Nagigiammum Ngana Kari i Mabbalin tu Kontentu?

1. Anni i kayà kagian na pabbalin tu kontentu, anna anni i ari nga kayà kagian natun?

KONTENTU ka kari? Makagi tam nga kontentu i tadday nga tolay nu magayayya yayya ta bendision ira nga niyawa ta nisa ni Jehova. Memammo gapa i nono na. Ari na kuruga kavurungan i awan ta nisa. Ngem nu kontentu ka, ari na kayà kagian tu makkakkampante ka ngana. Angngarigan na, ari gapa tu marake nu kayà na tadday nga Cristiano nga mas paga nga umaru i makua na ta passerbi kani Jehova. (Roma 12:1; 1 Tim. 3:1) Ngem maski nu ari na insigida nga malawa i pribilehio nga kakayà na, magayayya lagapa yayya megafu ta kontentu yayya.

2. Ngatta delikadu nu ari ittam nga kontentu?

² Marake i resulta na nu ari tu kontentu i tadday nga tolay. Angngarigan na, baka mappakabannag yayya ta trabahu tapenu laman magatang i gannug ira nga ari na mabba talaga mawag. I marake paga tatun, egga ira i Cristiano nga nakkoko tu kuartu anna karuan tu gannug nga kayà da. Baka ninono da, ‘Kuà nakuan talaga yaw,’ ‘Nabayag ku ngana nga kayà nga mapeggan tu kunnaw,’ onu ‘Apakku ngana labbi yaw nga kuartu ta itolì mabba saw.’ Ngem ikalussaw ni Jehova i pakkoko anna kepasiranan na yatun. (Prov. 30:9) Egga gapa danuri nattaki i nono da gafu ta ari da nga nalawa i ekspektadda nga pribilehio yatutta nagimmang ngana ira nga masserbi kani Jehova. (Gal. 6:9) Posible kari nga mesimmu yatun ta tadday nga maddayaw kani Jehova? Wan, nu ari ngana yayya kontentu ta egga nisa.

3. Anni i magigiammu tam ta Filipos 4:​11, 12?

³ Mawayya tam ngamin i mabbalin tu kontentu. Nitura ni apostol Pablo nga ‘nagigiammu na i makkontentu ta anni laman nga paddia-paddian na.’ (Bibbigan i Filipos 4:​11, 12.) Agga-fuku yayya turi ta nitura na yatun. Ngem magayayya lagapa yayya. ‘Nagigiammu na gare nga alawatan i anni laman’ megafu ta kontentu yayya. Marigatakka kari nga mabbalin tu kontentu? Mapagaram ka ta kinakkagi anna ta nappasa-pasan ni Pablo megafu ta ipasingan danatun nga awayyam gapa i mabbalin tu kontentu. Ari tam nakuan nonopan nga mabi laman i mabbalin tu kontentu. Mawag tu gigiammuattam i mabbalin tu kontentu. Pabbiridattam i tallu nga makua tam.

MABBALIN TU MINAPPABALO

4. Ngatta mabbalin ittam tu kontentu nu minappabalo ittam? (1 Tesalonica 5:18)

⁴ Nu minappabalo ittam, mabi laman gapa i mabbalin tu kontentu. (Bibbigan i 1 Tesalonica 5:18.) Angngarigan na, nu ipappabalo tam nga egga ngana nittam i mawag tam ira, ari tam ngana nga agga-nono i gannug ira nga kayà tam ngem awan ta nittam. Nu ipappabalo tam gapa i pribilehio tam ira sangawe, magga kuattam i adde na mawayya tam ta pangituppal tatun ira imbes tu agga-nono tam nu anni tamma i kuattam tapenu mala tam i tanakuan nga pribilehio nga kayà tam. Maski si Jehova, ammu na tu makaduffun ta nittam nu minappabalo ittam. Yayya nga kinagi na ta Biblia nga nu makimallo ittam, mappabalo ittam gapa. Nu nasanay ittam ngana nga mappabalo, matageno tam i ‘imammo na Dios nga ari malippawa na tolay.’ Gafu tatun, mabbalin ittam tu kontentu.—Fil. 4:​6, 7.

