Egga Paga Kari i Pangirespeto na Totolay ta Tanakuan?

NU NGATTA IMPORTANTE I PANGIRESPETO TA TANAKUAN

Makoffun i pangirespeto ta tanakuan tapenu ari nga mas marrake i tadday nga situasion.

Kagian na Biblia: “Mawawan i poray nu malumamo i tabbag, ngem mamappatu ta ulu i mataki nga uvovug.” (Proverbio 15:1) Mas marrake i situasion nu ari nga marespeto i paguvovug anna annangngua tam, maruddu nga marake i resulta natun.
Kinagi ni Jesus: “Ta nu anni i mayan na futu, yatun lagapa i mallawan ta simu.” (Mateo 12:34, NW) Nu ari ittam marespeto ta tanakuan, ipasingan naw nu anni i kurug nga matageno tam ta totolay ira nga neruma i lahi, tribu, nasionalidad, onu estado na pattolay da nittam.

Ta nikanni laman nga survey ta maturu 32,000 nga totolay ta 28 nga nasion, 65 porsiento i nakkagi nga grabe ngana i kawan na respeto na totolay ta kataggi-tadday.

I MAKUAM

Maski nu egga ka ta eskuela onu trabahu, irespetom i ngamin nga totolay—maski nu ariammu ira nga kaparehu. Innan ira i gannug nga awayya na nga papparehuan nu. Makoffun yatun tapenu ariammu ira nga kritikan onu husgan.

“Ari kamu nga mamanunnu tapenu arian nakamu nga panunnutan na Dios.”—Mateo 7:1.

Nu kunnasi i kayà mu nga pattratu na tanakuan nikaw, kunnatun gapa i pattratum nira. Nu ari ka mangireruma anna masippo ka ta tanakuan, kunnatun gapa i pattratu da nikaw.

“Kuan nu ta ikattolay nu i ikaya nu nga kuad-da nikamu.”—Lucas 6:31.

Mabbalin tu minammakoma. Mattalo nga arianna ka kayà nga takitan natun nga tolay yari tu ariammu ipafutu i mataki ira nga kinakkagi onu kingngua na.

“I pakalippawa na tolay i mangifugag nisa nga mapporay insigida, anna makasta ta nisa nga palampasan i kamali.”—Proverbio 19:11.

Ta unag na Kingdom Hall na Saksi ira ni Jehova nige na study ta kongregasion. Masippo nga kibbidan anna alawatadda i totolay ira nga nadduruma i dagun anna lahi da.

I KUAMMI IRA

Ipasingan na Saksi ira ni Jehova i respeto ta tanakuan, ta lugar nga paddianadda anna pattrabahuadda.

Mangiyofer kami tu libre nga paggigiammu tu Biblia ta ngamin nga totolay, ngem ariammi ipilit ta tanakuan i kurugan onu opinion mi. Ikagumammi nga iyaplika i tabarang na Biblia gukaban na pangikagi mi tu “malumamo anna sigga-pammakakua” ta mensahe mi.—1 Pedro 3:15, 16; 2 Timoteo 2:24.

Ari kami mangireruma anna alawatammi ta study mi ta kongregasion i totolay nga ikaya da nga gigiammuan i tuddu na Biblia maski nu anni paga i lahi da. Ikagumammi nga alawatan anna ‘ikakua i ngamin nga totolay.’—1 Pedro 2:17.

Irespeto mi i autoridad na gobiernu ta lugar nga paddianammi. (Roma 13:1) Tuttulammi i dob anna mappaga kami tu vugi. Anna maski nu neutral kami ta pulitika, irespeto mi i katunungan na tanakuan nga maddesision nu meyannung ta pulitika.