Mapaddumam Kari i Kurug ta Laddug?

1. Anni i makagim ta kinakurug?

AYATAN na totolay ni Jehova i kinakurug nga egga ta Uvovug na. Tatuttam nibase i pangurug tam. (Roma 10:17) Kumbinsidu ittam nga nipataddag ni Jehova i Cristiano nga kongregasion bilang “i arigi anna fundasion na kurug.” (1 Tim. 3:15) Magayayya ittam nga makimoray ta “manangngal” ira nittam nga mangipakanawag ta kinakurug ta Biblia anna mangiyawa tu direksion mekunnay ta uray na Dios.—Heb. 13:17.

2. Base ta Santiago 5:​19, anni i posible nga mesimmu nittam kabalin nga magigiammu tam i kinakurug?

² Maski nu inaksepta tam ngana i kinakurug anna i pakawagattam ta pangigiya na organisasion na Dios, posible lapa nga pallikurattam i kinakurug. (Bibbigan i Santiago 5:19.) Kakayà ni Satanas nga ari ittam nga mattalo ta Biblia onu ta direksion nga naggafu ta organisasion na Dios.—Efe. 4:14.

3. Ngatta mawag tu matalo nga tuttulattam i kinakurug? (Efeso 6:​13, 14)

³ Bibbigan i Efeso 6:​13, 14. Aranni ngana nga usan na Diablo i maka-engganyo nga kinaladdug tapenu ilogo i ngamin nga nasion nga kontran si Jehova. (Nep. 16:​13, 14) Ekspektattam gapa nga mas ikaguman ni Satanas nga ilogo i totolay ni Jehova. (Nep. 12:9) Yari tu mawag nga sanayattam i baggi tam nga mapadduma i kurug ta laddug anna matalo nga tuttulan i kurug. (Roma 6:17; 1 Ped. 1:22) Nakadepende tatun i kapaliag tam sonu dakal nga ziga!

4. Anni i gigiammuattam taw nga artikulo?

⁴ Taw nga artikulo, gigiammuattam i dua nga kualidad nga kawagan tapenu marekunnisi onu mammuattam nu anni i kurug nga naggafu ta Biblia anna tapenu akseptattam i direksion na organisasion na Dios. Tapus gigiammuattam i tallu nga makua tam tapenu tulu-tuloy nga matalo nga tuttulan i kurug.

KUALIDAD IRA NGA KAWAGAN TAPENU MAMMUAN NU ANNI I KURUG

5. Kunnasi nga makoffun i assing kani Jehova tapenu mammuattam nu anni i kurug?

⁵ Assing kani Jehova. Mepasingattam nga ikassing tam si Jehova nu kuruga ayatattam yayya. Ari tam gafu ikaya nga magangngua tu anni laman nga mamarraddam ta nisa. Kakayà tam nga magigiammu i nadduman na fustu ta ugal anna na kurug ta laddug tapenu mala tam i fabor ni Jehova. (Prov. 2:​3-6; Heb. 5:14) Ari tam nakuan vuluvuga ipamavulu nga mas masikan i assing tam ta tolay anne ta aya tam kani Jehova megafu ta maruddu nga ari nga mamagayayya kani Jehova i mamagayayya ta totolay.

