Pakkiavu na Mabbibbig Ira
Ngatta madduma i rekord ni Mateo anna ni Lucas meyannung ta kabbing ni Jesus?
I rekord ni Mateo meyannung ta nesimmu ira ta keyana anna kabbing ni Jesus ay gittana tanakuan ta nirekord ni Lucas megafu ta nadduruma i anggulo na nattura ira ta Evanghelio.
Nakafokus i rekord ni Mateo ta nesimmu ira kani Jose. Niturana i reaksion ni Jose turi ta nammuanna nga mavussi si Maria, i tatagenona nu sitaw niyesplika na anghel i situasion, anna i pangakseptana tatun nga eksplanasion. (Mat. 1:19-25) Nitura paga ni Mateo i meyannung ta tatageno ni Jose turi ta nikagi na anghel nga umay ira ta Ehipto, i pabbiahena kavulu i familiana, i tatagenona nu sitaw kinagi na anghel nga manoli ira ta Israel, i panolida, anna i desisionna nga maddian i familiana ta Nazaret. (Mat. 2:13, 14, 19-23) Ta gafu ira nga kapitulo na Evanghelio ni Mateo, nami-8 nga nakagi i ngagan ni Jose, ngem nami-6 laman kani Maria.
Ngem ta rekord gapa ni Lucas, mas nakafokus yaya kani Maria. Nelagum tatun i pabbisita ni anghel Gabriel kani Maria, i pabbisitana ta parientesna nga si Elizabet, anna i paddayona kani Jehova. (Luc. 1:26-56) Nitura paga ni Lucas i kinagi ni Simon kani Maria meyannung ta mappange ira nga ziga ni Jesus. Maski turi ta nabbisita i familiana ta templo sa 12 anios si Jesus, nitura ni Lucas i uvovug ira ni Maria, ari tu i uvovug ni Jose. Nitura paga ni Lucas nga talaga nafektan si Maria taw ira nga nesimmu. (Luc. 2:19, 34, 35, 48, 51) Ta ollu nga dua nga kapitulo na Evanghelio ni Lucas, nami-12 nekagi i ngagan ni Maria, ngem nami-3 laman kani Jose. Mas gafu nga niyesplika ni Mateo i pakavurungan anna kingngua ira ni Jose, tapus mas aru gapa nga detalye i niyawa ni Lucas meyannung ta papel anna ekspiriensa ira ni Maria.
Madduma gapa i lista na ginafuan nga nirekord na dua nga nattura ta Evanghelio. Manawag nga sinuttul ni Mateo i ginafuan ni Jose anna nipasinganna nga megafu ta siminaddag nga yama ni Jesus si Jose, si Jesus i legal nga mangirensia ta kinapatul ni David. Ngatta? Megafu ta si Jose ay gaka ni Patul David gukaban na linia na ana ni David nga si Solomon. (Mat. 1:6, 16) Ngem, manawag nga sinuttul gapa ni Lucas i ginafuan ni Maria anna nipasinganna nga si Jesus i gagangay nga mangirensia. “Neyana yaya nga naggafu ta ginaka ni David” ta literal onu pisikal nga pagimamma. (Roma 1:3) Ngatta? Megafu ta ginaka ni Patul David si Maria gukaban na linia na ana ni David nga si Natan. (Luc. 3:31) Ngem ngatta ari nilista ni Lucas ta ginafuan ni Maria nga ana yaya ni Heli nga yamana? Megafu ta gagangay nga matuttul i ginafuan ira ta linia na lallaki. Yatutta turi ta nilista ni Lucas si Jose anna kinagina nga ana yaya ni Heli, manawag nga kebalinan natun nga manugang ni Heli si Jose.—Luc. 3:23.
Manawag nga ipasingan na lista na ginafuan da Mateo anni Lucas nga si Jesus i neprofesiya nga Mesias. Megafu ta ammu na magaru nga si Jesus ay ginaka ni David, ari nga melimag yatun maski na Fariseo anna Saduceo ira. Ta maddaggun, parte lagapa na fundasion na pangurug tam anna testimonia ta kinasiguradu na promesa ira na Dios i lista na ginafuan nga nirekord da Mateo anni Lucas.