Anni i Pagimamma na Saksi ira ni Jehova ta Diborsio?
Tuttulammi i pagimamma na Biblia ta pagatawa anna diborsio. Niyunnug na Dios i pagatawa nga permanente nga pavvulu na lalaki anna babay. Ipamavulu laman na Biblia i diborsio nu nakangngua i tadday tu seksual nga imoralidad.—Mateo 19:5, 6, 9.
Uffunan kari na Saksi ira i magatawa nu egga i problema ta pagatawa da?
Wan, gukaban na tumunug ira:
Publikasion ira. Mabibbig taw ira i makoffun ta magatawa tapenu mabbalin tu matuyag i pavvulu da, maski nu kagitta na mariga ngana yatun nga ayusan. Angngarigan na, innan i artikulo ira nga “Manatiling Tapat sa Inyong Sumpaan Bilang Mag-asawa,” “Kung Paano Magpapatawad,” anna “Kung Paano Maibabalik ang Tiwala.”
Study ira. Gigiammuammi ta study ira ta kongregasion, asembli, anna kombensiommi i praktikal ira nga tabarang na Biblia ta pagatawa.
Elder ira. Mangiyawa tu uffun i elder ira ta kongregasion ta magatawa ira, mangikagi ira tu teksto ta Biblia kagitta na Efeso 5:22-25.
Mawag kari nga apruban na elder ira ta kongregasion i paddiborsio na tadday nga Saksi?
Ari. Maski paga nu mappoffun i magatawa ta elder ira meyannung ta problema ta pagatawa da, awan tu autoridad na elder ira nga maddesision para nira. (Galacia 6:5) Ngem nu pilian na tadday nga idiborsio i atawa na nga ari nebase ta Biblia, awan tu lallagurena nga mangatawa onu makitawa uli.—1 Timoteo 3:1, 5, 12.
Anni i pagimamma na Saksi ira ta paggungay?
Ipagaram na Biblia nga ari nakuan maggungay i magatawa maski nu meparubang ira ta mariga ira nga problema. (1 Corinto 7:10-16) Awayya na nga masolba i problema ira gukaban na kanayun nga pakimallo, pangiyaplika ta prinsipio ira na Biblia, anna pangipasingan tu aya.—1 Corinto 13:4-8; Galacia 5:22.
Ngem awayya na nga desisionan na tadday nga Cristiano nga igungay i atawa na ta kuruga mariga ira nga situasion kagitta na:
Sadya nga ari passuporta.—1 Timoteo 5:8.
Grabe nga pisikal nga pangabuso.—Salmo 11:5, NW.
Peligro nga madaral i espiritualidad. Angngarigan na, fuersan na atawa i Saksi nga atawa na nga ari tuttulan i bilin na Dios, anna awayya na nga i pakigungay laman i makua na tapenu ‘kurugan na i Dios anne ta tolay.’—Kingngua 5:29.