MAGIGIAMMU NGA ARTIKULO 45
KANSION 138 I Pakkemmian ta Pagubu-ubang
Makagigiammu ta Ultimu ira nga Kinagi na Matalo nga Lallakay
“Ari kari nga egga ta manakam ira i sirib, anna egga i pakalippawa danuri na apaddu i pattoleda?”—JOB 12:12.
I MAGIGIAMMU TAM
Nu parulattattam i Dios nga Jehova, bendisionan na ittam sangawe anna mangiyawa yayya tu mannanayun nga inango ta mappange.
1. Ngatta makagigiammu ittam ta manakam ira?
MAWAG tam ngamin i giya ta pangngua tu importante ira nga desision. Makua tam yatun ta uffun na elder anna na manakam ta espiritual nga wawwaragi. Ari tam nakuan insigida nga nonopan nga laus ngana i tabarang da megafu laman laka-lakay ngana ira. Kayà ni Jehova tu makagigiammu ittam ta nira. Mas nga ekspiriensadu ira, mas nga minangngalippawa, anna mas masirib.—Job 12:12.
2. Anni i gigiammuattam taw nga artikulo?
2 Ta ollu nga tiempo, inusa ni Jehova i matalo nga lallakay tapenu pagaramman anna igiya i totolena. Nelavu taw si Moises, David, anna si apostol Juan. Nattolay ira ta madduruma nga tiempo anna dakal i nadduman na situasiodda. Turi ta aranni ngana ira matay, nangiyawa ira tu masirib nga tabarang ta mabbing ira. Nipasigo naw nga matalo nga lallakay i balor na pamarulo ta Dios. Nipetura ni Jehova ta Biblia i masirib ira nga uvovug da tapenu makagigiammu ittam. Abbing ittam man onu lakay, awayya tam mammakapia ta paggigiammu ta tabaradda. (Roma 15:4; 2 Tim. 3:16) Taw nga artikulo, gigiammuattam i ultimu ira nga kinagi naw nga tallu nga lallakay anna nu anni i magigiammu tam ta kinagi da.
‘MAPIDDU I INANGO NU’
3. Kunnasi nga pinasserbian ni Moises i Dios anna i nasion na Israel?
3 Pinasserbian ni Moises si Jehova ta interu nga pattolena. Tadday yayya nga profeta, hues, mangirollu, anna gumattura. Napakaru i naekspiriensa ni Moises. Nirolluan na i nasion na Israel tapenu makapanaw ira ta nika-aripadda ta Ehipto anna nasingan na mismu i napakaru nga milagro ni Jehova. Niyusa yayya ni Jehova tapenu itura i ollu nga lima nga libru na Biblia, i Salmo 90, anna awayya na tu pati i Salmo 91. Posible gapa nga nitura na i libru na Job.
4. Sinni i pinagaram ni Moises, anna ngatta?
4 Nige natay si Moises ta edad nga 120, inammung na i ngamin nga Israelita tapenu iperaddam ta nira i nasingadda anna i naekspiriensa da. Turi ta kabbidda, nasingan na karuan nira i milagro ira nga kingngua ni Jehova anna i pangastigo na ta Ehipsio. (Ex. 7:3, 4) Liminakag ira ta nagaddua nga Uzzing nga Bebay anna nasingadda i nikapatay na armada ni Faraon. (Ex. 14:29-31) Naekspiriensa da i proteksion anna panangngal ni Jehova ta katanapan. (Deut. 8:3, 4) Turi ta patallung ngana i nasion ta Nepromesa nga Davvun, niyusa ni Moises yaw nga ultimu nga chansa tapenu pagaramman ira.a
5. Kunnasi nga napagaram i Israelita ira ta ultimu nga kinagi ni Moises ta Deuteronomio 30:19, 20?
5 Anni i kinagi ni Moises? (Bibbigan i Deuteronomio 30:19, 20.) Egga i makakkasta nga iddanama na nasion na Israel ta mappange. Megafu ta bendision ni Jehova, makapattolay i Israelita ira tu anaddu nga tiempo ta davvun nga nipromesa na ta nira. Makakkasta yatun nga lugar anna abundansia i vunga na mulu-mula! Kunnaw i pinangideskriba ni Moises tatun para ta nira: “Daddarakal anna makakkarasta nga siudad nga ari nu nipataddag, babalay nga napannu tu ngamin nga klase na mapia ira nga gannug nga ari nu pinabbannagan, pagunnugan tu danum nga ari tu sikamu i nakkokko, pammulan ira tu ubas anna fun ira na olibo nga ari tu sikamu i nammula.”—Deut. 6:10, 11.
