MAGIGIAMMU NGA ARTIKULO 7
KANSION 15 Idayaw i Kaka nga Ana ni Jehova!
Pamakoma ni Jehova—I Pammakapiammu Tatun
“Egga ta nikaw i kurug nga pamakoma.”—SAL. 130:4, NW.
I MAGIGIAMMU TAM
Ta paggigiammu tam ta makasta ira nga ilustrasion ta Biblia, mas maappresia tam i kurug nga pamakoma ni Jehova ta kada tadday nittam.
1. Nu kagian na tolay nga ‘Pinakoma taka ngana,’ ngatta mariga nga ammuan i kayà na kagian?
“PINAKOMA TAKA NGANA.” Nu kagian na tolay yatun niko, magga mabanna-bannayakka, mas ngana nu ammum nga egga i kinagim onu kingnguam nga nakataki ta nisa. Ngem anni kari i kebalinan natun nu kinagi da yatun niko? Kayà kari kagian na natakitammu nga makkofukkamu lagapa? Onu manaki na ngana nga pabbidan nu i nesimmu anna ari kamu ngana manoli gitta na ta dati? Talaga madduruma i kayà kagian na tolay nu kagiadda nga pinakoma daka ngana.
2. Kunnasi nga nadeskriba ta Biblia i pamakoma ni Jehova? (Innan gapa i footnote.)
2 Dakal i nadduman na pamakoma ni Jehova nu mekumpara ta pamakoma tam ta kataggi-tadday. Nerumu-ruma i pamakoma ni Jehova. Kunnaw i kagian na salmista meyannung kani Jehova: “Egga ta nikaw i kurug nga pamakoma, tapenu mekakua ka.”a (Sal. 130:4, NW) I pamakoma ni Jehova ay “kurug nga pamakoma.” Yayya laman i makepasingan nu anni talaga i kebalinan na pamakoma. Ta karuan nga teksto, nangusa i nattura ira ta Biblia tu Hebreo nga uvovug para ta pamakoma ni Jehova nga ari vuluvuga neyusa tapenu ideskriba i pamakoma na tolay.
3. Anni i nadduman na pamakoma ni Jehova ta pamakoma tam? (Isaias 55:6, 7)
3 Nu pakoman ni Jehova i tadday nga tolay, navurran ngana i liwa na. Metoli ta dati i nadaral nga relasiottam kani Jehova. Mappappabalo ittam gafu ta pamakoma ni Jehova megafu ta talaga vurran na i liwa tam anna pakatotoli na ittam nga pakoman.—Bibbigan i Isaias 55:6, 7.
4. Kunnasi ittam nga uffunan ni Jehova tapenu malippawa tam i kurug nga pamakoma?
4 Nu makkaduma i pamakoma ni Jehova ta pamakoma tam, kunnasi tam gafu malippawa i kurug nga pamakoma maski nu imperfekto ittam? Nangusa si Jehova tu manawag ira nga ilustrasion nga mangideskriba ta pamakoma na. Gigiammuattam taw nga artikulo i karuan tatun. Mammuattam tatun nu kunnasi nga alsan ni Jehova i liwa anna nu kunnasi na gapa nga itoli i relasion nga zinaral na liwa. Makoffun i paggigiammu tam tatun ira nga ilustrasion tapenu mas maappresia tam i minangngikallo nga Yama tam nga kuruga dakal i pamakoma na.
ALSAN NI JEHOVA I LIWA
5. Anni i mesimmu nu pakoman ni Jehova i liwi-liwa tam?
5 Ta Biblia, mamippiga nga negitta i liwa ta madammo nga agga-kattu tam. Kunnaw i pangideskriba ni Patul David ta liwi-liwa na: “Malaggabban ngà ta katagaruliak-ku ira, kuruga nepallo i dammo da.” (Sal. 38:4) Ngem pakoman ni Jehova i liwi-liwa danuri na mabbabawi. (Sal. 25:18; 32:5) I simple nga kebalinan na Hebreo nga termino nga ne-translate tu “pakoman” ay “kattuan” onu “iyakka.” Nu pakoman gafu ni Jehova i liwi-liwa tam, gitta na alsan na i madaddammo nga agga-kattu tam tapus yayya ngana i mangakka tatun.