5. Anni nakuan i nakaduffun ta Israelita ira tapenu mabbalin tu minappabalo? (Innan gapa i letratu.)

⁵ Makagigiammu ittam ta Israelita ira nu meyannung ta pabbalin tu minappabalo. Namippiga gare ira nga narreklamo kani Jehova gafu ta ari da ngana nga makan i dati nga kana-kadda ta Ehipto. (Num. 11:​4-6) Siempre, mariga i pinattoleda ta katanapan yatutta awayya na tu mariga i mabbalin tu kontentu. Ngem anni nakuan i nakaduffun ta nira? Ninono da nakuan i kingngua ira ni Jehova para ta nira. Angngarigan na, nakattamadda tu aripan laman ira ta Ehipto anna nazziga-riga ira tari. Ngem inusa ni Jehova i mafulu nga kastigo tapenu palubbangan ira ta Ehipsio ira. Turi ta manaw ngana ira ta Ehipto, zinuffunan ira ni Jehova tapenu makala ira tu napakaru nga pira, vulawan, anna sinnun ta Ehipsio ira. (Ex. 12:​35, 36) Turi ta aranni ngana ira nga madaddag na suddalu ira ni Faraon, nammilagro si Jehova. Ginaddua na i Uzzin nga Bebay tapenu makalakag ira. Tapus turi ta egga ngana ira ta katanapan, inaggaw na ira nga pinakan tu manna. Ngatta gafu ta ari ira nga nakontentu? Ari tu megafu ta kurang i makan nga niyawa ni Jehova nira. Ari gare ira nga minappabalo.

6. Anni ira i kuattam tapenu mabbalin tu minappabalo?

⁶ Anni gafu ira i kuammu tapenu mabbalikka tu minappabalo? Ollu, nonopammu kadaggaw i makasta ira nga nesimmu niko. Puedem gapa itura i dua onu tallu tatun. (Sila. 3:​22, 23) Mekadua, ikagim i appabalo mu. Siguraduammu nga mappabalo ka ta tanakuan ta kukukuadda para ta niko. Kanayukka nakuan gapa nga mappabalo kani Jehova. (Sal. 75:1) Mekatallu, makikavulu ka kanayun tari ira ta totolay nga minappabalo. Nu minappabalo gare i kanayummu nga kavulu, magga mabbalikka gapa tu kunnari. Ngem nu kanayun ira nga marreklamo, magga mainfluwensiaddaka. (Deut. 1:​26-28; 2 Tim. 3:​1, 2, 5) Nu mannono ittam tu gannug ira nga ipappabalo tam anna ikagi tam yatun, ari tam kavurungan i gannug ira nga awan ta nittam.

7. Anni i kingngua ni Aci tapenu mabbalin yayya tu minappabalo, anna anni i efekto na yatun nisa?

⁷ Nabbalin tu ari nga kontentu si Aci nga taga-Indonesia. Istorian na: “Turi ta COVID-19 pandemic, nikumparà i sarilì ta situasion na kapangngurug ku ira. Nabbalin ngà lallagu tu ari nga kontentu.” (Gal. 6:4) Anni gafu i kingngua ni Aci? Kagian na: “Ninono ku i mapia ira nga gannug nga iyawa ni Jehova niakan ta kada aggaw. Pinannonopakku gapa i bendisiokku ira megafu ta egga ngà ta organisasion na. Tapus ikagì kani Jehova nga ipappabalo ku ngamin yatun. Megafu tatun, kontentu ngà ngana sangawe.” Nu ari ka gapa nga kontentu ta situasiommu sangawe, makasta nu parigammu i kingngua ira ni Aci.

MABBALIN TU MINAPPAKALINNO

8. Anni i nesimmu kani Baruc?

⁸ Si Baruc i sekretario na profeta nga si Jeremias. Egga i mariga nga annungan ni Baruc. Mawag nga uffunan na si Jeremias nga ikagi ta Israelita ira nu anni i mesimmu ta nira gafu ta ari da nga nagginna kani Jehova. Ngem mittan, nabbalin nga ari tu kontentu si Baruc. Imbes tu kuan na i adde na mawayya na ta ipakua ni Jehova nisa, agga-nono na lallagu i kayà na nga kuan. Megafu tatun, sinabarangngan yayya ni Jehova. Inusa na si Jeremias tapenu ikagi yaw kani Baruc: “Magala-aleg ka tu atannang nga ganna-gannug para ta baggim. Iyemmammu i magala-aleg tu kunnatun nga ganna-gannug.” (Jer. 45:​3-5) Gitta na kakkagian ni Jehova kani Baruc: “Makontentu ka ngana ta egga niko.” Nagginna si Baruc ta tabarang anna napagayayya na si Jehova.

9. Anni i magigiammu tam ta 1 Corinto 4:​6, 7? (Innan gapa i letratu ira.)

⁹ Nu karuan, baka nonopan na tadday nga Cristiano nga mepangngo laman tu meyawa ta nisa i tadday nga pribilehio. Baka gare malalaki yayya, malappo, onu aru dagun ngana nga massesserbi kani Jehova. Ngem kunnasi nu neyawa ta tanakuan i pribilehio nga kayà na? Nu mattaki i nono na megafu tatun, makasta nu pannonopan na i nitura ni apostol Pablo ta 1 Corinto 4:​6, 7. (Bibbigan.) Naggafu mabba kani Jehova i ngamin nga pribilehio anna abilidad tam. Ngem niyawa na kari yatun megafu ta espesial ittam kumpara ta tanakuan? Ari. Niyawa na yatun megafu ta iddeddu na ittam anna megafu ta inaggallallo na.—Roma 12:​3, 6; Efe. 2:​8, 9.