6. Ngatta nipamavulu na Dios nga sakupan na tanakuan ira nga nasion i Israel?
6 Nangabiso gapa si Moises ta Israelita ira. Mawag tu parulattadda i bili-bilin ni Jehova tapenu tulu-tuloy ira nga maddian ta makakkasta nga davvudda. Pinagaram ira ni Moises nga ‘piliadda i inango’ gukaban na pagginna kani Jehova anna “pattalupaddian ta nisa.” Ngem ari nga pinarulo na Israelita ira si Jehova. Yatutta ta pappasa na tiempo, nipamavulu na Dios nga sakupan anna ipanaw ira ta davvudda na Asiriano ira. Tapus turi kua, kunnatun balaman i kingngua ta nira na Babilonio ira.—2 Pat. 17:6-8, 13, 14; 2 Cro. 36:15-17, 20.
7. Anni i magigiammu tam ta kinagi ni Moises? (Innan gapa i letratu.)
7 Anni i magigiammu tam? Makepaliag i pamarulo. Kagitta na Israelita ira turi ta aranni ngana ira nga makatallung ta Nepromesa nga Davvun, aranni ittam ngana gapa nga makatallung ta nepromesa na Dios nga bagu nga mundo. Araranni ngana nga mabbalin tu paraiso i davvun. (Isa. 35:1; Luc. 23:43) Mapawan ngana saw i Diablo anna i demonio na ira. (Nep. 20:2, 3) Awan ngana saw tu falsu nga relihion nga mangiyarayyu ta totolay kani Jehova. (Nep. 17:16) Awan ngana saw tu gobiernu na tolay nga manazza-tazzi ta immagurayadda ira. (Nep. 19:19, 20) Awan saw tu lugar na rebelde ira ta Paraiso. (Sal. 37:10, 11) Parulattan saw na ngamin nga totolay i matunung nga dorob ni Jehova yayya nga egga saw i imammo. Ngamin saw ay ayatan anna pattalakkadda i kataggi-tadday. (Isa. 11:9) Kakayà tam ngana nga mesimmu danatun! Nu parulattattam si Jehova, ari laman tu ginatu nga dagun nga makapattolay ittam ta Paraiso, nu ari, adde ta mannanayun.—Sal. 37:29; Juan 3:16.
Nu parulattattam si Jehova, ari laman tu ginatu nga dagun nga makapattolay ittam ta Paraiso, nu ari, adde ta mannanayun (Innan i parapo 7)
8. Kunnasi nga nakoffun ta nabayag ngana nga misionero i promesa nga mannanayun nga inango? (Jud. 20, 21)
8 Nu agga-nono tam i nipromesa na Dios nga mannanayun nga inango, kakayà tam nga parulattan yayya maski anni paga i kapurueba. (Bibbigan i Judas 20, 21.) Pasikannan ittam gapa natun nga promesa tapenu labanan i pakkafiattam. Istorian na brother nga nabayag ngana nga misionero ta Africa nu kunnasi na nalabanan i pakatotoli nga pakkafian na: “Nanono ku nga ariakku makapattolay tu mannanayun ta Paraiso nu ariakku parulattan si Jehova. Nakoffun yatun tapenu labanakku i pakkafiakku anna mas nga ipakimallo yatun kani Jehova. Megafu ta uffun na, neyemmakku balaman yatun nga marake nga annangngua.”