6. Anni i kingngua na mafulu nga panakallan na tribu megafu ta assing ta tolay?

⁶ Nu mas masikan i assing tam ta tolay anne ta assing tam ta Dios, baka meyarayyu ittam ta kinakurug. Ikonsidera tam i nesimmu ta 12 nga panakallan na tribu nga nagespiya ta davvun nga nipromesa ni Jehova nga iyawa na ta Israelita ira. Para ta mafulu nga espiya, mas masikan i assing da ta Canaanita ira anne ta aya da kani Jehova. Yatutta kinagi da ta kasi-Israelita da ira: “Ari tam mawayya nga labanan yari ira nga totolay megafu ta mas masisikan ira anne nittam.” (Num. 13:​27-31) Ta pagimamma na tolay, mas masikan i Canaanita ira anne ta Israelita ira. Fustu gapa yatun. Ngem i sinni laman nga mangikagi nga ari nga maffu na Israelita ira i kalabadda ay ari na nga nononopan si Jehova. Naffokus nakuan yatun ira nga mafulu nga espiya ta kayà ni Jehova nga ipakua ta Israelita ira. Ninono da nakuan tu mapia i kababalin laman ira nga kingngua ni Jehova para nira. Nu kunnatun i kiningngua da, nanono da nakuan nga awan tu kalalaban na Canaanita ira kumpara ta pakapangngua ni Jehova. Ari tu kagitta natun ira nga awan tu pangurug na nga espiya, ikaya da Josue anna Caleb nga mapagayayya si Jehova. Kinagi da ta totolay: “Nu magayayya si Jehova nittam, siguradu nga iyadde na ittam taw nga davvun anna iyawa na yatun nittam.”—Num. 14:​6-9.

7. Kunnasi nga mas maganassing ittam kani Jehova? (Innan gapa i letratu.)

⁷ Tapenu mas maganassing ittam kani Jehova, mawag tu nonopattam nu anni i mamagayayya nisa ta kada desisiottam. (Sal. 16:8) Ta pabbibbig mu tu rekord ira ta Biblia, iyavu mu ta baggim, ‘Nu egga ngà tatun nga situasion, anni i desisiokku?’ Angngarigan na, imajinammu nga gigginnammu i mafulu ira nga Israelita nga panakallan na tribu nga makkakkagi tu negatibo nga balita. Kurugammu kari i nibalita da? Mas masikan kari i assing mu ta tolay anne ta aya mu kani Jehova anna ta pakkaraga mu nga mapagayayya yayya? Interu nga henerasion na Israel i ari nga nakarekunnisi tu kurug i kinagi ni Josue anna ni Caleb. Megafu tatun, ari ira nakatallung ta Nepromesa nga Davvun.—Num. 14:​10, 22, 23.

8. Anni nga kualidad i ikagumattam nga kultiban, anna ngatta?

⁸ Kinapakalinno. Ipakannammu ni Jehova i kinakurug ta mapakalinno ira. (Mat. 11:25) Mapakalinno nga inaksepta tam i uffun tapenu magigiammu i kinakurug. (King. 8:​30, 31) Ngem magimmugug ittam nakuan ta baka mabbalin ittam tu minappakatannang. Nu kunnatun gare, baka nonopattam nga i opiniottam ay parefu nga fustu ta prinsipio ira na Biblia anna ta direksion maggafu ta organisasion ni Jehova.

9. Kunnasi nga ari tam mawawwan i kinapakalinno?

⁹ Tapenu ari nga mawawwan i kinapakalinno tam, mawag tu daddammattam nga awan tu sesserbi tam kumpara kani Jehova. (Sal. 8:​3, 4) Puede tam gapa ikiddaw kani Jehova nga uffunan na ittam nga mabbalin tu mas mapakalinno anna mabi matudduan. Uffunan ittam ni Jehova nga mas tagibaloran i appana-panono na nga naggafu ta Biblia anna ta organisasion na anne ta sarili tam nga appana-panono. Ta pabbibbig mu tu Biblia, sifutan i ebidensia ira nga mangipasingan nga kakayà ni Jehova i minappakalinno anna kalussaw na i minappakatannang anna palagopog. Ikagumammu nga ari mawawwan i kinapakalinno mu nu makalawa ka tu pribilehio nga mangiyawa niko tu autoridad onu mapansin naka na tanakuan.

KUNNASI TAM NGA METADDAGGAN I KINAKURUG?

