Nu Kunnasi Magadjust ta Bagu nga Kongregasion

Duma gapa i pinroblema da Nicolas anna Céline. Inasayn ira na branch ta France nga magali tu bagu nga kongregasion. Istoriadda: “Ta ollu bi, sobra i excited mi. Ngem turi kua, namegafu mi ngana nga ma-miss i friends mi ira. Ari mi paga gare kunnari ka-close i wawwaragi ta bagu nga kongregasiommi.”a Nu kunnatun gafu kariga i magali, anni ira i kuammu tapenu maka-adjust ka? Anni gapa i makua na tanakuan tapenu maduffunaddaka? Anni ira i kuammu tapenu mapagaram i tanakuan ta bagu nga kongregasiommu anna mapagaram daka gapa?

APPA NGA PRINSIPIO NGA MAKADUFFUN TA PAGADJUST

1. Mammakatalo ka kani Jehova. (Sal. 37:5) Pinanawan ni Sister Kazumi nga taga-Japan i kongregasion nga 20 dagun ngana yayya nga parte natun megafu ta neyali tu trabahu i atawa na. Kunnasi na nga ‘niyalawa i baggi na ta YAFU’ nga Jehova? Kinagi na: “Nivuvvu ku i ngamin nga mayan na futù kani Jehova. Kinagì ta nisa nga maganassing ngà, matageno ku tu magitetadday ngà, anna mavuru-vurung ngà. Kada kuakku yatun, iyawa na i sikan nga kawagakku.”

Anni i kuammu tapenu mas mattalo ka kani Jehova? Nonopammu i tadday nga mula. Mawag natun i danum anna i sustansia maggafu ta davvun tapenu dumakal. Kunnatun gapa i pangurug tam. Mawag natun i espiritual nga danum anna sustansia tapenu dumakal. Kunnatun i napakurug ni Nicolas nga nakagi ta ollu. Ninono na tu mapia i ehemplo da Abraham, Jesus, anna Pablo nga aru i nisakrifisio da tapenu kuan i uray na Dios. Gafu tatun, mas nattalo yayya nga suportan yayya ni Jehova. Nu kanayun gapa nga map-personal study ka, makayanammu i maski anni nga panguli ta pattolem anna makagigiammu ka tu gannug ira nga awayyam usan tapenu pagaramman i tanakuan ta bagu nga kongregasiommu.

2. Ari ka nga mangikumpara. (Ecl. 7:10) Turi ta nagali si Brother Jules ta United States maggafu ta Benin, nasingan na nga dakal i nadduman na kultura tari. Istorian na, “Matageno ku nga mawag ku nga ikagi ta kada makilalà i ngamin nga gannug meyannung niakan.” Megafu ta duma yatun ta nakasanayan na, inarayyuan na i wawwaragi ta kongregasion, ngem turi ta mas nakilala na ira, nanguli i appana-panono na. Kagian na: “Mangurug ngà tu maski sitaw i diattam ta davvun, para-parehu laman i totolay. Madduruma laman i abbibida da anna agguyu-guyu da. Pagurayammu laman i totolay nga kuadda nu anni i normal ta nira.” Ari mu nakuan gafu ikumpara i bagu nga kongregasiommu ta dati nga kongregasiommu. Kunnaw paga i kagian na payunir nga si Sister Anne-Lise: “Ari ngà mabba gapa nagali tapenu mammuan nu anni saw ira i ma-miss ku. Nagali ngà tapenu egga mammuakku nga bagu ira nga gannug.”

Mawag gapa tu ari nga ikumpara na elder ira i dati nga kongregasiodda ta nagalitadda. Nu duma i metodo na brother ira ta bagu nga kongregasiommu, ari na gapa kayà kagian tu ugal ira. Mas makasta nu ammuammu labbi nu kunnasi kari i paddia-paddian tatun nga lugar nige mu nga mangiyawa tu suhestion ira. (Ecl. 3:​1, 7b) Mas matudduammu i wawwaragi nu mapia i ehemplom, imbes tu ifersam ta nira i sarilim ira nga ideya.—2 Cor. 1:24.

3. Mabbalikka tu busy. (Fil. 1:27) Nu magali ka, aru nga tiempo anna sikan i ufutan natun. Ngem namegafu turi ta nagali ka, mawag tu makistudy ka lagapa tu face-to-face nu posible. Siempre gapa nu bagu ka ta kongregasiommu tapus ari daka kuruga masingan onu bihira laman, kunnasi daka gafu maduffunan? Kunnaw i istorian ni Sister Lucinda nga nagali ta dakal nga siudad ta South Africa kavulu i dua tu ana da nga babay: “Nitabarang ta nio na kokkofukku ira nga kanayun ngà mabbalin tu busy ta kongregasion. Nakipartner ngà ta nadduruma nga wawwaragi ta ministerio anna nakkomento ngà ta study. Niyofer mi gapa nga puede da usan i balemi nga pang-meeting for field service.”

‘Tadday laman nakuan i gakkag anna nono tam.’ Duffunattam gafu ta teokratiko ira nga aktibidad i wawwaragi ta bagu nga kongregasiottam tapenu ‘metaddaggattam i pangurug ta evanghelio.’ Pinagaram na elder ira si Anne-Lise nga nakagi ta gafu nga ikaguman na nga layyagayyan i maski sinni nga tolay. Anni i resulta natun? Kagian na, “Dakal i neduffun natun tapenu matageno ku nga parte ngà na kongregasion.” Mabboluntariu ka gapa ta pappakarenu anna pammentena ta Kingdom Hall ira tapenu mepasingammu ta wawwaragim nga ibilammu ngana tu yatun i bagu nga kongregasiommu. Nu mas busy ka, mas mabi ka nga makapagadjust anna matageno mu tu egga ngana i bagu nga familiam ta espiritual.