“MAKASTA I PATTUPPALAMMU”
9. Anni ira i nappasan ni David tu kapurueba?
9 Si David ay malalaki nga patul. Tadday gapa yayya nga musikeru, minabberso, suddalu, anna profeta. Aru nga kapurueba i nappasan na. Piga ragun bi nga nattatagu yayya megafu ta igato yayya nga patayan ni Patul Saul. Turi ta patul ngana yayya, mawag mangana tu mattammang yayya megafu ta kayà na ana na nga si Absalom nga agawan i trono ta nisa. Maski aru nga ziga i nappasan ni David anna aru i nakkamalian na, matalo lagapa yayya ta Dios adde ta patena. Para kani Jehova, si David ay ‘tolay nga meddu ta futu na.’ Mawag gafu tu ginnattam i masirib nga tabarang ni David!—King. 13:22; 1 Pat. 15:5.
10. Anni i nitabarang ni David ta ana na nga si Solomon?
10 Ikonsidera tam i nitabarang ni David ta ana na nga si Solomon, i tumunug nisa nga patul na Israel. Pinili ni Jehova yatun nga mabbing nga lalaki tapenu mamataddag tu templo nu sitaw makapaddayaw i totolay kani Jehova. (1 Cro. 22:5) Aru nga ziga i pappasan ni Solomon. Anni gafu tamma i nitabarang ni David ta nisa? Ammuattam.
11. Segun ta 1 Patul Ira 2:2, 3, anni i nitabarang ni David kani Solomon, anna anni i nesimmu turi ta sinuppal ni Solomon yatun? (Innan gapa i letratu.)
11 Anni i kinagi ni David? (Bibbigan i 1 Patul Ira 2:2, 3.) Kinagi ni David ta ana na nga si Solomon nga nu mattuppal yayya kani Jehova, makasta i pabbalinan na. Aru dagun nga naekspiriensa ni Solomon yatun. (1 Cro. 29:23-25) Pinataddag ni Solomon i makakkasta nga templo. Egga ira i libru na Biblia nga nitura na anna i karuan gapa nga kinagi na ay nelagum ta tanakuan paga nga libru na Biblia. Nabbalin yayya tu sikat gafu ta ka-uto anna kariku na. (1 Pat. 4:34) Ngem gitta na kinagi ni David kani Solomon, mabbalin laman tu makasta i pattuppalan na nu parulattan na i Dios nga Jehova. Ngem turi ta lakay ngana si Solomon, naddayaw yayya ta tanakuan ira nga dios. Megafu tatun, nawawwan ni Solomon i fabor ni Jehova kunne na gapa i ka-uto nga kawagan na tapenu makapammaguray yayya tu masippo anna patas.—1 Pat. 11:9, 10; 12:4.
Maduffunan ittam na ultimu ira nga kinagi ni David ta ana na nga si Solomon tapenu masingan nga nu minammarulo ittam kani Jehova, iddan na ittam tu ka-uto nga mangngua tu makasta ira nga desision (Innan i parapo 11-12)b
12. Anni i magigiammu tam ta nitabarang ni David?
12 Anni i magigiammu tam? Makasta i pabbalinattam nu parulattattam si Jehova. (Sal. 1:1-3) Siempre, ari nga nipromesa ni Jehova tu iyawa na nittam i kariku anna dayaw nga niyawa na kani Solomon. Ngem nu tuppalattam yayya, iddan na ittam tu ka-uto tapenu makangngua ittam tu makasta ira nga desision. (Prov. 2:6, 7; Sant. 1:5) Megiya ittam na prinsipio na ira ta praktikal ira nga gannug kagitta na trabahu, edukasion, pappaga-pagayayya, anna kuartu. Nu iyaplika tam i tabarang na, maprotektattam i relasiottam ta nisa anna mattolay ittam noka tu mannanayun. (Prov. 2:10, 11) Mapeggan ittam gapa tu mapia nga kokkofun anna mabbalin tu magayayya i familia tam.