10. Sinni i inusa ni Jehova tapenu mangiyawa tu instruksion anna direksion ta totolena?

¹⁰ Kanayun nga mattalo ta direksion na organisasion ni Jehova. Ta Israel gari, inusa ni Jehova si Moises tapus si Josue tapenu mangiyawa tu instruksion ira ta totolena. (Jos. 1:​16, 17) Mapia i paddia-paddian na Israelita ira nu imammatadda danatun nga mangirollu nga mangibaggi kani Jehova nga Dios. Pappasa na ginatu nga dagun turi ta nabuu i ollu nga Cristiano nga kongregasion, i 12 nga apostoles ngana i mangiyawa tu direksion. (King. 8:​14, 15) Turi kua, neyammung gapa tatun nga grupo i mannakam ira ta Jerusalem. Megafu ta sinuttul da i pangigiya nga nalawa da tatun nga matalo nga lallaki, “nassikan i angngurug na iglesia ira anna nammungan i bilang da ta kaggaggaw.” (King. 16:​4, 5) Ta tiempo tam gapa, mapia i paddia-paddiattam nu tuttulattam i direksion na organisasion ni Jehova. Ngem anni tamma i matageno ni Jehova nu manaki tam nga tuttulan danuri pinili na nga mangirollu? Matabbag yatun nu ikonsidera tam i nesimmu ta Israelita ira turi ta mattallung ira ta Nepromesa nga Davvun.

11. Anni i nesimmu turi ira ta narrebelde kontra ta pinili ni Jehova nga mangirollu? (Innan gapa i letratu.)

¹¹ Turi ta nakatallung ngana i Israelita ira ta Nepromesa nga Davvun, kinuestion na prominente ira nga lallaki si Moises anna i papel nga niyawa ni Jehova ta nisa. Kinagi da: “Masanto i interu nga Israel [ari laman tu si Moises], ngamin ira, anna egga si Jehova ta nallatanadda.” (Num. 16:​1-3) Kurug gapa tu imammatan ni Jehova tu masanto “i interu nga Israel,” ngem pinili na si Moises nga mangirollu ta totolena. (Num. 16:28) Ta pakkritika natun ira nga rebelde kani Moises, si Jehova talaga i krinitika da. Ari ira nga naffokus ta kayà ni Jehova, nu ari lagu, ta kayà da lagapa. Kayà da i mas aru nga autoridad anna kinaprominente. Pinatay na Dios danatun nga lider na rebelyon kunne na gapa i rinivu paga nga minanugu ta nira. (Num. 16:​30-35, 41, 49) Ta tiempo tam gapa, makasiguradu ittam nga manaki ni Jehova danuri awan tu respeto da ta unnug ira na organisasion na.

12. Ngatta kanayun nga makapattalo ittam ta organisasion ni Jehova?

¹² Kanayun ittam nga makapattalo ta organisasion ni Jehova. Nu klaro ngana nga mawag tu moli i pakalippawa tam ta tadday nga kinakurug ta Biblia onu ta unnug na organisasion, ari nga magalangan i Manangngal nga Baggi nga kuan i mawag ira nga moli. (Prov. 4:18) Kuadda yatun primeru ngana megafu ta kayà da nga pagayayyatan si Jehova. Kuadda gapa i adde na mawayya da nga ibase i desisiodda ira ta Uvovug na Dios, i apparigan nga mawag tu tuttulan na ngamin nga masserbi kani Jehova.

13. Anni ‘i netuddu ira nga apparigan na kinakurug,’ anna anni i mawag tu kuattam tatun?

¹³ ‘Tuttulan ta mapia nga kunna apparigan i netuddu ira nga kinakurug.’ (2 Tim. 1:13) ‘I netuddu ira nga apparigan na kinakurug’ ay tumukoy ta tuddu ira na Cristiano nga mabibbig ta Biblia. (Juan 17:17) Danatun nga tuddu i basehan na ngamin nga kurugattam. Sinudduan ittam na organisasion ni Jehova nga tuttulan tu mapia yatun nga ammarigan. Adde ta kukukuattam yatun, mapia i paddia-paddiattam.