4. Magaleg ka tu bagu nga kokkofun. (2 Cor. 6:​11-13) Nu ipasingammu ta totolay nga talaga ikavurungammu ira, makaleg ka tu bagu nga kokkofun. Yayya nga nige anna kabalin na study, makistoria ka nakuan ta wawwaragi tapenu mas mammammum ira. Ikagumammu gapa nga tandaan i ngaga-ngagadda. Nu matandaammu i ngagan na totolay anna masippo ka nira anna ipasingammu nga mabi ka nga marannian, mas kayà daka nga makilala anna magga mabbalikkamu tu makkofun.

Kammu kuruga mavurung nga baka ari daka magustuan na bagu ira nga kakongregasiommu. Pagurayammu laman nga makilala daka nu sinni ka talaga. Parigammu i kingngua ni Lucinda. Istorian na, “Egga ngana sangawe ira i close friend mi megafu ta sikami i nagollu nga magimbita ta tanakuan ta balemi.”

‘ALAWATAN NU I KATAGGI-TADDAY’

Para ta karuan, marigatan ira nga tullung ta Kingdom Hall nu puru ari da kilala i masingadda. Yayya nga anni gafu i kuammu tapenu ari ira nga marigatan? Nipagaram ni apostol Pablo, “Nu kunnasi na nipangalawa ni Cristo nikamu, kunnatun gafu i pangalawa nu ta kataggi-tadday.” (Roma 15:7) Nu parigan na elder ira si Cristo, maduffunan i babbagu ira nga matageno nga welcome ira. (Innan i kahon nga “Nu Anni i Makua Tapenu Maayus i Pagali.”) Ngem siempre, ngamin ta kongregasion maski abbarabbing ay egga i makua da tapenu matageno na babbagu ira nga komfortable ira.

Mepatageno tam ta tanakuan nga welcome ira ari laman nu imbitattam ira ta baletam, nu ari, uffunattam gapa ira ta praktikal. Kunnatun i kingngua na tadday nga sister. Zinuffunan na i tadday paga nga sister nga bagu laman nga nagali ta lugar da. Nipasiar na yayya ta siudad anna nipasingan na ta nisa nu kunnasi i sistema na pattakay tu bus anna tren ira tari. Talaga nagustuan natun nga sister i kingngua na anna nakaduffun yatun tapenu matageno na nga komfortable ngana yayya ta nagalitan na.

CHANSA TAPENU MAPPROGRESO

Habang abbing paga i durun, mamippiga nga mattali i tabbi natun nige nga makakagag. Kunnatun gapa nu magali ka tu bagu nga kongregasion. Alsammu labbi i maski anni nga pakavurungammu nga makefugag niko ta gitta na pakkagag onu papprogreso ta passerbi kani Jehova. “Makasta nga training i pagali,” kagian ni Nicolas anna ni Céline. “Gafu ta nakibagay kami ta bagu nga totolay anna pallevu, napeggakkami tu bagu ira nga kualidad.” Kunnaw gapa i kagian ni Jean-Charles nga nakagi ta gafu nu kunnasi nga nabbenefisio i familia da: “Ta bagu nga kongregasiommi, mas nammanakam ta espiritual i ána mi. Kabalin laman na piga vulan, nagasayment ngana i ana mi nga babay ta study mi ta midweek tapus na-unbaptized publisher gapa i ana mi nga lalaki.”

Kunnasi nu ari nga ipamavulun na situasiommu sangawe nga magali ka nu sitaw mas dakal i pakawagan? Puedem nga kuan i maddaggun nga kongregasiommu tu gitta na bagu. Puruebammu i suhestion ira nga nakagi taw nga artikulo. Mepasingammu nga mattalo ka kani Jehova nu kanayukka nga busy ta aktibidad ira na kongregasion. Iyiskediul mu gapa nga makikavulu ta wawwaragi ta ministerio anna mas paga nga kilalan danuri ari mu paga nga kilala onu mabbalin tu mas mapia nga kofun tari ira ta kilalam ngana. Puedem nga magollu nga uffunan ta praktikal danuri babbaragu anna danuri makawag. Megafu ta aya i panakkilalan na kurug ira nga Cristiano, mas mabbalikka tu madukko kani Jehova nu uffunammu i tanakuan. (Juan 13:35) Mepasiguradu ta niko nga ‘i kuddanaw ira nga sakrifisio i makapagayayya ta Dios.’—Heb. 13:16.

Maski nu mariga talaga i magali tu bagu nga kongregasion, aru ngana nga Cristiano i nakua da yatun. Makuam gapa yatun! Kagian ni Anne-Lise: “Megafu ta nagali ngà tu kongregasion, nakapappalawa ngà.” Kumbinsidu ngana gapa sangawe si Kazumi nga nu magali ka, “maekspiriensam i panguffun ni Jehova ta gannug ira nga ari mu naekspiriensa tagga.” Kunnasi gapa si Brother Jules? Kagian na: “Megafu ta egga ira i nabbalin tu bagu nga kokkofukku, ari ku ngana matageno sangawe nga magitadday ngà. Matageno ku ngana sangawe nga parte ngà na bagu nga kongregasiokku anna marigatan ngà ngana nga panawan yatun.”