Magayayya ta Iddanama nga Ari Makelogo

1. Ngatta makagi tam nga egga i basehan na iddanaman ni Abraham?

NIPROMESA ni Jehova ta kofun na nga si Abraham nga mabendisionan i ngamin nga nasion ta davvun gukaban na gaka na. (Gen. 15:5; 22:18) Megafu ta masikan i pangurug ni Abraham ta Dios, kumbinsidu yayya nga matuppal i promesa na Dios. Ngem turi ta 100 ngana i dagun ni Abraham anna 90 ngana gapa i atawa na, awan lagapa tu ana naw nga matalo nga magatawa. (Gen. 21:1-7) Ngem kagian na Biblia: ‘Nangurug anna nagiddanama si Abraham nga mabbalin yayya tu yama na aru nga nasa-nasion nga kunna kagian na Masanto nga Tura.’ (Roma 4:18) Ammum tu natuppal i iddanama ni Abraham. Nabbalin yayya tu yama ta ana nga lalaki nga nabayag nga iniddanaman na, si Isaac. Ngatta nakkomfiansa si Abraham nga tuppalan ni Jehova i promesa na?

2. Ngatta ari vuluvuga nabbabang si Abraham nga matuppal i nitabba ni Jehova?

² Megafu ta madukko nga relasion ni Abraham kani Jehova, ‘ari yayya vuluvuga nga nabbabang tu makua na Dios i nitabba na.’ (Roma 4:21) Inapruban ni Jehova si Abraham anna nibilang na yayya nga matunung megafu ta pangurug na. (Sant. 2:23) Base ta Roma 4:18, egga i koneksion na pangurug ni Abraham ta iddanama na. Gigiammuattam ngana i kinagi ni apostol Pablo meyannung ta iddanama ta kapitulo 5 na Roma.

3. Anni i nipakanawag ni Pablo meyannung ta iddanama?

³ Nipakanawag ni Pablo nu ngatta makasiguradu ittam nga “ari ittam nga melogo taw nga pagiddanama” tam. (Roma 5:5) Uffunan na ittam gapa nga malippawa nu kunnasi massikan i iddanama tam. Ta paggigiammu tam ta Roma 5:1-5, pannonopammu nu kunnasi nga nassikan i pagiddanamam ta mappange ta pappasa na tiempo. Maduffunan ittam gapa naw nga paggigiammu tapenu mammuan nu kunnasi tam paga nga pasikannan i iddanama tam. Gigiammuattam tu ollu i kinagi ni Pablo nga kappabbaw nga iddanama nga ari tam kelogotan.

I KAPPABBAW NGA IDDANAMA TAM

4. Anni i nepakanawag ta Roma 5:1, 2?

⁴ Bibbigan i Roma 5:1, 2. Nitura ni Pablo danatun nga uvovug ta kongregasion na Roma. Nagigiammu na wawwaragi tari i meyannung kani Jehova anna kani Jesus, nangurug ira, tapus nabbalin ira tu Cristiano. Para ta Dios, ‘napakatunung ngana ira gafu ta angngurug’ anna zinelugan na ira tu masanto nga espiritu. Wan, makapattalo ira ta kappabbaw nga iddanama da anna makasiguradu ira nga malawa da yatun.

5. Anni i iddanama na nazelugan ira?

⁵ Turi kua, nattura si Pablo ta nazelugan ira nga Cristiano ta Efeso meyannung ta iddanama nga niyawa na Dios ta nira. Nelagum tatun i pangalawa ta ‘bendision nga nitabba na Dios ta totolay na.’ (Efe. 1:18) Kinagi paga ni Pablo ta taga-Colosas ira nu sitaw da nga malawa i iddanama da. Inagalan na yatun tu “pagiddanama nu nga nepara-paran ta langi para nikamu.” (Col. 1:4, 5) I iddanama gafu na nazelugan ira nga Cristiano ay mapaginnolay ira anna mapeggan tu mannanayun nga inango ta langi nu sitaw makipammaguray noka ira kani Cristo.​—1 Tes. 4:13-17; Nep. 20:6.

