Sinni i Dios?

1. Ngatta mawag tu dayawattam i Dios?

I kurug nga Dios i Namaratu ta ngamin nga ganna-gannug. Awan tu namegafuananna anna awan tu pagultimuanna. (Salmo 90:2) Yayya i Paggafuan na makakkasta nga balita nga mabibbig ta Biblia. (1 Timoteo 1:11) Mawag tu dayawattam i Dios megafu ta niyawana inango tam.​—Bibbigammu i Apocalipsis 4:11.

2. Anni nga klase tu persona i Dios?

Awan vuluvuga tu tolay nga nakasingan ta Dios gafu ta Espiritu yayya. Ikaya na kagian tu mas atannang nga klase tu persona i Dios kumpara ta ngamin nga pinaratu ta davvun. (Juan 1:18; 4:24) Ngem masingattam i personalidad na Dios ta ganna-gannug nga pinaratuna. Angngariganna, ipasingan na nadduruma nga prutas anna lappaw i ayâ anna sirib na. Ipasingan gapa na kalawa na uniberso i pakapangngua na.​—Bibbigammu i Roma 1:20.

Mas aru paga i madidiamu tam nu anni nga klase tu persona i Dios nu kanayun nga bibbirattam i Biblia. Angngariganna, ituddu na nittam nu anni ikaya na Dios anna nu anni ikalussaw na. Ituddu paga na Biblia nu kunnasi na tratuan i totolay anna nu anni pagimamma na ta kukukuadda.​—Bibbigammu i Salmo 103:7-10.

3. Egga kari ngagan na Dios?

Kinagi ni Jesus: “Ama mi nga egga ta langi, marayaw paray i ngagam mu.” (Mateo 6:9) Maski nu aru titulu na Dios, tattadday lamang i ngagan na. Ta kada lengguahe, nadduruma i kevuyà na. Ta Ibanag mevuyà yaw tu “Jehova.” Ngem i karuan nga totolay ivuyàda yaw tu “Yahweh.”​—Bibbigammu i Salmo 83:18.

Ta aru nga Biblia, inalzadda i ngagan na Dios anna tinallianadda tu titulu nga Yafu onu Dios. Ngem nguri ta netura i Biblia, mabibbig tu mami-7,000 i ngagan na Dios. Nipakannammu ni Jesus i ngagan na Dios nguri ta tinudduanna i totolay meyannung ta Dios.​—Bibbigammu i Juan 17:26.

Girawan i video nga Egga Kari Ngagan na Dios?

4. Iddeddukan na kari ittam ni Jehova?

Napakaru ziga-riga sangawe. Ikaya na kari kagian tu ari na ittam iddeddukan ni Jehova? Kagian na karuan tu tentan ittam na Dios yari tu mazziga-riga ittam. Ngem ari tu fustu yatun.​—Bibbigammu i Santiago 1:13.

Iniddan na Dios i tolay tu dignidad nga mappili nu anni ikaya na. Mabbalabalo ittam ta Dios tu egga i pakawayya tam nga mappili nga masserbi nisa. (Josue 24:15) Ngem pinili na aru i magangngua tu kinarakay ta kasittolay da yari tu aru mazziga-riga. Matakitan si Jehova makasingan ta kawan na hustisia.​—Bibbigammu Genesis 6:5, 6.

Iddeddukan na ittam ni Jehova. Ikayana tu mattolay ittam tu sigga-magayayya. Aranni na ngana alzan i ziga-riga anna danuri magangngua tu marakay. Ngem ipamavulun na Dios i temporario nga ziga-riga. Ngatta tamma? Madidiamu tam i makasta nga rason na ta Leksion 8.​—Bibbigammu i 2 Pedro 2:9; 3:7, 13.

5. Kunnasi ittam mapeggan tu mas meggo nga relasion ta Dios?

Imbitan na ittam na Dios tu umaranni nisa gukaban na pakimallo. Interesadu yayya ta kada tadday nittam. (Salmo 65:2; 145:18) Minammakoma yayya. Ammuna tu ikaya tam angnguan uray na, maski nu makaliwa ittam nu mittan. Maski paga nu im2perfekto tam, awayya tam i mapeggan tu meggo nga relasion ta Dios.​—Bibbigammu i Salmo 103:12-14; Santiago 4:8.

Mawag tu mas iddukattam si Jehova anne ta sinni laman gafu ta niyawana inango tam. (Marcos 12:30) Mientras iddeddukammu i Dios, mapeggan ka tu mas meggo nga relasion nisa. Posible yatun nu itulu-tuluymu kannammuan si Jehova anna kuammu i dorob na.​—Bibbigammu i 1 Timoteo 2:4; 1 Juan 5:3.