MAGIGIAMMU NGA ARTIKULO 52

Kabataan ira nga Sister—Mammanakam Kamu ta Espiritual

‘Mawag tu matangngallan na babbay i baggi da anna mapammakatalakkan ira ta ngamin nga ganna-gannug.’—1 TIM. 3:11.

KANSION 133 Sikamu nga Kabataan—Dayawannu si Jehova

SUMARIOa

1. Anni i kuattam tapenu mammanakam ittam ta espiritual?

MAKADDAG ittam ta keppaspas nga dumakal i tadday nga abbing. Gitta na awan mabba tu kingngua na ngem ziminakal ngana yayya tapus nammanakam. Ngem ari tu kunnatun i pammanakam ta espiritual. Mawag tu egga i kuattam.b (1 Cor. 13:11; Heb. 6:1) Anni gafu i kuattam? Mawag tu egga i personal nga relasiottam kani Jehova anna madukko ittam ta nisa. Kawagattam gapa i masanto nga espiritu na tapenu mepasingattam i makadios ira nga kualidad, magigiammu tam i makaduffun ira nga skill, anna makapapprepara ittam para ta annungan ira ta mappange.—Prov. 1:5.

2. Anni i magigiammu tam ta Genesis 1:27, anna anni i gigiammuattam taw nga artikulo?

² Pinaratu ni Jehova i totolay nga lalaki anna babay. (Bibbigan i Genesis 1:27.) Siempre, nu ta itchura, madduma i lalaki ta babay. Ngem egga paga i tanakuan nga naddumadda. Angngarigan na, madduma i responsibilidad nga nipakua ni Jehova ta nira. Yayya nga egga ira i kualidad anna skill nga kawagadda tapenu metuppal da danatun. (Gen. 2:18) Gigiammuattam taw nga artikulo i kuan na kabataan nga sister tapenu mammanakam yayya ta espiritual. Gigiammuattam gapa ta tumunug nga artikulo i kuan na kabataan ira nga brother.

IPASINGAN I MAKADIOS IRA NGA KUALIDAD

Letratu ira: Kabataan nga sister nga inninnan na i ispehu anna pannonopan na tu mapia i nabibbig na ta nebase-Biblia nga publikasion. Picture ira ta tallu nga bilog: 1. Si Rebeka nga mangivuru tu danum ta paginuman na kamelio. 2. Si Ester nga tunnaggan na tu makan si Mardokeo. 3. Si Abigail nga mappalittukag anna makimemallo nga mapaliag i inango na anna na interu nga tangabbalayan na. — Mammanakam ka ta espiritual nu parigammu i kualidad ira na matalo nga babbay, gitta da Rebeka, Ester, anna Abigail (Innan i parapo 3-4)

3-4. Sitaw nga makaleg i kabataan ira nga sister tu makasta nga apparigan? (Innan gapa i letratu.)

³ Ta Biblia, aru i mabibbig tam nga mapia nga babbay nga iniddu da si Jehova anna nasserbi ta nisa. (Innan ta jw.org i artikulo nga “Anni i Magigiammu Tam ta Babbay ta Biblia?”) Ira danuri babbay nga nakagi ta tema nga teksto tam nga ‘matangngalladda i baggi da’ anna ‘mapammakatalakkan ta ngamin nga ganna-gannug.’ Makaleg gapa i sister ira ta kongregasiodda tu ehemplo na manakam nga babbay nga makasta nga parigan.

⁴ Nu kabataan ka nga sister, egga kari i kilalam tu sister ira nga manakam ta espiritual nga awayyam parigan? Sifutammu i makasta ira nga kualidad da. Tapus nonopammu nu kunnasim nga mepasingan danatun. Ta tumunug ira nga parapo, ammuattam i tallu nga kualidad nga mawag tu ipasingan na sister ira nga manakam ta espiritual.

