“Pilian Nu . . . nu Sinni i Passerbian Nu”

1. Anni i mawag tu kuattam tapenu mabbalin ittam tu kurug nga magayayya, anna ngatta? (Isaias 48:​17, 18)

KURUGA iddeddu ittam na Yama tam ta langi anna ikaya na tu magayayya ittam sangawe anna ta mappange. (Ecl. 3:​12, 13) Pinaratu na ittam nga egga ira i kappabbaw nga talento tam. Ngem arianna ittam niddan tu abilidad nga immagurayan lagapa i baggi tam anna maddesision nu anni i mapia anna marake. (Ecl. 8:9; Jer. 10:23) Ammu na nga tapenu mabbalin ittam tu kurug nga magayayya, mawag tu passerbiattam yayya anna tuttulattam yayya.—Bibbigan i Isaias 48:​17, 18.

2. Anni i kayà ni Satanas nga kurugattam, ngem anni i kingngua ni Jehova?

² Ikaya ni Satanas nga kurugattam nga magayayya ittam lapa maski awan si Jehova anna awayya tam lapa immagurayan i baggi tam. (Gen. 3:​4, 5) Tapenu mapakurug nga laddug si Satanas, nipamavulun ni Jehova nga immagurayan na tolay i baggi da ta unag na piga nga tiempo. Masingattam ngana sangawe nga ari navviktoria i pammaguray na tolay. Ngem nakagi ta Biblia i aru nga lallaki anna babbay nga nabbalin tu magayayya megafu ta masserbi ira kani Jehova. Tadday ta kakastan nga angngarigan ay si Jesu-Cristo. Taw nga artikulo, pabbiridattam nu ngatta pinili ni Jesus nga passerbian si Jehova. Gigiammuattam gapa nu ngatta mepangngo yayya ta paddayaw tam. Tapus pabbiridattam i karuan nga rason nu ngatta piliattam nga passerbian si Jehova.

NU NGATTA PINILI NI JESUS NGA PASSERBIAN SI JEHOVA

3. Anni i niyofer ni Satanas kani Jesus, ngem anni i pinili ni Jesus?

³ Turi ta egga si Jesus ta davvun, mawag na i mappili nu sinni i passerbian na. Ari nabbayag kabalin na bawtismo na, niyofer ni Satanas i ngamin nga pappatulan ta davvun katali na mittan laman nga paddayaw. “‘Panawam-mà, Satanas!’ kun-ni Jesus. ‘Kagian na Masanto nga Tura, “Daya-rayawam-mu i Yafu nga Dios mu, anna yaya laman i passerbiam-mu.”’” (Mat. 4:​8-10) Ngatta yatun i pinili ni Jesus? Ammuattam i karuan nga rason.

4-5. Anni i karuan nga rason nu ngatta pinili ni Jesus nga passerbian si Jehova?

⁴ I primeru nga rason nu ngatta pinili ni Jesus nga passerbian si Jehova ay megafu ta iddeddu na i Yama na. (Juan 14:31) Passerbian gapa ni Jesus si Jehova megafu ta yatun i mepangngo nga kuan na. (Juan 8:​28, 29; Nep. 4:11) Ammu na nga si Jehova i Paggafuan na inango, mapammakatalakkan yayya, anna vuka-palag. (Sal. 33:4; 36:9; Sant. 1:17) Kanayun nga kagian ni Jehova kani Jesus i kinakurug anna yayya i naggafuan na ngamin nga egga kani Jesus. (Juan 1:14) Ngem ararayyu si Satanas nu mekumpara kani Jehova. Si Satanas i rason nu ngatta malliwa anna matay i tolay. Laddug yayya, kakkam, anna makasarili. (Juan 8:44) Megafu ta ammu ni Jesus danatun, ari na vuluvuga ninono nga parigan si Satanas anna marrebelde kani Jehova.—Fil. 2:​5-8.

⁵ I tadday paga nga rason nu ngatta pinili ni Jesus nga passerbian si Jehova ay megafu ta ninono na i makasta ira nga mesimmu nu mattalupaddian yayya nga matalo. (Heb. 12:2) Ammu ni Jesus nga nu mattalupaddian yayya nga matalo, mapakasanto na i ngagan na Yama na anna mabbalin tu posible nga mapawan i liwa anna patay.

