Parigan i Appana-panono ni Jehova Anna ni Jesus

1-2. Anni i nelagum ta pangaya kani Jehova, anna kunnasi nipasingan ni Jesus nga ayatan na si Jehova ta interu nono na?

“AYATAM-MU i Yafu nga Dios mu ta interu nga futum, interu nga ikararuam, interu nga sikam-mu anna interu nga nono mu.” (Luc. 10:27) Nipakanawag ni Jesus nga yatun i pinaka-importante nga bilin ta Mosaiko nga Dob. Sifutan nga nelagum ta pangaya tam kani Jehova i futu tam. Kasali ta futu tam i pakkaraga tam anna i mataga-tageno tam ira. Kasali gapa tatun i interu-kararua nga debosiottam anna i sikattam. Ngem nelagum gapa ta pangaya tam kani Jehova i nono tam. Kasali tatun i pannono tam meyannung ta ganna-gannug. Siempre, imposible nga malippawa tam i ngamin nga appana-panono ni Jehova. Ngem mas malippawa tam yatun nu gigiammuattam “i annonopan ni Cristo.” Perfekto gare nga naparigan ni Jesus i annonopan na Yama na.—1 Cor. 2:16 anna i study note nga “taglay natin ang pag-iisip ni Kristo.”

² Ayatan ni Jesus si Jehova ta interu nga nono na. Ammu na gapa i uray na Dios ta nisa anna nikaguman na nga kuan yatun maski nu mazziga-riga yayya megafu ta pangngua na tatun. Nakafokus gapa si Jesus ta pangngua ta uray na Yama na yatutta ari na nipamavulu i maski anni nga mabbalin tu mas importante ta pattolena.

3. Anni i nagigiammu ni apostol Pedro kani Jesus, anna anni i nipagaram ni Pedro nga kuan na kapangngurug na ira? (1 Pedro 4:1)

³ Dakal i pribilehio ni Pedro anna na karuan paga nga apostoles nga makavulu si Jesus anna magigiammu mismu nu kunnasi yayya nga mannono. Turi ta nitura ni Pedro i ollu nga tura na, pinagaram na i Cristiano ira nga parigadda i appana-panono ni Cristo.a (Bibbigan i 1 Pedro 4:1.) Ta orihinal nga lengguahe, turi ta nitura ni Pedro i “sigga-parak-kamu gapa nakuan,” inusa na i uvovug ira nga mangideskriba ta suddalu ira nga magarmas tapenu preparadu ira ta pakiggerra. Yayya nga nu parigan na Cristiano ira i appana-panono ni Cristo onu nu kunnasi yayya nga mannono, mapeggan ira tu masiki-sikan nga armas ta pakillabadda mekontra ta kina-imperfekto da anna ta mundo nga pammagurayan ni Satanas.—2 Cor. 10:​3-5; Efe. 6:12.

4. Kunnasi ittam maduffunan naw nga artikulo tapenu matuttul i tabarang ni Pedro?

⁴ Gigiammuattam i appana-panono ni Jesus anna nu kunnasi tam nga maparigan yatun. Ammuattam gapa nu kunnasi tam nga (1) maparigan i appana-panono ni Jehova tapenu mattaradday i pannono tam, (2) mabbalin tu mappakalinno, anna (3) tangngallan i nono tam gukaban na pattalo kani Jehova nu makimallo ittam.

PARIGAN I APPANA-PANONO NI JEHOVA

5. Kanni nga ari naparigan ni Pedro i appana-panono ni Jehova?

⁵ Egga i tiempo nga ari naparigan ni Pedro i appana-panono ni Jehova ta ganna-gannug. Kinagi ngana ni Jesus ta apostoles na nga mawag tu umay yayya ta Jerusalem, arestowan yayya na lider ira na relihion tari, attamman na i paniga-riga, tapus mapapatay. (Mat. 16:21) Baka ari makapangurug si Pedro nga ipamavulun ni Jehova nga mapapatay si Jesus, i nepromesa nga Mesias nga mangipaliag ta Israel. (Mat. 16:16) Yayya nga niyarayyu ni Pedro si Jesus anna kunna nisa: “Afu, ariam-mu kaga-kagian i kunnatun! Ari mepangngo tu makua yatun nikaw!” (Mat. 16:22) Megafu ta ari nga naparigan ni Pedro i appana-panono ni Jehova tatun nga gannug, ari na gapa nga naparigan i appana-panono ni Jesus.

