Kontran i Diablo Anna i Pangilogòna

1, 2. Sinni ira magayayà ta tiempo na bawtismo?

NU NABAYAG ka ngana nga massesserbi kani Jehova, aru ngana i naginnam nga palappa ta bawtismo ta asembli anna kombension ira. Ngem maski nu kanayukka nga magatende tatun nga okasion, siguradu nga magayayà ka lagapa nga makasingan ta naka-itubang ira ta arubang nga manaddag tape ipresenta i baggida para ta bawtismo. Tatun nga akto, masingan i ayayà na nagatende ira tapus entusiastiko nga mappoppò. Baka makatangì ka paga nga makasingan ta bagu mangana nga grupo na naddesision nga masserbi kani Jehova. Kuruga makapagayayà i kunnatun ira nga tiempo!

² Piga beses tam nga makasingan tu bawtismo ta tanga-ragun, ngem egga pribilehio na anghel ira nga makagiraw tatun ta mas aru nga beses. Manonòmu kari i “pagayaya ta langi” ta pakasingadda ta rinivu nga totolay nga meyamung ta organisasion na Dios kada ligguan? (Lucas 15:7, 10) Siguradu nga magayayà i anghel ira nga makasingan tatun!​—Hageo 2:7.

I DIABLO AY “MALLELEVU NGA KAGITTA NA MANGNGANA-NGANANGNGAR NGA LEON”

3. Ngatta “mallelevu nga kagitta na mangngana-nganangngar nga leon” si Satanas anna anni i kakáyana nga kuan?

³ Ngem egga gapa marakay ira nga espiritu nga grabe i lussodda nga makasingan ta mappabawtiso ira. Maggazzi si Satanas anna i demoniona ira nu masingadda i rinivu nga tinallikuradda i marake nga pattolay ta mundo. Kurug yatun ta ipara-parayag ni Satanas nga awan tu tolay nga masserbi kani Jehova megafu ta ayâda sa anna awan tu mattalupaddian nga matalò sa nu mazziga-riga. (Bibbigammu i Job 2:4, 5.) Kada egga maddedika kani Jehova, mapakurug nga laddug si Satanas. Gittana rinivu nga lappag yatun kani Satanas kada dagun. Yari tu “mallelevu [yaya] nga kagitta na mangngana-nganangngar nga leon nga magaleg ta kanan na”! (1 Pedro 5:8) Kakàya na yaw nga “leon” nga daralan i espiritualidad tam tapenu madaral i relasiottam ta Dios.​—Salmo 7:1, 2; 2 Timoteo 3:12.

4, 5. (a) Anni i dua nga gannug nga kingngua ni Jehova tape malimitan i influwensia ni Satanas? (b) Anni i masiguradu na Cristiano ira?

⁴ Maski nu kananassing i kalabattam, ari tam nakuan nga maganassing. Ngatta? Megafu ta egga dua nga importante nga gannug nga kingngua ni Jehova tape malimitan i influwensiana yatun nga “mangngana-nganangngar nga leon.” Anni yatun? Ollu, neprofesiya ni Jehova nga egga “magaru” nga kurug nga Cristiano i mapaliag ta mappange nga “nepallo nga kadara-darum.” (Nepakannammu 7:9, 14) Ari vuluvuga nga maffalliu i profesiya na Dios. Yari tu ammu ni Satanas nga arianna mawayya nga interamente nga daralan i totolay na Dios.

⁵ Masingattam i mekadua ta kinakurug nga nekagi na tadday ta matalò ira nga aripan na Dios. Nekagi ni profeta Azarias kani Patul Asa: “Mattalupaddian nikamu si Jehova adde ta mattalupaddiakkamu sa.” (2 Cronica 15:2; bibbigammu i 1 Corinto 10:13.) Napakaru nga ehemplo ta Biblia i mangipasingan tu ari vuluvuga nadaral ni Satanas i aripan ira na Dios nga nattalupaddian sa. (Hebreo 11:4-40) Ta kaggawattam, nu mattalupaddian nga madukkò ta Dios i tadday nga Cristiano, mawayyana nga kontran anna affutan paga lagu i Demonio. Kakuruganna, nepasiguradu na Uvovug na Dios: “Tubangan nu i Demonio, ay arayyuan nakamu.”​—Santiago 4:7.