NU NGATTA MEPANGNGO SI JEHOVA TA PADDAYAW TAM

6-7. Ngatta aru i ari masserbi kani Jehova, ngem ngatta mepangngo yayya ta paddayaw tam?

⁶ Aru i ari masserbi kani Jehova megafu ta ariadda ammu i makasta ira nga kualidad na anna ariadda ammu i ngamin nga kingngua na para nira. Kunnatun i totolay nga nilayyagayyan ni apostol Pablo ta Atenas.—King. 17:​19, 20, 30, 34.

⁷ Nipakanawag ni Pablo ta maggigginna ira nisa nga i kurug nga Dios “i mangiyawa tu inango, tu pattolay anna ngamin nga ganna-gannug ta ngamin nga totolay.” Kinagi na paga: “Yaya i mangiyawa ta inango, pagguyu-guyu anna kata-katolay tam.” I Dios i Namaratu. “Tadday laman nga tolay i pinaratu na nga naggafuan na ngamin nga rasa na totolay.”—King. 17:​25, 26, 28.

8. Anni i ari vuluvuga nga kuan ni Jehova, anna kunnasi na nipasingan nga iddeddu na ittam?

⁸ Megafu ta si Jehova i Namaratu anna i Soberano ta interu uniberso, mawayya na nakuan nga fersan i totolay nga passerbian yayya. Ngem ari vuluvuga nga kuan yatun ni Jehova. Niddan na lallagu ittam tu aru nga ebidensia nga talaga kurug tu egga yayya anna iddeddu na i kataggi-tadday ta nittam. Adde ta posible, ikaya na nga aru nga totolay i mabbalin tu kofun na ta mannanayun. (1 Tim. 2:​3, 4) Yari ta sinanay ittam ni Jehova nga tudduan i tanakuan meyannung ta gakkag na ira anna ta makasta ira nga kuan na para ta totolay. (Mat. 10:​11-13; 28:​19, 20) Nangorganisa gapa yayya tu kongregasion ira tapenu medayaw tam yayya anna makalawa ittam tu uffun maggafu ta minaggiddu ira nga elder.—King. 20:28.

9. Kunnasi nga nipasingan ni Jehova i pangaya na ta ngamin nga totolay?

⁹ Nipasingan ni Jehova i aya na gukaban na pangiyawa tu makasta ira nga gannug maski turi ira ta ari mangurug nisa. Nonopan yaw: Ta rinivu ngana nga dagun, kukukuan na totolay nu anni i ammu da nga fustu anna ugal. Ngem masippo lagapa nga iyawa ni Jehova i kawagadda tapenu tulu-tuloy ira nga matolay anna magayayya. (Mat. 5:​44, 45; King. 14:​16, 17) Megafu gapa kani Jehova, awayya da i mapeggan tu kofun, maffamilia, mattrabahu, anna magayayya ta pattoleda. (Sal. 127:3; Ecl. 2:24) Manawag nga ipasingan danatun nga iddeddu na nelangitan nga Yama tam i ngamin nga totolay. (Ex. 34:6) Ammuattam ngana i karuan nga rason nu ngatta piliattam nga passerbian si Jehova anna i bendision ira nga iyawa na nittam.

NU NGATTA PILIATTAM NGA PASSERBIAN SI JEHOVA

10. (a) Anni i primeru nga rason nu ngatta passerbiattam si Jehova? (Mateo 22:37) (b) Kunnasi ka nabenefisiowan ta pappasa-pasensia ni Jehova? (Salmo 103:​13, 14)

¹⁰ Kagitta ni Jesus, i primeru nga rason nu ngatta passerbiattam si Jehova ay megafu ta iddeddu tam Yayya. (Bibbigan i Mateo 22:37.) Mas mabbalin ittam tu madukko kani Jehova nu mammuattam i kualidad na ira. Angngarigan na, nonopan i pasensia ni Jehova ta nittam. Turi ta ari yayya nga sinuttul na Israelita ira, nakimemallo yayya ta nira: “Fabor bi, likuran nu i marake nga kukukuan nu.” (Jer. 18:11) Malippawa ni Jehova nga imperfekto ittam anna gavu ittam laman. (Bibbigan i Salmo 103:​13, 14.) Yari tu nu pannonopammu tu mapia i pasensia ni Jehova nikaw anna i tanakuan paga nga kualidad na, ari ka kari mapaguyu nga passerbian yayya ta mannanayun?