5. Ngatta mawag i kinapakalinno tapenu mammanakam ta espiritual i tadday nga babay?

⁵ I kinapakalinno ay tadday nga kualidad nga pakasingannan tu manakam ta espiritual i tadday. Nu minappakalinno i tadday nga babay, makasta i relasion na kani Jehova anna ta tanakuan. (Sant. 4:6) Angngarigan na, nu iddukan na si Jehova, mapakalinno nga suportan na i prinsipio na pakka-ulu nga niyunnug na Yama na ta langi. (1 Cor. 11:3) Egga ira i unnug ta kongregasion anna ta familia nga keyaplikan natun nga prinsipio.c

6. Anni i magigiammu na kabataan ira nga sister kani Rebeka meyannung ta kinapakalinno?

⁶ Nonopan i ehemplo ni Rebeka. Ma-uto yayya nga babay. Ta interu pattolena, aru nga desision i kingngua na nga nagawag tu gutu. Ammu na gapa nu kanni anna nu kunnasi yayya nga magguyu. (Gen. 24:58; 27:5-17) Ngem maski kunnatun, minangngikakua anna minakkimoray lagapa yayya. (Gen. 24:17, 18, 65) Nu mapakalinno nga suportammu i unnug ira ni Jehova, gitta na kingngua ni Rebeka, mabbalikka tu makasta nga influwensia ta familiam anna ta kongregasion.

7. Kunnasi nga maparigan na kabataan ira nga sister si Ester?

⁷ I pangammu ta limitasion i tadday paga nga kualidad nga kawagan nga ipasingan na ngamin nga manakam ta espiritual. Kagian na Biblia nga mawag tu mabbalin ittam tu mapakalinno anna ammu tam i limitasiottam ira. (Prov. 11:2) Kunnatun si Ester. Ammu na i limitasion na anna matalo yayya ta Dios. Ari yayya nga nappakatannang maski turi ta reyna ngana yayya. Nagginna yayya ta tabarang na mas manakam nga kapitta na nga si Mardokeo anna sinuttul na yatun. (Est. 2:10, 20, 22) Mepasingammu gapa nga ammum i limitasiommu nu makitabarang ka anna nu tuttulammu yatun.—Tito 2:3-5.

8. Base ta 1 Timoteo 2:9, 10, kunnasi nakuan i assissinnun anna itchura na sister nga ammu na i limitasion na?

⁸ Egga paga i pakasingannan tu ammu ni Ester i limitasion na. Kurug tu ‘guapa yayya anna makemmemmi ta paningan,’ ngem ari yayya nga pasikat. (Est. 2:7, 15) Nu tadday ka nga sister, kunnasim maparigan si Ester? Makoffun nikaw i 1 Timoteo 2:9, 10. (Bibbigan.) Sinabarangngan ni apostol Pablo i Cristiano nga babbay nga mepangngo nakuan i assissinnudda anna ipasingan nakuan natun nga mapia i appana-panono da. I Griego ira nga uvovug nga neyusa tatun ay mangipasingan nga kanayun nakuan nga disente i assissinnun na tadday nga babay anna nonopan na gapa nakuan i makagi na tanakuan tatun. Talaga makomendan i sister ira nga manakam ta espiritual megafu ta mapia i assissinnudda!

9. Anni i magigiammu tam ta ehemplo ni Abigail?

⁹ I pakalippawa i tadday paga nga kualidad nga mawag na ngamin nga sister tapenu mammanakam ta espiritual. Anni i pakalippawa? Yatun i abilidad nga kannammuan i fustu anna i ugal anna kabalin na, pilian nga kuan i fustu. Ikonsidera i ehemplo ni Abigail. Ari tu makasta i desision nga kingngua na atawa na anna marake i efekto natun ta interu nga familia da. Ngem insigida nga egga i kingngua ni Abigail. Megafu ta pakalippawa na, ari ira nga natay. (1 Sam. 25:14-23, 32-35) Makaduffun gapa ta nittam i pakalippawa tapenu ammu tam nu kanni ittam nga maguvovug anna nu kanni ittam nga ari mattannug. Makaduffun gapa yatun tapenu kanayun nga balanse i pangipasingattam tu personal nga interes ta tanakuan.—1 Tes. 4:11.

GIGIAMMUAN I MAKADUFFUN IRA NGA SKILL

Kabataan nga sister nga agga-itubang nga mabbibbig tu brosiur nga “Tabbag ta 10 nga Pakkiavu na Kabataan Ira.” Egga ta lamesa na i agga-vuka nga Biblia, notebook, anna bolpen. — Anni i nammakapiammu megafu ta malalaki ka nga mabbibbig anna mattura? (Innan i parapo 11)

10-11. Anni i pammakapiammu anna na tanakuan nu malalaki ka nga mabbibbig anna mattura? (Innan gapa i letratu.)