“ARUBANGAT-TAM . . . I MARAKAY IRA NGA ESPIRITU”

6. Kunnasi i pangatake ni Satanas ta kada-tadday nga Cristiano?

⁶ Ari mangaffù si Satanas taw nga gerra, ngem awayyana nga maffù i kada-tadday nittam nu ariattam alerto. Ammu ni Satanas nga mawayyana ittam nga daralan nu mapakafina i relasiottam kani Jehova. Kunnasina nga kuan yatun? Gukaban na grabe nga pangatake, personal nga pangatake, anna pangilogò. Gigiammuattam yaw ira nga silu ni Satanas.

7. Ngatta grabe i pangatake ni Satanas ta totolay na Dios?

⁷ Grabe nga pangatake. Nekagi ni apostol Juan: “I mundo ay egga ta pammaguray na Demonio.” (1 Juan 5:19) Masserbi yatun nga tabarang ta ngamin nga Cristiano. Megafu ta nasilu ngana ni Satanas i ngamin nga marake nga totolay, mappuppursigi yaya nga mangatake ta ari na paga nga nasiluan​—i totolay ni Jehova. (Mikas 4:1; Juan 15:19; Nepakannammu 12:12, 17) Nepallò i porayna megafu ta ammuna nga baddi ngana laman i tiempona. Yari tu pinaggrabena paga i pangatakena. Mepa-arubattam ngana ta pangultimuan anna pinaka-grabe nga pangatakena tape madaral i relasiottam ta Dios.

8. Anni i kayà kagian ni Pablo turi ta nekagina nga “arubangat-tam” i marakay ira nga espiritu?

⁸ Personal nga pakiyarubang. Sinabarangngan ni apostol Pablo i kapangngurugna ira: “Ari tu totolay i arubangat-tam . . . danaw i marakay ira nga espiritu nga egga ta neravvunan ira nga pammaguray.” (Efeso 6:12) Ngatta nekagi ni Pablo nga egga “arubangat-tam”? Megafu ta egga mismu ta arubattam i kalabattam. Yari tu kayà kagian ni Pablo nga egga personal nga pakillaban na kada tadday nittam ta marakay ira nga espiritu. Aru onu maski baddi laman i mangurug ta marakay nga espiritu ta nasiottam, ariattam kattamman nga turi ta naddedika tam kani Jehova, kasali tam ngana tatun nga pakiyarubang. Namegafu ngana i simboliko nga pakillaban na Cristiano. Yari tu ari nga pappabbawan nga namittallu nga pinagaram ni Pablo i Cristiano ira ta Efeso tu ‘itaddaggadda nga tubangan i Demonio’!​—Efeso 6:11, 13, 14.

9. (a) Ngatta mangiyusa si Satanas anna i demonio ira tu nadduruma nga silu? (b) Ngatta kayà ni Satanas nga dapingan i nonò tam, anna kunnasi tam nga labanan yatun? (Innammu i kahon nga “Magimmugug ta Pangilogo ni Satanas!”) (c) Anni paga nga makelogò nga panenta ni Satanas i ammuattam?

⁹ Makelogò ira nga panenta. Pinagaram ni Pablo i Cristiano ira nga tumaddag tu mapia tape malabanadda i “pangilogo” ira ni Satanas. (Efeso 6:11) Ari laman tu tattadday yatun. Nadduruma i silu nga usan na marakay ira nga espiritu tape tentan i totolay. Ngatta nadduruma i usadda? Megafu ta egga ira Cristiano nga nalabanadda i tadday nga panenta ni Satanas ngem nasiluadda gabbalaman ta tanakuan nga panentana. Yari tu obo-obserban ni Satanas anna na demonio ira i kukukuan na kada tadday nittam tape mannammuadda i pakkafiattam. Tapus approbetsadda yatun tape makkafi ittam ta espiritual. Mapia ngana laman ta nekagi nittam na Biblia i usu-usan ira na Diablo nga silu. (2 Corinto 2:11) Ta nakkapollu nga kapitulo, nagigiammu tam i siluna ira kagitta na materialismo, marake nga pakikavulu, anna seksual nga immoralidad. Ammuattam i tadday paga nga makelogò nga panenta ni Satanas​—i espiritismo.

