Umay Ka Labbi nga Makippakoma ta Wagim​—Kunnasi?

Nonopammu nga maddiakka ta Galilea ta tiempo ni Jesus. Minay ka ta Jerusalem tapenu iselebra i Fiesta na Ammingan ira. Napannu i siudad tu kapangngurug mu nga arayyu i naggafuadda. Kayà mu i mangitavvung kani Jehova. Vulu-vulu mu i tadday nga kanzing anna pinegafuanammu i umay ta templo nga naddalakka ta kalye ira na siudad nga napannu tu tolay. Ta paddattal mu, napannu gapa i templo tu totolay nga mangitavvung tu sakrifisio. Tapus sikaw ngana i mangiyawa tu kanzing ta papari. Tatun nga oras, neraddammammu nga egga taki na nono na wagim nikaw, nga awayyana tu tadday yaya ta aru nga totolay onu egga yaya ta siudad. Niyesplika ni Jesus nu anni i kuammu. (Bibbigan i Mateo 5:24.) Kavulu i wagim nga natakitan, kunnasinu dua mepoppollu i imammo gittana nibilin ni Jesus? Ta kada kahon ta gukag, i-check i fustu nga tabbag.

MAWAG MU NGA . . .

• makiyuvovug laman ta wagim nu para nikaw ay fustu i rasonna nga mattaki i nonona

• itunung i appana-panono na wagim nu matageno mu nga sensitibo laman yaya onu egga gapa i liwana

• magginna tu mapia ta wagim nu kagianna i matagenona, anna maski nu ariammu kuruga malippawa, makkiddaw tu pamakoma ta taki nga natagenona onu ta ariammu inekspekta nga resulta na kingnguam ira

MAWAG NA WAGIM NGA . . .

• makiyegu ta wawwaragi ta kongregasion gukaban na pakkagi nira nu kunnasim yaya natakitan

• mapporay nikaw, taggi-taddayan i detalye na liwa mu, anna ipaamin nikaw i liwa

• appresian i kinapakalinno anna gutu mu turi ta minaranni ka sa anna napafutuan nga pakomannaka

▸ Maski ariattam ngana mangitavvung tu ayam ta paddayaw tam ta maddaggun, anni i ituttuddu ni Jesus meyannung ta koneksion na imammo ta wagi tam anna ta paddayaw nga akseptan na Dios?