Nu Kunnasi nga Tabbagan ni Jehova i Pakimallo Tam Ira

1-2. Anni i awayya na tu manono tam nu meyannung ta pakimallo tam ira?

NINONO mu ngana kari nu talaga tattabbagan ni Jehova i pakimallo mu ira? Nu wan, ari laman tu sikaw i kunnatun. Aru nga wawwaragi i nangikagi ta kunnatun nga panageno da, netallugaring nu egga ira i problema da. Nu mazziga-riga ittam, baka mas marigatattam nga masingan nu kunnasi nga tattabbagan ni Jehova i pakimallo tam ira.

² Gigiammuattam nu ngatta makapakkomfiansa ittam nga tabbagan ni Jehova i pakimallo na maddayaw ira sa. (1 Juan 5:15) Gigiammuattam gapa i tabbag taw ira nga pakkiavu: Ngatta nu karuan, gitta na ari nga tattabbagan ni Jehova i pakimallo tam ira? Kunnasi nga tattabbagan ni Jehova i pakimallo ira sangawe?

BAKA ARI TAM EKSPEKTAN I PANABBAG NI JEHOVA

3. Ngatta ikaya ni Jehova nga makimallo ittam ta nisa?

³ Nipasiguradu ta nittam na Katurakan nga iddeddu ittam ni Jehova anna tagibaloran na ittam. (Hag. 2:7; 1 Juan 4:10) Yari tu ikaya na nga mappoffun ittam ta nisa ta pakimallo. (1 Ped. 5:6, 7) Kayà na ittam nga uffunan tapenu kanayun ittam nga madukko ta nisa anna makayanattam i problema tam ira.

4. Kunnasi tam ammu nga tattabbagan ni Jehova i pakimallo ira na maddayaw ira nisa? (Innan gapa i letratu.)

⁴ Ta Biblia, aru i mabibbig nga istoria nga tinabbag ni Jehova i pakimallo na maddayaw ira ta nisa. Egga kari i manono mu tu angngarigan? Tadday tatun si Patul David. Neparubang yayya ta napakaru nga delikadu nga kalaban ta interu pattolena, ngem kanayun yayya nga nakkiddaw tu uffun kani Jehova ta pakimallo. Mittan nakimemallo yayya: “Ginnam-mu i dasal ku, AFU; tangngagam-mu i pakimallo ku! Mekatalo anna matunung ka, yatun tu ginnam-mà kari ngana!” (Sal. 143:1) Tinabbag ni Jehova i pakimallo ira ni David para ta kapaliag. (1 Sam. 19:10, 18-20; 2 Sam. 5:17-25) Yari tu sigga-komfiansa nga makagi ni David: ‘Aranni i YAFU ta ngamin nga magagal sa.’ Awayya tam gapa mapeggan tu kunnatun nga pakkomfiansa.—Sal. 145:18.

5. Kanayun kari nga tabbagan ni Jehova i pakimallo na maddayaw ira nisa tagga segun ta ekspektadda? Mangiyawa tu angngarigan. (Innan gapa i letratu.)

⁵ Awayya na tu ari nga tabbagan ni Jehova i pakimallo tam ta kunna inekspekta tam. Kunnatun i nesimmu kani apostol Pablo. Nikiddona ta Dios nga malsa nakuan i “sì ta pattag” na. Namittallu nga nipakimallo ni Pablo i meyannung tatun nga mariga nga problema na. Tinabbag kari ni Jehova danatun nga pakimallo? Wan, ngem ari tu segun ta inekspekta ni Pablo. Imbes tu alsan ni Jehova i problema, niddan na yayya tu pakapangngua onu sikan nga kawagan na tapenu metulu-tuloy na i matalo nga passerbi na ta nisa.—2 Cor. 12:7-10, NW.

6. Nu karuan, ngatta gitta na ari tu tattabbagan ni Jehova i pakimallo tam ira?

⁶ Baka i nalawa tam tu tabbag ta pakimallo tam ay ari tu segun ta inekspekta tam. Ngem siguradu ittam nga ammu ni Jehova i kapianan nga panguffun ta nittam. Kuan na paga lagu i “mas aru paga anne ta kiddawat-tam sa onu manono tam.” (Efe. 3:20) Megafu tatun, i tabbag na ira ta pakimallo tam ay awayya na tu duttal ta tiempo nga ari tam inekspekta onu duma i tabbag na ta pakimallo tam.