10. Kunnasi ittam mabbalin tu minappakalinno?

¹⁰ Mabbalin ittam nu minappakalinno nu nonopattam tu mapia i ehemplo ni Jesus anna parigattam yayya. Binaggawan ni Jesus i takki na apostoles na maski nu ammu na tu Ana yayya na Dios anna atannang i posision na. Nitura ni apostol Juan: “Ammu ni Jesus tu i Yama i nangiyawa sa ta ngamin nga pakapangngua. Ammu na tu naggafu yaya ta Dios, ay tu manoli yaya ta Dios. . . . Ay pinegafuanan na nga binaggawan i takki na disipulo ira.” (Juan 13:​3-5) Awayya nakuan nga ipabaggaw ni Jesus i takki na ta apostoles na. Ngem ta pinattolay ni Jesus ta davvun, ari na vuluvuga ninono nga mepangngo laman nakuan tu aru i kuartu na onu mas komfortable nakuan i pattolena. (Luc. 9:58) Minappakalinno si Jesus yatutta kontentu yayya. Makasta yayya nga ammarigan para ta nittam.—Juan 13:15.

11. Anni i nakaduffun kani Dennis nga mabbalin tu kontentu?

¹¹ Nikaguman ni Dennis nga taga-Netherlands nga mabbalin tu mapakalinno kagitta ni Jesus. Ngem ari tu mabi yatun. Istorian na: “Nu karuan, nu mala na tanakuan i pribilehio nga kayà ku, madismaya ngà megafu ta para ta nio, sakan nakuan i mepangngo tari. Nu mesimmu yatun, mappersonal study ngà meyannung ta kinapakalinno. Ta JW Library^® app ku gapa, egga ira i teksto meyannung ta kinapakalinno nga nipay ku ta bookmark tapenu mabi ku laman nga malegan danatun anna bibbigan uli. Nad-download ngà gapa tu palappa ira meyannung ta kinapakalinno anna kanayukku nga ginnan danatun.a Megafu tatun, nagigiammù nga ngamin nakuan nga kuakku ay megafu ta kayà ku nga medayaw si Jehova, ari tu i baggì. Egga i makua na kada tadday nittam ngem metuppal tam laman yatun megafu ta uffun ni Jehova.” Nu ari ka nga magayayya megafu ta ari mu nalawa i pribilehio nga kayà mu, ikagumammu i mabbalin tu minappakalinno. Yatun i mamakasta ta relasiommu kani Jehova anna i makaduffun tapenu mabbalikka tu kontentu.—Sant. 4:​6, 8.

AGGA-NONO MU NAKUAN I IDDANAMAM

12. Anni nga iddanama ta mappange i makaduffun tapenu mabbalin ittam tu kontentu? (Isaias 65:​21-25)

¹² Mabbalin ittam tu kontentu nu agga-nono tam i makakkasta nga iddanama tam ta mappange. Ta libru na Isaias, kinagi mismu ni Jehova ta nittam nga ammu na tu aru i pakarigatattam. Nipromesa na gapa nga alsan na saw ngamin danatun. (Bibbigan i Isaias 65:​21-25.) Maddian ittam saw ta makakkasta anna komfortable nga babalay. Aru saw i metuppal tam nga makapagayayya nga trabahu. Kuman ittam gapa saw tu masustansia anna masingngo ira nga makan. Ari ittam ngana saw vuluvuga mavurung tu egga i marake nga mesimmu ta nittam onu ta ána tam. (Isa. 32:​17, 18; Eze. 34:25) Siguradu ittam nga mesimmu saw yatun ira nga makakkasta nga nipromesa ni Jehova.

