Pakkiavu na Mabbibbig Ira

Kunnasi katannang i veranda na templo ni Solomon?

I veranda ay parte na attallungan mappange ta Masanto nga parte na templo. Segun ta nepublisa ira nga edision na New World Translation of the Holy Scriptures nage na dagun 2023, “i veranda ta arubang ay 20 nga siku i kapaddu na, kaparehu balaman na kaba na balay, anna i katannang na ay 120.” (2 Cro. 3:4) Kagian gapa na tanakuan ira nga translation nga “120 nga siku” i katannang na veranda. Torre gafu yatun nga 53 nga metro i katannang na!

Ngem ta 2023 nga edision na New World Translation, kunnaw i netura meyannung ta veranda na templo ni Solomon: “I katannang na ay 20 nga siku,” onu maggi 9 nga metro.a Ngatta nanguli yatun? Ammuattam i karuan nga rason.

Ari nga nakagi i katannang na veranda ta 1 Patul Ira 6:3. Tatun nga teksto, nitura ni Jeremias i kapaddu anna i kaba na veranda, ngem ari na nga nitura i katannang natun. Tapus ta tumunug nga kapitulo, dinetalye na i karuan paga nga parte na templo nga mabi laman nga masingan. Nelagum tatun i dakal nga pagunnugan tu danum nga napadday ta naforma nga metal, i mafulu nga karitela, anna i dua nga tubbaga nga arigi ta lawan na veranda. (1 Pat. 7:​15-37) Nu kurug tu maturu tu 50 nga metro i katannang na veranda anna arayyu nga mas atannang yatun anne ta karuan paga nga parte na templo, ngatta gafu ta ari nga nakagi ni Jeremias i meyannung ta katannang natun? Maski ta pappasa na ginatu nga dagun, nitura na Judio ira nga historiador nga ari tu mas atannang i veranda anne ta karuan nga parte na templo ni Solomon.

Kuestionan na iskolar ira nu masuportan kari na pader ira na templo i veranda nga 120 nga siku i katannang na. I atattarannang ira nga pataddag ta ollu nga tiempo ay napadday ta batu anna ta ladriliu. Makakaba i fundasion danatun, ngem sisinu nga bumaddi habang mappa-utung. Kunnatun i trangka ira na templo ta Ehipto. Ngem tanakuan i templo ni Solomon. Kurugan na iskolar ira nga adde laman ta 6 nga siku onu 2.7 nga metro i kaba na pader ira. Yayya nga kinagi na historiador na arkitektura nga si Theodor Busink: “Base ta kaba na pader na [attallungan na templo], imposible nga 120 nga siku i [katannang na] veranda.”

Awayya na tu ugal i nikakopia na 2 Cronicas 3:4. Maski nu nakagi ta karuan nga dadana nga manuskrito i “120” taw nga versikulo, nakagi gapa i “20 nga siku” ta mapattalakkan ira nga manuskrito kagitta na Codex Alexandrinus ta mekalima nga siglo anna Codex Ambrosianus ta meka-annam nga siglo. Ngatta gafu magugal i gumakkopia anna itura na i “120”? I Hebreo gare ira nga uvovug para ta “ginatu” anna “siku” ay parefu i itchura na. Yayya nga awayya na tu “ginatu” i nitura na gumakkopia imbes tu “siku.”

Siempre, maski nu ikakkagumattam nga alippawatan yatun ira nga detalye anna imajinan i fustu ira nga gukug na templo ni Solomon, mas nga maffokus ittam ta irepresenta natun nga templo—i dakal nga espiritual nga templo. Mappappabalo ittam ta inagalan ni Jehova i ngamin nga aripan na tapenu dayawan yayya tatun nga templo!—Heb. 9:​11-14; Nep. 3:12; 7:​9-17.