‘Napakoma’ (Sal. 32:5)
6. Kunnasi i karayyu na pangi-angngayan ni Jehova ta niyakka na tu liwi-liwa tam?
6 Egga paga i ilustrasion nga mangipasingan ta karayyu na pangi-angngayan ni Jehova ta liwi-liwa tam. Kagian na Salmo 103:12: “Nu kunnasi i karayyu na zigattu ta taggappan, kunnatun i kadakal na pamakoma na nittam.” Ararayyu i zigattu ta taggappan. Ari vuluvuga nga maddafung yatun. Kayà na gafu kagian, ararayyu i pangiyangayan ni Jehova ta liwi-liwa tam mas paga anne ta manono tam. Talaga ipasiguradu natun nga nu pakoman ittam ni Jehova, vurran na ngana yatun nga liwa.
“Nu kunnasi i karayyu na zigattu ta taggappan” (Sal. 103:12)
7. Base ta Mikias 7:18, 19, anni i kuan ni Jehova ta liwi-liwa tam?
7 Maski nu akkatan tapus iyarayyu ta nittam ni Jehova i liwi-liwa tam, ari na ngana kari nga ibbattan danatun? Ari. Kunnaw i nitura ni Patul Hezekias meyannung kani Jehova: “Nitabbo mu ta likug mu ngamin nga liwi-liwa ku.” Onu gitta na kagian na footnote, “inalsam ta paningammu i ngamin nga liwi-liwa ku.” (Isa. 38:9, 17; ftn.) Ipasingan natun nga itabbo ni Jehova i liwi-liwa danuri na mabbabawi anna ari na ngana nga innan uli danatun. Puede gapa nga me-translate yatun tu kunnaw: “Kingnguam tu gitta na awan tu nakaliwatakku.” Kaparehu natun i kuan ni Jehova ta liwa tam base ta ilustrasion ta Mikias 7:18, 19. (Bibbigan.) Nakagi tatun nga itabbo na i liwi-liwa tam ta karalamman na bebay. Ta tiempo tagga, imposible ngana nga mala i tadday nga gannug nga netabbo ta karalamman na bebay.
“Nitabbo mu ta likug mu ngamin nga liwi-liwa ku” (Isa. 38:17)
“Itabbo mu i ngamin nga liwi-liwa da ta karalamman na bebay” (Mik. 7:19)
8. Anni ngana i nagigiammu tam?
8 Nagigiammu tam ta ilustrasion ira nga nu pakoman ittam ni Jehova, alsan na i pakadammakkattam megafu ta liwi-liwa tam. Kurug gafu i kinagi ni David nga “mapalag danuri i pinakoma na Dios ta marakay nga kikkingngua da; danuri i napakoma i katagaruliad-da! Mapalag i tolay nga ari ngana nonopan na Yafu i katagarulian na ira!” (Roma 4:6-8) Yatun i kurug nga pamakoma!
VURRAN NI JEHOVA I LIWA
9. Anni ira nga ilustrasion i inusa ni Jehova tapenu ipasingan i kadakal na pamakoma na?
9 Gukaban na tavvu, mawayya ni Jehova nga vurran i liwi-liwa danuri na mabbabawi. Nangusa si Jehova tu ilustrasion ira tapenu ipasingan i kukukuan na. Ta Biblia, mabibbig tam nga baggawan ni Jehova i liwi-liwa. Megafu tatun, mapakarenuan i nakaliwa. (Sal. 51:7; Isa. 4:4; Jer. 33:8) Si Jehova mismu i nangideskriba ta resulta natun nga kukukuan na: “Maski nu kagitta na eskarlata i liwi-liwa nu, mapafuraw yatun nga kagitta na niebe; maski nu kasi-uzzing danatun na tela nga krimson, mapafuraw danatun nga kagitta na delana.” (Isa. 1:18) Kitarriga nga alsan i eskarlata onu krimson nga mancha ta tadday nga tela. Ngem inusa ni Jehova yatun nga ilustrasion tapenu ipasiguradu nga awayya na nga mabaggawan tu mapia i liwi-liwa tam anna ari ngana vuluvuga nga masingan danatun.
“Maski nu kagitta na eskarlata i liwi-liwa nu, mapafuraw yatun nga kagitta na niebe” (Isa. 1:18)
10. Anni paga nga ilustrasion i inusa ni Jehova tapenu ipasingan i kadakal na pamakoma na?
10 Nagigiammu tam ta nappasa nga artikulo nga megitta gapa i liwi-liwa ta gatu. (Mat. 18:32-35) Yatutta kada makaliwa ittam kani Jehova, gitta na dumakal laman nga dumakal i gatu tam. Talaga daka-dakal nakuan nga gatu i mawag tu pagattam ta Nisa! Ngem nu pakoman ittam ni Jehova, gitta na ari na ngana nga tukian i gatu tam. Ari na ngana ittam nga pappagan ta liwi-liwa nga napakoma ngana. Nu kunnasi nga mabanna-bannayan i tadday nga tolay nu ari na ngana nga mawag nga pagan i gatu na, magga mabanna-bannayan ittam gapa nu pakoman ittam ni Jehova!