PAKIPARTE TA ESPIRITISMO​—PATTRAIDOR TA DIOS

10. (a) Anni i espiritismo? (b) Anni i pagimamma ni Jehova ta espiritismo, anna kunnasi tam imammatan yatun?

¹⁰ Nu makiparte i tadday nga tolay ta espiritismo, onu demonismo, direkta yaya nga makikomunika ta marakay ira nga espiritu. Kasali ta espiritismo i pallavvun, passalamangka, pattamay, anna i pakiyuvovug ta natay. Ammu tam nga “kala-kalussaw” ni Jehova i espiritismo. (Deuteronomio 18:10-12; Nepakannammu 21:8) Megafu ta mawag tu ‘pallikurattam i marakay,’ ariattam vuluvuga makikomunika ta marakay ira nga espiritu nga fuersa. (Roma 12:9) Daka-dakal nga pattraidor yatun kani Jehova nga Yama tam!

11. Ngatta daka-dakal nga viktoria kani Satanas nu makumbinsina ittam nga makiparte ta espiritismo? Iyilustram.

¹¹ Ngem megafu ta dakal ngana nga pattraidor kani Jehova i maski aggi-mittan nga pakiparte ta espiritismo, determinado si Satanas nga influwensian i karuan nittam tape makiparte tatun. Kada egga mainfluwensianna nga makiparte ta demonismo, dakal nga viktoria yatun sa. Ngatta? Kunnaw i nekegittanna: Nu makumbinsi i tadday nga suddalu nga panawan i grupona tapus mevulu ta kalaban ira, magayayà i kumandante na kalaban. Awayyana nga ipara-parayagna paga yaw nga suddalu bilang tropeyona tapenu insultuan i dati nga komandante na suddalu. Kunnatun gapa nu makiparte ta espiritismo i tadday nga Cristiano. Gittana pinanawanna si Jehova tapus nakikavulu kani Satanas. Nonopammu i ayayà ni Satanas nga mangilelevu tatun nga traidor bilang tropeyona ta pakigerra! Kayà tam kari nga mavviktoria si Satanas? Siyempre ari! Ari ittam nga traidor.

PAKKIAVU IRA NGA MAMADDUDA

12. Anni nga silu i usan ni Satanas tapenu ulian i appana-panonò tam meyannung ta espiritismo?

¹² Nu kala-kalussotam i espiritismo, ari pulus nga mangaffù si Satanas nga mangiyusa tatun kontra nittam. Yari tu nanonòna nga ulian i appana-panonò tam. Kunnasi? Kuanna i ngamin nga mawayyana tape nonopattam nga “mapia i marake anna marake i mapia.” (Isaias 5:20) Tape makua yatun, usan na uli i efektibo nga siluna​—mamalattuag yaya tu pakkiavu ira nga mamadduda.

13. Kunnasi nga usan ni Satanas i pakkiavu ira nga mamadduda?

¹³ Sifutammu nu kunnasi nga neyusa ni Satanas yatun nga silu ta nappasa. Ta Eden, niyavùna kani Eva: “Talaga kari nga kinagi na Dios nga ariannu kuman tu vunga na kada kayu ta laguerta?” Ta tiempo ni Job, durante nga egga miting na anghel ira ta langi, pinalattuag ni Satanas yaw nga pakkiavu: “Maganassing kari ta Dios si Job nga awan tu rason?” Turi gapa ta gafu na ministerio ni Jesus ta davvun, sinentana i Cristo gukaban na pakkagi tu: “Nu kurug tu sikaw i Ana na Dios, pabbalinam-mu tu pan danoye nga batu.” Nonopammu​—ta nesimmu kani Jesus, awan tu anassing nga inuyaw ni Satanas i mismu ira nga kinagi ni Jehova annam nga ligguan ngana i nappasa: “Yaw i ideddedukak-ku nga Ana ku nga kuruga makapagayaya niakan”!​—Genesis 3:1; Job 1:9; Mateo 3:17; 4:3.

14. (a) Kunnasi nga neyusa ni Satanas i siluna tape makapalattuag tu padduda meyannung ta espiritismo? (b) Anni i gigiammuattam taw?

