Mangngua tu Desision ira nga Mamagayayya Kani Jehova

1. Ta anni ittam marigatan?

KADA AGGAW, mawag tam i maddesision. Mabi laman nga desisionan i karuan nga gannug, kagitta na nu anni i kanattam onu nu anni nga oras ittam makkatrug. Maziga gapa nga desisionan i karuan. Afektan garay natun i gawa-gawayyattam, pagayayya tam, iddeddukattam, anna i paddayaw tam kani Jehova. Ikaya tam nga mabenefisiowan ittam anna i familia tam ta desisiottam ira. Ngem i pinaka-importante ta ngamin, ikaya tam nga magayayya si Jehova ta desisiottam ira.—Roma 12:​1, 2.

2. Anni ira i kuammu tapenu makangngua ka tu masirib ira nga desision?

² Siguradu nga makangngua ka tu masirib ira nga desision nu (1) ammuammu i detalye ira, (2) nonopammu i pagimamma ni Jehova ta ganna-gannug, anna (3) pannonopammu i pappiliammu ira. Taw nga artikulo, gigiammuattam yatun ira nga tallu nga mawag tu kuattam. Ammuattam gapa nu kunnasi tam meyusa i pakalippawa tam ta paddesision.—Prov. 2:11.

AMMUAMMU I DETALYE IRA

3. Iyilustra nu ngatta mawag nga ammuammu i detalye ira nige mu mangngua tu desision.

³ I ollu nga makuam tapenu makangngua ka tu makasta nga desision ay ammuammu labbi i detalye ira. Ngatta mawag tu kuammu yatun? Angngarigan na, minay nappa-check up i tadday nga pasiente ta doktor megafu ta egga i grabe nga taki na. Insigida kari nga maddesision i doktor nu anni i ireseta na maski nu arianna paga yayya chineck up? Siempre ari. Makangngua ka gapa tu mapia ira nga desision nu ammuammu labbi i detalye ira nga makafekto ta situasiommu. Kunnasim nga makua yatun?

4. Base ta Proverbio 18:​13, anni i kuammu tapenu mammuammu i detalye ira? (Innan gapa i letratu.)

⁴ Mammuammu i detalye ira nu makkiavu ka. Angngarigan na, kunnasi nu nembitakka ta tadday nga okasion? Umay ka kari? Nu ariammu ammu nu sinni i maka-okasion onu ariammu ammu nu anni i makua tari, makasta nu iyavutammu ta nagimbita niko yaw ira nga pakkiavu: “Sitaw anna sonu anni yatun? Kunnasi karu na umay? Sinni i maniguradu tapenu ari nga magulu i okasion? Sinni ira i umay? Anni ira i makua tari? Egga kari i binarayang tari?” Makoffun i tabbag tatun ira nga pakkiavu tapenu makapaddesisiokka tu masirib.—Bibbigan i Proverbio 18:13.

5. Anni i kuammu nu ammum ngana i detalye ira?

⁵ Nu ammum ngana i detalye ira, nonopammu tu mapia i buu nga situasion. Angngarigan na, kunnasi nu nammuammu nga umay tatun nga okasion danuri totolay nga ariadda tuttulan i prinsipio na Biblia, onu egga i binarayang ngem awan tu mabbantay ta karu na inuman na totolay? Posible kari nga mabbalin yatun nga okasion tu magulu nga pappaga-pagayayya? (1 Ped. 4:3) Fuera paga tatun, kunnasi nu nekanna i okasion ta iskediul na study na kongregasiommu onu na pallawammu? Nu napannonopammu ngana i buu nga situasion, mas mabi para niko nga mangngua tu makasta nga desision. Ngem egga paga i mawag tu kuammu. Ammum ngana i matageno mu tatun nga situasion. Ngem anni gapa i matageno ni Jehova tatun?—Prov. 2:6.

NONOPAMMU I PAGIMAMMA NI JEHOVA

6. Base ta Santiago 1:​5, ngatta mawag tu ipakimallo tam i uffun ni Jehova?

⁶ Ikiddom kani Jehova nga uffunan naka nga malippawa i pagimamma na ta tadday nga gannug. Nipromesa ni Jehova nga iddan na ittam tu ka-uto tapenu malippawa tam nu makapagayayya nisa i tadday nga desision. ‘Vuka i palag na Dios anna sigga-allo yayya nga mangiyawa’ tu kunnatun nga ka-uto “ta ngamin nga totolay.”—Bibbigan i Santiago 1:5.