‘Pinakoma taka ta ngamin nga gatu mu’ (Mat. 18:32-35)
11. Anni i kebalinan na nu kagian na Biblia nga ‘nafunatan i liwi-liwa’ tam? (Kingngua 3:19)
11 Nu pakoman ittam ni Jehova, ari na ngana nga tukian i gata-gatu onu liwi-liwa tam. Ngem ari laman tu yatun i kuan na. Funatan na gapa yatun. (Bibbigan i Kingngua 3:19, NW.) Nu ari ngana nga mepapaga i tadday nga gatu, gitta na egga i dakal nga X nga metura tari ta lista na gatu tam. Ngem maski nu egga ngana yatun nga X, masingattam lagapa nu piga yari i netura nga gatu tam. Ngem duma nu mafunatan i tadday nga gannug. Tapenu mantindiattam yatun, daddammattam nga mabi laman nga mafunatan i klase na tinta nga usu-usan na totolay ta ollu nga tiempo. Awayya na nga manga i tadday nga tolay tu basa nga espongha tapus funatan na i netura. Nu “mafunatan” gafu i gatu na tadday nga tolay, mawawan i anni laman nga dati bi nga netura. Gitta na ari vuluvuga nga nakagatu yatun nga tolay. Mappappabalo ittam ta nu pakoman ittam ni Jehova, ari na ngana nga tukian i liwi-liwa tam anna funatan na gapa danatun nga gitta na ari tam vuluvuga nakaliwa!—Sal. 51:9.
“Tapenu mafunatan i liwi-liwa nu” (King. 3:19, NW)
12. Anni i magigiammu tam ta ilustrasion meyannung ta makannag nga kunam?
12 Egga paga i ilustrasion nga inusa ni Jehova tapenu ideskriba nu kunnasi na nga funatan i liwi-liwa tam. Kagian na: “Funatakku i tagarulim nga kunna makallabban tu kunam, anna i liwi-liwa mu nga kunna makallabban tu makannag nga kunam.” (Isa. 44:22) Nu mamakoma si Jehova, gitta na kallabban na i liwi-liwa tam tu makannag nga kunam tapenu ari tam ngana vuluvuga masingan danatun. Maski si Jehova, ari na gapa ngana masingan danatun.
“Funatakku i tagarulim nga kunna makallabban tu kunam” (Isa. 44:22)
13. Nu pakoman ni Jehova i liwi-liwa tam, anni i matageno tam?
13 Anni i magigiammu tam ta ilustrasion ira? Nu pakoman ittam ni Jehova, ari ittam nakuan gafu ngana makokkonsensia. Megafu ta tavvu ni Jesu-Cristo, napagan ngana i gatu tam ira. Navurran ngana i lista na gatu tam. Gitta na ari ittam vuluvuga nakaliwa. Yatun i pammakapiattam ta kurug nga pamakoma ni Jehova nu mabbabawi ittam.
ITOLI NI JEHOVA I MAKASTA NGA RELASION
Megafu ta pamakoma na Yama tam ta langi, mapeggan ittam tu makasta nga relasion ta nisa (Innan i parapo 14)
14. Ngatta makapattalo ittam ta pamakoma ni Jehova? (Innan gapa i letratu ira.)
14 Megafu ta kurug nga pamakoma ni Jehova, mapeggan ittam tu makasta nga relasion ta nisa. Makoffun gapa yatun tapenu ari ittam ngana nga makokkonsensia. Ari ittam mavurung nga egga i itatagu ni Jehova nga taki na nono na ta nittam anna magaleg yayya tu chansa tapenu kastiguan ittam. Imposible nga kuan na i kunnatun. Ngatta makapattalo ittam kani Jehova nu kagian na nga pakoman na ittam? Kunnaw i nitura ni profeta Jeremias nga kagian ni Jehova: “Pakomakku i nakkamaliadda ira, anna ari ku ngana daddamman i liwa da.” (Jer. 31:34) Danatun gabbalaman nga uvovug i agga-nono ni apostol Pablo turi ta kinagi na: “Ariak-ku ngana vuluvuga daddamman i marakay nga kingngua da.” (Heb. 8:12) Ngem anni kari talaga i kebalinan natun?