11. Anni paga ira i rason nu ngatta piliattam nga passerbian i Yama tam ta langi?

¹¹ Pinili tam nga passerbian si Jehova megafu ta yatun i mepangngo nga kuattam. (Mat. 4:10) Ammu tam gapa nga aru i makasta nga mesimmu nu mattalupaddian ittam nga matalo: mapakasanto tam i ngagan ni Jehova, mapakurug tam nga laddug i Diablo, anna mapagayayya tam i futu na Yama tam. Nu piliattam gapa nga passerbian si Jehova sangawe, mapeggan ittam tu iddanama nga passerbian yayya tu mannanayun!—Juan 17:3.

12-13. Anni i magigiammu tam ta ekspiriensa ni Jane anna ni Pam?

¹² Maski nu mabbing ittam paga, mawayya tam nga ayatan si Jehova anna mas paga iddukan yayya habang dumakal ittam. Kunnatun i kingngua na mawwagi nga si Jane anna si Pam.a Si Jane ay 11 anios anna 10 anios gapa si Pam turi ta nab-Bible study ira. Maski nu ari tu interesadu i magana da, pinayagadda si Jane anna si Pam nga maki-Bible study ta Saksi ira ni Jehova basta kanayun lapa ira makimisa kavulu i familia da. Kagian ni Jane: “Nakoffun nio i nituddu na Saksi ira maggafu ta Biblia tapenu malisiakku i mad-drugs onu mabbalin tu imoral kagitta na kaklasè ira.”

¹³ Pappasa na piga dagun, parehu ira nga nappa-baptize. Turi kua, nappayunir ira habang tangngawadda i bako anna lakay nga magana da. Kunnaw i makagi ni Jane nu manono na i nappasa-pasadda: “Nagigiammù nga matalo si Jehova ta kokkofun na anna tangngallan na ira. Kurug gapa i kagian na 2 Timoteo 2:19 nga ‘ammu na Dios nu sinni i totolay na ira.’” Yari tu siguradu nga tangngallan ni Jehova danuri piliadda nga ayatan anna passerbian yayya!

14. Kunnasi tam nga medefensa i ngagan ni Jehova ta kakkagian anna kukukuattam? (Innan gapa i letratu ira.)

¹⁴ Ikaya tam nga idefensa i ngagan ni Jehova nu para-paraketadda yatun. Angngarigan na, nonopammu nga egga i kofummu nga masippo, minangngiyawa, anna minammakoma. Ngem egga i naginnam nga nakkagi tu maporay anna laddug kanu yatun nga kofummu. Anni i kuammu? Magga idefensam yayya. Kunnatun gapa i kuattam nu para-paraketan na totolay si Jehova. Idefensa tam Yayya gukaban na pakkagi tu kinakurug meyannung Nisa. (Sal. 34:1; Isa. 43:10) Mepasingattam ta kakkagian anna kukukuattam nga kayà tam nga passerbian si Jehova.

15. Anni ira i makasta nga nesimmu kani apostol Pablo turi ta inuli na i pattolena? (Filipos 3:​7, 8)

¹⁵ Sigga-paran ittam nga ulian i pattoletam tapenu mas mapasserbiattam si Jehova. Angngarigan na, pinanawan ni apostol Pablo i atannang nga posision na ta relihion na Judio ira tapenu mabbalin tu disipulo ni Jesus anna passerbian si Jehova. (Gal. 1:14) Anni i resulta natun? Magayayya i pinattolena anna napeggan yayya tu iddanama nga makipammaguray kani Jesus ta langi. Arianna vuluvuga pinabbabawyan i desision na nga passerbian si Jehova. Ari tam gapa pabbabawyan yatun.—Bibbigan i Filipos 3:​7, 8.

