Ngatta Ipamavulun na Dios i Kinarakay Anna Ziga-riga?

1. Kunnasi namegafu i kinarakay?

Namegafu i kinarakay ta davvun tagga ta kinagi ni Satanas i ollu nga kinaladdug onu kinateko. Ari tu pinaratu na Dios si Satanas nga marakay gafu ta perfekto nga anghel tagga yayya, ngem “arianna sinaddaggan i kinakurug.” (Juan 8:44) Mapassil anna ikayana i medaya-rayaw nga para laman nakuan ta Dios. Nalladdug si Satanas ta ollu nga babay nga si Eva, anna kinumbinsina tu tuttulanna yayya anne ta Dios. Nagginna si Adan kani Eva. Navvunga tu ziga-riga anna ipapatay i desision ni Adan.​—Bibbigammu i Genesis 3:1-6, 19.

Nguri ta tinenta ni Satanas si Eva nga arianna tuppalan i Dios, nangigafu si Satanas tu rebellion mekontra ta soberania na Dios onu posision na Dios tu Katannangan nga mammaguray. Nakitadday i kakaruan na totolay kani Satanas ta ariadda pangalawa ta Dios tu Mammaguray. Yari tu nabbalin si Satanas tu “mammaguray ta mundo.”​—Bibbigammu i Juan 14:30; 1 Juan 5:19.

2. Egga kari defekto na pinaratu na Dios?

Perfekto i ngamin tu pinaratu na Dios. I totolay anna anghel ira nga pinaratu na Dios ay egga pakawayyada nga tuppalan yayya. (Deuteronomio 32:4, 5) Pinaratu ittam na Dios tu egga i pakawayya nga mappili nu anni ikaya tam nga kuan​—i mapia onu marakay. Megafu tatun, egga tiansa tam nga mangipasingan tu ayâ ta Dios.​—Bibbigammu i Santiago 1:13-15; 1 Juan 5:3.

3. Ngatta ipamavulun na Dios i kinarakay adde sangawe?

Ta temporario tu tiempu, ipamavulun ni Jehova i rebellion mekontra ta soberania na. Ngatta? Tapenu mapakurug nga awan tu mapia nga ivunga ta totolay na pammaguray nga nesina nisa. (Eclesiastes 7:29; 8:9) Mananawag nga masingang i ebidensia ta pappasa na 6,000 dagun tu historia na totolay. Ari tu nalza na totolay i gerra, kinarakay, kawan ira na hustisia anna taki.​—Bibbigammu i Jeremias 10:23; Roma 9:17.

Ari tu kagitta na pammaguray na totolay, mabenefisiowan danuri mangalawa ta pammaguray na Dios. (Isaias 48:17, 18) Aranni ngana nga alzan ni Jehova i ngamin nga gobiernu na totolay. Danuri lamang i maya tu pammagurayan na Dios i maddian ta davvun.​—Isaias 11:9.​—Bibbigammu i Daniel 2:44.

Girawan i video nga Ngatta Ipamavulun na Dios i Pazziga-riga?

4. Anni tu tiansa i egga nittam megafu ta pappase-pasensia na Dios?

Kinagi ni Satanas tu massesserbi i totolay kani Jehova ngem awan tu fuffustu nga pangayâda Nisa. Ikaya mu kari nga pakurugan tu kinaladdug i kinagi ni Satanas? Makuam ya! Megafu ta pappase-pasensia na Dios egga i tiansa tam nga mappili​—pammaguray na Dios onu pammaguray na totolay. I klase na pattolay tam ipasinganna nu sinni i pinili tam.​—Bibbigammu i Job 1:8-12; Proverbio 27:11.

5. Kunnasi tam mepasingan tu i Dios i piliattam tu Mammaguray?

Mepasingattam tu i Dios i piliattam tu Mammaguray nu daya-rayawattam yayya ta kinakurug nebase ta Uvovug na, i Biblia. (Juan 4:23) Mepasingan tu ariattam alawatan si Satanas nga mammaguray nu ariattam makiparte ta pulitika anna gerra, gitta na kingngua ni Jesus.​—Bibbigammu i Juan 17:14.

Usu-usan ni Satanas i pakapangnguana tapenu umaru i imoral anna marake nga anangngua. Nu arayyuattam yatung, awayya na tu kantiawan onu ikalussaw ittam na karuan nga kofun anna parientes tam. (1 Pedro 4:3, 4) Mawag gavu tu mappili ittam. Makikavulu ittam kari ta totolay nga mangaya ta Dios? Tuppalattam kari i masirib anna minangngaya nga dorob na? Nu kuattam danatun, mapakurugtam tu laddug si Satanas nguri ta kinagina nga awan vuluvuga tu masserbi ta Dios oras tu marigatan ngana.​—Bibbigammu i 1 Corinto 6:9, 10; 15:33.

Megafu ta ayâ na Dios ta totolay, siguradu tu alzanna i kinarakay anna ziga-riga. Danuri i nappili tu mas makasta i pammaguray na Dios i makapagayayya nga mattolay tu mannanayun ta davvun.​—Bibbigammu i Juan 3:16.