Ammum Kari?

Kunnasi ka-importante i musika ta Israel tagga?

KURUGA importante i musika ta kultura na Israelita ira tagga. Maruddu nga mabibbig ta Biblia i totolay nga mappatugtug tu instrumento anna makkansion. Mafulu porsiento na Biblia ay kansion. Angngarigan na, i Salmo, Kansion ni Solomon, anna Silasigo ay netura para makansion. Nakagi ta libru nga Music in Biblical Life nga ipasingan na Biblia nga kanayun nga usan na Israelita ira i musika ta aru nga aktibidad da ta pattoleda.

Musika ta inaggaw nga pattolay. Nappatugtug i Israelita ira anna nakkansion ira tapenu ilawan i mataga-tageno da. (Isa. 30:29) Nappatugtug tu pandereta i babbay, magayayya ira nga nakkala-kansion anna nattala ta selebrasion ira gitta na ketrono na bagu nga patul, pangaffu na suddalu ira ta gerra, anna fiesta ta paddayaw. (Uk. 11:34; 1 Sam. 18:​6, 7; 1 Pat. 1:​39, 40) Nakkansion gapa i Israelita ira tu funebre tapenu ilawan i daddam da nu egga i matay. (2 Cro. 35:25) Manawag gafu nga kakayà na Israelita ira i musika.

Musika ta palasio. Kakayà na patul ira na Israel i musika. Inagalan ni Patul Saul si David nga mabbalin tu musikeru na ta palasio. (1 Sam. 16:​18, 23) Turi ta nabbalin ngana tu patul si David, namadday yayya tu instrumento, nattura tu makasta ira nga kansion, anna nangorganisa tu orkestra ta templo ni Jehova. (2 Cro. 7:6; Amos 6:5) Egga gapa i lallaki anna babbay nga gumakkansion ni Patul Solomon ta palasio.—Ecl. 2:8.

Musika ta paddayaw. Pinaka-importante, inusa na Israelita ira i musika tapenu idayaw si Jehova. Egga i 4,000 nga musikeru ta templo na Jerusalem. (1 Cro. 23:5) Nappatugtug ira tu piampiang, instrumento nga de-kwerdas, arpa, anna trumpeta. (2 Cro. 5:12) Ngem ari laman tu yaw ira nga malalaki nga musikeru i nangusa tu musika tapenu idayaw si Jehova. Aru nga Israelita i nakkansion tu Kansion ira ta Igugon ta pabbiahe da kada ragun paumay ta fiesta ira ta Jerusalem. (Sal. 120-134) Base gapa ta Judio ira nga literatura, nakkansion i Israelita ira tu Salmo ira nga Hallela durante ta pamugag ta Paskua.

Adde sangawe, kuruga importante i musika ta totolay na Dios. (Sant. 5:13) Parte na paddayaw tam i pakkansion. (Efe. 5:19) Nu kavulu tam i wawwaragi nga makkansion, mas nga maddukko ittam ta nira. (Col. 3:16) Mapasikan ittam gapa na musika nu mazziga-riga ittam. (King. 16:25) I musika ay makakkasta nga pangipasingan tu pangurug anna aya tam kani Jehova.