6. Kunnasi nga nipasingan ni Jesus nga perfekto nga naparigan na i appana-panono ni Jehova?

⁶ Perfekto nga naparigan ni Jesus i appana-panono na Yama na. Yayya nga nitabbag na kani Pedro: “Arayyuam-mà, Satanas! Makaguruk-ka niakan. I appana-panono mu ay ari nga naggafu ta Dios, nu ari ta tolay laman.” (Mat. 16:23) Awayya na tu makasta gapa i intension ni Pedro, ngem pinanakitan ni Jesus i tabarang na. Anni i magigiammu tam tatun? Ammu ni Jesus nga tapenu makua na i uray ni Jehova, mawag tu mazziga-riga yayya anna matay. Tatun nga tiempo, nagigiammu ni Pedro nga mawag tu parigan na i appana-panono na Dios.

7. Kunnasi nga nepasingan ni Pedro nga kakayà na nga ulian i appana-panono na tapenu maparigan na i appana-panono ni Jehova? (Innan i letratu.)

⁷ Pappasa na tiempo, nipasingan ni Pedro nga kayà na nga maparigan i appana-panono ni Jehova. Zimittal i tiempo tu puede ngana mabbalin tu parte na totolay na Dios i ari nakugi ira nga Hentil. Zinog na Dios si Pedro nga layyagayyan i Hentil nga si Cornelio nga tadday ta ollollu nga Hentil nga nabbalin tu Cristiano. Ari kuruga nga makillivu-livu i Judio ira ta Hentil. Yayya nga talaga kawagan ni Pedro i uffun tapenu makaprepara para tatun nga annungan na. Tapus turi ta nalippawa ngana ni Pedro i uray na Dios meyannung taw nga gannug, inuli na i pagimamma na. Yatun ta turi ta nipagal ni Cornelio si Pedro, ‘ari yayya nga nabbabang’ nga minay. (King. 10:​28, 29) Nilayyagayyan na si Cornelio tuange ta kitangabbalayan na tapus nabawtisowan ira.—King. 10:​21-23, 34, 35, 44-48.

8. Kunnasi tam mepasingan nga paparigattam i appana-panono ni Jehova? (1 Pedro 3:8)

⁸ Pappasa na piga dagun, pinagaram ni Pedro i kapangngurug na ira nga ‘mapakatadday nakuan i appana-panono da.’ (Bibbigan i 1 Pedro 3:8.) Bilang totolay ni Jehova, mapakatadday i appana-panono tam nu parigattam i appana-panono ni Jehova base ta mabibbig ta Uvovug na. Angngarigan na, pinagaram ni Jesus i tagatuttul na ira nga pagolluadda i Pappatulan ta pattoleda. (Mat. 6:33) Baka egga i kakongregasiommu nga mapplano nga mappayunir onu magaplay ta karuan paga nga klase na ngamin-tiempo nga passerbi. Imbes tu ikagim nisa nga pilian na ngana laman i mas komfortable nga pattolay, makkagi ka nakuan tu positibo ira nga gannug meyannung ta goal na anna suportammu yayya.

MAPPAKALINNO

9-10. Kunnasi nga nipasingan ni Jesus nga fermi i pappakalinno na?

⁹ Ta gabi nage nga mapatay si Jesus, sinudduan na si Pedro anna i karuan nga apostoles nga mappakalinno. Nage natun, zinog ni Jesus si Pedro anna si Juan nga iprepara i gannug ira para ta ultimu nga pamugag nga kavulu da si Jesus nage na nga matay. Magga kasali tatun nga preparasion i paniguradu nga egga i palanggana anna tuwalya ira nga meyusa na bisita ira tapenu baggawadda i takki da nage na pakkakadda. Ngem sinni tamma i mangngua tatun nga alinno nga trabahu?