“Ari ku ngana daddamman i liwa da” (Jer. 31:34)
15. Anni i kayà kagian na ari vuluvuga daddamman ni Jehova i liwi-liwa tam?
15 Ta Biblia, i termino nga “daddamman” ay ari nga kanayun nga tumukoy ta pannono uli ta tadday nga gannug. Tumukoy gapa yatun ta pagguyu tapenu kuan i tadday nga gannug. Kunnaw i kiddaw na kriminal nga nepato ta biko ni Jesus: “Jesus, daddammam-mà noka nu mammaguray ka ngana!” (Luc. 23:42, 43) Ari laman nga kikkiddawan natun nga lalaki kani Jesus nga nonopan na yayya tatun nga tiempo. Masingan ta tabbag ni Jesus nga magguyu saw yayya tapenu paginnolayan yatun nga kriminal. Nu kagian gafu ni Jehova nga ari na ngana vuluvuga daddamman i liwi-liwa tam, kayà na kagian nga ari yayya nga magguyu kontra ta nittam. Ari na ittam saw nga kastiguan ta liwi-liwa nga pinakoma na ngana.
16. Ta Biblia, anni i kapalubbang nga resulta na kurug nga pamakoma?
16 Egga paga i ilustrasion nga usan na Biblia tapenu mas mantindiattam i kapalubbang nga resulta na kurug nga pamakoma. Megafu ta imperfekto ittam, ‘nammagurayan ittam na katagarulian.’ Ngem megafu ta pamakoma ni Jehova, ‘napalubbangan ittam ta pakawayya na katagarulian.’ (Roma 6:17, 18; Nep. 1:5) Nabbalin ittam tu magayayya ta gitta tam i aripan nga napalubbangan megafu ta pamakoma ni Jehova.
“Napalubbangak-kamu ta pakawayya na katagarulian” (Roma 6:18)
17. Kunnasi nga marresulta i pamakoma ta pammapia ta espiritual nga taki? (Isaias 53:5)
17 Bibbigan i Isaias 53:5. Yatun i ultimu nga ilustrasion nga gigiammuattam. Tatun nga ilustrasion, negitta ittam ta totolay nga egga i kappatay nga taki da. Megafu ta sakrifisio nga tavvu nga niyawa ni Jehova gukaban na Ana na, gitta na pinammapia ittam ni Jehova. (1 Ped. 2:24) Megafu tatun nga tavvu, posible nga mapakappian i relasiottam kani Jehova nga zinaral na taki ta espiritual. Nu kunnasi nga magaya-ayayya i tolay nga nammapia ta kappatay nga taki na, magayayya ittam gapa nu mammapia ittam ta espiritual anna malawa tam uli i fabor ni Jehova megafu ta pamakoma na.
“Nammapia ittam gafu ta bigag na ira” (Isa. 53:5)
I PAMMAKAPIATTAM TA PAMAKOMA NI JEHOVA
18. Anni i magigiammu tam ta ilustrasion ira ta Biblia meyannung ta pamakoma ni Jehova? (Innan gapa i kahon nga “Nu Kunnasi Ittam Pakoman ni Jehova.”)
18 Anni i nagigiammu tam ta ilustrasion ira ta Biblia meyannung ta pamakoma ni Jehova? Nu pakoman na ittam, talaga vurran na yatun anna makasiguradu ittam nga ari na ittam kastiguan ta mappange megafu tatun. Gafu tatun, egga i makasta nga relasiottam ta Yama tam ta langi. Daddammattam gapa nga regalu i kurug nga pamakoma. Ari ittam nakuan mepappangngo tatun. Ngem neyawa yatun megafu ta aya anna ta ari kapaga-pagan nga inaggallallo ni Jehova ta minakkaliwa nga totolay.—Roma 3:24.
19. (a) Anni nakuan i ipappabalo tam? (Roma 4:8) (b) Anni i gigiammuattam ta tumunug nga artikulo?
19 Bibbigan i Roma 4:8. Talaga mappappabalo ittam nga si Jehova i Dios na “kurug nga pamakoma”! (Sal. 130:4, NW) Ngem nakadepende ta tadday nga importante nga gannug i kapakoma tam. Niyesplika ni Jesus: “Nu pakoman nu i nakaliwa ira nikamu, pakoman nakamu gapa na Yama nu ta langi.” (Mat. 6:14, 15) Mawag gafu tu parigattam i pamakoma ni Jehova. Kunnasi tam makua yatun? Gigiammuattam yatun ta tumunug nga artikulo.
KANSION 46 Mabbalo, Jehova
a Usan na orihinal nga Hebreo nga Katurakan i termino nga “i pamakoma.” Ipasingan natun nga yatun laman i kurug nga pamakoma maski egga paga i tanakuan nga pangipasingan tu pamakoma. Ari nga napalattuag na karuan nga translation na Biblia yaw nga importante nga punto ta Salmo 130:4 ngem napalattuag lapa yatun na New World Translation of the Holy Scriptures.