16. Anni i magigiammu tam ta ekspiriensa ni Julia? (Innan gapa i letratu ira.)

¹⁶ Nu i passerbi kani Jehova i fokus tam, siguradu nga bendisionan na ittam sangawe anna ta mappange. Kunnatun i ekspiriensa ni Sister Julia. Abbing pagalaman yayya, makkakkansion ngana yayya ta simbahan. Napansin na tadday nga professional opera singer i kalalaki ni Julia nga makkansion yari tu ni-train na yayya. Ari nabbayag, nabbalin tu sikat si Julia anna nap-perform yayya ta sikat ira nga lugar. Nagiskuela si Julia ta tadday nga sikat nga music school. Tapus egga i kaklase na nga nangikagi nisa meyannung ta Dios anna niyesplika na nga Jehova i ngagan na Dios. Ari nabbayag, nappa-Bible study si Julia mamiddua ta tanga-ligguan. Pappasa na tiempo, naddesision yayya nga maffokus ta passerbi kani Jehova imbes tu mabbalin tu opera singer. Dakal nga panguli yatun ta pattolena anna mariga yatun nga desision. Kinagi ni Julia: “Aru nga totolay i nakkagi ta nio nga sinayang ku laman i talentò. Ngem kayà ku usan i pattolè tapenu mapasserbian si Jehova.” Trenta dagun ngana i nappasa turi ta kingngua ni Julia yatun nga desision. Ngem kunnaw i makagi na: “Memammo i nono ku anna siguradu ngà nga iyawa saw ni Jehova i ngamin nga ikaya na futù.”—Sal. 145:16.

ITULU-TULOY I PASSERBI KANI JEHOVA

17. Megafu ta aranni ngana i panuppalan, anni nakuan i efekto natun ta ngamin?

¹⁷ Araranni ittam ngana ta panuppalan. Nitura ni apostol Pablo: “Ta pigo nga tiempo ngana laman yuri i umay ay duttal ngana nga awan tu talattan.” (Heb. 10:37) Anni nakuan i efekto natun ta ngamin? Pigo onu ababba ngana laman i nabattang nga tiempo tapenu pilian na totolay nga passerbian si Jehova. (1 Cor. 7:29) Nu pinili tam ngana gapa nga passerbian i Dios, mawag tu attammattam lapa i kapurueba ira. Ngem ammu tam nga ababba ngana laman nga tiempo yatun.

18. Anni i ikaya ni Jesus anna ni Jehova nga kuattam?

¹⁸ Ikaya ni Jesus nga ari laman tu basta mabbalin tu disipulos na i totolay ira. Ikaya na tu itulu-tuloy da i panuttul nisa. (Mat. 16:24) Yari tu nu nabayag ittam ngana nga masserbi kani Jehova, determinadu ittam nakuan nga ari magimmang. Mawag tu mappursigi ittam tapenu tulu-tuloy tam nga mapasserbian yayya. Awayya na tu mariga yatun. Ngem siguradu nga mabbalin ittam tu magayayya anna aru i bendisiottam nu passerbiattam yayya maski sangawe pagalaman!—Sal. 35:27.

19. Anni i magigiammu tam ta ekspiriensa ni Gene?

¹⁹ Aru i makatageno nga nu passerbiadda si Jehova, ariadda ngana ma-enjoy i pattoleda. Nu tadday ka nga kabataan, matageno mu kari nga aru saw i ariammu makua nu passerbiammu si Jehova? Kinagi na kabataan nga si Brother Gene: “Matageno ku nga kekkaru i mebawal ta nio megafu ta Saksi ngà ni Jehova. Masingakku nga magenjoy i kaedad ku ira. Map-party ira, egga i ka-date da, anna maggayang tu vayolente ira nga video games. Tapus sakan, mawag ku i makistudy anna mallayyagayya.” Anni i efekto natun kani Gene? “Nabbalin tu doble-kara i pattolè. Kurug tu nagenjoy ngà gapa, ngem ari ngà mabba talaga magayayya. Ninono ku i benefisio ira nu sinuttul ku nakuan i kagian na Biblia, yari tu nadesisiokku nga napafutuan nga passerbian si Jehova. Turi ta kingnguà yatun, nasingakku nga sinabbag ni Jehova i ngamin nga pakimallo ku.”

20. Anni nakuan i determinadu nga kuattam?

²⁰ Nikansion na tadday nga salmista kani Jehova: “Mapalag danuri i pilliam-mu nga maddian ta Templom nga masanto!” (Sal. 65:4) Paray nakuan tu determinadu ittam nga itulu-tuloy nga passerbian si Jehova. Kagitta na kinagi ni Josue, makagi tam gapa: “Para niakan anna ta tangabbalayakku, masserbi kami kani Jehova.”—Jos. 24:15.