14. Ngatta nagimmang i karuan nga Cristiano nga ibase i pangurug da ta ‘netuddu ira nga apparigan na kinakurug’?

¹⁴ Anni i mesimmu nu ari tam ngana nga ibase i pangurug tam ta ‘netuddu ira nga apparigan na kinakurug’? Ikonsidera i nesimmu ta ollu nga siglo. Egga ira i Cristiano nga nangipala-palakag tu istoria nga zimittal ngana kanu i aggaw ni Jehova. Posible nga egga i nalawa da tu tura nga abbo da tu nitura ni apostol Pablo nga kunnatun i kagian na. Ari nga kinumfirma na karuan nga Cristiano ta Tesalonica nu kurug kari yatun, yayya nga nangurug ira tatun nga istoria anna niyisti-istoria da paga yatun ta tanakuan. Ari nakuan ira nga nelogo nu neraddammadda i nituddu ni Pablo ta nira tagga bi ta kavulu da paga yayya. (2 Tes. 2:​1-5) Sinabarangngan ni Pablo i kapangngurug na ira nga ari da nakuan kurugan i ngamin nga maginna da. Tapenu moffunan paga ira ni Pablo ta mappange, niyultimu na i mekadua nga tura na ta Tesalonica ira ta kuddanaw nga uvovug: “Sakan mismu i nangitura taw: ‘Maddios ngà nikamu.’ Kunnaw i affirmà ta ngamin nga tura ku; kunnaw i attura ku.”—2 Tes. 3:17.

15. Kunnasi tam maprotektan i baggi tam ta kinaladdug ira nga gitta na kurug gapa? Mangistoria tu angngarigan. (Innan gapa i letratu ira.)

¹⁵ Anni i magigiammu tam ta kinagi ira ni Pablo ta taga-Tesalonica? Nu egga i maginna tam nga ari tu mekunnay ta nagigiammu tam ta Biblia onu nakaginna ittam tu kakkadda-kaddag nga istoria, mawag tu usattam i nono tam. Angngarigan na, ta dati nga Soviet Union, nangiyawa i totolay na gobierno ta brother ira tu tadday nga tura nga pinalawadda tu naggafu ta world headquarters. Pinagaram ira natun nga tura nga mabbuu ira tu tanakuan nga grupo nga nesina ta organisasiottam. Nu bibbigammu yatun nga tura, gitta na kurug gapa. Ngem ari natun nelogo i matalo ira nga brother. Narekunnisi da nga ari nga mekunnay ta netuddu ta nira i mensahe natun nga tura. Ta tiempo tam, nu mittan usan gapa na kalabattam ira i Internet anna i social media tapenu pangguluan anna passirinan ittam. Imbes tu “malogon nga mataranta onu mavurung” ittam, maprotektan ittam nu nonopattam tu mapia nu mekunnay i naginna onu nabibbig tam ta kinakurug ira nga nagigiammu tam ngana.—2 Tes. 2:2; 1 Juan 4:1.

16. Segun ta Roma 16:​17, 18, anni nakuan i kuattam nu pinanawan na karuan i kinakurug?

¹⁶ Ari nga panawan danuri matalo kani Jehova. Kayà na Dios nga egga i pattaradday tam ta paddayaw ta nisa. Ari tam mawawan yatun nga pattaradday adde ta itaddaggattam i kinakurug. I sinni laman nga mangipalakag tu informasion nga mekontra ta kinakurug ay mamassirina ta unag na kongregasion, yayya nga tabarangngan ittam na Dios nga ‘arayyuattam ira.’ Ta nu ari, baka meyarayyu da gapa ittam ta kinakurug.—Bibbigan i Roma 16:​17, 18.

17. Anni i pammakapiattam nu marekunnisi tam nu anni i kurug anna nu ari tam vuluvuga panawan yatun?

¹⁷ Nu ammuattam nu anni i kurug anna ari tam vuluvuga panawan yatun, kanayun ittam nga madukko kani Jehova anna masikan kanayun i pangurug tam. (Efe. 4:​15, 16) Fuera paga tatun, maprotektan ittam gapa ta falsu ira nga tuddu anna propaganda ni Satanas anna kanayun ittam nga tangngallan ni Jehova sonu dakal nga ziga. Ari mu gafu vuluvuga panawan i kinakurug, “ay i Dios nga mangiyawa nittam ta imammo ay makitappaddian nikamu.”—Fil. 4:​8, 9.