Tulu-tuloy nga Mammakapia ta Paganassing ta Dios

1-2. Kagitta ni Lot, anni i situasion na Cristiano ira sangawe?

NU MASINGATTAM i alinno nga moralidad na totolay sangawe, matageno tam i natageno ni Lot. “Kuruga maraddam si Lot megafu ta ari nga mafugu-fugaddan nga pakkaraga na totolay nga minannadda ta dob.” Ammu na gare nga ikalussaw na Yama tam ta langi i marake nga kondukta. (2 Ped. 2:7, 8) Megafu ta ikassing anna ayatan ni Lot i Dios, pinanakitan na i alinno nga moral ira nga estandarte na totolay. Sangawe, aru gapa i balabaddi laman onu awan tu pangikakua da ta moral ira nga estandarte ni Jehova. Ngem mattalupaddian ittam nga marenu ta moral nu ari tam nga wawanan i pangaya tam ta Dios anna maganassing ittam ta nisa.​—Prov. 14:2.

² Duffunan ittam ni Jehova nga makua yatun gukaban na pamagaram nga mabibbig ta libru na Proverbio. Bilang Cristiano, pammakapiattam ngamin, lallaki man onu babbay, abbing onu manakam, nu gigiammuattam i mapia nga tabarang nga mabibbig tatun.

PROTEKSION TA NITTAM I ASSING TA DIOS

3. Segun ta Proverbio 17:3, ngatta mawag tu protektattam i futu tam? (Innan gapa i letratu.)

³ Ngatta mawag tu protektattam i figuratibo nga futu tam? Usitakkan gare ni Jehova i mayan natun. Kayà kagian natun nga ari laman tu i masingi-singan na tanakuan i masingan ni Jehova. Ammu na gapa nu anni talaga i kata-katoletam. (Bibbigan i Proverbio 17:3.) Iddukan na ittam nu agga-nono tam i tabarang na nga makaduffun tapenu mattolay ittam tu mannanayun. (Juan 4:14) Nu kuattam yatun, ari ittam vuluvuga mainfluwensian na alinno nga moralidad anna kinaladdug ni Satanas anna na marake nga mundo na. (1 Juan 5:18, 19) Habang mas maddukko ittam kani Jehova, mas ayatan anna ikakua tam yayya. Megafu ta manaki tam nga takitan i Yama tam, ikalussaw tam i mangngua tu liwa maski ta nono tam laman. Nu matenta ittam nga mangngua tu marake, iyavu tam ta baggi tam, ‘Ngatta gapa sadyaakku nga takitan i Tadday nga daka-dakal i pangaya na ta nio?’—1 Juan 4:9, 10.

4. Kunnasi nga nabbalin tu proteksion ta tadday nga sister i assing na kani Jehova?

⁴ Si Sister Marta nga taga-Croatia ay natenta nga mangngua tu imoralidad. Nitura na: “Marigatan ngà nga mannono tu mapia anna labanan i pakkaraga ku nga mangngua tu imoral. Ngem nabbalin tu proteksion nio i assikku kani Jehova.”b Kunnasi? Kinagi ni Marta nga ninono na tu mapia i marake ira nga resulta nu mangngua yayya tu imoral. Awayya tam gapa nga kuan i kunnatun. I karaketan nga resulta na ay maparaddam tam si Jehova anna ari ittam ngana nga makapaddayaw ta nisa tu mannanayun.​—Gen. 6:5, 6.

5. Anni i magigiammum ta nesimmu kani Leo?

⁵ Nu maganassing ittam kani Jehova, ari ittam nga makikkofun tari ira ta marake. Kunnatun i nagigiammu ni Leo nga taga-Congo. Appa-ta-ragun kabalin na bawtismo na, nakibarkada yayya tari ira ta mangngua tu marake. Ninono na nga basta ari tu yayya mismu i mangngua tu marake, awan tu pakaliwatan na kani Jehova. Ngem ari nabbayag, ininfluwensian yayya na kakavulu na nga magillellaw anna mangngua tu imoral. Ngem nanono na i nituddu bi ta nisa na Saksi ira nga magana na anna i pagayayya na tagga ta masserbi paga yayya kani Jehova. Anni i resulta natun? Nanono na gabbalaman i mapia. Ta uffun na elder ira, nanoli yayya kani Jehova. Sangawe, magayayya ngana yayya nga massesserbi bilang elder anna special pioneer.