¹⁰ Ari nabbabang si Jesus nga nangipasingan tu fermi nga pappakalinno. Nakaddag i apostoles na turi ta kingngua na i gagangay nga kukukuan laman na tadday nga doroban. Inalsa ni Jesus i lawan nga sinnun na tapus nattapi tu tuwalya anna pinayyan na tu danum i tadday nga palanggana tapus pinegafuanan na nga baggawan i takki da. (Juan 13:​4, 5) Megafu ta binaggawan ni Jesus i takki na ngamin nga 12 nga apostoles na, awayya na tu nabayag yatun. Binaggawan na paga lagu maski i takki ni Judas nga mattraydor saw nisa. Ngem mapakalinno nga binalin ni Jesus yatun nga annungan. Tapus mapasensia nga niyesplika na ta nira: ‘Malippawa nu i kebalinan na kingnguà nikamu? Mestru anna Yafu i pagagal nu niakan, ay fustu yatun ta kurug mabba. Sakan paga nga Yafu anna Mestru nu ay binaggawak-ku i takki nu, mawag gafu tu makkabagga-baggaw kamu gapa tu takki.’—Juan 13:​12-14.

11. Kunnasi nga nipasingan ni Pedro nga nagigiammu na i mappakalinno? (1 Pedro 5:5) (Innan gapa i letratu.)

¹¹ Nakagigiammu si Pedro ta kinapakalinno ni Jesus. Turi ta minune ngana si Jesus ta langi, milagro nga pinammapia ni Pedro i tadday nga lalaki nga neyana tu pilay. (King. 1:​8, 9; 3:​2, 6-8) Magga aru nga totolay i nakasingan tatun nga pinammilagro na anna nakkakarela ira kani Pedro. (King. 3:11) Chansa ngana nakuan ni Pedro yatun nga mappasikat megafu ta gagangay laman mabba ta kultura nga naggafuan na nga importante i pabbalin tu prominente. Ngem mapakalinno nga pinanakitan ni Pedro i pangidayaw anna niyawa na lallagu yatun kani Jehova anna kani Jesus. Kinagi na: “I ngagan ni Jesus anna i angngurug sa i nangiyawa ta sikan naw nga tolay nga masingan anna ammu nu.” (King. 3:​12-16) Turi kua, sinurakkan ni Pedro i Cristiano ira meyannung ta pabbalin tu mapakalinno. Nangusa yayya tatun tu uvovug ira nga mangipanono ta nittam ta pinattapi ni Jesus tu tuwalya anna pinamaggona ta takki na apostoles.—Bibbigan i 1 Pedro 5:5.

12. Kunnasi tam nga tulu-tuloy nga mepasingan i kinapakalinno kagitta ni Pedro?

¹² Magigiammu tam gapa i mappakalinno kagitta na kingngua ni Pedro. Nelagum ta uvovug nga niyusa ni Pedro nga ne-translate tu “mappakalinno” i pagimamma tam ta baggi tam anna ta tanakuan. Ari laman gafu nga masingan i kinapakalinno ta kakkagiattam. Masingan gapa yatun ta nononopattam. Passerbiattam i tanakuan megafu ta iddukattam si Jehova anna iddukattam i totolay, ari tu megafu ta kayà tam i medayaw. Nu magayayya nga passerbiattam si Jehova anna i wawwaragi tam ta maski anni nga meyuffuttam, mepasingattam nga mapakalinno ittam maski paga nu ari nga mapansin na tanakuan i kukukuattam.—Mat. 6:​1-4.

‘TANGNGALLAN NU I APPANA-PANONO NU’

13. Iyesplika nu anni i nelagum ta ‘tangngallan nu i appana-panono nu.’

¹³ Anni i kebalinan na ‘tangngallan nu i appana-panono nu’? (1 Ped. 4:7) Nu matangngallan na tadday nga Cristiano i appana-panono na, kuan na i mawayya na tapenu makakua yayya tu makasta ira nga desision nga mangipasingan ta appana-panono ni Jehova. Ammu natun nga Cristiano nga i relasion na kani Jehova i pinaka-importante ta pattolena. Balanse gapa i pagimamma na ta baggi na megafu ta anugutan na nga ari na ammu i ngamin nga gannug. Ipasingan na gapa i pattalo na kani Jehova gukaban na kanayun nga mapakalinno nga pappakimallo.b

