Anni i Egga ta Website mi?

Nekagi ni Jesus ta tagatuttulna ira: “Pannawagannu i tulunu ta arubang na totolay tapenu masingadda i mapia nga trabahunu anna dayawadda i Yamanu nga egga ta langi-langi.” (Mateo 5:16) Tapenu metuppal yatun, usammi tu mapia i moderno nga teknolohia pati i internet. I jw.org i ofisial nga website na Saksi ni Jehova. Egga ira informasion taw meyannung ta pangurug anna aktibidadmi. Anni ira ne-feature taw?

Tabbag na Biblia ta importante ira nga pakkiavu. Masingammu i tabbag ta karuan ira nga kuruga importante nga pakkiavu na totolay. Angngariganna, i tract nga Mawawan Kari Noka i Ziga-riga? anna i Maginnolay Kari Noka i Natay Ira? ay malegan online ta maturu nga 600 lengguahe. Masingammu gapa tatun i New World Translation ta maturu nga 130 lengguahe anna karuan paga nga makoffun ta paggigiammu tu Biblia kagitta na brosiur nga Makakkasta nga Balita Naggafu ta Dios! Kunne na gapa ta pinakabagu nga isyu na Passifusifutan anna Awake! Aru taw nga publikasion i puedem mabibbig onu maginna online anna puede me-download ta format nga MP3, PDF, onu EPUB. Puedem paga i-print i karuan nga pahina tapenu me-share mu ta interesadu nga totolay ta mismu nga lengguaheda! Aru gapa i video nga publikasion ta nadduruma nga sign language. Puede ka gapa mangi-download tu audio drama na pabbibbig tu Biblia, drama ta Biblia anna makakkasta ira nga musika.

Fustu nga informasion meyannung ta Saksi ni Jehova. Masingan gapa ta web site i bagu ira nga balita anna video clip meyannung ta interu mundo nga trabahumi, mesissimmu ira nga mangafekto ta Saksi ni Jehova anna ta kuammi nga pangoffun. Egga gapa informasion meyannung ta mappange nga kombension anna detalye nu kunnasi makontak i panga nga ofisinami.

Gukabanna ira yaw, mapannawagmi i tulu na kinakurug ta karaywan nga lugar ta davvun. Mabenefisiowan ngaming nga totolay ta kada kontinente kasali i Antartica. Ipakpakimallomi nga “tulu-tuloy i mabi nga kewara na uvovug ni Jehova” ta interu nga davvun, tapenu madayarayaw i Dios.​—2 Tesalonica 3:1.

• Kunnasi nga makoffun i jw.org ta mas aru nga totolay tapenu magigiammuda i kinakurug ta Biblia?

• Anni i ikayamu nga innan ta website mi?