Mattalikarag ta Pallayyagayya Kagitta ni Jesus

1. Anni i nadduman na totolay ni Jehova ta karuan nga makkakkagi tu Cristiano ira?

MATALIKARAGa i totolay ni Jehova ta pallayyagayya. Yatun i naddumadda ta karuan nga makkakkagi tu Cristiano ira. (Tito 2:14) Ngem awayya na tu egga ira i tiempo nga awan tu ganas mu nga mallayyagayya. Baka kaparefum i tadday nga malallappo nga elder nga nakkagi, “Nu karuan, awan tu ganas ku nga mallawan.”

2. Ngatta egga ira i tiempo nga ari ittam matalikarag ta pallayyagayya?

² Awayya na nga mas magayayya ittam ta karuan nga klase na passerbi anne ta nu mallayyagayya ittam. Ngatta? Nu mamataddag anna mamentena ittam gare tu Kingdom Hall, manguffun ittam ta disaster relief, onu pagarammattam i wawwaragi tam, insigida nga masingattam i makasta nga resulta natun anna magayayya ittam tatun. Nu makipattrabahu ittam gapa kavulu i wawwaragi tam, memammo anna makka-aya-aya ittam anna ammu tam nga appresiadda i kukukuattam para ta nira. Ngem nu mallayyagayya ittam, baka piga dagun ngana nga tottoliattam i tadday nga teritoria ngem awan mabba kuruga tu magginna. Baka masimmuattam paga i totolay nga mapporay ta nittam. Ammu tam gapa nga megafu ta umara-aranni i panuppalan, umaru gapa i mangikalussaw ta mensahe tam. (Mat. 10:22) Anni gafu i kuattam tapenu ari nga mawawwan i ganas tam onu mas mattalikarag ittam?

3. Anni i magigiammu tam kani Jesus ta ilustrasion ta Lucas 13:​6-9?

³ Makagigiammu ittam kani Jesus ta pabbalin tu matalikarag ta pallayyagayya. Kanayun nga matalikarag si Jesus tapus mas paga nga nallallappo yayya tatun ta pappasa na tiempo. (Bibbigan i Lucas 13:​6-9.) Ta tadday nga ilustrasion, nikumpara ni Jesus i ministerio na ta tadday nga manammi ta koman nga tallu ragun nga nallallappo ta pamadakal ta fun na igos. Ngem ari nga navvunga yatun nga fun. Tallu ragun gapa nga nilayyagayyan ni Jesus i Judio ira, ngem magaru ta nira i ari nga nagginna ta nisa. Kagitta na manammi ta koman nga nagiddanama lagapa nga mavvunga balaman saw i fun na igos, ari gapa nga nagimmang si Jesus nga layyagayyan i Judio ira. Mas paga lagu nga nallallappo yayya ta pallayyagayya ta nira tapenu kurugadda i mapia nga dumug.

4. Anni i appa nga makasta nga parigattam kani Jesus?

⁴ Gigiammuattam taw nga artikulo nu kunnasi nga nipasingan ni Jesus i talikarag na mas ngana ta ultimu nga annam nga vulan na ministerio na. (Innan i study note nga “Pagkatapos nito” ta Lucas 10:1.) Nu magigiammu tam gare i nituddu ira ni Jesus anna parigattam i kikkingngua na, kanayun ittam gapa nga matalikarag ta ministerio. Ammuattam i appa nga makasta nga parigattam kani Jesus: (1) Uray ni Jehova i pinaka-importante nisa, (2) sigga-nono yayya ta profesiya ira ta Biblia, (3) nattalo yayya ta panguffun ni Jehova, anna (4) nakkomfiansa yayya nga egga ira i magginna nisa.

URAY NI JEHOVA I PINAKA-IMPORTANTE NISA

5. Kunnasi nipasingan ni Jesus nga uray na Dios i pinaka-importante nisa?

⁵ Matalikarag nga nilayyagayya ni Jesus i ‘mapia nga dumug nga meyannung ta Pammaguray na Dios’ megafu ta ammu na nga yatun i kayà na Dios nga kuan na. (Luc. 4:43) I pallayyagayya i pinaka-importante kani Jesus. Maski turi ta ultimu ira nga vulan na ministerio na, minay yayya “ta ili-ili anna babario” tapenu manuddu. (Luc. 13:22) Sinanay na gapa i mas aru nga disipulos tapenu mallayyagayya.—Luc. 10:1.

6. Maski nu egga ira i annungattam ta passerbi nga kayà ni Jehova nga kuattam, anni i anningan na ta pallayyagayya tam? (Innan gapa i letratu.)