6. Anni i kinagi na tadday nga nazelugan nga brother meyannung ta iddanama na?

⁶ Tagibaloran na nazelugan ira nga Cristiano yatun nga iddanama da. Tadday tatun si Brother Frederick Franz nga piga dekada nga matalo nga nasserbi ta Dios. Kunnaw i napafutuan nga kinagi na ta 1991: “Siguradu nga matuppal i iddanama mi anna kada tadday nikami nga 144,000 ay makalawa ta nipromesa na Dios. Ararayyu nga mas makasta i bala-balo mi anne ta maski anni nga ninono mi. . . . Kuruga tagibalorammi lagapa i iddanama mi. . . . Habang mas iddaggammi yatun, mas nga mappappabalo kami megafu tatun. Sulit i paginnag mi tatun, maski paga maginnag kami tu minillion nga daga-ragun. Kuruga tagibalorakku i iddanama mi, mas ngana sangawe.”

7-8. Anni i iddanama na magaru ta nittam? (Roma 8:20, 21)

⁷ Tanakuan i iddanama na magaru ta maddayaw kani Jehova sangawe. Kaparehu da tu iddanama si Abraham​—mannanayun nga inango ta davvun sonu mammaguray i Pappatulan na Dios. (Heb. 11:8-10, 13) Nitura ni Pablo i makapabbaw nga mesimmu para turi ira ta kunnatun i iddanama da. (Bibbigan i Roma 8:20, 21.) Turi ta nagigiammum i promesa ira na Biblia ta mappange, anni i pinakanagustuammu? Yari kari i mabbalikka saw tu perfekto anna ari ka ngana makaliwa? Magayayya ka kari turi ta nammuammu nga maginnolay saw i iddeddukammu ira ta paraiso nga davvun? Megafu ta “egga i iddanama” tam, napakaru i aba-abangattam.

⁸ Iddanamattam man nga mattolay tu mannanayun ta langi onu ta davvun, mamagayayya yatun ta nittam. Awayya na gapa nga mas malladda yatun nga iddanama tam. Nipakanawag ni Pablo nu kunnasi yatun nga mesimmu. Gigiammuattam nu anni yatun nga nitura na meyannung ta iddanama tam. Nu kuattam yatun, mas makkomfiansa ittam nga talaga mesimmu saw yatun nga iddanamattam.

KUNNASI NGA MAS MALLADDA I IDDANAMA TAM?

9-10. Kagitta na nesimmu kani Pablo, anni nakuan i ekspektan na Cristiano ira? (Roma 5:3) (Innan gapa i letratu ira.)

⁹ Bibbigan i Roma 5:3. Kinagi ni Pablo nga nu mazziga-riga ittam, mas mabbalin tu kuru-kurug ta nittam i iddanama tam. Baka makaddagan ittam tatun. Ngem i kurug, awayya na nga mazziga-riga i maski sinni nga tagatuttul ni Cristo. Kunnatun i nesimmu kani Pablo. Kinagi na ta taga-Tesalonica ira: “Ta dana ngana kinagi mi nikamu turi ta kegga mi tatun tu madara-darum ittam, ay masingan nu tu yatun ngana i nesimmu.” (1 Tes. 3:4) Kinagi na gapa ta taga-Corinto ira: “Wawwagi ira, ariak-ku nga ikaya tu pakilavvunan nu i nappasa-pasak-ku nga ziga-riga . . . Ariak-ku nga iddanaman tu matolay ngà paga.”​—2 Cor. 1:8; 11:23-27.

¹⁰ Ekspektan na Cristiano ira sangawe nga awayya na tu mazziga-riga ira. (2 Tim. 3:12) Nadara-darum ka ngana kari megafu ta pangurug mu kani Jesus anna nabbalikka tu disipulo na? Awayya na tu uyu-uyawan naka na kokkofummu anna na kafamiliam. Baka tazza-tazziaddaka paga lagu. Namroblema ka ngana kari ta boss mu onu ta katrabahum megafu ta determinadu ka nga mabbalin tu mapammakatalakkan? (Heb. 13:18) Kinokkontra naka kari na gobiernu megafu ta pangikagim ta tanakuan meyannung ta iddanamam? Ngem maski anni paga nga pazziga-riga i awayya na nga meparubang ta nittam, kinagi ni Pablo nga mawag nga magayayya ittam. Ngatta?