13. Anni i kingngua ni Carmen tapenu mabbalin tu kurug nga makasta i pattolena?
13 Ta ollu na bi, abbo ni Carmen nga taga-Mozambique nga nu makkolehio yayya, makkasta saw i pattolena. Megafu tatun, nagiskuela yayya tu architecture ta tadday nga unibersidad. Nitura na: “Kakayà ku i kursò. Ngem ufutan natun i tiempo anna sikakku. Egga ngà ta eskuela mamegafu ta 7:30 na umma adde ta 6:00 na gabi. Marigatan ngà nga umay ta study ira, yayya nga nakkafi i espiritualidad ku. Ta unu-unag ku, matageno ku tu massesserbi ngà ta dua nga yafu.” (Mat. 6:24) Nipakimallo na yatun nga situasion na anna nar-research yayya ta publikasiottam ira. Niyammung na paga: “Megafu ta makasta i nitabarang ta nio na elder ira anna na yenà, nadesisiokku nga iyemmang ngana i makkolehio tapenu makapap-pioneer ngà. Yatun i kakastan nga desisiokku anna awan vuluvuga tu pabbabawyakku.”
14. Anni i pinakamensahe ni Moises anna ni David?
14 Parehu nga iddeddu ni Moises anna ni David si Jehova anna talaga ammu da nga kuruga importante tu parulattadda yayya. Ta ultimu ira nga kinagi da, pinagaram da i maggigginna ta nira nga tuttulan i ehemplo da gukaban na pattalupaddian nga matalo kani Jehova. Parehu gapa nga nitabaradda nga nu panawan na tadday nga tolay si Jehova, mawawwan na i fabor ni Jehova kunne na gapa i bendision ira nga nipromesa na. Makaduffun gapa nittam sangawe i tabaradda. Pappasa na ginatu nga dagun, egga paga i tadday nga aripan ni Jehova nga nangipasingan tu importante i kinamatalo ta Dios.
‘AWAN NGANA TU MAS PAGA NGA MAKAPAGAYAYYA’
15. Anni ira i nappasan ni apostol Juan?
15 Si Juan ay madukko nga kofun anna apostol ni Jesu-Cristo. (Mat. 10:2; Juan 19:26) Vinulu ni Juan si Jesus ta interu nga ministerio na, nasingan na i milagro na ira, anna ari na yayya nga pinagurayan ta mariga ira nga tiempo. Nemammatan na i pamatay da kani Jesus anna nasingan na gapa yayya turi ta naginnolay. Nasingan na gapa i pawwara na Cristianismo ta ollu nga siglo namegafu ta baddi nga grupo na matalo nga lallaki adde ta “nelayya-gayya ta ngamin nga totolay ta utun na davvun” i mapia nga dumug.—Col. 1:23.
16. Sinni ira i mammakapia ta nitura ni Juan?
16 Turi ta laka-lakay ngana si Juan, napeggan yayya tu pribilehio nga itura i makapabbaw nga libru na Nepakannammu. (Nep. 1:1) Nitura ni Juan i Evanghelio nga nengagan ta nisa. Pinadday na gapa i tallu nga tura nga magalan ngana sangawe tu ollu, mekadua, anna mekatallu nga Juan. Ta mekatallu nga tura ni Juan, sinurakkan na i tadday nga matalo nga Cristiano nga mangngagan tu Gayo nga iddeddu na nga kunna ana na ta espiritual. (3 Juan 1) Tatun nga tiempo, aru paga i minammatan ni Juan nga kunna ana na ta espiritual. Magadde ta tiempo tam, mapagaram i ngamin nga tagatuttul ni Jesus ta nitura natun nga matalo nga lakay.
17. Segun ta 3 Juan 4, anni i mangiyawa tu dakal nga pagayayya?
17 Anni i nitura ni Juan? (Bibbigan i 3 Juan 4.) Nitura ni Juan nga mamagayayya i pamarulo ta Dios. Turi ta maddagun nga itura ni Juan i mekatallu nga tura na, egga danuri mangiwara-wara tu falsu nga tuddu anna mamassirina ta kongregasion. Ngem tulu-tuloy nga “mattolay segun ta kurug” i karuan. Sinuppal da si Jehova anna ‘pinarulo da i bilin na Dios.’ (2 Juan 4, 6) Parehu nga napagayayya danatun nga matalo nga Cristiano si Juan anna si Jehova.—Prov. 27:11.