14. Kanni nga ari nepasingan ni Pedro i pattalo na kani Jehova?

¹⁴ Ta ultimu nga gabi nage na patay ni Jesus, sinabarangngan na i disipulos na: “Toye nga gabi, sikamu ngamin ay pallikuran-nù.” Ngem sigga-komfiansa nga nitabbag ni Pedro: “Ariat-taka vuluvuga nga pallikuran, maski nu ngamin danoye ay pallikurad-daka!” Tatun balaman nga gabi, sinabarangngan gapa ni Jesus i karuan nga disipulos na: “Mawag tu lukag kamu anna maddasal kamu.” (Mat. 26:​31, 33, 41) Ari nga sinuttul ni Pedro yatun nga tabarang. Nu sinuttul na nakuan yatun, awayya na nakuan tu masikan i nono na turi ta niyavu da nisa nu disipulo kari yayya ni Jesus. Nilimag lallagu ni Pedro i Yafu na anna dakal i pinabbabawi na tatun nga kingngua na.—Mat. 26:​69-75.

15. Kunnasi nga natangngallan ni Jesus i appana-panono na ta ultimu nga gabi na pinattolena bilang tolay?

¹⁵ Buu i pattalo ni Jesus kani Jehova. Maski nu perfekto si Jesus, mamippiga yayya nga nakimallo ta gabi nage na patena. Gafu tatun, masikan i nono na nga kuan i uray ni Jehova para ta nisa. (Mat. 26:​39, 42, 44; Juan 18:​4, 5) Siguradu nga ari nga nakattaman ni Pedro i namippiga nga pakimallo ni Jesus tatun nga ultimu nga gabi.

16. Kunnasi nga nipasingan ni Pedro nga natangngallan na i appana-panono na? (1 Pedro 4:7)

¹⁶ Megafu ta kanayun nga makimallo si Pedro, nagigiammu na gabbalaman nga mas mattalo kani Jehova ta pakimallo. Nipasiguradu ni Jesus kani Pedro anna ta karuan nga apostol nga makalawa ira tu masanto nga espiritu tapenu makapallayyagayya ira. Ngem nikiddaw ni Jesus nga maginnag ira ta Jerusalem adde ta kesimmu natun. (Luc. 24:49; King. 1:​4, 5) Anni i kingngua ni Pedro habang maginnag yayya? ‘Kanayun yayya nga maddasal’ anna i kapangngurug na ira. (King. 1:​13, 14) Tapus turi ta ollu nga tura ni Pedro, pinagaram na i kapangngurug na ira nga tangngalladda i appana-panono da anna kanayun ira nga makimallo tapenu ipasingan i pattalo da kani Jehova. (Bibbigan i 1 Pedro 4:7.) Nagigiammu ni Pedro i mattalo kani Jehova anna nawayya na nga uffunan anna pasikannan i wawwaragi na.—Gal. 2:9.

17. Anni nakuan i kanayuttam nga kuan? (Innan gapa i letratu.)

¹⁷ Tapenu matangngallattam i appana-panono tam, kanayun ittam nakuan nga makimallo kani Jehova. Ammu tam gare nga mawag nga kanayun ittam lagapa nga makimallo kani Jehova maski paga nu malalaki ittam. Yatun ta nu mangngua ittam tu darakal nga desision, mawag tu ikiddaw tam kani Jehova i pangigiya na anna mattalo ittam nga ammu na i kakastan para nittam.

18. Kunnasi tam nga mas maparigan i appana-panono ni Jehova?

¹⁸ Mapia ngana laman ta pinaratu ittam ni Jehova nga mawayya tam parigan i kualidad na ira. (Gen. 1:26) Siempre, ariattam perfekto nga maparigan si Jehova. (Isa. 55:9) Ngem kagitta ni Pedro, ikaya tam nga kanayun nga maparigan i appana-panono ni Jehova, mappakalinno, anna tangngallan i nono tam.