⁶ I pangilayyagayya gapa ta mapia nga dumug i pinaka-importante nga trabahu nga kayà ni Jehova anna ni Jesus nga kuattam sangawe. (Mat. 24:14; 28:​19, 20) Konektadu ta trabahu nga pallayyagayya i nadduruma nga annungattam ta passerbi. Angngarigan na, mamataddag ittam tu Kingdom Hall onu masserbi ittam ta Bethel tapenu suportan i trabahu nga pallayyagayya. Mabboluntariu ittam ta disaster relief tapenu moffunattam i wawwaragi nga metulu-tuloy da i espiritual nga rutina da, kasali i pallayyagayya. Daddammattam nga i trabahu nga pallayyagayya i pinaka-importante nga kayà ni Jehova nga kuattam. Makoffun yatun tapenu magaganas ittam nga regular nga makiparte ta pallayyagayya. Kagian na tadday nga elder ta Hungary nga si János: “Ariakku nakuan kattaman nga awan tu maski anni nga annungattam ta passerbi i puede nga itali tam ta trabahu nga pallayyagayya. Yatun i pinaka-importante nga annungattam.”

7. Ngatta kayà ni Jehova nga ari ittam nga magimmang ta pallayyagayya? (1 Timoteo 2:​3, 4)

⁷ Mas mattalikarag ittam ta pallayyagayya nu parigattam i pagimamma ni Jehova ta totolay. Adde gare ta posible, kayà na nga mas aru i makaginna ta mapia nga dumug anna mangalawa tatun. (Bibbigan i 1 Timoteo 2:​3, 4.) Makepaliag yatun ta totolay, yatutta sana-sanayan ittam ni Jehova nga mabbalin tu efektibo ta pallayyagayya. Angngarigan na, makoffun i suhestion ira ta brosiur nga Ayatan i Totolay—Pabbalinan Ira tu Disipulo tapenu makegafu ittam tu pakiyuvovug nga marresulta ta Bible study anna mabbalin ira saw tu disipulos. Ngem maski nu ari nga magginna i totolay ta nittam sangawe, awayya na nga egga lapa saw i chansa da nige nga mangultimu i dakal nga ziga. Awayya na paga lagu nga i nilayyagayya tam ta nira sangawe i mamaguyu saw ta nira nga masserbi kani Jehova ta mappange. Ngem posible laman yatun nu ari ittam magimmang nga mallayyagayya.

SIGGA-NONO YAYYA TA PROFESIYA IRA TA BIBLIA

8. Megafu ta nalippawa ni Jesus i profesiya ira ta Biblia, kunnasi na nga inusa i tiempo na?

⁸ Nalippawa ni Jesus nu kunnasi nga matuppal i profesiya ira ta Biblia. Ammu na nga tallu-ragun-gaddua laman i ministerio na. (Dan. 9:​26, 27) Ammu na gapa nga dati ngana nga neprofesiya nu kanni anna nu kunnasi yayya matay. (Luc. 18:​31-34) Megafu ta ammu ni Jesus i profesiya ira, inusa na ta kapianan i tiempo na. Matalikarag yayya nga nallayyagayya tapenu mabalin na i nipatrabahu ni Jehova ta nisa.

9. Ngatta mas mattalikarag ittam ta pallayyagayya nu malippawa tam i profesiya ira ta Biblia?

⁹ Mas mattalikarag ittam nga mallayyagayya nu malippawa tam i profesiya ira ta Biblia. Ammu tam gare nga araranni ngana i panuppalan. Neprofesiya ta Biblia nu anni ira i mesimmu anna i ugu-ugali na totolay ta pangurianan ira nga aggaw. Masingi-singattam nga matuttuppal ngana yatun ira nga profesiya. Masingi-singattam ngana gapa i pakillaban na Anglo-American World Power kontra ta Russia anna ta kaalyadu na ira. Tuttuppalan natun i profesiya meyannung ta patul na zita anna patul na sigiran “ta tiempo na panuppalan.” (Dan. 11:40) Nalippawa tam gapa nga irepresenta na takki na imahe ta Daniel 2:​43-45 i Anglo-American World Power. Gafu ta paggigiammu tam tatun nga profesiya na Biblia, kumbinsidu ittam nga araranni ngana nga daralan na Pappatulan na Dios i ngamin nga gobiernu na tolay. Ipasingan ngamin natun ira nga profesiya nga araranni ngana i panuppalan. Mawag gafu nga usattam ta kapianan i tiempo tam tapenu ilayyagayya i mapia nga dumug.

