LEKSION 10

Modulasion

Proverbio 8:4, 7

SUMARIO: Padduruman i sikan na ngaral, katannang na ngaral, anna kalistu na paguvovug tapenu meyadde i ideya tu manawag anna makatukkal ta futu.

Padduruman i sikan na ngaral. Isikammu i ngaral mu tapenu mapalawan i pinakapunto ira anna mapaguyu i maggigginna. Kunnatun gapa i kuammu nu mabbibbig tu teksto ira na Biblia meyannung ta pangastigo. Ikafim i ngaral mu tapenu mala i interes na maggigginna onu tapenu ipatageno i assing onu pavvuru-vurung.

Ariammu kanayun nga isikan i ngaral mu tapenu ari matageno na maggigginna nga mapopporyan ira. Lillitan i sossobra nga kadramatiko tapenu ari nga medirekta nikaw i atension.
Padduruman i katannang na ngaral. Nu mepangngo, iyatannang i ngaral mu tapenu masingan i entusiasmo, onu mepalippawa i kadakal onu distansia. Iyalinno i ngaral mu tapenu ipatageno i daddam onu pavvuru-vurung.
Padduruman i kalistu na paguvovug. Paspasammu tu baddi i maguvovug tapenu magganas i maggigginna. Ibayag mu gapa i maguvovug nu makkagi tu importante ira nga punto.

Tapenu ari nga makadda-kaddag i maggigginna, ariammu gavva-gavva nga paspasan i maguvovug. Ariammu maguvovug tu sobra kapaspasna nga ari ngana mantindian i kakkagiammu.