¹⁰ Mawag tu gigiammuan na tadday nga Cristiano nga babay i makaduffun ira nga skill. I karuan ta skill nga magigiammu na babay ta kabbing na ay pammakapianan na ta interu nga pattolena. Ammuattam i karuan tatun.

¹¹ Gigiammuan nga mabbibbig anna mattura tu mapia. Ta karuan nga kultura, ari importante tu gigiammuan na babbay i mabbibbig anna mattura. Ngem importante nga skill danatun ta ngamin nga Cristiano.d (1 Tim. 4:13) Yayya nga maski nu mariga nga kuan yatun, ikagumammu lagapa nga mabbalin tu malalaki nga mabbibbig anna mattura. Anni i makasta nga resulta natun? Makaduffun yatun tapenu makaleg ka tu trabahum. Mas mabi gapa niko nga gigiammuan i Biblia anna ituddu yatun ta tanakuan. Pinaka-importante ta ngamin, mas maddukko ka kani Jehova habang bibbigammu i Uvovug na anna pannonopammu tu mapia yatun.—Jos. 1:8; 1 Tim. 4:15.

12. Anni i magigiammum ta Proverbio 31:26?

¹² Pakastammu i abilidad mu nga makikomunika. Mawag tu gigiammuan na Cristiano ira yatun. Kunnaw i nitabarang ni Santiago meyannung tatun: ‘Mawag tu sigga-parakkamu nga magginna anna memmugug kamu ta paguvovug.’ (Sant. 1:19) Nu magginna ka tu mapia habang mabbida i tanakuan, mepasingammu nga ‘makipattageno’ ka ta nira. (1 Ped. 3:8, NW) Nu ari ka siguradu nu nantindiammu i kakkagian onu mataga-tageno na tadday nga tolay, makkiavu ka paga. Tapus mannono ka labbi nige ka mabbida. (Prov. 15:28) Iyavu mu ta baggim: ‘Kurug kari anna makapasikan ta nono yaw nga kagiakku? Makapataki kari yaw onu masippo?’ Parigammu i sister ira nga malalaki nga magginna anna masippo nga mabbida. (Bibbigan i Proverbio 31:26.) Sifutammu nu anni i ikagi da anna nu kunnasi da nga ikagi yatun. Habang mas magigiammum nu kunnasi nga kuan danatun, mas mabbalin tu makasta i pakikavulu mu ta tanakuan.

Kabataan nga sister kavulu i yena na nga makirigacha ta mallaku ta palengke. — Nu ammu na tadday nga babay nu kunnasi asikasuan i pakawagan ta baleda, dakal nga uffun yayya ta familia na anna ta kongregasion (Innan i parapo 13)

13. Kunnasim nga magigiammu nga asikasuan i pakawagan ta balenu? (Innan gapa i letratu.)

¹³ Asikasuan i pakawagan ira ta balenu. Ta aru nga lugar, babbay i mangngua ta kakaruan na trabahu ira ta balay. Maduffunan naka na yenam onu na tanakuan paga nga sister tapenu magigiammum i trabahu ira ta balay. Kunnaw i kagian ni Sister Cindy: “Tadday ta kakastan nga nituddu nio na yenà ay mamagayayya i malappo nga pattrabahu. Sinudduan nà nu kunnasi i mallutu, mappakarenu, maddage, anna mabbadyet nu gumatang. Gafu tatun, ari ngà ngana nga marigatan anna mas aru i makuà ta passerbi kani Jehova. Sinudduan nà gapa nga mabbalin tu minammadulo, yayya nga aru i nakilalà nga mapia ira nga brother anna sister nga nabbalin tu makasta nga apparigakku.” (Prov. 31:15, 21, 22) I malappo anna minammadulo nga babay nga ammu na nu kunnasi nga asikasuan i pakawagan ira ta baleda ay bendision para ta familia na anna ta kongregasion.—Prov. 31:13, 17, 27; King. 16:15.