13. Ta anni ira nga situasion nga mawag tu mas agga-nono tam i iddanama tam?

¹³ Sangawe ngana i tiempo nga mawag tu mas agga-nono tam i iddanama tam. Mattolay ittam ngana gare ta “pangurianan ira nga aggaw” anna egga ira i problema tam nga ‘mamazziga’ ta nittam. (2 Tim. 3:1) Ngem kanayun ittam nga igiya ni Jehova. Pasikannan na gapa ittam anna uffunan na ittam nga makapagattam. (Sal. 145:14) Mapasikan ittam gapa na iddanama tam nu mappasa ittam mismu ta mariga ira nga situasion. Angngarigan na, baka marigi-rigatakka nga iyawa i pakawagan na familiam. Awan ngana kari tu pangulian na situasiommu? Nipromesa ni Jehova nga sonu Paraiso, iyawa na saw i mawag mu ira. Ari ka ngana saw vuluvuga makkurang. (Sal. 9:18; 72:​12-14) Baka attattammammu gapa i taki mu, egga i depresion mu, onu karuan paga nga malala nga taki. Ari ka ngana kari mammapia? Sonu Paraiso, awan ngana saw tu mattaki anna matay. (Nep. 21:​3, 4) Gafu tatun nga iddanama tam, ari ittam nga madismaya onu mattaki i nono tam ta mesissimmu nittam. Maski gapa nu marake i katratu tam, natayan ittam, onu egga paga i karuan nga problema tam, magayayya ittam lagapa. Ammu tam gare tu ‘manganannuan laman i ziga-riga’ tam anna aranni ngana nga mawawan ngamin yatun sonu Paraiso.—2 Cor. 4:​17, 18.

14. Anni i kuattam tapenu mabbalin tu kuru-kurug i iddanama tam?

¹⁴ Mabbalin ittam tu kontentu nu kuru-kurug nittam i iddanama tam. Anni gafu i kuattam tapenu mabbalin tu manawag onu kuru-kurug yatun nga iddanama? Nonopammu yaw: Mawag nga mangusa i tadday nga tolay tu eyeglass tapenu mas manawag nga masingan na i arayyu. Mabbalin gapa tu mas manawag i iddanama tam nu imajinattam nga egga ittam ngana ta Paraiso. Angngarigan na, nu mavurung ittam megafu ta mariga i magaleg tu kuartu sangawe, makasta nu imajinattam i pattoletam sonu ari tam ngana kawagan i kuartu anna awan ngana tu pobre. Nu dismayadu ka gapa megafu ta ari mu paga nala i pribilehio nga kayà mu, nonopammu sonu perfekto ka ngana anna rinivu dagukka ngana nga nakapasserbi kani Jehova. Magga ari mu ngana saw probleman danatun. (1 Tim. 6:19) Ngem nu mittan, ta karu na problema tam sangawe, makattamattam ngana i makasta ira nga nipromesa ni Jehova. Ngem nu kanayuttam nga agga-nono i iddanama tam ta Paraiso, yatun i ollu nga manono tam maski nu kunnasi karu na problema tam.

15. Anni i magigiammum ta kinagi ira ni Christa?

¹⁵ Manono mu paga si Dennis ta nappasa ira nga parapo? Kunnaw labbi gapa i istorian na atawa na nga si Christa: “Manisinu ngà nga makkafi ta taki ku. Ari ngà makalakag yatutta maw-wheelchair ngà. Agga-idda ngà laman gapa kanayun. Mataka-taki kanayun i baggì. Kinagi na doktor ku nga awan ngana tu pag-asà nga mammapia. Ngem nanono ku, ‘Nakagi na laman yari gafu ta ari na nga ammu i promesa ira ni Jehova.’ Ngem sakan, ammù yatun yayya nga memammo ngà. Kurug tu marigi-rigatan ngà sangawe. Ngem sonu Paraiso, magayayya ngana saw i pattolè!”

“DANURI MANGIKAKUA SA AY EGGA NIRA NGAMIN I MAWAG DA”

16. Ngatta makagi ni Patul David nga danuri mangikakua kani Jehova ay “egga nira ngamin i mawag da”?

¹⁶ Maski nu kontentu ittam, makkaproblema tam lagapa. Kunnatun si Patul David. Tallu onu maturu paga ta ána na i natay. Napara-parake yayya, natraydor, anna nigata-gato da yayya nga patayan. Ngem maski nu nappasan ni David danatun, kontentu lagapa yayya. Kinagi na meyannung kani Jehova: “Danuri mangikakua sa ay egga nira ngamin i mawag da.” (Sal. 34:​9, 10) Ngatta makagi yatun ni David? Ammu na gare nga maski nu ari nga ilisi ni Jehova i totolena ta problema ira, magga kanayun na nga iyawa i mawag da. (Sal. 145:16) Kunnatun gapa i kuan ni Jehova para nittam. Maski gafu nu anni i problema tam, awayya tam lagapa i mabbalin tu kontentu.

17. Ngatta kayà mu i mabbalin tu kontentu?

¹⁷ Kayà ni Jehova nga mabbalikka tu kontentu. (Sal. 131:​1, 2) Ikagumammu gafu nga gigiammuan nu kunnasi i mabbalin tu kontentu. Nu mabbalikka tu minappabalo, minappakalinno, anna agga-nono mu i iddanamam, mabbalikka tu kontentu anna kunnaw gapa i makagim kani Jehova: ‘Mapia ngamin i regalum niakan.’—Sal. 16:​5, 6.