6. Anni i dua nga klase na babay nga gigiammuattam?

⁶ Gigiammuattam ngana i Proverbio kapitulo 9. Mabibbig tam tatun i dua nga babay. Irepresenta na tadday ta nira i ka-uto tapus i tadday gapa irepresenta na i kawan tu ammu. (Ikumpara i Roma 5:14; Galacia 4:24.) Daddammattam nga i imoral nga sex anna pornograpia laman i talattangngawan na mundo ni Satanas. (Efe. 4:19) Mawag gafu tu kanayun ittam nga maganassing ta Dios anna arayyuattam i marake. (Prov. 16:6) Mammakapia ittam ngamin ta magigiammu tam tatun nga kapitulo, lalaki ittam man onu babay. Mabibbig tatun nga parehu nga magiggimbita i dua nga babay tari ira ta kurang i ekspiriensa da, danuri “kurang i pakalippawa da.” Gitta na kakkagian na kada tadday ta nira, ‘Umay ka nga kuman ta balè.’ (Prov. 9:1, 5, 6, 13, 16, 17) Ngem dakal i nadduman na mesimmu tari ira ta mangalawa tatun nga imbitasiodda.

PANAKITAN I IMBITASION NA BABAY NGA AWAN TU AMMU NA

7. Segun ta Proverbio 9:13-18, anni i mesimmu ta mangalawa ta imbitasion na babay nga awan tu ammu na? (Innan gapa i letratu.)

⁷ Nonopan i imbitasion na “babay nga awan tu ammu na.” (Bibbigan i Proverbio 9:13-18.) Awan tu pasiran na nga iyaga-agal tari ira ta kurang i pakalippawa da, “Umay kamu taw” anna maffiesta ittam. Anni i mesimmu ta nira? “Natay danuri egga tari.” Kunnatun gabbalaman i mabibbig ta nappollu ira nga kapitulo na Proverbio. Neyabiso ta nittam i meyannung ta “babay nga matagga i ulu na” anna “imoral.” Mabibbig tam: “Lummag i balena ta patay.” (Prov. 2:11-19) Neyabiso gapa ta Proverbio 5:3-10 nga magimmugug ittam ta tadday paga nga “babay nga matagga i ulu na” nga “i takki na ira ay mappange ta patay.”

8. Anni nga desision i mawag tu kuattam?

⁸ Yaw i desision nga mawag tu kuan danuri na makaginna ta “babay nga awan tu ammu na”: Umay kari ira ta imbitasion na onu ari? Awayya na tu kunnatun gabbalaman i mawag tu desisionattam. Nu egga i manenta ta nittam nga mangngua tu imoral onu gavva nga makasingan ittam tu pornograpia, kagitta na ta TV onu ta Internet, anni i desisiottam?

9-10. Ngatta ibita tam nakuan i imoral nga annangngua?

⁹ Ngatta ibita tam nakuan i imoral nga annangngua? Kakkagian gare na “babay nga awan tu ammu na”: “Mammi i nakoko nga danum.” Anni kari i “nakoko nga danum”? Ikumpara na Biblia i seksual nga relasion na magatawa ta makarefresko nga danum. (Prov. 5:15-18) Paggafuan na pagayayya na magatawa nga kasal i pabbiko onu seksual nga relasiodda. Ngem duma i efekto na “nakoko nga danum.” Puede nga tumukoy yatun ta megamma onu imoral nga sex. Maruddu gare nga metagu i kunnatun nga annangngua, kagitta na sinaga-tagu nga pakkoko. Gitta na mabbalin paga lagu tu mas mammi i “nakoko nga danum” nu abbo danuri na mangngua tu kunnatun nga metagu da i liwa da. Ilologo da lagapa i baggi da megafu ta masingi-singan ni Jehova i ngamin! Nu mawawattam i fabor na, yatun ngana i pinakamape onu pinakagrabe nga mesimmu ta nittam anna magga ari tu “mammi” yatun. (1 Cor. 6:9, 10) Ngem egga paga i marake nga resulta na.

