Uklɔ O Lɔhi Nōó Tōō Je Mlanyi Ŋ

Ó tɔɔtɛ ku oduudu ācɛ o gba Ujehofa ɛ̄gbā kéē ya odee lɛ Ujehofa nōó gáā tōō je mlanyi gboogboo ŋ. Ɔwɛ ekponu nɛ ɛnɛ mla adā nōo yihɔtu ayipɛ ɔlɛ uwa i gē je mlanyi ɔdā nɛ ayipɛ a ya lɛ uwa ŋ ma, Ujehofa i gē je mlanyi uklɔ nɛ alɔ gē ya mla ihɔtu nɛ alɔ gē mafu ohigbu iye nu a ŋ. (Umát. 6:20; Uhíb. 6:10) Ɔkwɔɔkwɛyi, ijeeyi nɛ alɔ jé, ɔdā nɛ alɔ ya gla mla āhɔ̄ ku ɔnyɔɔnyɛ wɛ ɛyɛɛyɛyi. Naana a, ɔdaŋ ku alɔ ya ofiyɛ duu ku alɔ ipu ɛ̄gbā o gba Ujehofa, alɔ géē gweeye. (Ugal. 6:4; Ukól. 3:23) Ihayi alɛwa nōo gā yɛ a, ayinɛ alɔ nɔnyilɔ mla ayinɛ alɔ nɔnya alɛwa yuklɔ Ubɛtɛlu ɛ. A je iyi uwɔ tɛɛcɛ ku a yuklɔ ku Ubɛtɛlu gla a? Ɔdaŋ kóō tɔɔtɛ lɛ uwɔ ŋ, a ta ɔcɛ ɔhá ɔtu kwu ɔtu kóō ya lɛ a gla a. Amāŋ ō ta ɔcɛ nōo yɔ i yuklɔ Ubɛtɛlu ɔtu kwu ɔtu kóō gɔbu yɔ i gba Ujehofa ɛ̄gbā ipu aya ɛnɛnɛ nyā gla a?

AA MÁ UVIDIO NYĀ NŌO KAHINII: YA OTUTU LƐYIKWU Ō YUKLƆ UBƐTƐLU, CƐƐ, AA LƐ AƆKA NŌO YƆ ƐHAAJƐ A CILA:

• Ɔdi cika ō ya ku alɔ dɔka ō yuklɔ Ubɛtɛlu a?

• Ɔdi nɛ ācɛ ka lɛyikwu ɔhā nōo gē wa ŋma o yuklɔ Ubɛtɛlu a?

• Auce o ya nyá cɛgbá lɛ ɔcɛ nōo dɔka ō nyɔ i yuklɔ Ubɛtɛlu a?

• Ɛgɛnyá nɛ a lɔfu miyɛ ɛga o nyɔ i yuklɔ Ubɛtɛlu a?