MAGIGIAMMU NGA ARTIKULO 43
KANSION 90 Makkapasa-pasikan Ittam
Anni i Kuattam Tapenu Mawawwan i Padduda Tam?
“Innan nu ta mapia nu kurug ngamin danaw.”—1 TES. 5:21.
I MAGIGIAMMU TAM
Nu anni i makua tam tapenu mawawwan i padduda tam ira nga awayya na tu makafekto ta passerbi tam kani Jehova.
1-2. (a) Anni i karuan nga paddudan na aripan ira ni Jehova? (b) Anni i gigiammuattam taw nga artikulo?
SITTAM ngamin, abbing man onu lakay, ay nakatageno ngana tu padduda.a Angngarigan na, baka paddudan na kabataan nga Saksi nu ikavurungan kari yayya ni Jehova. Megafu tatun, baka magalangan yayya nga mappa-baptize. Nonopammu gapa i tadday nga brother nga pinili na nga ipollu nga passerbian si Jehova turi ta kabataan yayya imbes tu magunnug tu aru nga kuartu. Sangawe ta ari nga makkasia i kuartu na para ta pakawagan na familia, baka paddudan na nu fustu i pinili na turi ta kabataan yayya. Imajinammu i baka-bako nga sister nga makafi ngana. Awayya na tu madismaya yayya megafu ta arianna ngana makua i dati nga makua na. Neyavu mu ngana kari danaw: ‘Talaga kari nga ikavurungan nà ni Jehova? Fustu kari i sakrifisio nga kingnguà para kani Jehova? Meyusa nà paga kari ni Jehova?’
2 Nu pagurayattam nga ari nga matabbag danatun, awayya na nga makkafi i pangurug tam kani Jehova anna magimmang ittam paga lagu nga masserbi nisa. Taw nga artikulo, gigiammuattam nu kunnasi makoffun i prinsipio ira na Biblia nu paddudattam nga (1) ikavurungan ittam ni Jehova, (2) fustu i kingngua tam ira nga desision, onu (3) meyusa ittam paga ni Jehova.
I MAKUA TAM TAPENU MAWAWWAN I PADDUDA TAM
3. Anni i makua tam tapenu mawawwan i padduda tam?
3 Anni i makua tam tapenu mawawwan i padduda tam? Alegattam ta Biblia i tabbag ira ta pakkiavu tam. Nu kuattam yatun, massikan i pangurug anna i relasiottam kani Jehova anna mas ‘mapakaladda tam i angngurug tam.’—1 Cor. 16:13.
4. Kunnasi tam ‘innan tu mapia nu kurug ngamin’ i kuru-kurugattam? (1 Tesalonica 5:21)
4 Bibbigan i 1 Tesalonica 5:21. Pagaramman ittam na Biblia nga ‘innan tu mapia nu kurug ngamin’ i kuru-kurugattam. Kunnasi tam nga makua yatun? Ikumpara tam yatun ta kakkagian na Biblia. Angngarigan na, baka paddudan na kabataan nga lalaki nu ikavurungan kari yayya na Dios. Basta ngana laman kari nga nonopan na nga kurug tu ari yayya nga ikavurungan na Dios? Ari, mawag tu ‘innan na tu mapia nu kurug ngamin danaw’ gukaban na paggigiammu ta Biblia.
5. Kunnasi tam nga “maginna” i tabbag ira ni Jehova ta pakkiavu tam?
5 Habang bibbigattam i Biblia, “maginna” tam i kakkagian ni Jehova ta nittam. Ngem tapenu mammuattam i tabbag na ta espesipiko nga pakkiavu tam, mawag tu kuattam gapa i parte tam. Mawag nga alegan anna gigiammuattam i teksto ira nga makoffun tapenu matabbag i pakkiavu tam ira. Awayya tam gapa i-research yatun nga topiko, tapus usattam i publikasion ira nga niyawa na organisasion ni Jehova. (Prov. 2:3-6) Ipakimallo tam kani Jehova nga igiya na nakuan i par-research tam anna uffunan na ittam nga mammuan i tabbag na ta pakkiavu tam. Tapus alegattam i prinsipio ira na Biblia anna informasion ira nga makoffun ta situasiottam. Makasta gapa nu gigiammuattam i karakter ira ta Biblia nga kaparefu na pappasa-pasattam.