10. Kunnasi ittam nga mas mattalikarag ta pallayyagayya megafu ta profesiya ira na Biblia?

¹⁰ Kakayà tam nga ikagi ta tanakuan i profesiya ira ta Biblia. Kagian ni Sister Carrie nga taga-Dominican Republic: “Makakkasta i promesa ira ni Jehova para ta mappange. Kakayà ku nga ikagi yatun ta tanakuan.” Kagian na paga: “Nu masingakku i pappasa-pasan na totolay sangawe, manono ku nga ari laman tu para niakan yatun ira nga promesa. Para gapa ta nira yatun.” Ipasingan na profesiya ira ta Biblia nga uuffunan ittam ni Jehova ta pallayyagayya tam. Pagaramman ittam natun nga ari nga magimmang. Kagian ni Leila nga taga-Hungary: “Gafu ta Isaias 11:​6-9, kakayà ku nga ikagi ta tanakuan i mapia nga dumug maski tari ira ta gitta na ari nga magginna tatun. Ammù nga puede manguli i maski sinni ta uffun ni Jehova.” Kagian gapa ni Brother Christopher nga taga-Zambia: “Neprofesiya ta Marcos 13:10 nga melayyagayya ta interu mundo i mapia nga dumug. Daka-dakal nga pribilehio nga makoffun ngà ta ketuppal natun nga profesiya.” Anni ira nga profesiya ta Biblia i mamaguyu niko nga ari magimmang nga mallayyagayya?

NATTALO YAYYA TA PANGUFFUN NI JEHOVA

11. Ngatta mawag nga mattalo si Jesus kani Jehova tapenu metulu-tuloy na i matalikarag nga pallayyagayya na? (Lucas 12:​49, 53)

¹¹ Nattalo si Jesus ta panguffun ni Jehova tapenu metulu-tuloy na i matalikarag nga pallayyagayya na. Maski gare nu magimmugug si Jesus ta pallayyagayya na, ammu na nga aru i mapporay anna kumontra ta mapia nga dumug na Pappatulan. (Bibbigan i Lucas 12:​49, 53.) Gafu ta pallayyagayya ni Jesus, mamippiga yayya nga pinurueban nga patayan na lider ira na relihion. (Juan 8:59; 10:​31, 39) Ngem nitulu-tuloy lagapa ni Jesus i mallayyagayya megafu ta ammu na nga uffunan yayya ni Jehova. Kinagi na: “I naddog niakan ay egga niakan. Arian nà vuluvuga nga pagurayan, gafu ta kuak-ku nga kanayun i makapagayaya sa.”—Juan 8:29.

12. Kunnasi nga niprepara ni Jesus i disipulos na tapenu ari ira nga magimmang mallayyagayya maski nu mapersigi ira?

¹² Niperaddam ni Jesus ta disipulos na nga makapattalo ira ta panguffun ni Jehova. Namippiga na nga nipasiguradu ta nira nga uffunan ira ni Jehova maski nu mapersigi ira. (Mat. 10:​18-20; Luc. 12:​11, 12) Ngem kinagi na gapa nga mawag tu magimmugug ira. (Mat. 10:16; Luc. 10:3) Nidog na ta nira nga ariadda nakuan ifersa i mensahe da tari ira ta manaki nga magginna. (Luc. 10:​10, 11) Kinagi na gapa nga nu mapersigi ira, mawag tu magali ira ta tanakuan nga lugar. (Mat. 10:23) Maski nu matalikarag si Jesus anna kanayun yayya nga nattalo kani Jehova, nilisian na i delikadu ira nga situasion.—Juan 11:​53, 54.

13. Ngatta makasiguradu ka nga uffunan naka ni Jehova?

¹³ Mawag tam i uffun ni Jehova tapenu ari ittam nga magimmang nga mallayyagayya maski nu mapersigi ittam. (Nep. 12:17) Ngatta gafu makasiguradu ka nga uffunan naka ni Jehova? Megafu ta pakimallo ni Jesus ta Juan kapitulo 17. Nikiddaw ni Jesus kani Jehova nga tangngallan na i disipulos na ira anna sinabbag ni Jehova yatun. Mabibbig ta libru na Kingngua nu kunnasi nga inuffunan ni Jehova i apostoles tapenu makapallayyagayya lagapa ira maski nu napersigi ira. Nikiddaw gapa ni Jesus kani Jehova nga tangngallan na danuri mangurug ta ilayyagayya na apostol ira. Tadday ka tatun. Adde sangawe, ari lagapa nagimmang si Jehova nga tabbagan i pakimallo ni Jesus. Inuffunan Na i apostol ira tagga yatutta magga uffunan Naka gapa.—Juan 17:​11, 15, 20.

14. Ngatta makasiguradu ittam nga matalikarag ittam lagapa nga makapallayyagayya maski ta mariga ira nga situasion? (Innan gapa i letratu.)

