (3) paladdan i relasiommu kani Jehova (Innan i parapo 16-17)
16. Ngatta mawag tam i uffun ni Jehova tapenu malabanan i tentasion?
16 Mappoffukka kani Jehova tapenu malabanammu i tentasion. Megafu ta imperfekto ittam, mawag nga tulu-tuloy tam nga labanan i tentasion nga magangngua tu liwa. Kukukuan gare ni Satanas i ngamin nga mawayya na tapenu mas marigatan ittam nga kuan yatun. Tadday ta usu-usan na tapenu parittan i appana-panono tam ay gukaban na imoral ira nga dibersion. Megafu tatun ira nga dibersion, awayya na tu madapingan i appana-panono tam. Yatun ira nga appana-panono i mamaddaping ta nittam ta paningan ni Jehova anna manginfluwensia nittam nga mangngua tu madammo nga liwa.—Mar. 7:21-23; Sant. 1:14, 15.
17. Nu nappoffun ittam kani Jehova ta pakimallo, anni i mawag nga kuattam tapenu malabanan i tentasion? (Innan gapa i letratu.)
17 Mawag tam i uffun ni Jehova tapenu malabanattam i tentasion nga mangngua tu liwa. Kunnaw i kinagi ni Jesus ta modelo nga pakimallo: “Arian nakami nga ipamavulun ta pangakkakka [tentasion], ngem paliaran nakami ta Marakay.” (Mat. 6:13) Ikaya ittam nga uffunan ni Jehova, ngem mawag tu mappoffun ittam ta nisa. Mawag gapa nga magguyu ittam segun ta pakimallo tam ira. Ikagumattam nga lillitan i mabbibbig anna magginna tu marake ira nga ideya nga popular ta mundo ni Satanas. (Sal. 97:10) Pannuattam nakuan i nono tam tu marenu ira nga gannug gukaban na pabbibbig anna paggigiammu tu Biblia. Maprotektan gapa i appana-panono tam nu makistudy anna mallayyagayya ittam. Ipromesa gapa ni Jehova nga arian na nga ipamavulun tu duttal i tentasion nga ari tam nga mawayya nga affutan.—1 Cor. 10:12, 13.
18. Nu meyannung ta pakimallo, anni i mawag nga kuattam?
18 Sangawe nga mariga nga pangurianan nga aggaw, mas kawagattam i pakimallo tapenu mattalupaddian nga matalo kani Jehova. Magaleg ka nakuan tu tiempo ta kada aggaw tapenu napafutuan nga makimallo. Ikaya ni Jehova nga nu makimallo ittam, ‘ngamin i vuru-vurung tam ay ettam sa nga kagian.’ (Sal. 62:8) Dayawammu si Jehova anna mappabalo ka ta nisa ta ngamin nga kukukuan na. Kiddawammu ta nisa i gutu tapenu makapallayyagayya ka. Makimemallo ka ta nisa tapenu malabanan i maski anni nga tentasion anna maattamman i maski anni laman nga problemam. Ariammu ipamavulun i maski anni onu i maski sinni nga fugaddakka nga kanayun nga makimallo kani Jehova. Ngem kunnasi nga tattabbagan ni Jehova i pakimallo tam ira? Matabbag yatun ta tumunug nga artikulo.
KANSION 42 Ang Panalangin ng Lingkod ng Diyos
a Ikaya tam nga megitta ta tura para ta madukko nga kofuttam i pakimallo tam ira. Ngem nu karuan, marigatan ittam nga magaleg tu tiempo nga makimallo. Baka marigatan ittam gapa nga mannono nu anni i ipakimallo tam. Paguruvovugattam danatun taw nga artikulo.