11. Ngatta mawag nga determinadu ittam nga pasensian i maski anni nga kapurueba?

¹¹ Awayya tam nga magayayya nu mazziga-riga ittam megafu ta egga i makasta nga resulta natun. Kagian na Roma 5:3 nga “i pazziga-riga ay mavvunga ta appasensia.” Ngamin nga Cristiano ay mappasa ta ziga-riga. Determinadu ittam nakuan gafu ngamin nga pasensian onu attamman i maski anni nga kapurueba. Malawa tam laman gare i bala-balo nga iddanamattam nu magattam ittam anna tulu-tuloy nga masserbi kani Jehova. Ariattam kayà nga mabbalin tu kagitta na totolay nga nononopan ni Jesus turi ta kinagi na i meyannung ta vullung ira nga nekanna ta binatu nga davvun. Sigga-pagayayya nga inalawa da i mensahe ta ollu na ngem nilikuradda i pangurug da turi ta ‘zimittal i pazziga-riga onu kadara-darum.’ (Mat. 13:5, 6, 20, 21) Kurug tu ari nga kappagayayya nu meparubang ittam ta pangokkontra onu kapurueba ira. Ngem mabenefisiowan ittam nu mappasa-pasensia ittam. Kunnasi?

12. Anni ira i makasta nga resulta na nu attammattam i kapurueba ira?

¹² Nipasigo ni Santiago i makasta nga resulta na pagatta-attam ta kapurueba ira. Nikagi na: “Mawag tu magatta-attam kamu adde ta pangurianan tapenu mammanakam kamu ta angngurug nu anna awan vuluvuga tu pakkurangan nu.” (Sant. 1:2-4) Nikagi ni Santiago nga mawag tu magattam ittam adde ta pangurianan. Anni i resulta natun nga pagatta-attam? Mabbalin ittam tu mas minappasensia, massikan i pangurug tam, anna mas mattalo ittam ta Dios. Ngem egga paga i makasta nga resulta na pagatta-attam.

13-14. Anni i vunga na pappasa-pasensia, anna anni i koneksion natun ta iddanama? (Roma 5:4)

¹³ Bibbigan i Roma 5:4. Kagian ni Pablo nga nu mappasensia ittam, “apruban ittam na Dios.” Yatutta nu mappasa-pasensia ka, apruban naka ni Jehova. Ari tu kebalinan natun nga magayayya si Jehova megafu ta mapuruebakka onu problemadu ka. Lallagu, magayayya yayya megafu ta matalo ka habang mappasa-pasensia. Fugurammu yatun!​—Sal. 5:12.

¹⁴ Daddamman nga pinasensian ni Abraham i kapurueba ira yatutta inapruban yayya na Dios. Nabbalin yayya tu kofun ni Jehova anna nibilang na yayya nga matunung. (Gen. 15:6; Roma 4:13, 22) Kunnatun gapa ta nittam. Ari ittam nga apruban na Dios base ta karu na kukukuattam para nisa onu ta pribilehio tam ira. Apruban na ittam megafu ta matalo ittam nga mappasa-pasensia. Maski piga i daguttam onu anni i sirkumstansia anna abilidad tam, sittam ngamin ay makapagattam. Egga kari i maddaggun nga pasa-pasensiammu nga kapurueba ngem matalo ka lagapa kani Jehova? Nu kunnari, magayayya ka nakuan ta ammum tu apruban naka na Dios. Nu ammu tam nga apruban ittam ni Jehova, mas malladda iddanama tam.