¹⁴ Megafu ta umara-aranni i panuppalan, awayya na nga mas mariga nga ilayyagayya i mapia nga dumug. Ngem nipasiguradu ni Jesus nga mala tam i uffun nga kawagattam. (Luc. 21:​12-15) Kagitta na kingngua ni Jesus anna na disipulos na, pagurayattam i totolay nga maddesision nu magginna ira nittam onu ari. Ari ittam gapa nga makitturia nira. Maski gapa nu megamma i trabahu tam ta karuan nga nasion, ari lagapa nga magiggimmang i wawwaragi tam nga ilayyagayya i mapia nga dumug megafu ta mattalo ira kani Jehova, ari tu ta baggi da. Pinasikan ni Jehova i ollu siglo ira nga Cristiano. Pasikannan na ittam gapa tapenu makua tam i uray na nga ‘melammuyag tam ta ngamin’ i mapia nga dumug. (2 Tim. 4:17) Makasiguradu ka gafu nga nu mattalo ka kani Jehova, ari ka vuluvuga magimmang ta matalikarag nga pangilayyagayyam.

NAKKOMFIANSA YAYYA NGA EGGA IRA I MAGGINNA NISA

15. Anni i mangipasingan nga kanayun nga makkomfiansa si Jesus nga egga i magginna nisa?

¹⁵ Kanayun nga makkomfiansa si Jesus nga egga i magginna nisa. Megafu tatun, magayayya yayya anna nallallappo yayya ta pallayyagayya na. Angngarigan na, turi ta 30 C.E., nasingan na nga aru i maya nga magginna ta nisa. Nigitta na ira ta mula ta koman nga puede ngana nga maapit. (Juan 4:35) Mattanga-ragun i nappasa, kinagi na ta disipulos na: “Kuruga aru i magatab.” (Mat. 9:​37, 38) Tapus turi kua, kinagi na mana: “Aru i magatag . . . Ipakimallo nu ta makakkua ta magatag tu maddog paga tu maggatag.” (Luc. 10:2) Kanayun nga makkomfiansa si Jesus nga egga i magginna ta mapia nga dumug anna magayayya yayya turi ta nagginna ira tatun.—Luc. 10:21.

16. Kunnasi nga nakoffun i ilustrasion ira ni Jesus tapenu kanayun nga matalikarag i disipulos na? (Lucas 13:​18-21) (Innan gapa i letratu.)

¹⁶ Inuffunan ni Jesus i disipulos na nga kanayun nga mattalikarag ta pallayyagayya. Nituddu na ta nira nga makasta i resulta na mensahe nga ilayyagayya da. Innattam i dua ta ilustrasion nga inusa na ta panuddu ta nira. (Bibbigan i Lucas 13:​18-21.) Niyarig ni Jesus i mensahe na Pappatulan ta baddi nga vullung na mustasa nga nabbalin tu kakkadakal nga kayu. Kayà kagian natun nga aru nga totolay i mangalawa ta mapia nga dumug anna awan tu makefugag ta kesimmu natun. Ta mekadua nga ilustrasion, niyarig gapa ni Jesus i mensahe na Pappatulan ta lebadura megafu ta melayyagayya yatun ta interu mundo anna ulian natun i totolay maski nu ari insigida nga masingan na tanakuan yatun ira nga panguli. Inuffunan gafu ni Jesus i disipulos na tapenu masingadda nga nu kanayun ira nga matalikarag, aru lapa i makasta nga resulta natun.

17. Ngatta makkomfiansa ittam nga egga lagapa i magginna ta pallayyagayya tam?

¹⁷ Mattalikarag ittam ta pallayyagayya nu masingattam i aru nga totolay nga moffunattam ta interu mundo. Kada dagun, minillion nga interesadu i magatende ta Memorial anna mappa-Bible study ta nittam. Rinivu gapa i mappa-baptize anna makavulu tam ta pallayyagayya. Ariattam ammu nu piga paga i magginna ta pallayyagayya tam. Ngem ammu tam nga maddaggun ngana nga pattaraddayan ni Jehova i dakal nga ammung nga mepaliag saw ta dakal nga ziga. (Nep. 7:​9, 14) Si Jehova i makakkua ta magatab anna masingi-singan na nga aru paga i magginna ta mapia nga dumug. Ari ittam nakuan gafu magimmang nga matalikarag nga mallayyagayya.

18. Anni i kayà tam nga masingan na totolay ta nittam?

¹⁸ Mabi laman nga mammuan nu sinni i disipulos ni Jesus megafu ta matalikarag nga pallayyagayya da. Turi ta nasingan na totolay i gutu anna talikarag na apostol ira, “nalippawa da tu kavulu ira gari ni Jesus.” (King. 4:13) Ta pallayyagayya tam gafu, masingan nakuan na totolay nga paparigattam si Jesus.