14. Anni i magigiammum kani Crystal, anna anni nakuan i fokus mu?

¹⁴ Gigiammuan nga ari nga kanayun nga maddepende ta tanakuan. Mawag tu kunnatun i ngamin nga makkaraga nga mammanakam ta espiritual. (Fil. 4:11) Kagian ni Sister Crystal: “Zinuffunan nà na magana ku ira nga mappili nu anni nga strand i apakku ta high school tapenu makagigiammu ngà tu praktikal ira nga skill. Pinagaram nà gapa na yamà nga manga tu subject ira nga accounting anna talaga dakal i neyuffun natun ta nio.” Fuera paga ta paggigiammu tu skill ira nga kawagan tapenu makaleg ka saw tu trabahum nga passuportam ta baggim, ikagumammu i mabbadyet anna tuttulammu yatun. (Prov. 31:16, 18) Nakafokus ka nakuan ta espiritual ira nga goal. Makuam yatun nu ari ka nga maggatu nu ari mabba nga kawagan anna nu kontentu ka ta simple nga pattolay.—1 Tim. 6:8.

MAPPREPARA PARA TA RESPONSIBILIDAD MU IRA TA MAPPANGE

15-16. Anni ira i meduffun na single ira nga sister? (Marcos 10:29, 30)

¹⁵ Nu egga ngana i makadios ira nga kualidad anna makaduffun ira nga skill mu, mas preparadu ka saw para ta responsibilidad mu ira ta mappange. Ikonsidera i karuan nga makuam.

¹⁶ Awayyam i mattalupaddian labbi tu single. Base ta kinagi ni Jesus, egga ira i babbay nga pinili da i ari nga makitawa maski nu ari nga kostumbre ta diadda i mattalupaddian nga awan tu atawa na. (Mat. 19:10-12) Madduruma gapa i rason na karuan nu ngatta single ira magadde sangawe. Ngem mepasiguradu ta nittam nga ari nga tagibadditan ni Jehova anna ni Jesus i wawwagi tam nga single. Ta interu mundo, makasta nga influwensia ta kongregasion i single ira nga sister. Iddeddukadda anna talaga ikavurungadda i wawwaragi, yayya nga nabbalin ira tu espiritual nga manang anna yena na magaru.—Bibbigan i Marcos 10:29, 30; 1 Tim. 5:2.

17. Kunnasi nga makapapprepara sangawe i tadday nga sister tapenu makapaf-full-time saw yayya?

¹⁷ Awayyam i masserbi ta ngamin-tiempo. Daka-dakal i meduffun na sister ira ta pallayyagayya ta interu mundo. (Sal. 68:11) Puedem kari nga planowan ngana sangawe nga masserbi tu full-time? Puede ka nga masserbi bilang payunir, construction volunteer, onu Bethelite. Ipakimallo mu i goal mu. Makibbida ka gapa turi ira ta nadde da ngana i kunnatun nga goal anna iyavu mu ta nira nu anni i kuammu tapenu makualipika tatun ira. Tapus mapplano ka nu kunnasim nga madde mu yatun. Sonu masserbi ka ngana ta ngamin-tiempo, napakaru i kappagayayya nga makuam para kani Jehova.

Kabataan nga sister nga makistoria ta grupo na sister ira. Napansin na i single nga brother nga mappakarenu ta Kingdom Hall. — Nu planom i makitawa, piliammu nakuan tu mapia i pakitawammu (Innan i parapo 18)

18. Ngatta pilian nakuan tu mapia na tadday nga sister i pakitawan na? (Innan gapa i letratu.)

¹⁸ Awayyam nga pilian nga makitawa. Mabbalikka tu mapia nga atawa nga babay nu egga ta niko i kualidad anna skill ira nga nagigiammu tam. Siempre, nu planom i makitawa, mawag tu piliammu tu mapia i pakitawammu. Tadday gare yatun ta pinaka-importante nga desision nga kuammu. Daddammammu nga mawag saw tu makimoray ka ta pakitawammu. (Roma 7:2; Efe. 5:23, 33) Iyavu mu gafu ta baggim: ‘Manakam kari yayya ta espiritual? Pagolluan na kari i espiritual ta pattolena? Makasta kari i desision ira nga kukukuan na? Aminan na kari i nakkamalian na ira? Irespeto na kari i babbay? Meyawa na kari i pakawagakku ira ta espiritual, material, anna emosional? Responsable kari yayya? Angngarigan na, anni ira i annungan na ta kongregasion anna kunnasi na nga asikasuan danatun?’ (Luc. 16:10; 1 Tim. 5:8) Siempre, nu kayà mu i makaleg tu mapia nga atawa, mawag gapa tu mapprepara ka tapenu mabbalikka tu mapia nga atawa nga babay.