7. Kunnasim makannammuan i pagimamma ni Jehova ta tadday nga gannug? Iyilustra.

⁷ Nu nipakimallo mu ngana i direksion ni Jehova, sigga-sifu ka nakuan ta tabbag na. Tapenu iyilustra, kunnasi nu nawawwakka ta biahe? Awayyam nga makkiavu ta tolay nga taga-tari. Ngem insigida ka kari manaw maski nu ariammu paga gininna i tabbag na? Siempre awan. Siguradu nga ginnammu tu mapia i direksion nga ituddu na. Kunnatun nakuan gapa i kuammu kabalimmu nga nikiddaw kani Jehova i ka-uto. Sifutammu nakuan i tabbag na gukaban na paggigiammu ta dorob anna prinsipio ira na Biblia nga magaplika ta situasiommu. Angngarigan na, nu maddesisiokka nga umay tari ta okasion nga nakagi ta gafu, awayyam nonopan nu anni i kagian na Biblia meyannung ta magulu nga pappaga-pagayayya, marake nga kakavvulu, anna importansia na pangipoppollu ta Pappatulan anne ta ikaya mu ira nga kuan.—Mat. 6:33; Roma 13:13; 1 Cor. 15:33.

8. Anni i kuammu nu mawag mu i uffun tapenu malegan i informasion ira nga kawagammu? (Innan gapa i letratu.)

⁸ Nu mittan, mawag mu i uffun tapenu malegan i informasion ira nga kawagammu. Awayyam i makitabarang ta ekspiriensadu nga wagi. Ngem mabenefisiowakka gapa nu mar-research ka lapa. Aru i informasion nga malegan ta tools tam ta paggigiammu kagitta na Tulong sa Pag-aaral ng mga Saksi ni Jehova anna Mga Teksto Para sa Kristiyanong Pamumuhay. Daddamman nga i goal mu ay makangngua tu desision nga mamagayayya kani Jehova.

9. Kunnasi tam masiguradu nga mamagayayya kani Jehova i desisiottam? (Efeso 5:17)

⁹ Kunnasi tam masiguradu nga mamagayayya kani Jehova i desisiottam? Ollu ta ngamin, mawag nga kilala tam yayya tu mapia. Kagian na Biblia nga “i pakannammu ta Pinakamasanto ay mangiyawa tu pakalippawa.” (Prov. 9:10) Mapeggan ittam gafu tu kurug nga pakalippawa nu ammuattam tu mapia i kualidad ira ni Jehova, i gakkag na, anna nu anni i ayatan onu ikalussaw na. Iyavu mu ta baggim, ‘Base ta ammù meyannung kani Jehova, anni nga desision i mamagayayya nisa?’—Bibbigan i Efeso 5:17.

10. Ngatta mas importante i prinsipio ira na Biblia anne ta tradision na familia onu kultura ta lugar nu?

¹⁰ Nu mittan, tapenu mapagayayya tam si Jehova, mawag nga kuattam i tadday nga gannug maski nu madismaya i totolay nga madukko nittam. Angngarigan na, awayya na tu makasta i intension na magana ira ngem baka ipilit da ta ana da nga babay nga makitawa ta mariku maski nu ari tu makasta i espiritualidad na lalaki. Kurug tu ikaya da laman nga komfortable saw i pattolay na ana da, ngem sinni gafu saw i manguffun nisa tapenu mammanakam ta espiritual? Anni i pagimamma ni Jehova tatun nga gannug? Malegattam i tabbag ta Mateo 6:33. Tatun, pinagaram ni Jesus i Cristiano ira nga kanayudda nga pagolluan nga “aleran i meyannung ta Pammaguray na Dios.” Ikaya tam nga ikakua i magana tam anna irespeto i totolay ta diattam, ngem i pinaka-importante nittam ay mapagayayya si Jehova.

PANNONOPAMMU I PAPPILIAMMU IRA

11. Ta Filipos 1: 9, 10, anni nga kualidad i makoffun ta niko tapenu mapilim i kapianan nga desision?

¹¹ Nu ammum ngana i prinsipio ira na Biblia nga makoffun niko nga maddesision, mawag tu pannonopammu i pappiliammu ira. (Bibbigan i Filipos 1:​9, 10; innan i study note nga “malalim na unawa.”) Makoffun i pakalippawa tapenu masingammu i posible nga resulta na kada desision nga pappiliammu. Nu mittan, mabi laman i mappili. Ngem ari tu ngamin ay mabi desisionan. Makoffun i pakalippawa tapenu makapaddesisiokka tu masirib maski ta komplikadu ira nga situasion.

12-13. Kunnasi makoffun i pakalippawa tapenu makangngua ka tu masirib nga desision meyannung ta trabahu?

