LEKSION 02
Makakkasta i Iddanama nga Nipromesa na Biblia
Mamroblema i aru nga totolay yari tu maraddam anna mavuru-vurung ira. Nesimmu kari ngana nikaw yatun? Posible nga marigatakka megafu ta taki onu natayakka tu iddeddukan. Yatutta baka manono mu, ‘Makkasta kari paga i pattolay?’ Makapabannay i tabbag tatun na Biblia.
1. Anni i makakkasta nga nipromesa na Biblia?
Kagian na Biblia nu ngatta ta napakaru i problema taw ta mundo. Ikagina gapa i makakkasta nga balita nga aranni ngana nga mapawan i ngamin nga problema. Mangiyawa nikaw i promesa ira na Biblia tu makakkasta nga “mappange anna iddanama.” (Bibbigan i Jeremias 29:11, 12.) Makoffun yatun ira nga promesa tapenu marubang tam i problema tam ira, mabbalin tu positibo, anna magayayya tu mannanayun.
2. Anni i makakkasta nga mappange nga nipromesa na Biblia?
Kagian na Biblia nga ta mappange “awan ngana noka tu matay, onu maraddam, onu tumangi-tangi, onu magattam ta taki.” (Bibbigan i Nepakannammu 21:4.) Mapawan ngana noka i problema ira nga mamazziga ta totolay kagitta na kinapobre, kawan na hustisia, taka-taki, anna patay. Nipromesa na Biblia nga magayayya ittam nga mattolay tu mannanayun ta Paraiso nga davvun.
3. Ngatta mangurug ka nga mesimmu i promesa ira na Biblia?
Aru i makakkasta nga iddanaman na totolay ngem ari ira siguradu nu mesimmu yatun. Ari tu kunnatun i promesa ira na Biblia. Makapattalo ittam ta promesana ira nu ‘gigiammuattam ta kagaggaw i Masanto nga Tura.’ (Kingngua 17:11) Ta paggigiammum tu Biblia, mapakurug mu nga mesimmu i promesana ira ta mappange.
GIGIAMMUAN I ARU PAGA
Ammuan i karuan ira nga promesa na Biblia ta mappange, anna nu kunnasi nga makoffun ta totolay sangawe i iddanama nga nipromesa na Biblia.
4. Nipromesa na Biblia nga mattolay ittam tu mannanayun anna awan ngana tu problema
Innammu i promesa ira na Biblia nga egga ta gukag. Anni taw i kakayà mu ngana nga matuppal? Ngatta?
Bibbigan i teksto ira nga egga ta gukag, anna paguvovugan yaw ira nga pakkiavu:
Anni i meyuffun nikaw na teksto ira? Anni gapa i meyuffunna ta familiam anna ta kokkofummu?
Nonopammu nga mattolay ka ta mundo nga
AWAN NGANA TU . . . |
MAGAYAYYA ITTAM NGAMIN TA . . . |
|---|---|
|
|
|
|
|
|
|
|
|
|
5. Mapakasta na promesa ira na Biblia i pattoletam
Aru i madismaya onu makaporay paga lagu megafu ta problema ira nga masingi-singadda. Makillaban gapa i karuan tapenu makkasta i situasion. Innan nu kunnasi nga makoffun ta totolay sangawe i promesa ira na Biblia. Girawan i VIDEO, anna paguvovugan yaw ira nga pakkiavu.
Ta video, anni i pakavurungan ni Rafika?
Maski nu ari nga nasolba i problemana, kunnasi yayya noffunan na Biblia?
Nu mattalo ittam ta promesa ira na Biblia, magayayya ittam lagapa maski nu madismaya anna egga ira i problema tam. Bibbigan i Proverbio 17:22 anna Roma 12:12, anna paguvovugan yaw ira nga pakkiavu:
Mapakasta kari na promesa ira na Biblia i pattolem sangawe? Ngatta?
I KAGIAN NA KARUAN: “Imposible nga mesimmu i promesa ira na Biblia ta mappange.”
Ngatta importante nga ammuammu i ebidensia ira nga matuppal i promesa ira na Biblia?
ANNI I NAGIGIAMMUM?
Aru i makapagayayya ira nga promesa na Biblia. Mangiyawa nittam yaw tu iddanama anna mapakastana i pattoletam sangawe.
Review
Ngatta kawagan na totolay i iddanama?
Anni i promesa ira na Biblia ta mappange?
Kunnasi nga makoffun nikaw sangawe i iddanama ta mappange?
I AWAYYAM PAGA KUAN
Ammuan nu kunnasi nga makoffun i iddanama.
Ammuan nu kunnasi nakoffun i promesa ira na Biblia ta egga ira i grabe nga takida.
“Makoffun Kari i Biblia nu Egga i Grabe nga Taki Mu?” (Artikulo ta website)
Ta paggirom ta music video, nonopammu nga magayayya ka anna na familiam nga mattolay ta Paraiso.
Bibbigan nu kunnasi nga nanguli i tadday nga aktibista turi ta nammuanna i promesa ira ta Biblia.
“Ariakku Ngana nga Nononopan nga Mawag Ku Ulian i Situasion” (Passifusifutan, Hulio 1, 2013)