18. Anni magigiammu tam ta kinagi ira ni Juan?
18 Anni i magigiammu tam? Mamagayayya i kinamatalo. (1 Juan 5:3) Angngarigan na, magayayya ittam gafu ta ammu tam nga mapagayayya tam si Jehova. Magayayya si Jehova nu masingan na nga labanattam i tentasion naw nga mundo anna nu alawatattam i kinakurug. (Prov. 23:15) Magayayya gapa i anghel ira ta langi. (Luc. 15:10) Magayayya ittam gapa nu masingattam nga matalo lagapa i wawwaragi tam maski nu mapersigi onu matenta ira. (2 Tes. 1:4) Sonu madaral ngana yaw nga mundo ni Satanas, magayayya ittam ta ammu tam nga nattalupaddian ittam nga matalo kani Jehova maski nu marake yaw nga mundo.
19. Anni i makagi ni Sister Rachel meyannung ta panuddu tu kinakurug ta tanakuan? (Innan gapa i letratu.)
19 Magayayya ittam nu ibillay tam i kinakurug ta tanakuan. Kunnatun si Sister Rachel nga taga-Dominican Republic. Matageno na nga dakal nga pribilehio nga tudduan i tadday nga tolay meyannung ta makapabbaw nga Dios nga passerbiattam. Kunnaw i makagi na nu manono na i ána na ta espiritual: “Ari tu makalanno i uvovug ira tapenu deskriban i pagayayya nga mataga-tageno ku nu masingakku nga iddukan ngana gapa na Bible studỳ ira si Jehova, pattalakkadda yayya, anna uliadda i pattoleda tapenu mapagayayya yayya. Gafu tatun, sobra i ayayya ku, yayya nga sulit i maski anni nga appursigì anna sakrifisiò tapenu laman tudduan ira.”
Magayayya ittam nu tudduattam i tanakuan nga iddukan anna parulattan si Jehova kagitta na kukukuattam (Innan i parapo 19)
MAMMAKAPIA TA ULTIMU IRA NGA KINAGI NA MATALO NGA LALLAKAY
20. Anni i napparehuattam kadi Moises, David, anna Juan?
20 Kumpara ta nittam, duma nga tiempo anna situasion i nattolayan da Moises, David, anna Juan. Ngem dakal i napparehuattam ta nira. Nasserbi ira ta kurug nga Dios nga kagitta tam. Kagitta da gapa, makimallo ittam kani Jehova, mattalo ittam ta nisa, anna mappegiya. Mangurug ittam nga bendisionan ni Jehova danuri mamarulo ta nisa, kagitta na kingngua na tatun nga lallakay ta ollu nga tiempo.
21. Anni ira i bendision nu ginnattam i tabarang na matalo nga lallakay kagitta da Moises, David, anna Juan?
21 Ginnattam gafu i ultimu ira nga kinagi na matalo nga lallakay gukaban na pamarulo ta bili-bilin ni Jehova. Nu kuattam yatun, makasta saw i pabbalinan na ngamin nga kuattam. Fuera paga tatun, ‘mapiddu i inango’ tam anna mattolay ittam tu mannanayun! (Deut. 30:20) Mabbalin ittam gapa tu magayayya gafu ta ammu tam nga mapagayayya tam i minaggiddu nga Yama tam ta langi. Tuppalan na noka i ngamin nga promesa na mas paga anne ta inekspekta onu inimajittam.—Efe. 3:20.
KANSION 129 Itulu-tuloy Tam i Magattam
a Magaru ta Israelita ira nga nakasingan ta milagro ni Jehova ta Uzzing nga Bebay ay natay nige da paga nakatallung ta Nepromesa nga Davvun. (Num. 14:22, 23) Nimandu ni Jehova nga matay ta katanapan i ngamin nga lallaki nga magedad tu 20 onu maturu paga. (Num. 14:29) Ngem ari tu mapatay da Josue, Caleb, anna aru paga nga mas mabbing nga henerasion kunne na gapa i tribu ni Levi. Nasingadda i pangituppal ni Jehova ta promesa na turi ta nakadaki i Israel ta Bannag Jordan anna nakatallung ira ta Canaan.—Deut. 1:24-40.
b DESKRIPSION NA LETRATU: Zimigi: Si David nga mangiyawa tu ultimu nga tabarang ta ana na nga si Solomon. Ziwanan: Estudiante ira ta Pioneer Service School nga mammakapia ta teokratiko nga edukasion.