I MAS MALADDA NGA IDDANAMA

15. Anni paga nga punto i nipakanawag ni Pablo, anna ngatta maguluan i karuan tatun?

¹⁵ Gitta na nipakanawag ni Pablo, apruban ittam ni Jehova nu mattalupaddian ittam nga matalo ta nisa anna nu pasa-pasensiattam i ngamin nga kapurueba. Yaw i tumunug nga kinagi ni Pablo: “Ay nu apruban ittam na Dios, egga i iddanama tam. Ari ittam nga melogo taw nga pagiddanama.” (Roma 5:4, 5) Baka maguluan i karuan tatun. Ngatta? Megafu ta nakagi ngana ni Pablo ta Roma 5:2 nga egga ngana i iddanama danatun nga Cristiano ta Roma, i ‘iddanama tu mesipo ta dayaw na Dios.’ Megafu tatun, baka iyavu na tadday, ‘Nu egga ngana i iddanama danatun nga Cristiano, ngatta nilavu pagalaman ni Pablo i iddanama ta tumunug nga nipakanawag na?’

16. Kunnasi nga mamegafu nga malladda i iddanama na tadday? (Innan gapa i letratu ira.)

¹⁶ Mala tam i punto ni Pablo nu nonopattam nga awayya nga malladda i iddanama. Tapenu iyilustra: Manono mu paga kari ta ollu nga naginnam i kappabbaw nga iddanama ta Uvovug na Dios? Tatun nga tiempo, awayya na tu nanono mu nga imahinasion laman i pattolay tu mannanayun ta Paraiso. Ngem habang mas umaru i magigiammum meyannung kani Jehova anna ta promesa ira ta Biblia, nakumbinsi ka nga mesimmu noka yatun nga iddanamam.

17. Kunnasi nga tulu-tuloy nga malladda i iddanamam kabalimmu ma-baptize?

¹⁷ Kabalimmu nga na-baptize, tulu-tuloy nga nalladda i iddanamam habang umara-aru i pakannammum anna mammanakam ka ta espiritual. (Heb. 5:13–6:1) Awayya na nga nappasammu i nakagi ta Roma 5:2-4. Neparubakka ta nadduruma nga pazziga-riga, ngem pinasa-pasensiammu yatun ira anna natageno mu nga apruban naka na Dios. Megafu ta ammum tu apruban naka, mas aru ngana i rasommu tapenu ekspektan nga malawa mu i nipromesa na ira. Mas nga nalladda i iddanamam anne ta gafu na. Mas nga kuru-kurug yatun ta niko anna mas nga personal. Kuruga dakal i efekto na yatun ta niko. Influwensian natun i kada aspeto na pattolem anna talibaguan na i pattratum ta familiam, pangnguam tu desision, anna i pangusam ta tiempom.

18. Anni i nipasiguradu ni Jehova?

¹⁸ Egga paga i kuruga importante nga punto nga niyammung ni apostol Pablo meyannung ta iddanamam kabalin naka nga apruban na Dios. Ipasiguradu na ta nikaw nga matuppal noka i iddanamam. Ngatta makapattalo ka tatun? Kunnaw gare i pamasiguradu ni Jehova nga nitura ni Pablo para ta Cristiano ira: “Ari ittam nga melogo taw nga pagiddanama, ta niyaluvu na Dios i aya na ta giffutuat-tam gafu ta Espiritu Santo nga niyawa na nittam.” (Roma 5:5) Makasiguradu ka gafu nga kurug i iddanama nga niyawa ni Jehova nikaw.

19. Ta anni ka nga makasiguradu meyannung ta iddanamam?

¹⁹ Pannonopammu i promesa ni Jehova kani Abraham anna nu kunnasi na yayya nga inapruban anna nibilang nga kofun na. Natuppal i iniddanaman ni Abraham. Kagian na Biblia: “Megafu ta pasensia ni Abraham nga naginnag, nalawa na i nitabba na Dios.” (Heb. 6:15; 11:9, 18; Roma 4:20-22) Ari yayya vuluvuga nelogo. Makasiguradu ka gapa nga nu mattalupaddiakka nga matalo, malawa mu i iddanamammu. Kuru-kurug i i iddanamam. Mamagayayya nakuan yatun ta niko. Ari ka nga melogo tatun! (Roma 12:12) Nitura ni Pablo: “I Dios nga paggafuan na iddanama ay pannuan nakamu paray ta pagayaya anna imammo gafu ta angngurug nu sa, tapenu dumakal i pagiddanama nu gafu ta pakapangngua na Espiritu Santo.”​—Roma 15:13.