A Yɔ i Lɛ Itene Ŋma Examining the Scriptures Daily?

Ō jé aɛlā nōo yɔ ipu ɔkpá néē hi ka Examining the Scriptures Daily a, wɛ ipu ɛ̄gbā ō gba ku uwɔ ɛ̄cī doodu? Ɔdaŋ kóō lɛ a ŋ, a lɔfu ya kóō wɛ ipu aɔdā nɛ a gē ya ɛ̄cī doodu a? Ācɛ alɛwa gē jé ɔ eko oflɔci. Cɛɛ, é kē gbɛla tu ɔ ipu ɔdā ō ya ku uwa ku ɛ̄cī ɔɔma. (Ujós 1:8; Aíjē 119:97) Ɛgɛnyá nɛ a géē lɛ itene fiyɛ ŋma ō jé aɛga ku Ubáyíbu néē je aɛlā ku Examining the Scriptures Daily a ŋma a? Lɛ aɔgba ku Ubáyíbu nōo yɔ kwu ɛ̄nɛ̄ é bi le yuklɔ a jé, o ya ku a jé ɔdā néē yɔ i kɛla lɛyikwu ɔ a. Gbɛla lɛyikwu ɔka ku Ubáyíbu éyi, nōo wɛ ocabɔ mafu ku ukɔ́ nɛ aɛlā a yɔ i kɛla lɛyikwu ɔ a. Cɛɛ, ku a bi aukɔ́ a le yuklɔ ipu oyeeyi ku uwɔ. Eko nɛ ɛlā ku Ɔwɔico lɛ abɔ kwu aɔdā nɛ a miya o ya a, ó géē bi uwɔ jé ɔwɛ klla géē tiile gā uwɔ nɛhi.—Aíjē 119:105.

Ācɛ nōo gē yuklɔ Ubɛtɛlu ipu oduudu ɛcɛ a, gē klɔcɛ ku Examining the Scriptures Daily eko néē gē lé ɔdole ku ɔcɔɔci a. Aihayi nōo gā yɛ nōó gboji ɛ ŋ ma, é lɛ aɔka o ka nyā gwotu ipu JW Broadcasting^® ipu PROGRAMS AND EVENTS. Eko nyá nɛ a jila aɛlā néē gwotu nyā kwɛji a? Á jé ŋ, ōhī ku uwa lɛ o ya mla ɔdā nɛ a cɛgbá yiili a. Ocabɔ mafu, ɛgɛnyá nɛ ɔka ku Ulɔtu lɔfu lɛ abɔ kwu aɔdā nɛ a miya o ya a?

AA LƐ UVIDIO NYĀ MÁ NŌO KAHINII, AA KÓŌ HII PIYƆTU ƐCƐ Ŋ (1 UJƆ́N. 2:15), CƐƐ, AA LƐ OHI KU AƆKA NŌO YƆ ƐHAAJƐ A CILA:

• Ukɔ́ ku Ubáyíbu nyá wɛ ɔdā okpɔcii nōo cɛ lɛ Ɛ̄gbā Ō Gba Ku Ɔcɔɔci nyā tɔɔtɛ a?

• Ɛgɛnyá nɛ ɔka ku Ulɔtu, mafu ɔdā ō kwu iyē nōo lɔfu ya alɔ, ɔdaŋ ku alɔ piyɔtu ku ɛcɛ nyā, amāŋ ɔdā nōo yɔ anu a?—Ohút. 13:12; 14:12; 19:3, 12, 13, 24-26

• Ɛgɛnyá nɛ alɔ géē mafu ku alɔ yihɔtu ku Ujehofa ka ó wɛ ɛcɛ nyā, amāŋ ɔdā nōo yɔ anu ŋ má?