19. Ngatta medayaw i babay ta responsibilidad na nga “manguffun”?

¹⁹ Kagian na Biblia nga i mapia nga atawa nga babay ay ‘kavulu’ na atawa na anna “manguffun” ta nisa. (Gen. 2:18) Meyalinno kari i babay tatun nga deskripsion? Ari gapa! Medayaw lallagu yayya tatun. I kurug, namippiga nga nakagi ta Biblia tu si Jehova ay “minangnguffun” onu “manguffun.” (Sal. 54:4; Heb. 13:6) Mabbalin tu kurug nga kaduffun i babay nu suportan na i atawa na. Angngarigan na, nu egga ira i desision na atawa na, suportan na yatun tapenu makasta i pabbalinan na familia da. Megafu gapa ta iddeddukan na babay si Jehova, kuan na i adde na mawayya na tapenu makasta i anningan na tanakuan ta atawa na. (Prov. 31:11, 12; 1 Tim. 3:11) Awayyam ngana i mapprepara sangawe tapenu mabbalikka saw tu mapia nga atawa nga babay. Makuam yatun nu mas paga nga iddukammu si Jehova anna mabbalikka tu minangnguffun ta unag na familia anna ta kongregasion.

20. Anni i meduffun na tadday nga yena ta familia na?

²⁰ Awayyam i mabbalin saw tu yena. Sonu egga ngana i atawam, awayya nu i makka-ana. (Sal. 127:3) Makasta gafu nu mapplano ka ngana sangawe. Makaduffun niko i kualidad anna skill ira nga nagigiammu tam taw nga artikulo sonu makitawa ka onu makka-ana ka. Nu minangngiddu ka, masippo, anna minappasensia, magayayya saw i familiam anna matageno na ána mu tu safe ira anna meddeddu ira.—Prov. 24:3.

Letratu ira: Kabataan ira nga sister nga masingan ta artikulo nga magayayya ta espiritual ira nga aktibidad. 1. I sister nga nannono tu mapia ta binibbig na ay agga-tammi tu nakavuka nga Biblia anna agga-ngizzi. 2. I sister nga nakirigacha ta mallaku ay mangiplasta tu piggang anna kutchara ta dining ta Bethel. 3. I sister nga nabbibbig tu brosiur ay ibibbig na i tadday nga teksto ta babay nga layyagayyan na. 4. I sister nga nakapansin ta single nga brother ta Kingdom Hall ay mak-cart witnessing kavulu i tadday nga bako. — Nammanakam ta espiritual i aru nga kabataan nga sister megafu ta ginigiammu da i Biblia anna niyaplika da yatun (Innan i parapo 21)

21. Anni i makagi tam ta sister tam ira, anna ngatta? (Innan i letratu ta vungun.)

²¹ Iddeddukammi sikamu nga kabataan ira nga sister megafu ta ngamin nga kukukuan nu para kani Jehova anna ta totolena. (Heb. 6:10) Ikakkaguman nu nga ipasingan i makadios ira nga kualidad, gigiammuan i skill ira nga makaduffun tapenu magayayya i pattolenu anna danuri na egga ta pallevu nu, anna mapprepara kamu tu mapia para ta posible ira nga responsibilidad nu ta mappange. Talaga bendision kamu ta organisasion ni Jehova!

KANSION 137 Matalo nga Babbay

a Sikamu nga meddu nga kabataan nga sister, nabala-balor kamu ta kongregasion. Mammanakam kamu ta espiritual nu ipasingan nu i makadios ira nga kualidad, gigiammuan nu i makaduffun ira nga skill, anna mapprepara kamu para ta responsibilidad nu ira ta mappange. Nu kuan nu danatun, aru i bendision nu ta passerbi kani Jehova.

b KEBALINAN NA TERMINO: I tadday nga manakam ta espiritual onu matured nga brother onu sister ay mappegiya ta espiritu na Dios, ari tu ta ka-uto na tolay. Paparigan na si Jesus anna ikakkaguman na nga kanayun nga maddukko kani Jehova, anna kurug i pangiddu na ta tanakuan.

c Innan i Pebrero 2021 nga isyu na Passifusifutan, p. 14-19.

d Tapenu mammuan nu ngatta importante i pabbibbig, innan ta jw.org i artikulo nga “Bakit Mahalagang Magbasa ang mga Bata?—Bahagi 1: Magbabasa o Manonood?”