¹⁰ Nu makangngua tu imoral i tadday nga tolay, awayya na tu makatageno yayya tu pasiran anna kawan tu kwenta. Marresulta gapa yatun ta ari neplano nga pavvussi anna nadaral nga relasion na familia. Ma-uto ittam gafu nu lillitattam i “balay” na babay nga awan tu ammu na anna ari makipakkan ta nisa. Aru nga totolay nga nakangngua tu imoral i natay ta espiritual anna mabi ira nga literal nga matay megafu ta taka-taki nga nala da. (Prov. 7:23, 26) Kunnaw i kinagi na ultimu na versikulo 18 na kapitulo 9: “I bisita na ira ay egga ta karalamman na Attanamman.” Ngatta gafu aru lagapa i umay ta makelogo nga imbitasion na babay maski nu marake i pattuppalan natun?—Prov. 9:13-18.

11. Ngatta kuruga delikadu i paggiraw tu pornograpia?

¹¹ Mawag tu arayyuattam i pornograpia. Abbo na karuan nga awan tu dake na paggiraw tu kunnatun. Ngem i kurug, silu yatun megafu ta marake i efekto natun ta totolay. Mawanan ira tu respeto ta baggi da anna ta tanakuan anna maka-adik yatun. Marigi-riga nga alsan ta nono i bastus ira nga picture onu eksena. I ziga na paga, ari nga patayan na pornograpia i marake ira nga pakkaraga. Mas lallagu nga sikkagan na danatun. (Col. 3:5; Sant. 1:14, 15) I kurug, aru tari ira ta maggiraw tu pornograpia i magangngua gapa tu imoral.

12. Kunnasi tam mebita i gannug ira nga mamappanono ta nittam tu imoral?

¹² Anni i kuattam nu kalanna nga limittuag i bastus nga picture onu eksena ta gadyet tam? Insigida nakuan nga ilisi tam i paningattam. Anni i makaduffun ta nittam? Daddammattam nga i pinakamabalor nga pakkukua tam ay i relasiottam kani Jehova. I kurug, egga ira i picture onu eksena nga ari mabba tu pornograpia onu bastus ngem mamappanono lagapa tu imoral. Ngatta lillitattam danatun? Megafu ta manaki tam nga mangngua tu anni laman nga imoral maski ta nono tam laman. (Mat. 5:28, 29) Kagian ni David nga elder ta Thailand: “Iyavu ku ta baggì: ‘Maski nu ari mabba nga bastus danaw nga gannug, magayayya kari si Jehova nu agga-sinnakku danatun?’ Makaduffun i kunnatun nga pannonono tapenu ammù i fustu tu kuakku.”

13. Anni i makaduffun tapenu makua tam i fustu?

¹³ Nu maganassing ittam nga mapalussaw si Jehova, makaduffun yatun tapenu makua tam i fustu. I assing ta Dios i “pamegafuanan na sirib.” (Prov. 9:10) Masingattam yatun ta gafu na Proverbio kapitulo 9 nu sitaw nekumpara i “kurug nga ka-uto” ta tadday paga nga babay.

UMAY TA IMBITASION NA BABAY NGA MA-UTO

14. Anni paga i tanakuan imbitasion nga mabibbig ta Proverbio 9:1-6?

¹⁴ Bibbigan i Proverbio 9:1-6. Mabibbig taw i imbitasion ni Jehova, i Namaratu ta nittam anna i Paggafuan na ngamin nga kurug nga ka-uto. (Prov. 2:6; Roma 16:27) Mabibbig tatun i ilustrasion meyannung ta dakal nga balay nga egga i pitu tu arigi na. Ipasingan natun nga vuka-palag si Jehova anna patallungan na i ngamin nga maya nga mangiyaplika ta ka-uto na ta pattoleda.

15. Imbitan ittam na Dios nga kuan i anni?

¹⁵ Si Jehova ay Minangngiyawa anna abundansia i probision na ira. Nammuattam yatun ta angngarigan na babay nga mangirepresenta ta “kurug nga ka-uto” ta Proverbio kapitulo 9. Mabibbig ta teksto ira nga yatun nga babay ay niprepara na ngana i karne na, sinempla na ngana i binarayang na, anna pinakappian na ngana gapa i lamesa ta balena. (Prov. 9:2) Kunnaw gapa i mabibbig ta versikulo 4 anna 5: “Kagian na [i kurug nga ka-uto] ta tadday nga kurang i pakalippawa na: ‘Umay ka taw, kumakka tu tinapay ku.’” Ngatta ta umay ittam nakuan ta balay na kurug nga ka-uto anna makipakkan ittam ta nisa? Kayà gare ni Jehova nga mabbalin tu ma-uto i ána na anna memmuguran ira. Manaki na nga makangngua ittam tu ugal ira nga desision nga makataki ta nittam. Yatun i rason nu ngatta “unnugan na i praktikal nga sirib para ta matunung.” (Prov. 2:7) Nu egga i mepangngo nga assing tam kani Jehova, kayà tam nga pagayayyatan yayya. Ginnattam i mapia nga tabarang na anna magayayya ittam nga kuan yatun.​—Sant. 1:25.