6. Kunnasi nga makoffun i study ira tapenu mawawwan i padduda tam?
6 “Maginna” tam gapa i kakkagian ni Jehova ta nittam gukaban na study ira. Nu kanayun ittam nga makistudy, egga i maginna tam ta palappa onu komento na wagi nga yatun mismu i tabbag ta pakkiavu tam onu mangalsa ta padduda tam ira. (Prov. 27:17) Ammuattam ngana nu anni ira i makua tam tapenu malsa i karuan nga padduda tam.
NU PADDUDAMMU NGA IKAVURUNGAN NAKA NI JEHOVA
7. Anni i iyavu na karuan?
7 Nanono mu ngana kari yaw, ‘Talaga kari nga ikavurungan nà ni Jehova?’ Nu matageno mu nga awan tu balor mu, baka manono mu nga imposible nga mabbalikka tu kofun na Namaratu ta uniberso. Awayya na tu nanono gapa yatun ni Patul David. Nappabbaw yayya ta ikavurungan ni Jehova i totolay. Niyavu na: “Anni laggapa i tolay, O AFU, nga yaya i daddaddammam-mu, onu i ana na tolay nga agga-nono mu?” (Sal. 144:3) Pakalegammu ta tabbag tatun nga pakkiavu?
8. Base ta 1 Samuel 16:6, 7, 10-12, anni i iinnan ni Jehova ta totolay?
8 Ta Biblia, mammuattam nga ikavurungan ni Jehova danuri tagibadditan na tanakuan. Angngarigan na, zinog ni Jehova si Samuel ta balay ni Jesse tapenu tunnakkan i tadday ta ána ni Jesse nga mabbalin saw tu patul na Israel. Nipagal ni Jesse i pitu ta walu nga ána na tapenu umarubang kani Samuel. Ngem ari na nga nipagal i pinaka-urian nga si David.b Ngem si David i pinili ni Jehova. (Bibbigan i 1 Samuel 16:6, 7, 10-12.) Nasingan gare ni Jehova i kononaggan ni David. Tadday yayya nga kabataan nga mattagibalor ta espiritual ira nga gannug.
9. Ngatta makasiguradu ka nga ikavurungan naka ni Jehova? (Innan gapa i letratu.)
9 Nonopammu nu kunnasi nga nipasingan ni Jehova ta niko nga ikavurungan naka. Iddiddan naka tu tabarang nga sakto ta pakawagammu. (Sal. 32:8) Makua na tamma yatun nu ari naka kuruga ammammu? (Sal. 139:1) Nu iyaplikam i tabarang ni Jehova anna masingammu nu kunnasi naka nga uuffunan, mas makumbinsi ka nga ikavurungan naka. (1 Cro. 28:9; King. 17:26, 27) Masingi-singan ni Jehova i pappursigim. Masingi-singan na gapa i makasta ira nga kualidad mu anna kayà na nga mabbalin tu kofummu. (Jer. 17:10) Kuruga magayayya yayya nu kayà mu gapa nga mabbalin tu kofun na.—1 Juan 4:19.
“Nu alegammu [si Jehova], ipamavulun na nga malegammu yayya.” —1 Cro. 28:9 (Innan i parapo 9)c
NU PADDUDAMMU NGA FUSTU I DESISION IRA NGA KINGNGUAM
10. Anni awayya na nga meyavu tam nu manono tam i desision ira nga kingngua tam?
10 Ta pappasa na tiempo, baka manono na karuan nu fustu kari i desision ira nga kingngua da. Baka nadesisiodda gare nga panawan i trabahu da nga atannang i sueldu na onu i masikan nga negosio da tapenu mas aru i makua da para kani Jehova. Ngem ta pappasa na aru nga dagun, baka masingadda i kakilala da ira nga pinili da i maffokus ta sekular tapus mariku ngana sangawe anna komfortable i pattoleda. Yayya nga manono da: ‘Fustu kari i nisakrifisiò ira para kani Jehova? Onu mas makasta nu nattrabahu ngà nakuan tapenu aru i kuartù sangawe?’