7. Ngatta awayya na nga mawag tu talianattam i ipakimallo tam? Mangistoria tu ekspiriensa.

⁷ Baka mawag tu talianattam i ipakimallo tam habang mas malippawa tam i uray ni Jehova. Kunnatun bi i kingngua ni Brother Martin Poetzinger. Kabalin na kasal na, nefuku yayya ta tadday nga Nazi concentration camp. Ta gafu na bi, nipakimallo na kani Jehova nga makalawan nakuan yayya ta concentration camp tapenu matangngallan na i atawa na anna metulu-tuloy na i pallayyagayya. Nappasa ngana i dua ligguan, ngem gitta na ari nga tattabbagan ni Jehova i pakimallo na nga makalawan. Yari tu nipakimallo na: “Jehova, fabor bi tu ipasingammu niakan nu anni i kayà mu tu kuakku.” Tapus ninonono na i attattamman ira na karuan nga wawwaragi ta kampu. Aru ta nira i mavuru-vurung para ta atawa da anna ta ána da. Yari tu nipakimallo ni Brother Poetzinger: “Dios nga Jehova, mabbalo ta bagu nga asayment ku. Uffunammà nakuan tapenu mapasikan anna mapagaram ku i wawwaragì.” Kunnatun i kingngua na ta unag na siam nga ragun ta kampu ira!

8. Anni i daddammattam nu makimallo ittam?

⁸ Daddammattam nga egga i gakkag ni Jehova, anna tuppalan na yatun segun ta tiempo nga sinunno na. Nelavu tatun nga gakkag i nalanna-lanno anna permanente nga pangalsa na ta ngamin nga problema nga paggafuan na grabe nga pazziga-riga sangawe. Kasali tatun ira nga problema i kalamidad, taka-taki, anna patay. Ituppal noka ni Jehova i gakkag na gukaban na Pappatulan na. (Dan. 2:44; Nep. 21:3, 4) Ngem habang ari paga nga nesimmu yatun, ipamavulun ni Jehova nga mammaguray si Satanas ta mundo.b (Juan 12:31; Nep. 12:9) Nu solban ngana gare ni Jehova i problema ira sangawe, baka gitta na makasta lallagu i pammaguray ni Satanas. Maski mawag gafu tu innaggattam i pangituppal ni Jehova ta promesa na ira, ari na kayà kagian nga ari na ittam vuluvuga uffunan. Ammuattam i karuan ta panguffun na nittam.

NU KUNNASI NGA TATTABBAGAN NI JEHOVA I PAKIMALLO IRA SANGAWE

9. Kunnasi ittam nga duffunan ni Jehova nu mawag tam i maddesision? Mangistoria tu ekspiriensa.

⁹ Iddan na ittam tu sirib. Nipromesa ni Jehova nga iddan na ittam tu sirib tapenu makangngua tu makasta ira nga desision. Kawagattam i sirib na Dios, mas ngana ta desision ira nga makafekto ta interu nga pattoletam, kagitta na pattalupaddian nga single onu pakitawa. (Sant. 1:5) Kunnatun i ekspiriensa na tadday nga single sister nga mangngagan tu Maria.c Magayayya bi yayya nga massesserbi bilang regular payunir tapus egga i nakilala na nga brother. Kinagi na: “Habang mas makkakilala kami, na-develop i feelings mi ta kataggi-tadday. Ammù nga mawag ku i maddesision. Namippigà nga nipakimemallo yatun. Kawagakku i pangigiya ni Jehova. Ngem ammù nga ari tu si Jehova i maddesision para niakan.” Mangurug yayya nga tinabbag ni Jehova i pakimallo na nga mapeggan tu sirib. Kunnasi? Ta par-research na ta publikasiottam ira, nakaleg yayya tu artikulo ira nga nakoffun tapenu matabbag i pakkiavu na ira. Nipafutu na gapa i makasta nga tabarang na matalo nga yena na. Nakoffun yatun tapenu mapannonopan na tu mapia i mataga-tageno na. Yatutta nakangngua yayya tu makasta nga desision.

10. Base ta Filipos 4:13, anni i kuan ni Jehova tapenu moffunan i maddayaw ira nisa? Mangistoria tu ekspiriensa. (Innan gapa i letratu.)