16. Kunnasi nga nakaduffun kani Alain i assing na ta Dios tapenu makangngua yayya tu fustu nga desision, anna anni i resulta natun?

¹⁶ Nakaduffun kani Alain i assing na ta Dios tapenu makangngua yayya tu fustu nga desision. Elder yayya anna manuddu gapa ta eskuela. Istorian na, “Aru ta kakavvulu ku ira nga mestru i makkakkagi nga maggigiraw ira tu pagiraw ira nga nakivuan tu pornograpia tapenu mammungan i pakannammu da meyannung ta sex.” Ngem ugal yatun para kani Alain. Kinagi na: “Megafu ta assing ku ta Dios, nitagga ku nga ari girawan danatun. Niyesplikà gapa ta kakavvulu ku ira nga mestru nu ngatta.” Sinuttul ni Alain i tabarang na “kurug nga ka-uto” nga ‘lumakag ta dalan na pakalippawa.’ (Prov. 9:6) Megafu ta nabbilib kani Alain i kakavvulu na nga mestru, karuan ta nira ay mab-Bible study ngana anna umu-umay ta study tam.

17-18. Anni ira i bendision danuri na umay ta imbitasion na “kurug nga ka-uto,” anna anni i iddanamadda? (Innan gapa i letratu.)

¹⁷ Inusa ni Jehova i ilustrasion na dua nga babay tapenu masingattam nu kunnasi i mabbalin tu magayayya ta mappange. Danuri umay ta imbitasion na matannug anna “babay nga awan tu ammu na” ay agga-nono da laman i “mammi” anna sinaga-tagu nga pappaga-pagayayya ta imoralidad. Kakurugan na, i maddaggun laman i agga-nono da anna awan tu pakialam da ta mappange. Mattuppal ira noka ta “karalamman na Attanamman.”​—Prov. 9:13, 17, 18.

¹⁸ Ngem dakal i neruman natun ta mesimmu tari ira ta umay ta imbitasion na “kurug nga ka-uto”! Sangawe paga laman, magayayya ngana ira i bisita natun nga babay megafu ta makakkasta anna masustansia i netunnag ira nga kana-kanadda ta espiritual. (Isa. 65:13) Kagian ni Jehova gukaban ni profeta Isaias: “Magginna kamu tu mapia niakan, anna kanan nu i mapia, ay kuruga magayayya kamu ta masingngo nga maka-makan.” (Isa. 55:1, 2) Ikakkagumattam nga iddukan i iddukan ni Jehova anna ikalussaw i ikalussaw na. (Sal. 97:10) Magayayya ittam gapa nga imbitan i tanakuan tapenu mammakapia ira ta “kurug nga ka-uto.” Megitta ittam ta aripan ira nga “makkulle ta atannang ira nga parte na siudad: ‘I sinni laman nga kurang tu ekspiriensa, umay yayya taw.’” Pammakapianattam yatun anna na magginna ira ta nittam ari laman tu sangawe, nu ari, maski ta mappange. Megafu gare tatun, “mattolay” ittam noka tu mannanayun habang ‘lumakag ittam ta dalan na pakalippawa.’—Prov. 9:3, 4, 6.

19. Base ta Eclesiastes 12:13, 14, anni nakuan i determinadu nga kuattam? (Innan gapa i kahon nga “Mammakapia Ittam ta Paganassing ta Dios.”)

¹⁹ Bibbigan i Eclesiastes 12:13, 14. Taw nga marake nga pangurianan ira nga aggaw, kanayun nakuan tu i paganassing tam ta Dios i mapprotekta ta futu tam anna manguffun ta nittam nga mattalupaddian nga marenu ta moral anna ta espiritual. Yatun nga paganassing i mamaguyu ta nittam nga ari vuluvuga magimmang nga agalan i aru nga totolay tapenu alegadda i “kurug nga ka-uto” anna mammakapia tatun.