Ɛgɛ Nɛ Alɔ Géē Bi Utract Le Gbɔɔ Ɔka O Ka A

Ŋma Ɔya Aflɛyi ku 2018, iyɔbu ku Ɔkpá Ku Ōjila ku Oyeeyi mla Uklɔ Ku Alɔ gē mafu ocabɔ ku ɔka o ka. É ta alɔ ɔtu kwu ɔtu o ya ɛɛ ku alɔ yuklɔ mla ɔka o ka mla ācɛ, ikɔkɔ ō je ɔkpá lɛ uwa anca a. O ya ɛɛ ku ayinɛ kéē yuklɔ mla opiyabɔ nyā, é cɛgbá otabɔ. Ɔɔma ya nɛ auvidio ku ocabɔ ku ɔka o ka a, mafu ɛgɛ nɛ alɔ géē gbɔɔ ɔka o ka ŋma lɛ ō bi Ubáyíbu foofunu le yuklɔ á. Ɛnyā wɛ ku alɔ i gáā je ɔkpá lɛ ācɛ, eko nɛ alɔ yɔ i tɔɔna ŋma ɔlɛ gā ɔlɛ ŋ nɛɛ? Ehee! Ocabɔ mafu, utract ku alɔ wɛ ɛnɛɛnɛ ɔwɛ éyi, nɛ alɔ lɔfu bi le gbɔɔ ɔka o ka mla ācɛ. Alɔ lɔfu yɛce aukɔ́ nōo yɔ ɛhaajɛ a eko duuma nɛ alɔ dɔka ō bi autract le yuklɔ:

1. Alɔ lɔfu da aɔka nōo yɔ iyɔbu ku utract a.

2. Mafu ohi nɛ Ubáyíbu ta nōo yɔ ɛhico ku upeji ɔmpa a. Ɔdaŋ ku eko yɔ kpɔ, lɛ ɛlā ōhī nōo yɔ ipu utract a jé, ku aa klla kɔka lɛyikwu ɔ.

3. Kwu utract a u lɛ ondu ɔlɛ a, ku a ta ɔ ɔtu kwu ɔtu kóō lɛ ohile a jé eko nɛ ó má ɛga.

4. Gbɔbu ɛɛ ku a nyɛɛ, lɛ aya nōo kahinii: “Gbɛla Tu Ɔka Nyā” a mafu lɛ ɔ, cɛɛ ku aa lɛ eko miya taajɛ o wa i cila ɔka a ŋma ipu Ubáyíbu.

Eko nɛ a le cigbihi nyɔ, lɛ ohi ku ɔka a cila, cɛɛ, a lɛ ɔka ɔhá da ɔ nɛ a géē cila, eko ɔhá nɛ a le cigbihi. A lɔfu je ɔka a ŋma uwɛbsayiti ku alɔ amāŋ ɔkpá nōo yɔ igbihi ku utract a. Eko nɛ ɛnɛɛnɛ ɛga yɔ, gbɔɔ ɛlā o ka mla ubrociɔ néē hi ka Ɔkoolɔhi Nōo Ŋma Ɛgiyi Ɔwɔico! a, amāŋ ɔkpá ɔhá ŋma ipu Aɔdā Nɛ Alɔ Gē Bi Le Ya Oklɔcɛ Mla Ācɛ a.