11. Anni i pinaddudan na nattura ta Salmo 73?
11 Nu kunnatun gapa i pakavurungammu, makoffun niko i natageno na nattura ta Salmo 73. Nasingan na i totolay nga ari mabba nga masserbi kani Jehova ngem magawa-gawayyan, mariku, anna gitta na awan tu problema da. (Sal. 73:3-5, 12) Nu masingi-singan na danatun, manono na nga awan tu kekkwenta na pappursigi na nga passerbian si Jehova. ‘Tangaggaw yayya nga narigi-rigatan’ megafu tatun nga makapakafi nga nononopan na. (Sal. 73:13, 14) Anni i kingngua na tapenu mawawwan yatun nga padduda na?
12. Segun ta Salmo 73:16-18, anni i kingngua na salmista tapenu mawawwan i padduda na?
12 Bibbigan i Salmo 73:16-18. Minay i salmista ta templo ni Jehova. Tatun nga lugar, mas nga nakapannono yayya tu mapia. Nanono na nga maski nu makasta i pattolay na karuan, awan mabba tu iddanama da ta mappange. Megafu tatun, nabbalin tu memammo i nono na. Ammu na nga nakua na i kapianan nga desision turi ta pinagollu na i passerbi kani Jehova. Anni i resulta natun? Nassikan i nono na tapenu ari magimmang nga passerbian si Jehova.—Sal. 73:23-28.
13. Kunnasi nga mawawwan i paddudam nga fustu i desision ira nga kingnguam? (Innan gapa i letratu.)
13 Makoffun niko i Biblia tapenu malsa i paddudam ira kagitta na nakua na salmista. Nonopammu i mapia ira nga gannug nga egga niko sangawe, nelagum tatun i pamendision ni Jehova. Tapus ikumparam yatun tari ira ta ari nga masserbi kani Jehova nga i bala-balo da laman ay i gannug ira nga mala da taw nga mundo. Baka i fokus da ngana laman ay mappariku sangawe megafu ta awan mabba tu iddanama da ta mappange. Ngem kunnasi ka gapa? Ari laman tu i mapia ira nga gannug nga maggafu kani Jehova i egga niko sangawe. Nipromesa na nga mas aru paga i bendisiommu ta mappange. (Sal. 145:16) Nonopammu gapa yaw: Talaga kari nga ammum nu anni i nattuppalammu nu tanakuan i desision nga kingnguam? Yaw laman i siguradu: Nu maddesisiokka megafu ta aya mu ta Dios anna ta kasittolem, ari vuluvuga meyetu ta nikaw i anni laman nga mapia.
Kanayummu nakuan nga agga-nono i bendision ira nga nipromesa ni Jehova (Innan i parapo 13)d
NU PADDUDAMMU NGA MEYUSA NAKA PAGA NI JEHOVA
14. Anni i paddia-paddian na karuan nga aripan ni Jehova, anna anni i paddudadda?
14 Manakam ngana i karuan ta aripan ira ni Jehova. Mataki gapa i karuan onu baldadu. Megafu tatun, paddudadda nu importante ira kani Jehova. Baka meyavu da, ‘Meyusa nà kari paga ni Jehova?’
15. Ta anni nga kumbinsidu i nattura ta Salmo 71?
15 Nanono gapa na nattura ta Salmo 71 nu meyusa kari paga yayya ni Jehova. Nipakimallo na: “Sangoye ta makkafi ngà ngana, kari tu ariam-mà pagurayan.” (Sal. 71:9, 18) Ngem maski kunnatun, kumbinsidu lagapa i salmista nga igiya anna suportan yayya ni Jehova nu matalo yayya nga masserbi nisa. Nagigiammu na salmista nga magayayya si Jehova tari ira ta kukukuadda i adde na mawayya da tapenu passerbian Yayya maski nu limitadu ngana i makua da.—Sal. 37:23-25.
