Ɛgɛ Nɛ Ɔba Mla Ɔnyā Géē Ya Ku Obatɔha Ku Uwa Kóō Lɔfu Iye Tōōtɔ̄ɔ̄ A

Ebraham mla Usara wɛ ɛnɛɛnɛ ocabɔ ku ɔba mla ɔnyā, nōo ya ihɔtu ku iyi uwa klla lɛ ojilima ce iyi uwa. (Ohút. 12:11-13; 1 Upít. 3:6) Naana a, é lɛ unwalu ipu obatɔha ku uwa, é klla lɔtu ku ojama ɛyɛɛyɛyi ipu oyeeyi ku uwa duu. Ɔdi nɛ ɔba mla ɔnyā lɔfu nwu, ŋma lɛ ō leyi yɛ ocabɔ ku Ebraham mla Usara a?

Aa bēē kɔka mla iyi aa. Bēē ta ohi ɔwɛ ogbonɛnɛ, eko nɛ ɔba uwɔ amāŋ ɔnyā uwɔ, lɛ ɛlā ka ipu icɔɔnu amāŋ ipu iwɔtu. (Ohút. 16:5, 6) Aa bēē miya eko taajɛ o yɔ mla iyi aa. Ipu ɛlā ō ka amāŋ uce ō ya ku uwɔ, bēē cabɔ lɛ ɔba uwɔ amāŋ ɔnyā uwɔ ku a yihɔtu ku nu nɛɛnɛhi. Ɔdā nōo cɛgbá fiyɛ duu a, wɛ ō je Ujehofa ta ipu obatɔha ku aa ŋma lɛ ō yɔ i ya oklɔcɛ, ɔkɔ o gba, mla ɛ̄gbā ō gba Ujehofa tɔha. (Ɔ̄cok. 4:12) Ujehofa lɛ ōmiya ku obatɔha ku ɔba mla ɔnyā kwaajɛ a. Ɔdaŋ ku obatɔha a kē lɔfu nɛɛnɛhi, ó géē bi ojilima gē lɛ ɔ.

AA LƐ UVIDIO NŌO KAHINII, ƐGƐ NƐ OBATƆHA KU ƆBA MLA ƆNYĀ GÉĒ LƆFU IYE FIYƐ A MÁ, CƐƐ AA LƐ AƆKA NŌO BA ƐHAAJƐ NYĀ CILA:

• Ipu uvidio nyā, ɔdi wɛ aɔdā nōo mafu ku Ushaan mla Ukiara yɔ i je kɔ gwo iyi uwa ta a?

• Ɔdiya nɛ ɛlā ɔkwɛyi o ka ŋma ɔtu cɛgbá nɛhi ipu obatɔha ku ɔba mla ɔnyā a?

• Ɛgɛnyá nɛ ocabɔ ku Ebraham mla Usara ta Ushaan mla Ukiara abɔ a?

• Ɔdi nɛ Ushaan mla Ukiara miya ō gbɔɔ ō ya, ku obatɔha ku uwa kóō lɔfu iye tōōtɔ̄ɔ̄ a?

• Ɔdiya ɛɛ nɛ ɔba mla ɔnyā i cika ō kpeyice ku obatɔha ku uwa i gáā lɛ unwalu duuma ŋ ma?