¹⁴ Ta kaggawattam, usu-usan gapa na Diablo i parehu laman nga silu ta appursigina nga mamalattuag tu padduda meyannung ta kinadake na espiritismo. Kaddaraddam ta egga ira nasiluanna nga mangurug tatun. Namegafu ira nga madduda nu talaga kari nga marake i karuan nga klase na espiritismo. (2 Corinto 11:3) Kunnasi tam ira nga moffunan tape moli i pagimammàda? Kunnasi tam masiguradu nga ari ittam mainfluwensian na silu ni Satanas? Tape matabbag yatun, ikonsidera tam i dua ta aspeto na pattolay nga kinivuan ni Satanas tu espiritismo​—dibersion anna pakiyoru.

PANGAPPROBETSA TA PAKKARAGA ANNA PAKAWAGATTAM

15. (a) Anni i pagimamma na aru nga totolay ta nasa-nasion ta Europe anna North America meyannung ta espiritismo? (b) Kunnasi nga nainfluwensian i karuan nga Cristiano ta pagimamma na aru nga totolay ta espiritismo?

¹⁵ Normal ngana laman i okultismo, tamay, anna i tanakuan paga nga klase na espiritismo ta kaggawattam, mas lalu ngana ta nasa-nasion ta Europe anna North America. Ta pelikula, libru, programa ta TV, anna ta gayam ira ta kompiuter, napabbalin nga makapagayayà anna awan tu peligrona yatun nga maka-demonio nga annangngua. Popular i karuan nga pelikula anna libru meyannung ta okultismo. Manawag nga nawayya na demonio ira nga influwensian i totolay tape nonopadda nga ari tu delikadu i okultismo. Nainfluwensian kari gapa taw i Cristiano ira? Wan, egga karuan. Kunnasi? Angngariganna, kabalin nga giniraw na tadday nga Cristiano i meyannung ta okultismo, kinagina, “Naggiraw ngà laman, ngem ariakku gamma parigan yatun.” Ngatta delikadu yatun nga parrason?

16. Ngatta delikadu i pappili tu dibersion nga meyannung ta okultismo?

¹⁶ Maski nu nakkaduma i paggiraw ta mismu nga pagangngua tu espiritismo, arianna kayà kagian nga awan ngana tu peligro na paggiraw tatun. Ngatta? Nonopammu yaw: kagian na Biblia nga ari nga mabibbig ni Satanas anna na demoniona ira i ginnonopattam.a Yatutta nakagi nga obo-obserbadda i kukukuattam, maski i piliattam nga dibersion tape mammuan nu anni i nononopan anna nu anni i pakkafiattam. Nu kakayà na Cristiano i maggiraw onu mabbibbig tu meyannung ta espiritismo, salamangka, natallungan tu demonio, onu karuan paga nga kagittana yaw, idi-iddanna tu ideya i demonio ira. Gittana ikakkagina nira nu anni i pakkafianna! Nu kunnatun, mas nga pasikannan paga na demonio ira i pangatakeda tatun nga Cristiano, approbetsadda i pakkafianna adde ta maffù ta laban. Kakuruganna, i karuan ta nakka-interes ira ta espiritismo megafu ta dibersion nga meyannung ta okultismo ay aktual gabbalaman nga nakiparte ta espiritismo.​—Bibbigammu i Galacia 6:7.

17. Anni nga makelogò nga panenta i awayya usan ni Satanas tape masiluan i Cristiano nga matakì?

¹⁷ Ari laman nga i pakkaraga tam nga maddibersion i samantalan ni Satanas, samantalanna gapa i pakawagattam nga makiyoru. Kunnasi? Baka mawanan ngana tu iddanama i Cristiano nga moruan. (Marcos 5:25, 26) Yatun i mangiyawà tu tiansa kani Satanas anna ta demoniona ira. Awayyana tu tentan na demonio ira i matakì nga Cristiano nga mapporu ta espiritista. (Isaias 1:13) Nu nakua yatun na demonio sa, makkafi i relasionna ta Dios. Kunnasi?

18. Anni nga panguru i pammanakitan na tadday nga Cristiano, anna ngatta?

¹⁸ Sinabarangngan ni Jehova i Israelita ira nga nattalò ta salamangka: “Nu sonnatannu i pala-palagnu, itagù i matà. Maski nu kanayukkamu nga makimallò, ariakku magginna.” (Isaias 1:15) Siempre, kanayun nga kayà tam nga lillitan i maski anni nga makagurun ta pakimallò tam anna i rason tape ari ittam uffunan ni Jehova​—mas lalu ngana ta tiempo nga matakì tam. (Salmo 41:3) Yatutta nu egga kivuna nga espiritismo i proseso na panguru, pammanakitan yatun na Cristiano.b (Mateo 6:13) Nu kunnatun, siguradu nga kanayun ittam nga uffunan ni Jehova.​—Innammu i kahon nga “Espiritismo Kari Talaga Yatun?”