¹² Nonopan yaw nga situasion. Magala-aleg ka tu trabahu tapenu masuportammu i familiam. Egga dua tu pappiliammu. Ammum ngana i detalye ira kagitta na nu anni nga klase na trabahu yatun, i iskediul, i karayyu na, anna karuan paga. Nu Biblia i pabbaseyan, awan gapa tu marake tatun nga dua nga trabahu. Awayya na tu mas kayà mu i tadday ta pappiliammu megafu ta mas ma-enjoy mu yatun onu mas dakal i sueldu. Ngem egga paga i mawag tu pannonopammu nige mu maddesision.

¹³ Angngarigan na, nu piliammu i maski anni tatun nga trabahu, makangay ka lapa kari ta study na kongregasion nu? Apan kari natun i tiempom tapenu iyawa i emosional anna espiritual nga kawagan na familiam? Makoffun yatun ira nga pakkiavu tapenu mepoppollum “i kapianan ta ngamin,” i paddayom anna i kawagan na familiam, ari tu i pagaleg tu mas aru nga kuartu. Nu kunnatun i kuammu, makangngua ka tu desision nga bendisionan ni Jehova.

14. Kunnasi makoffun nittam i pakalippawa anna i aya tapenu malisiattam i makesiddukal?

¹⁴ Makoffun gapa i pakalippawa tapenu sigga-nono ittam ta efekto na desisiottam ta tanakuan. Ikaya tam garay nga ‘awan tu kapaliwatattam’ ta maski sinni. (Fil. 1:10) Importante yaw nu mangngua ittam tu desision meyannung ta assissinnun anna itchura tam. Angngarigan na, awayya na nga kakayà tam i tadday nga klase na sinnun onu pagayus. Ngem kunnasi nu mesiddukal tatun i wawwaragi onu i ari tu Saksi? Makoffun i pakalippawa tapenu sigga-nono ittam ta panageno da. Paguyuan ittam na aya tapenu nonopan i pammakapianan na ‘ikattolay tam’ anna massinnun tu mepangngo. (1 Cor. 10:​23, 24, 32; 1 Tim. 2:​9, 10) Nu kuattam yatun, masingan ta desisiottam nga ayatan anna irespeto tam i tanakuan.

15. Anni i mawag mu nga nonopan nige mu nga ituppal i tadday nga importante nga desision?

¹⁵ Nu mangngua ka tu importante nga desision, nonopammu labbi nu anni i mawag nga kuammu tapenu metuppal yatun. Nituddu nittam ni Jesus nga ‘karkulan nu piga i magasto tam.’ (Luc. 14:28) Yari tu mawag nga nonopammu i karu na tiempo, pakkukua, anna sikan nga kawagammu tapenu mepatuppal i desisiommu. Awayyam gapa kibbidan i familiam nu egga i mawag tu kuadda tapenu masuportan i desisiommu. Ngatta importante yatun? Makoffun garay yatun tapenu masingammu nu egga i mawag tu uliammu ta desisiommu onu mas makasta i tanakuan nga desision. Nu isalim gapa i familiam anna ginnammu i makagi da, mas suportaddaka tapenu mepatuppal i desisiommu.—Prov. 15:22.

MANGNGUA TU DESISION NGA MAKASTA I RESULTA NA

16. Anni ira i kuammu tapenu makangngua ka tu desision nga makasta i resulta na? (Innan gapa i kahon nga “Nu Kunnasi Ka Makangngua tu Masirib ira nga Desision.”)

¹⁶ Nu sinuttul mu ngana i ginigiammu tam ira, preparadu ka ngana nga mangngua tu masirib nga desision. Ammum ngana i detalye ira anna pinannonopammu ngana i prinsipio ira nga makoffun niko tapenu makangngua ka tu desision nga mamagayayya kani Jehova. Sangawe, awayyam ngana ikiddaw kani Jehova nga bendisionan na i desisiommu.

17. Anni i pinakamakaduffun tapenu makangngua ka tu makasta ira nga desision?

¹⁷ Maski nu nakangngua ka ngana tu makasta ira nga desision ta nappasa, daddammammu nga i pinakamakoffun nikaw tapenu makangngua ka tu makasta ira nga desision ay i pattalo ta sirib nga naggafu kani Jehova, ari tu ta sarilim nga pakannammu onu ekspiriensa. Yayya laman i makeyawa nikaw tu kurug nga pakannammu anna pakalippawa nga kawagammu tapenu makangngua ka tu masirib nga desision. (Prov. 2:​1-5) Moffunan naka ni Jehova tapenu makangngua ka tu desision ira nga mamagayayya nisa.—Sal. 23:​2, 3.