¹⁰ Iddan na ittam tu sikan tapenu makapagattam. Gitta na kiningngua ni Jehova kani apostol Pablo, iddan na ittam tu sikan nga kawagattam tapenu makapagattam ta kapurueba ira. (Bibbigan i Filipos 4:13, NW.) Angngarigan na, zinuffunan ni Jehova si Brother Benjamin nga attamman i mariga ira nga paddia-paddian. Turi ta kabataan yayya, aru dagun nga naddian si Benjamin anna i familia na ta refugee camp ira ta Africa. Istorian na: “Kanayun ngà nga makimallo kani Jehova. Nikiddò ta nisa nga iddan nà tu sikan tapenu kuan i makapagayayya ta nisa. Tinabbag ni Jehova i pakimallo ku ira gukaban na pangiyawa na niakan tu memammo nga nono, gutu nga mallayyagayya, anna i publikasion ira tapenu mattalupaddian nga masikan i espiritualidad ku.” Nikagi na paga: “Binibbig ku i ekspiriensa ira na wawwaragi tapus nammuakku nu kunnasi ira nga inuffunan ni Jehova nga makapagattam. Yatun i namasikan ta determinasiokku nga mattalupaddian nga matalo.”

11-12. Kunnasi nga usan ni Jehova i familia tam ta espiritual tapenu tabbagan i pakimallo tam ira? (Innan gapa i letratu.)

¹¹ Usan na i familia tam ta espiritual. Ta gabi nage nga nisakrifisio ni Jesus i inango na, nakimemallo yayya. Nipakimemallo na kani Jehova tu ari nakuan yayya mapaliwa nga mangikakkagi tu marake meyannung ta Dios. Ngem imbes tu kunnatun i kuan ni Jehova, nidog na i tadday tu anghel nga wagi ni Jesus tapenu mamasikan ta nisa. (Luc. 22:42, 43) Moffunan ittam gapa ni Jehova gukaban na makapatuyag nga tawag onu pabbisita na tadday ta brother onu sister tam. Makaleg ittam ngamin tu oportunidad tapenu mangikagi tu “mapia nga uvovug” ta kapangngurug tam ira.—Prov. 12:25.

¹² Kunnatun i ekspiriensa ni Sister Miriam. Piga ligguan kabalin na patay na atawa na, matageno ni Miriam nga magitetadday yayya, nakkafi i nono na anna nadepres yayya. Ari na mafugaddan i tumangi anna mawag na i magginna ta nisa. Kinagi na: “Awan tu sikakku nga mattawag ta maski sinni, yari tu nakimallo ngà kani Jehova. Habang tumatangi ngà anna makimallo, nagguni i cellphone ku. Timmawag nio i tadday nga elder nga madukko nga kofukku.” Binanna-bannayan natun nga elder anna na atawa na si Miriam. Kumbinsidu si Miriam nga pinaguyu ni Jehova yatun nga brother tapenu mattawag ta nisa.

13. Mangikagi tu angngarigan nu kunnasi nga paguyuan ni Jehova danuri ari nga maddayaw ta nisa tapenu tabbagan i pakimallo tam ira.

¹³ Awayya na tu paguyuan na i totolay nga ari nga masserbi ta nisa. (Prov. 21:1) Nu karuan, tabbagan ni Jehova i pakimallo na totolena gukaban na pamaguyu tari ira ta ari maddayaw nisa tapenu duffunan ira. Angngarigan na, pinaguyu na si Patul Artaxerxes tapenu pamavulunan si Nehemias nga manoli ta Jerusalem tapenu manuffun ta kepataddag uli na siudad. (Neh. 2:3-6) Sangawe, paguyuan gapa ni Jehova maski danuri ari nga masserbi ta nisa tapenu manguffun ta nittam nu kawagattam yatun.