NU ARU I ISTORIA MEYANNUNG TA DEMONIO

19. (a) Anni i ninonò na karuan nga totolay meyannung ta pakapangngua ni Satanas? (b) Anni ira nga istoria i mawag nga lillitan na Cristiano?

¹⁹ Maski nu tagibaddikan na nasa-nasion ta Europe anna North America i peligro na pakawayya ni Satanas, ari tu kunnatun i pagimamma na karuan nga nasion. Aru i nelloko tatun ni Satanas tape mangurug ira nga mas makapangngua yaya anne ta ninonòda. Mattolay i karuan, kuman, mattrabahu, anna makkaturug nga sigga-anassing ta marakay ira nga espiritu. Aru i istoria meyannung ta pakapangngua na demonio ira. Maruddu nga pakastan na totolay i pangistoriada tatun, yatutta kakayà gapa na maggigginna. Iyistoria tam kari gapa yatun? Ari. Lillitan yatun na kurug nga aripan na Dios megafu ta dua nga importante nga rason.

20. Kunnasi nga mepala-palakag na tadday i propaganda ni Satanas?

²⁰ Ollu, aktual nga manguffun kani Satanas i tadday nga mangis-istoria meyannung ta demonio ira. Kunnasi? Pakurugan na Biblia nga egga pakawayya ni Satanas, ngem sinabarangnganna gapa ittam nga usu-usanna i “senial anna milagro ira nga makelogo.” (2 Tesalonica 2:9, 10) Megafu ta si Satanas i kalalakian nga minangngilogò, ammuna nga influwensian i ginnonopan danuri mayà ta espiritismo. Ammuna gapa nu kunnasina ira melloko tape kurugadda i falso. Awayyana tu talaga nga kurugan na kunnatun nga totolay nga egga aktual nga nasingan anna naginnada, tapus iyistoriada nga gittana kuru-kurug. Sonu kua, maama-amungan i istoria megafu ta metotoli nga mekagi. Nu iyistoria na Cristiano i kunnatun, kukukuanna ngana i uray ni Satanas​—“i yama na ngamin nga siri.” Ipala-palakagna i propaganda ni Satanas.​—Juan 8:44; 2 Timoteo 2:16.

21. Anni nakuan i iyistoria tam?

²¹ Mekadua, maski nu aktual nga egga ekspiriensa na tadday nga Cristiano meyannung ta marakay nga espiritu, arianna nakuan iyis-istoria yatun ta kapangngurugna ira. Ngatta? Nepagaram nittam: “Imammatat-tam si Jesus ta yaya i nangigafu anna nangompleto ta angngurug tam.” (Hebreo 12:2) Wan, mawag tu nakafokus tam kani Cristo, ari nga kani Satanas. Turi ta egga ta davvun si Jesus, ari nga nangistoria ta disipulosna tu meyannung ta marakay ira nga espiritu, maski nu aru nakuan i mekagina nga makua ni Satanas. Naffokus si Jesus ta mensahe na Pappatulan. Yari tu, tape maparigattam si Jesus anna i apostolesna, iyistoria tam nakuan i “makapabbaw ira nga kingngua na Dios.”​—Kingngua 2:11; Lucas 8:1; Roma 1:11, 12.

22. Anni i awayya tam kuan tape tulu-tuloy i “pagayaya ta langi”?

²² Tadday laman i espiritismo ta nadduruma nga usu-usan ni Satanas nga makelogò nga panenta tape madaral i relasiottam kani Jehova. Ngem, nu ikalussotam i marakay anna kanayun nga kuattam i mapia, awan tu tiansa ni Satanas nga pakafian i determinasiottam nga pammanakitan i ngamin nga klase na espiritismo. (Bibbigammu i Efeso 4:27.) Nonopammu i “pagayaya ta langi” nu ariattam magimmang nga itaddaggan nga tubangan i pangilogò ni Satanas adde ta mawawan ngana yaya!​—Lucas 15:7; Efeso 6:11.