16. Anni ira i pangusan ni Jehova ta manakam ira? (Salmo 92:12-15)
16 Nu lakay onu bako ka ngana, meyusa naka lagapa ni Jehova. Moffunan naka tapenu matalo nga passerbiammu yayya maski nu limitadu ngana i makuam. (Bibbigan i Salmo 92:12-15.) Imbes tu agga-nono mu i ariammu ngana nga makua, maffokus ka ta makuam. Angngarigan na, mapagaram mu i tanakuan ta kinamatalo mu anna ta personal nga interes mu ta totolay. Puede gapa nga iyistoriam nu kunnasi naka inuffunan ni Jehova ta nappasa ira nga daga-ragun anna nu anni ira nga promesa ta Biblia i iddanamammu. Kammu gapa tagibadditan i makua na napafutuan nga pakimallo mu ira para ta tanakuan. (1 Ped. 3:12) Ngamin gafu ittam maski anni paga i paddia-paddiattam, magga lang egga i meyawa tam para kani Jehova anna ta tanakuan.
17. Ngatta ariattam nakuan ikumpara i baggi tam ta tanakuan?
17 Nu agga-nono mu nga baddi ngana laman i makuam ta passerbim kani Jehova, mepasiguradu niko nga tagibaloran na i maski anni nga metuppal mu. Baka ikumparam i kukukuammu ta makua na tanakuan. Ari mu nakuan kuan i kunnatun! Ngatta? Megafu ta ari mabba nga kuan ni Jehova yatun. (Gal. 6:4) Angngarigan na, nangiregalu si Maria kani Jesus tu kuruga mangina nga bangug. (Juan 12:3-5) Ngem dua laman nga sinsiliu nga balabaddi i balor na i nidanna na pobre nga balu. (Luc. 21:1-4) Ari nga pinakkumpara ni Jesus yatun nga dua nga babay. Ammu na nga parefu nga nangiyawa si Maria anna i pobre nga balu megafu ta pangurug da. Magga kunnatun gapa i Yama na nga si Jehova. Kuruga tagibaloran na i maski anni nga kukukuammu megafu ta pangurug anna aya mu ta nisa maski paga nu kunnasi kabaddi yatun ta paningammu.
18. Anni i makoffun tapenu mawawwan i padduda tam ira? (Innan gapa i kahon nga “Moffunan Naka na Uvovug ni Jehova Tapenu Mawawwan i Paddudam Ira.”)
18 Madduda ittam ngamin nu karuan. Ngem kagitta na nagigiammu tam, moffunan ittam na Biblia tapenu mawawwan danatun. Kuammu gafu i adde na mawayyam tapenu mawawwan i paddudam anna ari ngana makkafi i nono mu. Ikavurungan naka ni Jehova. Appresian na i sakrifisiom ira anna kakayà na nga bendisionakka. Kanayummu nakuan nonopan nga ayatan anna ikavurungan ni Jehova i ngamin nga matalo nga aripan na.
KANSION 111 I Rasottam ira nga Magayayya
a KEBALINAN NA TERMINO: Taw nga artikulo, gigiammuattam i padduda ira nga makagafu nu ngatta kuestionattam i balor tam kani Jehova onu nu fustu kari i desision ira nga kingngua tam. Ari tu yaw i klase na padduda ira nga nakagi ta Biblia nga mangipasingan nga kurang i pangurug tam kani Jehova anna ta promesa na ira.
b Maski nu ari nga nakagi ta Biblia i eksakto nga edad ni David turi ta pinili yayya ni Jehova, posible nga tinedyer pagalaman yayya.—Innan i Setiembre 1, 2011 nga Ang Bantayan, p. 29, par. 2.
c DESKRIPSION NA LETRATU: Tadday nga kabataan nga sister nga bibbibbigan na i Biblia tapenu mammuan na i appana-panono ni Jehova ta situasion na.
d DESKRIPSION NA LETRATU: Tadday nga brother nga mappakarenu tu benta tapenu masuportan na i familia na. Kanayun na nga agga-nono i pattolay ta Paraiso.