14. Kunnasi ka napagaram ta ekspiriensa ni Soo Hing? (Innan gapa i letratu.)

¹⁴ Natageno ni Sister Soo Hing nga inuffunan yayya ni Jehova gukaban na doktor da. Egga ira i taki ta uto na ana da tu lalaki. Turi ta grabe i nika-aksidente natun nga ana da, narresayn yayya anna i atawa na ta trabahu da tapenu tangngallan i ana da. Megafu tatun, nakkaproblema ira ta finansial. Kinagi ni Soo Hing nga natageno na nga megitta yayya ta lastiku nga nasonna tu mapia anna aranni ngana nga makatta. Yayya nga nivuvvu na i mayan na futu na kani Jehova tapenu makkiddaw tu uffun. Nagaleg tu solusion i doktor da tapenu moffunan yayya anna i familia na. Megafu taw, nakalawa ira tu uffun na gobiernu anna mappo nga paddianan. Turi kua, nakagi ni Soo Hing: “Nasingammi i lima ni Jehova taw nga gannug. Kurug tu ‘tattabbagan na i dasa-dasal tam ira.’”—Sal. 65:2.

MAWAG I PANGURUG TAPENU ALERAN ANNA ALAWATAN I TABBAG NI JEHOVA

15. Anni i nakoffun ta tadday nga sister tapenu masingan nga matattabbag i pakimallo na ira?

¹⁵ Ari tu kanayun nga kuruga espesial i tabbag ta pakimallo tam ira. Ngem maruddu nga yatun ira nga tabbag i mawag tam tapenu mattalupaddian nga matalo ta Yama tam ta langi. Yari tu sigga-sifu ka nakuan ta tabbag ira ni Jehova ta pakimallo mu. Abbo ni Sister Yoko nga ari nga tattabbagan ni Jehova i pakimallo na ira. Ngem pinurueban na nga itura i kiddaw na ira kani Jehova. Nappasa i piga nga tiempo, iningan na uli i nitura na ira ta notebook na anna nasingan na nga tinabbag ni Jehova i kakaruan ta pakimallo na ira, maski paga lagu yuri ira i nattaman na ngana. Makasta gafu nga magimmang ittam tu manganannuan anna pannonopan nu kunnasi nga tattabbagan ni Jehova i pakimallo tam ira.—Sal. 66:19, 20.

16. Kunnasi tam mepasingan i pangurug nu meyannung ta pakimallo tam ira? (Hebreo 11:6)

¹⁶ Mepasingattam i pangurug ari laman tu ta pappakimallo kani Jehova nu ari lagu ta pangalawa gapa ta tabbag na ta pakimallo tam ira maski anni paga yatun. (Bibbigan i Hebreo 11:6.) Kunnatun i kingngua da Mike anna na atawa na nga si Chrissy. Goal da bi i masserbi ta Bethel. Kinagi ni Mike, “Mamippiga kami nga nagaplay na atawà anna pakatotoli nga nipakimallo mi yatun kani Jehova, ngem ari kami vuluvuga nagalan.” Maski kunnatun, nattalo lagapa da Mike anna Chrissy nga ammu ni Jehova i kapianan nga pangusan na ta nira. Yatutta nitulu-tuloy da nga kuan i adde na mawayya da. Nar-regular payunir ira nu sitaw mas dakal i pakawagan anna sinuportadda i construction project ira na organisasion. Sangawe, massesserbi ira ta circuit work. Kinagi ni Mike, “Ari tu kanayun nga segun ta inekspekta mi i tabbag ni Jehova ta pakimallo mi ira. Ngem tinabbag na danatun. Mas makasta paga lagu i tabbag na ira anne ta naimajimmi.”

17-18. Base ta Salmo 86:6, 7, ta anni ittam siguradu?

¹⁷ Bibbigan i Salmo 86:6, 7. Siguradu i salmista nga si David nga gininna anna sinabbag ni Jehova i pakimallo na ira. Awayyam gapa i mapeggan tu kunnatun nga pakkomfiansa. Ipasiguradu ta nittam na ekspiriensa ira taw nga artikulo nga meddan ittam ni Jehova tu sirib anna sikan nga kawagattam tapenu makapagattam. Awayya na usan i familia tam ta espiritual onu maski danuri ari paga nga masserbi ta nisa tapenu duffunan ittam.

¹⁸ Maski nu ari tu kanayun nga segun ta inekspekta tam i tabbag ni Jehova ta pakimallo tam ira, ammu tam nga magga tabbagan na danatun. Iyawa na i mismu nga kawagattam ta eksakto nga tiempo. Itulu-tuloy mu gafu i makimallo anna mangurug nga ginnan naka ni Jehova. Makkomfiansa ka nga tangngallan naka sangawe, anna ngamin i ‘karagatammu ay iyawa na nikaw’ sonu napabagu nga mundo.—Sal. 37:4.